Ka Nupepa Kuokoa, Volume I, Number 3, 16 November 1861 — Ahahui Mahiai o Waioli, Kauai. [ARTICLE]

Ahahui Mahiai o Waioli, Kauai.

Ma ka la 30 o Okatoba iho nei, akoakoa kekahi poe kanaka ma na apana o Hanalei me Anahola, ma ka hale pule o Waioli, e hookumu i Ahahui Mahiai no ia mau apana. Ua kohoia o D. B. Mahoe, Esq., i Kaukau Olelo, a o J. H. Wana, Esq., i Lunahoomalu no ia Aha. Ua lawe ia mai i kumu kanawai i mua o ka Aha, a ua hooponoponoia a hooholoio, peneia: KUMU KANAWAI. PAUKU 1.—E kapaia keia ahahui "Ka Ahahui Mahiai" o Waioli, Kauai, e kokua ana i ka Ahahui Mahiai o ko Hawaii Pae Aina. 2.—Na kumu o keia Ahahui, e noonoo pu no na mea e holopono ai ka Oihana Mahiai, a e hoomahuahua i na waiwai noloko mai o ka lepo. 3.—Eia na luna o keia Ahahui, he Perisedena, he malama waiwai, he kakau olelo, he kakau leta, me na luna hooponopono elima, e noho luna ana no ka makahiki hookahi. 4.—Eha halawai o keia Ahahui ma ka makahiki, ma ka Poakolu mua o kela hapaha keia hapaha makahiki, e hoomaka ana i Ianuari, a ma ka la o ka halawai ma ka malama o Okatoba, oia ka halawai makahiki; a malaila e kohoia na luna no ka makahiki hou. £ kohoia na luna ma ka balota, a o ka mea i oi ka nui o na balota, ua kohoia oia. 5.—O keia poe luna apau, ua lilo i Papa Hooponopono no ka Ahahui, a ua hiki i ka hapalua o lakou ke hooko i na hana. Ua hiki hoi i keia poe luna ke kuai anoano mea kanu, a pai aku i na olelo hoolaha, a ia mea aku, ia mea aku, aole nae e hooaie aku, i mea e pilikia ai ka Ahahui. 6.—E hoike mai ka Perisedena i ka Aha i olelo hoike no na hana oia makahiki, a nana hoi e hai i olelo paipai imua o ka Ahahui ma ka Halawai Makahiki, a i ole nana, ia ia no ka imi aku i pani hakahaka nona ma ia hana. 7.—E hoike hoi ka Malama Waiwai, ma ka palapala, ma ka halawai makahiki, i olelo no ka loaa mai, a me ka lilo aku o ke dala. 8.—Eia na mea e lilo i lala makahiki o keia Ahahui, o ka mea e kakau ana i kona inoa ma ka papa kanawai, a e haawi hoi i ka waihona, i hapalua dala. I na uku kekahi i $5 i ka wa hookahi, e lilo oia i lala mau. 9.—E hiki ke hoololi keia kumu kanawai ma ka ae like ana o na hapakolu elua (2/3) o na mea i akoakoa ma kekahi Halawai Makahiki. Ua kohoia mai na luna na keia makahiki, peneia: Peresidena, E. Ioane. Malama Waiwai, A. Wilikoke. Kakau Olelo, A. S. Nuuanu. Kakau Leta, D. B Mahoe. Na Luna Hooponopono, J. H. Wana, B. Kalaiohl, D. Nuuhiwa, Kauaihilo, M. Kaanaana. No ka emi ana o na moku okohola, a no ka pilikia o na kanaka i ka imi ana i dala e pono oi no na hookupu, a me na mea e lako ai ka noho ana, nolaila ka hookumu ia ana o keia Ahahui. Ua manao no keia Ahahui, he pono ke hoao i ke kanu raiki a me ka pulupulu, a me na mea e ae paha e pono ai. Ma ka Ahahui e hiki ai ke hui pu, a noonoo pu no na mea kanu e pono ai.