Ka Nonanona, Volume IV, Number 22, 18 February 1845 — Page 109

109 KA NONANONA. (FEBERUARI,

                Olelo mai ma ke kau wahi o ka ke Akua olelo, o ka poe molowa, e ike no lakou i ka lakou hua. O ka poe hoomau i ka hana, e ike no lakou i ka lakou hua.
                "O ka hua a ka poe palaualelo, ua loaa no ma ka palapala a Solomona 26: 13—15.
                E ka poe e heluhelu ana, e pono e hoopau loa i keia palaualelo ana. O ka mea keia e ilihune ai o ka aina, a e pilikia nui ai.
I. H. B. KAIHE.

                E na hoahanau ekalesia mai Hawaii a Kauai. E aloha ia oukou a pau loa, e maluhia hoi e Iesu Kristo, ko kakou Haku e ola'i.
                Ke hai aku nei au ia oukou i ka hana a na hoahanau ekalesia mai Huelo a Keokea i hana'i, i ka mua o keia makahiki hou. No ko lakou manao ia hana, aole au i olelo aku ia lakou, "E makana mai ia'u;" no ko lakou aloha no ia, no ko lakou manao paa e malama, ma na mea o ke kino, i ka lakou kumu, i ole ia e noho pilikia, i kona noho pu ana me lakou. Eia ka lakou; He wahi eke dala, aia iloko hookahi haneri kanakolukumamakahi dala maoli $131,00. Hookahi hoahanau a me kana wahine, a me na keiki elua, he umi dala, $10.00. Hookahi hoahanau a me kana wahine, ekolu dala, $3,00. Kekahi mau hoahanau he dala pakahi; aka o ka nui, he hapalua, hapaha, he hapawalu. Pela ko lakou haawi ana. I ka nana aku, ua oluolu loa na hoahanau i ko lakou haawi ana, aole kaumaha, "aole hoi me he mea la i auhauia."
                Nui kuu hauoli i keia hana, aole nae no kuu makemake i ka makana, aka, no kuu makemake i ka hua e nui ai ko lakou pono. Pilipi 4: 17. A ua ike au, "E hiki no i ke Akua ke hoonui ae i na mea maikai a pau ia lakou; i lako mau lakou i na mea a pau, i mahuahua ka lakou hana maikai ana ma na mea a pau." 2. Korineto 9: 8. A ke pule aku nei au, "O ka mea nana e haawi mai i ka hua na ka mea lulu, a me ka ia e ai ai, e haawi mai no ia, a e hoonui hoi i ka lakou hua i lulu ia, me ka hoomahuahua i na hua o ko "lakou pono." I lako lakou i na mea a pau, i nui ai ko lakou lokomaikai, oia ka mea e hoomaikaiia'ku ai ke Akua ma o makou la." 2. Korineto 9: 10. 11.
Na'u NA GELINA.

PAU I KE AHI.

                I ka po o ka la 19 o Dekemaba i ka hora 10, pa mai ka makani kuhonua ma Kealakekua. Ikaika loa ka makani: aole no ke kai mai, mauka mai no. Lele kekahi huna ahi, no kapuahi o ka Puhi, aole i ikea a kau ma ke kua o kahi hale ma Kiloa. Aole emo a lapalapa ka hale; Lele aku ke ahi i kela hale aku a me kahi hale aku, no ka mea, ikaika ka makani. Pau na hale imua o ke ahi a puka i kahakai; pau pu me kekahi mau paila wahie. Pau ko makou halau waa i kahakai, me na mea e maloko. Pau na moena o kanaka, a me na paipu. Holo kohana wale kekahi, holo kekahi me na mea a ka lima i paa ai. I kakahiaka waiho wale na kahua aohe hale, he lehu wale no. Umi a kumamakolu na hale i pau i ke ahi i ka po nei. Aloha wale!
                Aloha ino ka poe paulele i na mea o ke kino!
                Pau wale me he aka la ka waiwai o kela mau kanaka. Pakele wale ke ola o kekahi. I ole ka poe