Ka Nonanona, Volume IV, Number 11, 17 September 1844 — Page 64

64 KA NONANONA. (SEPATEMABA,

wa o ka awa?" Eia ka hewa, o ka hana ole, aole hana, hiamoe wale no ia la aku ia la aku, poho ka manawa, ku ka hana, ilihune, mahuna, ona, mai ke kino, make ka uhane. Oia na hewa, he hewa nui.
                Eia kekahi, ua lohe wale au, ua inu awa kekahi poe luna ou ma Hilo, a nolaila; ua lana ka manao o na kanaka malaila i kela hana pono ole. Ua lohe nae paha oe i keia a e hiki ia oe ke hooponopono iho.
                2. Eia kekahi; o ka palaualelo, noho wale, hana ole, aole ku pono ia mau mea i ke Kiaaina o Hawaii. No ka mea, he hana nui loa kana, a o ka lilo i ka hana mai ke ao a po, oia ka pono. Pela na lii kaulana o na aina naauao, he poe ikaika loa a me ka hoomanawanui i ka hana. Ua lohe pinepine oe ia Wasenetona, kela alii kaulana loa o Amerika huipuia. Oia ka Makua a me ka Pookela o kela aina maikai, a he alii hoomanawanui loa ia i ka hana. Uuku kona manao hiamoe a me ka hoomaha, o ka hana wale no kana; imi mau loa ia i ka pono no kela lahuikanaka i ka po i ke ao, a nolaila, ua mahalo loa ia o Wasenetona ma na aina a pau.
                Pela oe, e kuu hoaaloha, e Leleiohoku e. E pale aku i ka hiamoe i ke ao, a me ka noho wale, a e hoopiha i kela hora, i keia hora i kekahi hana naauao. E ala i kakahiaka nui i ka wa i puka ole mai ai ka la, e hoomakaukau i ke kino a maemae, alaila, hoomakaukau no ka hana.
                Eia kekahi; e mahele pono i na hora o ka la; i kaawale ka manawa no kela hana keia hana. Penei paha, i ka hora 5, e ala; i ka hora 7, e paina kakahiaka; i ka hora akahi, i ka auwi ana o ka la, e ai awakea; a ka hora 7 ahiahi, e inu ki, a i ka hora 10, hiamoe. A ma na kowa iwaena o keia mau hora e hooponopono i na hana. E hookaawale i hora no ka hookolokolo; i hora okoa e hooponopono i na luna; i hora palapala ma kahi malu; i hora okoa e holo iwaho, e hoolewa i ke kino ma ka lio; e hele i ka auau, e ike i na hoalauna, a pela aku no. Mai huikau na hana a me na hora. Hemahema loa ia, aole holo ka hana.
                Ua kaukanawaiia na hora a pau o Wasenetona, i kona wa noho alii: aole huikau na hana.
                Eia kekahi; o ka hora i hoakakaia e oe no kekahi hana e hana io no i kela hora ponoi no. Ina o ka hora 10, ka hora i oleloia e hana ma kekahi poe ma ka hora 10 no e hana'i e like me kau olelo; aole ma ka hora 11, a ma ka hora 12 paha. Nui ka pono, ke hana pela aole noho a kali kekahi no kekahi; aole poho ka manawa o kekahi; aole mea haohao, no ka mea, e like me kau olelo; i ka hora 10, e hana, pela io no e hana'i. O ka lilo no ia o kau olelo i olelo oiaio, a he mea nui loa ia. Pela o Wasenetona; i ka hora ana i olelo ai, e hana pu me kekahi poe, i kela hora ponoi no i hana'i oia; aole ona hoohakalia; a hoopanee a kali ia hora aku, ia hora aku. Ina hiki ole mai kona poe hoaai i ka hora i oleloia no ka ahaaina, o kana ai no ia, aole kali iki. Pono loa keia; he mea ia e holo ai ka hana, a e lilo ai hoi kau olelo, i olelo oiaio. Nui ka hemahema a me ka pilikia, ke malama ole na'lii i na hora hana a lakou i olelo ai.
                Eia kekahi mea nui, e nana pono mai oe, e hookaawale oe i mau hora i kela la i keia la, e huli naauao. Mai hoopoina i keia; mai hoohema-