Ka Nonanona, Volume III, Number 6, 8 August 1843 — Page 25

KA NONANONA.
"E ka mea hiamoe, e holo oe i ka nonanona, e nana i kona aoao a e hoonaauao iho." SOLOMONA.
Buke 3. HONOLULU, OAHU, AUGATE 8, 1843. Pepa 6.

MOKU MANUWA.

                I ka la 26 o Iulai, ku mai la ka moku Manuwa Beritania, Dublin kona inoa. O Rear Adimarala. Thomas ke Alii. He alii oia maluna o na moku Manuwa Beritania a pau ma ka moana Pakifika nei.
                I ka loaa ana ia ia ka palapala no Capt. Haku Geoge Paulet, ma ka moku Vitoria, a lohe pono oia, ua kau ka hae o Beritania ma keia pae aina, holo koke mai no ia e hoihoi mai ke aupuni ia Kamehameha III. Nani kona aloha mai i ke alii, ea! a me na kanaka no hoi.

KA HOIHOI ANA O KE AUPUNI.

                Nani ka pomaikai o Kamehameha III, a me kona poe kanaka i keia wa, no ka mea, ua hemo ka popilikia, ua hoihoiia mai ka ea o ka aina. Ua pau ka noho pio ana malalo o ko Vitoria poe kanaka.
                O Kamehameha III. oia ke alii nui o Hawaii nei i keia manawa. Ua kuuia ko Beritania hae ilalo i keia la, Iulai 31. 1843, a ua kau hou ia ko Hawaii nei hae. Nolaila, eia ka la o ka makahiki e hoomanao ia'e, me ka hauoli, ma keia hope aku.
                Peneia kekahi hana kupaianaha i keia la. I ka hora eiwa a me ka hapa, hele aku la o Adimarala Thomas, a me kekahi poe koa, mai na moku manuwa Beritania ekolu, (e ku ana ma Honolulu nei i keia wa.) ma ka aina papu o Honolulu ma ke kula o kahua, me na pu nui a me na pu liilii, a me na ihe, a malaila ua kali lakou i ke alii. Ma ka hora 10, hele mai no ke alii me kona poe koa, a hiki,alaila ua weheia ko Hawaii nei hae, a ua kuuia ko Beritania hae malalo ma ka papu, a ua kau ia ko Hawaii nei hae ilaila, a mauka hoi kekahi ma ka puu o puawaina; a ua ki nui mai na pu aloha mai o a o; O ka poe koa kekahi, o na moku manuwa kekahi, o ka papu kekahi, o ka puu o puawaina kekahi, a o na moku kohola kekahi; a ua hookaniia no hoi na bele. Ua paapu na moku manuwa i na hae, maikai, nani loa ke nana'ku.
                Lehulehu na kanaka i akoakoa mai e nana i keia hana kupaianaha, he umi paha tausani o lakou a pau. Ua hana ka poe koa i na mea i ku pono i ka lakou oihana; elua ko lakou kaapuni ana i ke alii, me ke kuhikuhi aloha ia ia; ua ki pinepine lokou i na pu, a holo i o ia nei me ka mama a me ke akamai. A pau ka lakou, ua hoi nui keia anaina i ke kulanakauhale.

POE KIPI.

                A hiki aku makou i ka hale o ke alii, ma honukaopu, alaila kii aku o Kekuanaoa i kekahi poe kipi, i hoonohoia ma ka hale Kauila, 140, paha o lakou. Aole ae mai ke alii ia lakou e hele pu me ia e kau i ka hae.
                Eia ko lakou ano kipi. I ka lilo maopopo ole ana o keia pae aina ia capt. Haku Geoge Paulet, ua haalele lakou nei ia Kamehameha III. a ua hoohiki lakou mamuli o ke Lii