Ka Nonanona, Volume III, Number 7, 22 August 1843 — Page 35

1843.) KA NONANONA. 35

Ina ua hemahema ke kanaka me he poo ole, pehea na lahuikanaka me ke alii ole? Aole anei lakou hemahema, a pono ole ke ole ke alii?
          Owai ka poe i makemake e noho alii ole? He poe pono anei; he poe hewa paha? Olelo mai la keia haumana pope penei; "hookahi no koko, aole he koko keokeo kekahi, a he koko ulaula kekahi e pono ai ke lilo i alii." Nani ka naaupo o ua kanaka la. Ua pono anei ke wawahi i na ano like ole o na kanaka a pau? Heaha la ka hope o ia mea? Eia. Alaila, aole alii, aole lunakanawai, aole haku aina, aole konohiki, aole Adimarala o na moku manuwa, aole Kamakoa, aole kapena o na moku. A heaha aku? aole kumu ao kamalii, aole kahuna haipule, aole Bihopa, aole Pope. A heaha aku? Aole Iesu Kristo, "aole he Akua." Oia la ke ano o ua haumana pope la, e hoole ana i ke alii.
            He aia no ia, a he hoomaloka loa hoi. "I iho la ka aia iloko o kona naau, aole Akua."

KANAWAI OLE.

            O ka poe e hoole ana i ke alii, hoole no hoi lakou i na kanawai. O ke kuko o ka naau, oia ko lakou alii, oia hoi ko lakou kanawai.
          Nolaila, makemake lakou e hana ino aku ia hai me ka hihia ole. Aka, no ko lakou makemake e hana ino aku ia hai, a e lawe wale i ka hai, a e powa wale aku, a e pepehi wale aku, nolaila he pono loa na kanawai; he pono hoi na hale paahao, a me na kaula hao, a me na kupee, a me na lua hohonu poeleele, kahi e paa ai ka poe kipi, a me ka poe hehi wale i na kanawai o ke Alii.
          Ua kauia na kanawai no ka poe hewa, aole no ka poe pono. Eia ko Paulo manao no na kanawai, i kakauia ma Timoteo I. mokuna 1: 8-10.
          "Ua ike kakou i ke kanawai, he mea maikai ia, ke malama pono ia ia e ke kanaka; Me ka ike hoi, aole i kau ia ke kanawai no ke kanaka hoopono, aka, no ka poe pono ole, ka poe hoolohe ole, ka poe aia, ka poe hewa, ka poe haihaiia, ka poe hoino, ka poe pepehi makuakane, ka poe pepehi makuwahine, ka poe pepehi kanaka, ka poe hookamakama, ka poe aikane, ka poe aihue kanaka, ka poe hoopunipuni, ka poe hoohiki wahahee, a me na mea e ae i ku e mai i ka pono oiaio."
          Ua pono loa ko Paulo manao no na kanawai. A ua hewa loa ka poe i manao e hoole i ke alii, a me kona mau kanawai.

NO NA MAKUWAHINE MEA KEIKI. HELU II.

            Aloha oukou. Ua heluhelu anei oukou i kuu wahi palapala iki, a'u i kakau iloko o ka Nonanona pepa 6? Ke i mai nei paha oukou ia'u penei. "Aole he manao hou iloko o kolaila palapala. Ua lohe pinepine makou e kela kumu, keia kumu, i na mea a pau e pono ai na keiki. Heaha ka makou mea hou e loaa'i ia oe"? E na makuwahine, aole he manao hou iloko o'u no keia hana nui. He oiaio no, ua lohe pinepine oukou i na mea pono a pau loa, e kela kumu keia kumu, "he lalani maluna o ka lalani, a ke kauoha maluna o ke kauoha." Aka, ke ike nei au, aole oukou malama nui i na mea pono a oukou i lohe ai; nolaila keia manao o'u e paipai hou aku ia oukou; malama