Ka Nonanona, Volume III, Number 6, 8 August 1843 — Page 32

32 KA NONANONA. (AUGATE,

Lahainaluna, Augate 1, 1843.
                Auhea oe, e ka Nonanona e. Ke haiia aku nei kau ninau, ma ka pepa 4 aoao 15.
                Eia no ia ninau.
                Ke ku nei mawaho o ke awa o Kou nei, ka moku manuwa o Amerika, o Uluhoku (Constellation) kona inoa. I ka wa i kani ai kona mau pu, e ku ana au ma ka hale o Mi Kamalena, a nana aku la au i ka wati, ike mua ka malamalama o ka pouda e anapu mai ana, a mahope lohe ia mai ke kani ana o ka pu Ewalu sekona ka wa i hala, mai ka ikea ana mai o ka malamalama a lohea mai ke kani ana.
                Ua ikea ka holo ana o na leo, ke holo malie no, he 1,142 kapuai kona holo ana i ke sekona hookahi.
                E hoike mai oe, e ka akamai i ka helu, ehia mile ka loa, mai ka hale o Mi. Kamalena a hiki i ua moku nei?
                Eia ka loa mai ka hale Mi. Kamalena, a hiki i ua moku la; 1 mile, 5 setadia, 8 kaulahao, 4 anana, 1 iwilei a me 1 kapuai.
                Penei, e hana ai i loaa. E hoailona i ka mea ike oleia i w. Nolaila, 1,142w kapuai + 8 = 9,136w kapuai, a ma ka mile hookahi 5,280w kapuai, nolaila, 9136w ÷ 5,280w = 1 3,856w - 95,280w mile.
                Ua like ia me 1 mile, 5 setadia, 8 kaula hao, 4 anana, 1 iwilei a me hookahi kapuai. IOANE.
                Eia hoi ka hana ana a Kaiwi ma Waialua i ua mea la.
                He 1,142 + 8 = 9,136 ÷ 5,280 = 1, mile me 3,850 kapuai: alaila 3,850 ÷ 660 = 5, setadia, a me 550 kapuai, 550 ÷ 66 = 7 kaulahao me 83 kapuai, he 88 ÷ 6 = 14 anana a me 4 kapuai. Hana maoli 1 mile, 5 set, 7 kaulahao 14 ana 4 kap. Na KAIWI.
                He okoa na kaulahao a me na anana, a me na iwilei, a me na kapuai a laua i loaa mai. Owai ko kakou "hailoaa" i ike pono? E hana hou paha olua, no ka mea, ua lalau kekahi o olua.

NO KO DAVIDA PEPEHI ANA IA GOLIA.

                O Golia ka inoa o keia kanaka nui. O Davida hoi keia kanaka uuku. He kanaka koa no o Golia no ka poe o ko Pilisetia. Ua hele mai la ko Pilisetia e kaua mai i ka Iseraela. Ku ae la lakou maluna o kekahi puu, a ku ae la hoi ka Iseraela ma kekahi puu a he awaawa mawaena. A puka mai la o Golia a aa mai la i ka Iseraela a nonoi mai la i hoa kaua nona. He kanaka ikaika loa no o Golia a he kanaka haaheo no hoi. Ua weliweli loa no ka Iseraela a pau ia ia, a holo lakou mai kona maka aku. Aka aole i makau o Davida. Ua hilinai aku o Davida ia Iehova. A ua kokua mai o Iehova ia ia e kaua aku ia Golia. Ua lawe o Davida i na ala elima a me kana maa. Ua hookokoke aku la ia ia Golia. Maa aku la ia i kekahi ala a pa aku la ia i ka lae o Golia. Komo iho la ka ala iloko o kona poo. A haule iho la o Golia ma ka honua ilalo ke alo. Alaila holo aku la o Davida a unuhi ae la i ka pahikaua nui a Golia mailoko mai o kona wahi, a oki aku la i kona poo. Lawe o Davida i ke poo o Golia a haawi aku ia Saula, ke alii o ka Iseraela. Ua paulele aku o Davida ia Iehova, a nana no ia i hoolanakila maluna o Golia. E hilinai aku hoi kakou i ke Akua a e hoolanakila mai ia ia kakou maluna o ka hewa, ko kakou enemi nui.

KA MARE.

                "E mahaloia ka mare no na mea a pau, a e hoopaumaele ole ia hoi kahi moe: no ka mea, e hoahewa mai ana no ke Akua i ka poe hookamakama, a me ka poe moe kolohe."
                "O ke kanaka i lolelua ka naau, ua lauwili oia i kona aoao a pau."

KA HOAA ANA I Na BAIBALA.

                Eia kekahi mea i paiia ma ka palapala, "New Zost Observer." Dek. 10, 1842.
                He wahi pule hoomau na ka poe pope, ma kekahi kulanakauhale, (o Kabo kona inoa) a ia manawa, ua hoakoakoa ia na Baibala i hoolahaia, a kuaiia hoi iwaena o lakou, a ua hoaa ia i ke ahi ma ke akea. Olelo mai la ka mea i ike maka ia mea, elua no haneri Baibala, a keu aku i hoaa ia i ke ahi. Ua makemake kekahi e kuai mai i ua mau Baibala, aole nae hiki.
                E na kanaka ma Hawaii nei; e hoomanao oukou i keia mea ano e; Oia hoi, ua hoaa ia na Baibala e na kahuna pule pope, ma Amerika Huipuia, i ka makahiki o ko kakou Haku 1842.