Ka Nonanona, Volume IV, Number 20, 21 January 1845 — Page 93
KA NONANONA.
"E ka mea hiamoe, e hele oe i ka nonanona, e nana i kona aoao a e hoonaauao iho." SOLOMONA.
Buke 4. HONOLULU, OAHU, IANUARI 21, 1845. Pepa 20.
HE MELE NO KA MAKAHIKI HOU.
Leo, Makahiki. (Benevento.)
1 Holo maha ole no,
O ka makahiki i pau; Nui no na hoahanau,
Pau ke ola o lakou;
Aole halawai pu hou
Me kakou malalo nei;
Paa mau no ma kela ao, Aole lakou hoi hou mai.
2 Kakou nae, ke ike nei
'Keia makahiki hou;
E Iesu, e halawai
Me makou, a noho pu.
E kokua, e hoomau
I ka lokomaikai ou;
A honui no a pau
Keia makahiki hou.
3 Nani kou aloha mai,
I na la i hala ae nei;
Pono no ma keia la,
E noonoo, a e nana
I na hana maikai au,
A hoonani ka naau.
Pela e hana'i kakou
Ma ka makahiki hou.
4 Pono hoi ke hoomanao,
Ma ka makahiki nei,
Kii mai paha o Iesu
Ia kakou e hele ae.
Pomaikai ke makaukau
E haalele i keia ao,
A pii aku i luna'e,
Me Iesu e noho ai,
NA LAIANA.
Waimea, Dek. 4, 1844.
HE HOMILE—OIA KA HAIAO POKOLE. Helu 1.
Kekahuna 9: 3. Aia no ka ulala iloko o ko lakou naau.
Ka manao nui: Ma na mea o ka uhane, ua like ka nui o kanaka me na pupule.
Pehea keia? E nana kakou i ka pupule i akaka ia manao.
1. Kuhi hewa ka pupule. Aole kaupaona ia i na mea maoli i maopopo ka waiwai. He manao kamalii kona. Ua paani, akaaka, manao i ka opala, na pohaku liilii, kapa weluwelu.
Aole anei pela ka nui o kanaka ma na mea o ka uhane? Pela io no. Ua kuhi hewa loa. Aole kaupaona lakou i maopopo na mea oiaio. Nolaila, koho lakou i na mea mama, opala, na mea lapuwale, na mea popopo wale. Koho lakou i ke dala, gula, lealea, hanohano, me ka manao ole i ke Akua, me ka imi ole i ke ola mau loa ma ka lani.
2. Hana pinepine ka pupule ma na mea e poino ai kona poe makamaka.
Hoomaunauna ka pupule i ka waiwai o kona poe hoahanau. Hana ino i kona makamaka. Puhi hale, huki ai, pepehi wahine, pepehi keiki. Aole okana mai kona kolohe i kona poe ponoi.
Pela ka nui o kanaka ma na mea o ka uhane. Kue a hana ino aku i ko lakou poe makamaka. Kue i ke Akua, i ko lakou makua nui. Hoino aku ia Iesu, pale aku i ka Uhane Hemolele, hoowahawaha i ka poe haipule. Alakai i ka lakou poe keiki, a me na ohua ilalo i ka make!
3. Ua hana ino ka pupule ia ia iho.
Pale aku oia i ka ai, a me ka wai inu, a me ke kapa maikai, Ua pololi, ua make wai, ua olohelohe, ua kuewa wale. Hahau ia ia iho, lele i ka pali, inu i ka apu heoheo e make ai, kaawe ia ia iho.