Ka Nonanona, Volume IV, Number 22, 18 February 1845 — Page 104

KA NONANONA.
"E ka mea hiamoe, e hele oe i ka nonanona, e nana i kona aoao a e hoonaauao iho." SOLOMONA.
Buke 4. HONOLULU, OAHU, FEBERUARI 18, 1845. Pepa 22.

NO KUU HOLO I MAUI.

                I ka la 7 o Ian. iho nei, holo au i Maui; eia ko'u mea i holo ai, o ka hoike o ke Kulanui; no ka mea, ua kohoia au i Kahu no ia kula. O Tatina kekahi Kahu, o Wini no hoi, o Laimana, aole nae lakou i hiki ae i ka hoike. Pau e ka hoike, pae aku o Wini.
                Eia kekahi mau mea a'u i ike ai, i keia holo ana i Maui.
                O Hooikaika; maluna ona au i holo ai. He moku holo loa ia; me he Kioloa la, me he Malolo la kona mama maluna o ke kai; he 40 hora mai Honolulu a pae ma Lahaina, me ka pohu kekahi o ka holo ana. I kekahi holo ana o keia Kialua, 18 hora hiki i Lahaina a hoi hou mai, ku maanei.
                Nani wale ka holo ana!
                                Moku holo, ano e,
                                Ua HOOIKAIKA nei,
                                Lua ole makamae,
                                Holo lele pololei.

                                Kau ka hae alii iluna,
                                KEONI HOLO ke Kapena,
                                Makaukau ka holo ana,
                                Hanohano, manuwa.
                He Kapena lokomaikai o Keoni Holo, (Kaanana) malama pono mai ia'u, a kokoke i Oloalu, pohu loa ka moku, a haawi mai oia i ka waapa ia'u e holo iuka, no ka mea, ua make loa au i ka hoopailua.

                KA MOI A ME KE KUHINA. Hiki au i Lahaina, kipa iki ma kahi o kuu mau hoaloha, o Baluina ma, inu i wahi kiaha kope a pau ka hoopailua, o kuu hele koke no ia e ike i na'lii. Hele mua au i ke Kuhina, aloha ia ia, a me ko ka hale ona; alaila, hele au e ike ia Kamehamea III mahope o kona ae ana mai. Oluolu lakou a pau: aole pilikia; e noho pomaikai ana no. Kamailio iki makou, a noi aku au ia lakou i waiwai kokua i ka hale pule ma Kau i Hawaii. Ae nui mai no, e kokua, aole nae i haiia mai ka nui. Mahope paha lohe kakou.

                HALE PULE MA LAHAINA. Ua popopo ka lai maluna iho o keia luakini, a ke hoomakaukau nei ko Lahaina e wehe a e hana hou me ka pili laau. Pono loa keia, no ka mea ua nui ke dala malaila i keia wa; uuku ma Honolulu nei. No ka ulu moku okohola keia; 300 moku okohola i ku malaila iloko o 1845! Lohe wale hoi au, ua makaukau na ekalesia ma Lahaina e hanai i ka lakou kumu i keia makahiki. Pono loa ia.

                NA KULA. Pilikia iki na kula ma Maui i keia wa; eia ka pilikia, o ka hole o na makua i ka uku o na kumuao. Nolaila, ua olelo ke Kahukula e kakia i ko lakou mau puka hale a paa, no keia hoole ana. Pehea keia manao o ke Kahukula o Maui? Pono anei? Aole pono i ko'u manao; no ka mea, ma ke kanawai, aia ka uku o na kumu i ke aupuni, aole i na makua. Olelo ke kanawai, e kokua pono na makua i na kumu e like me ka mea ku pono i ka oluolu like a me ka maikai o ka hana ana, aole nae ma ka uku keia kokua; na ke Kahukula ia, e like me ka olelo o ke kanawai aoao 74, p. 3.
                Hele na kanaka i ke koele, 3 la i ka malama hookahi, a iloko olaila ko lakou kokua i na kumuao: aole pono e hooluhi hou iho. Ina no nae i manao na makua e kokua i na kumu, ma ke aloha, pono maoli no ia.

                MOE KOLOHE; Lohe au ma Lahaina, he nui loa ka moe kolohe malaila i keia wa; i ka ulu moku nui loa. Hele nui mai na wahine o Maui a puni i Lahaina, e imi dala ma ka hookamakama. Akahi no a ino loa, aole okana mai. Pehea keia? Ina lanakila keia hewa, ehia makahiki a pau na kanaka o Hawaii nei, i ka make a lilo ka aina i na haole? Auhea ka laau e pau ai keia mai lepera o Hawaii nei?
                Ahea la ala hou na'lii a me ka poe noonoo e kinai i keia hewa?

                KULANUI MA LAHAINALUNA. Na kumu o ia kula, eia no, o Emesona laua o Alekanedero; na kahu, eia no, o Tatina, Wini, Kalaka, Laimana, Bele, Limaikaika.