Ka Nupepa Kuokoa, Volume I, Number 3, 16 November 1861 — He Kaao no ke Keiki Moi o Farani. [ARTICLE]

He Kaao no ke Keiki Moi o Farani.

I ka nui ana ae o Napoleona, ke Keiki Moi o Farani, e like me na keiki kaulana ole e ae. Ua lealea no ia i kona noho ana me na makua ma na wahi kuaaina, kahi e hiki ke holoholo wale ma ka ululaau. I kekahi la o kona holo lealea ana, loaa ia ia kekahi keiki makaainana e waele ana i ke kihapai pua me kana kopala. Noi aku la o Napoleona ia ia e haalele iho i kana kopala, a e hele pu me ia e paani. Hoole mai ua keiki hana la, aole au e hele. Lalau aku la o Napoleona i ke kopala, i aku la, "Heaha kau e hoole mai nei ia'u i ke keiki a ka Emepera?" Pane mai kela keiki, "Hiki no ia'u ke hoole aku i ke keiki a ka Emepera. Aole au e makau ia ia. E inaina ana kuu makuakane i ka Emepera, nolaila, aole au e paani pu me oe." Ikaika ko Napoleona manao e paani pu laua, aumeume me ia i ke kopala. Aka, ua oi ka ikaika o ke keiki hana, a holo aku la o Napoleona e imi i ka Emepera. A loaa aku la, i aku la ia i kona makuakane, "E! ua loaa ia'u kekahi keiki i hoole loa mai ia'u, aole e paani pu me au. I mai kela, ua inaina kona makuakane ia oe." I mai ka Emepera, "Aole, e kuu keiki, ina aohe ona manao e paani me oe, pono no e waiho pela ia ia; ina e inaina ana kona makua ia'u, aole pono oe e paani pu me ia. E imi oe i keiki e ae i hoapaani nou.