Ka Nonanona, Volume III, Number 6, 8 August 1843 — Page 26

26 KA NONANONA. (AUGATE,

Wahine o Beritania. Eia paha ke kumu o ko lakou hoohiki ana mamuli o Vitoria; no ka ukuia mai i na kala. Nolaila ua hoopili mea ai lakou.
                Ua makaukau paha lakou e hele pu me Geoge ma i kela kaua i keia kaua, ina he kaua i ke alii, o lakou kekahi; a ina he kaua i na haole kamaaina, a i na Misionari paha, o lakou no e kaua mai! Ina pela ka hoohiki ana o na koa ma kekahi mau aina naauao, ua pau ko lakou mau poo i ka okiia. Aka, no ke ahonui, a me ka lokomaikai o Kamehameha III, ua pakele lakou nei.
                I ko lakou hiki ana mai ma kahi o ke alii, ekolu ko lakou ki ana i na pu aloha i ko Hawaii nei hae; alaila hoohiki hou lakou e noho pono malalo o Kamehameha III. Mahope iho, ua launa iki mai lakou me ke Lii; me ka lulu lima.

HALAWAI HOOMAIKAI I KE AKUA.

                I ka hora akahi, he halawai nui ma ka luakini pohaku. Eia ka hana ilaila. He wahi pule mua; alaila ua hoike mai ke alii i kekahi manao pokole, peneia, "E hoolohe mai oukou e na makaainana. Ua hoihoiia mai ka ea o ka aina ia'u i keia la, e like me ko'u manao lana mamua. Nolaila e ike hou mai oukou ia'u. Ke hoala hou nei au i na kanawai kahiko, a o ka mea hana hewa, e hoopaiia no ia. Eia ko'u manao ia oukou, e ike mai oukou ia'u." A pau ia, alaila ua unuhi mai o Kauka Judd i kekahi palapala a ka Adimarala, no kona hoihoi ana mai i ke aupuni i ke Lii.
                Alaila ua komo o Ioane Ii i ka awai, a hoike mai i kona manao hauoli a me ka olioli no ka hoihoi ia'na mai o ke aupuni i ke Lii; no ka mea, i kela noho ana, he noho pio, he noho kaumaha loa no ia. Aka, ua pau aku ia i keia la, ua lanakila hou kakou, nolaila he nui no ka pomaikai o ko Hawaii pae aina i keia la. Ua akaka lea hoi, no ke Akua mai keia pomaikai i keia la.
                A pau kona manao, heluhelu mai la ia i kekahi palapala na ke Lii. Eia kekahi mau manao ma ua palapala la. O ka poe paa i ka hao i keia wa mamua'ku nei, ua pau i ka weheia, mai Hilo a Niihau. Eia kekahi. Ua hoanae ea na la he umi, i wa e hauoli ai, a e ahaaina ai, a e hoomaikai aku ai i ke Akua, no kona lokomaikai ia kakou i keia manawa. A pau ia, he wahi pule hoomaikai aku i ke Akua, e L. Kamika; alaila, hoi nui na Lii, a me na kanaka i ko lakou wahi e noho ai.

AHAAINA.

                I ka hora 3, ahiahi, holo aku la ke Lii ma ka waapa e ahaaina me Adimarala Thomas, ma ka moku manuwa Dublin. I kona holo ana maloko o ke awa, ua ki aloha mai na pu 21, ma ka moku manuwa Carisfort; pela no hoi ma ka moku manuwa Hazard. Holo aku ke alii i ka moana mawaena o ka moku manuwa Dublin, a me ka moku manuwa Constellation, ki aloha mai no laua i na pu 21 pakahi, alaila, ee no ke alii i ka manuwa Dublin; a ahaaina pu me ke Adimarala.
                Ua lohe makou, aole inu iki o Kamehameha III, i ka waina, a me na mea ona, o ka wai wale no.

HE OLELO LOKOMAIKAI.

                Na ka Moi KAMEHAMEHA III., a me kona