Ka Nupepa Kuokoa, Volume I, Number 23, 3 May 1862 — Page 3
Ka Nupepa Kuokoa.
noho ai, alaila imi i ua kanaka la, a loaa ua kanaka la, kuhikuhi aku ; alaila, ko iho pa-ha ka makemake o ka mea nana ka ninau.
Ina pela ke ano o ka ninau ; alaila, e aho no ke kuhikuhi iho i kekahi kanaka e noho ana ma keia Aupuni. He ike no la hoi kanaka Hawaii i ka poa ana o ka opea o ka puaa.
A ina aole pela ke ano o ka ninau ; alaila, ua hemahema ke ano o ka ninau. Ua hemahema io no : ua ae mai o G. M. Koha, a ke i mai nei. " Owai ka mea nana i poa ka opea o ka puaa imua o Iehova ? " Ina pela ke ano o ka ninau, aole no he waiwai. Ina he waiwai ; alaila, he waiwai no hoi keia ninau. Owai ka mea nana i poa ka opea o ka uku lio. Like, pu loa ke ano.
Aka, no ka haina o ka ninau a G. M. Koha, ke pane aku nei wau, o G. M. Koha no ka mea nana i poa ka opea o ka puaa imua o Iehova.
Ina hoole mai o G. M. Koha aole i ike, alaila makehewa kana olelo ana ia J. W. Lipoa. " Ina he manao kou e hai aku au i ka Hailoaa ; e noi mai ia'u, i ao aku ai au ia oe."
A ina i ae mai o Koha, a me kekahi kanaka e ae, i ka ike i ka poa ana o ka opea o ka puaa, a hoole nae, aole imua o Iehova ; alaila, he mea ia e hoole ana, aole ke Akua ma na wahi a pau.
A i hoole mai kela, aole i oleloia iloko o ka Baibala, alaila, aole ha he ki iwaho. Aka, he ki no nae ia e hemo ai ia ninau. No ka mea, he okoa no ka Pahu, a he okoa no hoi ke ki.
Pela no ka ninau 3, He ano hemahema no. No ka mea, o ka mea i kauohaia, o ka lalau aku no a hoike aku, aole paha ka hoike aku i ka inoa. Ina he laau Kedera ma kahi o Mi. Pareka, e lalau paha kela, a hoike aku, aole paha e ike mai o Koha ; no ka paa i na pali. A malia paha, aole no i like ka nani o ko Hawaii nei mau Kedera, me na Kedera o Lebanona, ka mea i oleloia, ua oi ae ka nani i ko na laau ma ka mala o ke Akua.
A o ka ninau 4. He ninau pono kela, Aole o'u kanaluna ia ninau, no ka mea, he hiki ke hai aku ma ka inoa. Aole nae na Iehova i hana, aole no hoi na Isaia, he mea okoa no. Malia o hai mai o Koha.
A ma ke ano pahemahema, a me ka loaa ole ana o keia mau ninau ia Lipoa, aole i loaa ka waiwai. Ina ninau mai o Koha, a pane pololei aku o Lipoa, aole pakike aku. A ninau aku hoi o Lipoa, aole e haanui wale mai o Koha, alaila, e aho ia. Aole nae pela.
A i mea e waiwai io ai, ke noi nei au ia Lipoa, e ae aku i kela olelo a Koha, e ao mai ia ia. A i ae mai o Koha, e hai pu mai me ke ano o ke kii, o kela ninau keia ninau.
A o ka'u olelo hope keia me Kaleilehua. A ke aloha aku nei au ia ia. Aloha oe.
KANAKA HAWAII.
E Ka Nupepa Kuokoa e:—Aloha oe.
Aia ma ka Helu 30 o ka Hoku Pakipika, na hoolahaia nolaila kekahi Olelo Hoolaha a kuu wahine a Kapoluhi. Ua olelo nuiia ma ia Olelo Hoolaha, ua haa-lele au ia ia, aohe oiaio oia olelo, he palau. Aole paha au i haalele ia ia, oia kai haalele mai ia'u, a lilo aku ia i ke kane e, aia no me ia kane a hiki i keia manawa.
Owau, eia no au ke noho nei maloko o ka hale a'u i ako ai no maua, maluna o ka aina ana e papa nei ia'u, aole au e mahu. Hilahila ole ka hoolaha wale iho no ma ko akea, me ka olelo iho, '' Ua noho pono maua iloko o na makahiki o ko maua noho mare ana." Noho pono ka uanei.
Aole i loaa ia'u ka nono oluolu pu ana me ka'u wahine ma kona hale, noho no au me ka hoomanawanui i ka hoino o kona mau kupuna, e kapa mai ana ia'u he wahi kanaka waiwai ole, a hala eha ma-kahiki o ko'u noho ana me kuu wahine, a me na kupuna o maua, me ka hoomanawanui i ka hoinoia mai.
Nolaila, nonoi aku au i ka manao o kuu wahine e hoi maua maluna o ka aina o ke kaikaina o ka makuakane hanau, ua ae mai kela. Kukulu au i ka hale a paa, hoi maua a noho ma ia hale, i ko maua noho ana maluna o ua aina la, aole no i oluolu pono, hoi no kela me kona mau kupuna, a noho hookahi wale iho no au, a hoi mai no hoi i kekahi manawa. Pela no ka noho ana me ka wahine me ka oluolu pono ole, elua o maua makahiki o ka noho ana maluna o ua aina la i ole-loia maluna. A i ka makahiki 1861, ua haalele mai kela ia'u, a lilo i ka hoohele a loko, wahi a kana Olelo Hoolaha. Hoopaiia kela no ka moekolohe imua o J. W. Keawehunahala, he $30 pakahi, maia manawa mai a hiki i keia manawa, aia no kela me kaua kane manuahi, ua keku loa ia mai au. Nolaila, o na mea i olelo nuiia iloko o kana Olelo Hoolaha, he wahahee wale no.
Ua olelo oia, he mau aina kona, aia la i hea, aole ona mau aina a'u e mahi nei. Eia nae, o ka aina kahi a'u e mahi nei no ke kaikaina o kona makuahine hanau, ua kuleanaia ma ka inoa o kana kane mare o Kekipi, ua make laua, aole nae i hooponoponoia imua o kekahi o na Lunakanawai o ka Aha Kiekie.
Ua oleloia hoi, ua lawe au i kona mau waiwai ponoi no'u, nana no i haawi kona lio ia hai, o ka lio i haawiia mai ia'u i ko maua wa i mare ai, oia wale no ka'u e malama nei. Nana no i haawi i kekahi lio ona ia hai, ma ka la 21 o Aperila nei, ua kii au i kela lio a malama mai, o kekahi lio ana i haawi ai, aia no ia ke paa la ma ka lima o ka mea ana i haawi ai. Nolaila, o na mea a pau i oleloia ma kana Olelo Hoolaha, he oiaio ole ia.
S. KUI.
Paalaa, Waialua, Aperila 25, 1862.
Ia G. M. Koha.
O oe anei e G. M. Koha ke kakau mai ia makou, ma ka Nupepa Kuokoa, i kekahi mau ninau ano ole ea ?
Ke pane aku nei au ia oe, he mau ninau ano ole keia, aole ka haina ma ka Baibala Hawaii, ua imi wale iho no oe ia mea, i mea e kaulana nui ai no kou inoa ma keia Aupuni. Ina pela kou manao ana, alaila, e pau koke ana paha ka naki o kou inoa naauao wahi a ka Haku.
"No ka mea, o kela mea keia mea e hookiekie ae ia ia iho, e hoohaahaaia no ia : A o kela mea keia mea e hoohaahaa ia ia iho, e hookiekieia no ia." (Luka, 18: 14. )
Ke ninau aku nei au ia oe, aia mahea ka mokuna, a me ka pauku o ka Baibala, ma ka olelo Hawaii i loaa'i ia oe keia mau hua Latina ? a Helene paha ? Au i kuhikuhi mai nei ia makou ma ka Nupepa Kuokoa, o ka la 19 o Aper. Helu 21, aoao 2, penei : " Lib. 37 se Chic." O ka moolelo a Seretuliano. A heaha la ke ano Aleph-Thau, ma ka olelo Hawaii ?
Ua hiki ka paha ia oe e G. M. Koha ke unuhi i kekahi palapala ma ka olelo Latina, i ka olelo Hawaii. A pela hoi ma ka olelo Helene, a Hebera hoi ? A ina pela, e unuhi mai oe i keia wahi pauku, iloko o ka palapala a Ceretuliano, ma ka olelo Latina i olelo Hawaii.
1. Incensus his Asclepiades gusserat Evis-cerandum Corpus. equuleo eminus Pendere, et uncis ungulisque crescere. (Tertulliam Apolog, Dissert, 10 D. le Nour, Lib. primus Cap. 16 Artic 1.)
2. Quia omnis, qui se exaltat, humiliabitur; et qui se humiliat ;exaltabitur. ( Sane. Luc.)
3. Beati paupares Spiritu ! quoniam ipsorum est regnum Coelorum, (Matth.)
W. PILIOLE.
Ka Hope o ke
KANIKAU O MOISE.
Kau kuu manao e ike ia Pelekane,
I hoaikaneia e a'u ka noe o Aina Hou,
Haua eha ia e ka kihikihi,
Kikaha aela ka hele a ka holokahiki,
I kahiki no oe i Honolulu au.
Na hale hulahula ka'u aloha,
Kiaha pia ia e eha ai,
E uina ai o ko piko olu,
Aloha au o ka luna e maemae,
Maemae no oe o ka maikai,
He apiki no oe no ka launa ole,
Ke kalewa nei no ka poi puupuu,
Hoi iho ka nani i ka uouo,
Ka lei hala i wili ia me ka maile.
Aloha au o ka ua lihau o Poheke Ailana,
Lana kuu manao e ike ia Aukaki,
Hikii mai ka hau paa na kuahiwi,
Kolaila kahiko mau no ia o ka noe,
Uhia ke awa paa na poki.
I lohe mai au i ka leo o ka hone,
Ke ole lua nei na'lii i ka moana,
U ana au ia oe e ke anu,
A nu mai nei kuu nui kino.
Holo ka maeele i ka welelau o kuu lima,
Paa pono ole na kaula likini.
Kapoia no ka'u aloha,
Ka huila wai kaa ke panana,
Nana ae oe i ka pulupai.
I pai ia e ka makani poho na pea,
Ike ole ia ke ala e hiki aku ai,
Hiki mai ka lani e Nouaiki;
E naue iki ae no au a hoi aku,
Hoi aku no au e pili me mamala,
E malama oe e ke pailaka,
I laka no oe i kaia manuahi o ka aina,
Kaluluu a na kanaka o ka Puukolo,
Kokolo kuu manao e iki ia Kikihale,
I ka alohi mai ana puka aniani,
Ani mai ka luna e Kaumakapili,
Ka pili hemo ole i ka lai e Honolulu,
Ua lulu no oe ua lono au
I lono mai au i kahi wai o Makaaho,
Aohe aho o ka ua haaheo,
I ke alai ae no a Waikahalulu
Kahaluku wale no ia o ka waimaka,
Haohao ka ua me ka makani,
Makani maila ka luna e Pawaa,
He aloha me ka minamina.
W. HALEONAONA.
Aloha au o ka ua lihau la e Hauhaukoi,
Ke halii maila la i ka lau o ka inia
Iini kuu manao e ike ia oe,
I hea la maua e ike ai ia oe,
I ke kino wailua paha ike ahe a ka makani,
Makani maila la ke kula e ka Iwiula,
Pono ole ia kiakolu i elua Kapena,
Ui ae nei la e ka Maiwala.
Aloha au o ka lau niu kapalili o Aala.
Aala no oe he hinano.
I nalo no oe i ka poli o kuu hoa.
I hoohoa aku no au i ka nani o Kanekini,
A Haleakala pua ka lehua,
A Waipiula ike i ka luhi,
Wai o Honolulu e inu ai,
Ike aku au o ka ahihi o Nuuanu,
Hiki mai ke aloha paa kuu kino,
A waho o Mamala, pau ka ike i ka hoa,
O ka huini o ke kia ka'u e ike nei.
Ike wale aku oe i ka la e paiahaa,
Haa ka wahine haa o Hopoe,
Makani Haena i ka ua lulehua,
Elua mea kamahao iluna o Waiola,
Ola ka laula a ka manao,
Manao aku au o ka pua o ka lilia;
Ka lau oliva ka'u aloha,
Aloha au o ka ua pale lima o ke ahiahi.
Ka wewelo a na ilima i ka Poaono,
Ono aku au o na mea nani o Halemakeke.
He aloha me ka minamina.
B. M. KALAULEHUA.
He uhane no Moise,
Ka pua lipana o ko Hawaii pae aina,
Kiina maila oe e na kerupima,
Apoa maila oe e Maria lilo i ka lani,
He kelelo gula haule makou he keleawe,
Pele ke ano o kou hele ana,
Hele aku la oe i ke kulanakauhale o Honolulu,
Ike aku la oe i ka pahukani e nunulu ana,
Me kolaila puali koa,
Haalele oe i ka la i ka mea mehana,
He uhane nei nou e Moise.
I hele hookahi aku la aohe lua, aohe kolu, aohe ukali o ka hope,
Hookahi ukali o ke aloha,
Ua lawe ka po ia oe,
Oelieli lua o ka lua o ke kanaka,
I hana ia i ke awakea i hana ia i ka holoaa,
I haua paa ia i kanini,
Ua uhia i ke kapa ua paepae kauluna,
Ua lea ka hiamoe moe kau moe hooilo,
Aloha kou mau kupuna i ka ike ole ia oe,
E uwe kakou he mea aloha,
He aloha me ka minamina.
K. KAIKAINAALOHA.
Hauhaukoi, Oahu Aperila, 15, 1862.
NA AWA O HONOLULU
Na Moku ku mai.
Aper. 26—MOKU kuna o Kohala Maria, mai San Diego mai.
26—MOKU kiapa Am. Whatcher, he 16 la mai Kapalakiko mai
26—MOKU kiakahi Ema, mai Waialua mai, me 220 eke kulina, 2 pahu aila bipi, 30 ili bipi.
27—MOKU a Kamoi, mai Kahului me Lahaina mai, me 8 pahu liilii 10 pahu nui uala, me na ukana e ae.
28 —MOKU o Kohola Am. Ocean, mai San Diego mai, me 6 0 barela aila.
29—Moku kuna Moikeiki, mai Kahului me Lahaina mai, me 100 ili bipi, me 11 ee moku.
30—Moku kalepa Am. Syren, he 14 la mai Kapalakiko mai, e holo ana Manila.
30—Moku kuna Kekauluohi, he 30 hora mai Kona, Kona, Haw.
Mei 1 —Mokuahi Beretania Columbia, he 12 la mai Kapalakiko mai, e holo ana ma Kina.
1—Moku kuna Moiwahine, mai Koloa a me Nawiliwili mai, me 141 pahu a me 139 eke ko paa, 40 pahu malakeke, 5 pahu aila bipi, 7 pahu puaa, 14 ili bipi, 2 owili pepeiao laau, 615 kini bipi, 62 pai ai, 10 eke hulu hipa, 1 lio, 3 puaa, 5 paila wahie, a me 32 ohua.
Ke kauohaia'ku nei na Lunakula, a me na Kumukula, e hooili mai i ka inoa o ka poe Hanau, Mare, a me ka poe Make, i hoolahaia'i ma ka Nupepa Kuokoa. E kakau mawaho o ka palapala ia H. M. Wini. Luna Pai o ke Kuokoa ; a i ole ia, e haawi ae i na Luna o ke Kuokoa.
HANAU.
AKINI—Aperila 24, ma Kolepo, Honolulu, o Akini (w.) na Apana (Pake) me Keliikanakaole (w.)
KAUI—Mar. 21, ma Wailua, Hilo, o Kaui (w.) na Kahou me Keaweaukai.
KALAPONI—Aperila 13, ma Wailoa, Hilo, o Kalaponi (k.) na Kauluokamoa me Kauanono (w.)
PUNIPU—Mar. 28, ma Nonopapa, Niihau, hanau o Punipu (w,) na Kapahee me Ponawahine (w.)
WEHIWEHI—Aperila 5, ma Puuwai, Niihau, hanau o Wehiwehi (w,) na Namaka me Auhea.
ISAIA—Aper. 28, 1862, ma Waiokuu, Huleia, Kauai, hanau o Isaia (k.) na M. Koloaiki, laua me Abigaila
KAHAULIPO —Aper. 23, ma Koloa, Kauai, hanau o Elena Kahaulipo (w,) na John Hobbs, jr., me Abigaila.
KINI PAI KII!
HONOLULU, OAHU.
MAKAUKAU LOA E PAI I NA KII, O OUKOU. Aole o kanamai na pahu kii ano hou. Ma ka aoao hikina o ka Hale Leta. 23-1t
OLELO HOOLAHA.
NO KA MEA, UA NOI IA MAI KA MEA HANOHANO o G. M. Robertson, ka Lunakanawai o ka Aha Kiekie, e Kekuanaoa, no ka hookohu ia ia i Luna Hooponopono Waiwai, no Kapaalua, o Kapalama, i make aku nei: Nolaila, ua hoikeia i na kanaka a pau loa, ke pili, o ka Poaono, oia ka la 3 o Mei, i ka hora 9 o kakahiaka, oia ka la a me ka hora i oleloia no ka hoolohe i ka oiaio o keia noi ana mai, a me na mea hoole i hoikeia, aia ma ka Hale Hookolokolo mai Honolulu, Oahu. JNO. E. BARNARD.
Kakauolelo o ka Aha Kiekie.
Honolulu, Oahu, Aper. 28, 1862. 23-1t
Olelo Hoolaha.
NO KA MEA, UA NOIIA MAI KA MEA HANOHANO o G. M. Robertson, ka Lunakanawai o ka Aha Kiekie, e Ioanemalia, a me ka hookohu ia ia i Luna Hooponopono Waiwai, no Pao, o Honolulu, i make aku nei : Nolaila, ua hoike ia i na kanaka a pau loa, ke pili, o ka Poalua, oia ka la 13 a Mei, i ka hora 9 o kakahiaka, oia ka la a me ka hora i oleloia, no ka hoolohe i ka oiaio o keia noi ana mai, a me na mea hoole i hoikeia, aia ma ka Hale Hookolokolo, ma Honolulu, Oahu. JNO. E. BARNARD.
Kakauolelo o ka Aha Kiekie.
Honolulu, Oahu, Aper. 28, 1862. 23-2t
OLELO HOOLAHA.
UA HOOPII o Kahalekai. KUE I KANA WAHINE o Kahiliole, o Honolulu, mamua, e hooki i ko laua mare ana, no ka haalele wale ana o ka mea i hoopii ia i kana wahine no na makahiki elima. E hanaia keia hoopii imua a ka mea Hanohano o John Ii, kekahi Lunakanawai o ka Aha Kiekie, ma ka Poaono, oia ka la 3 o Mei, i ka hora 9 o kakahiaka, aia ma ka Hale Hookolokolo, ma Honolulu, Oahu. JNO. E. BARNARD,
Kakauolelo o ka Aha Kiekie
Honolulu, Oahu, Aper. 11, 1862 23-2t
KE KUMUKUAI O NA MEA KALEPA
MA HONOLULU.
BIPI LOLEIA, no ka paona, 4 hiki i ka 6 keneta.
" Ola, no ke poo, $3.00 a hiki i ka $18.00.
HIPA LOLEIA, no ka paona 12 1/2 keneta.
" Ola, no ke poo, $3.00.
PUAA LOLEIA, no ka paona, 10 keneta.
" Ola uuku, $2.00 a hiki $3.00
" Ola nui, $6.00 a hiki $10.00.
PELEHU KANE OLA, $0.75 keneta
" wahine Ola, 37 1/2 a hiki i 25 keneta.
MOA, 23 a hiki i 37 1/2 keneta.
KULINA, no ka paona 1 1/2 keneta.
PINE, " " 3 keneta.
PEPEIAO LAAU, " 9 keneta.
PULU, " 4 keneta.
KOPAA ULAULA, 7 a hiki 9 keneta.
" keokeo, " 15 keneta.
KALEKOA ko ka I-a, 13 a 14 keneta.
SILIKA, " " aole akaka loa.
AHINAHINA, " 16 keneta.
UALA KAHIKI, no ka pahu, " $3.00. Ko Maui, $3.00.
" MAOLI, " " $3.00.
BERENA, no ka paona 5 1/2 a hiki 6 1/2 keneta.
PAI AI, 1 keneta no ka paona
PENA KEOKEO, $3.00 no ka pahu
AILA KUKUI, 50 keneta no ke galani
KELEAWA KAHIKO, makepono
LALA MANO, 15 keneta no ka paona
PUNA, Hawaii, $2.50 no ka pahu.
" Kaleponi, $5.00 no ka pahu
KOPE, o Kona, 15c. no ka paona
PAPA HALE, $30.00 no ka 1,000 kapuai
LAAU KUA HALE, $25.00 no ka 1,000 kapuai
PILI HALE, Keokeo, $6 a hiki $8
" " Ulaula, $6 a hiki $6.50 no ke 1000
LAIKI, 10 keneta no ka paona
LAIKI, me ka ili, 3 keneta, ma kahi o Savidge e kuai ai
HUA MANU 12 1/2 keneta no ke kakini.
IPU PU, $12.00 o ka 100
IPU HAOLE, $5.00 o ka 100
ILI KAO, ke nui, 30 keneta.
" ", ke liilii, 25 "
OLELO HOOLAHA.
UA HOOPII o AUANA w. kue I KANA KANE o KOOLAU, no Hamakua, Maui, mamua, e hooki i ko laua mare ana, no ka holo i Kahiki, aole i hoi mai, aole i loheia, no na makahiki ewalu o Koolau i kana wahine. E hanaia keia hoopii imua o ka mea Hanohano o John Ii, ka Lunakanawai o ka Aha Kiekie, ma ka Poalima, oia ka la 9 o Mei, i ka hora 9 o kakahiaka, aia ma ka Hale Hookolokolo ma Honolulu, Oahu.
JNO. E. BARNARD.
Kakauolelo o ka Aha Kiekie.
Honolulu, Oahu, Aperila 11, 1862. 23-2t
OLELO HOOLAHA
UA NOI MAI o Hilea k, OIA KE KANE o Kama (w,) mamua, i ka mea Hanohano John Ii, kekahi o na Lunakanawai o ka Aha Kiekie, e ae aku ia ia e mare hou, e like me ka Pauku 1334 o ke Kanawai Kivila o ka la 3 o Mei, oia ka la hana i keia hoopii, ma ka hora 10 o kakahiaka.
JNO. E. BARNARD.
Kakauolelo o ka Aha Kiekie.
Honolulu, Oahu, Aper. 26, 1862. 23-1t
OLELO HOOLAHA.
UA HOOPII o Kamaka w, KUE I KANA KANE o Oopa, no Honolulu mamua, e hooki i ko laua mare ana, no ka haalele wale ana o ka mea i hoopii i kana kane, no na makahiki he umikumamalima. E hanaia keia hoopii imua o ka mea Hanohano o John Ii, ka Lunakanakawai o ka Aha Kiekie, o ka Poakolu, oia ka la 3 o Mei, i ka hora 9 o kakahiaka, aia ma ka Hale Hookolokolo, ma Honolulu, Oahu.
JNO. E. BARNARD.
Kakauolelo o ka Aha Kiekie.
Honolulu, Oahu, Aper. 24, 1862 23-1t
OLELO HOOLAHA
NO KA MEA, UA NOI IA MAU KA MEA Hanohano o G. M. Robertson, ka Lunakanawai o ka Aha Kiekie, e Kaomea, no ka hooiaio i na Palapala Kauoha o KUAE, o Honolulu, Oahu, i make aku nei; Nolaila, ua hoikeia i na kanaka a pau loa, ke pili, o ka Poaono, oia la la 10 o Mei, i ka hora 9 o kakahiaka, oia la ka a me ka hora i oleloia, no ka hoolohe i ka oiaio o keia Palapala Kauoha, a ma keia noi ana mai, a me na mea hoole i hoikeia, aia ma ka Hale Hookolokolo ma Honolulu, Oahu.
JNO. E. BARNARD.
Kakauolelo o ka Aha Kiekie.
Honolulu, Oahu, Aper. 28, 1862. 23-1t
OLELO HOOLAHA.
NO KA MEA, UA NOIIA MAI KA MEA HANOHANO o G. M. Robertson, ka Lunakanawai o ka Aha Kiekie, e KAIMULOA, no ka hooiaio ia ia i na Palapala Kauoha o Kahui, o Honolulu, i make aku nei; Nolaila, ua hoikeia i na kanaka a pau loa, ke pili, o ka Poalua, oia ka la 7 o Mei, i ka hora o 9 kakahiaka, oia ka la a me ka hora i oleloia no ka hoolohe i ka oiaio o keia noi ana mai, a me na mea hoole i hoikeia, aia ma ka Hale Hookolokolo ma Honolulu, Oahu.
JNO. E. BARNARD.
Kakauolelo o ka Aha Kiekie.
Honolulu, Oahu, Mei 1, 1862. 23-1t
OLELO HOOLAHA.
E IKE AUANEI NA KANAKA A PAU MA keia Aupuni, ua hoopauia ka noho Luna Hana ana o AKO (Pake,) ma ko maua aina mahiai, ma Amauulu, Hilo, Hawaii, ma ka la 4 o Aperila nei. A ua lilo o AKANA (Pake) a me AKANA liilii (Pake,) na Luna ma kona wahi, a na laua no e hana oluolu aku i ka poe a pau e makemake ana e hana KU MAKAHIKI, a hana eka paha me ka uku maikaiia.
Eia hou—O ka poe a pau i mahuka aku e pono e hoi mai, aole lakou e hana ino ia'ku, o na Luna Hana hou a maua i koho aku nei, ua kauohaia e hana me ka oluolu loa i na kanaka paahana.
UTAI & AHEE
Honolulu, Aper. 28, 1862. 23-1m
HANA KAMAA LIO!
$1.50 WALE NO.
Mauka o ka Halewai, ma Alanui Alii.
E IKE NA KANAKA A PAU, UA MAKAUKAU au e Hana i na Kamaa, no na lio o ka poe e makemake ana i ko lakou mau wawae e paa i ke Kamaa Hao! ME KA EMI O KA UKU. Hookahi Dala me ka Hapalua! No na wawae mua, a i na pau na wawae eha, Ekolu Dala wale no! Eia kekahi, ua makaukau no hoi oia e hana i na mea a pau e pili ana i kana oihana no ka uku emi loa, oia no na hao kuni, kapilipili kaa, a pela aku. E hele mai e ikemaka no oukou iho.
WM. DUNCAN,
Honolulu, Oahu, Mei 1, 1862, 23-3m
AA MAMUA O NA MEA A PAU
MA KA
Hana Kamaa Lio!
UA MAKAUKAU KA MEA NONA KA inoa malalo, e hana i na KAMAA no na lio, me ka uku EMI LOA, oia hoi he Hookahi dala me hapalua! NO NA WAWAE MUA. A Ekolu hoi dala, no na wawae 4. Me ka Hana Mikioi aku. Aia ko'u wahi ma ke Alanui Alii, ma ka aoao ma Ewa o ka hele noho o John H. Brown, Makai Nui o Oahu. E hele mai na kanaka a pau. D. J. STEWART.
Honolulu, Oahu, Mei 1, 1862. 23-1m
OLELO HOOLAHA.
E IKE NA KANAKA A PAU, OWAU O Awahua. ka mea nona ka inoa malalo nei. Ua kapu o'u Aina,
O Onouli, a me Keopu,
Ke kuleana i Kaawaloa maikai, a me ke alanui halihali waiwai a Kanaina i hoolimalima ai, a me kuu Aina iloko o Kealakekua. Ua kapu na holoholona komo hewa.
LIO.
HOKI.
MIULA.
PUAA.
KAO.
BIPI.
KEKAKE.
Aole kii wale na kanaka i na mea a pau e ulu ana i luna o ka aina a pau.
ULU,
HAU.
OHIA,
ULEI.
KUKUI,
PILI.
HALA.
LAUHALA,
PEPEIAO LAAU.
Mai uka a hiki i kahakai, a me na lihi aina i lawe ole ia e na haole.
J. AWAHUA
Mei 1, 1862. 23-1t*
HALE KUAI MAKEPONO.
MANUAHI LAUNAOLE
AIA MA KE ALO O KA LOIALA HOTELE, ma ke kihi o ke Alanui Nuuanu me ke Alanui Manini. E loaa'i na hale
MAKEPONO LOA.
o na ano a pau. He nui loa ka AILA manuahi ma ia Hale Kuai. E hele mai e nana no oukou iho, e na makamaka kanaka maoli a pau. A e kuai aku no au me ka maikai, a me ke ku i ko oukou makemake. KALE. (Charles Brenig)
Honolulu, Aperila 24, 1862. 22-3m*
PALENA! PALAOA!
A ME KA
Aila Kukui Makepono.
E IKE NA KANAKA A PAU. UA MAKAUkau au ka mea nona ka inoa malalo nei, e kuai aku i ka
Palena, Palaoa, a me ka Meaono.
maikai loa, ma ko'u Hale Kuai, ma ke kihi o ke Alanui Hotele me ke Alanui Maunakea, mauka iki ae o Lepekahoe. Me ka manuahi. He Aila Kukui maikai loa kekahi ma ko'u Hale Kuai nei, he emi loa ke kumukuai.
G. WILIHEMA.
Honolulu, Aperila 25, 1862. 22-3m*
HALE HANA KAMAA!
KE HAI AKU NEI KA MEA NONA inoa malalo, me ka mahalo i kona makamaka a me ka lehulehu no a pau, i kona makaukau e hana i na
Kamaa Buti a me Kamaa Maoli.
o na ano a pau, me ka maikai, a me ka mikioi. A no ka mea, ua makaukau oia i na mea a pau e pili ana i ka hana i na Kamaa Maikai Loa, Nolaila, ua hilinai oia i ka hiki ia ia ke hana'ku i na mea ku i ka makemake o ka poe a pau e oluolu ana e hele aku i kona wahi, mauka iho o Waialeale. Ma ke Alanui Hotele.
GEO. CLARK.
Honolulu, Aperila 24,1862. 22-3m
I NA KANAKA
O KO
HAWAII PAE AINA !
KE HOIHOI AKU NEI AU I ALOHA NO ka lokomaikai a oukou i haawi mai ia'u iloko o na makahiki he umikumamakahi i kaa hope ae, a e koi aku hoi ia oukou e hele mai e kuai. Ua hooili aku nei au ma ka moku Cometa mai keia wahi aku, he mau WAIWAI HOU no ka
Hale Kuai Nalomeli!
Ua manao au e makemake nui ana oukou i kekahi o na mea a'u i hooili aku nei. E holo ana au mai anei aku i keia la ma ka
Golden Age:
Ahiki i Nu Ioka, he 2200 ka nui o na tona o keia moku. Ma ia hope aku, e holo loa ana au i Enelani, a me Secotia, a malia paha o hala loa au i Farani, e kuai ai i mau lole a me na waiwai hou no oukou. E hooikaika ana au e imi i na mea i ike mua ole ia e oukou, me ka hooikaika e hooluolu ia oukou, a e imi hoi i ke dala mai a oukou mai.
Ua lawa ko'u manao e ike i kekahi mau mea hou ma ka hoike makahiki nui, a i na au e hiki aku, e hai no au i na mea a pau a'u i ike ai.
Mai poina i ko oukou manawa e makemake ai i na palule o na ano a pau, na koloka, na papale, na papale oo aa, na holoku maikai, a me na hulu maikai, a oukou i ike ole ai mamua, a me na waiwai e ae he nui wale. E na makamaka, e hele mai e kuai ma ka
Hale Kuai Nalomeli.
Aloha oukou a pau loa.
JOHN THOS. WATERHOUSE.
Kapalakiko, Aperila 1, 1862. 22-3m
Olelo Hoolaha.
UA KAPU NA HOLOHOLONA KOMO wale ma ko'u Aina Kuai, e waiho la ma
Kukuiopae elua,
Kona Hema, Hawaii. Aole komo ka
BIPI,
LIO.
HOKI.
HIPA.
KAO,
KEKAKE.
A me ka Puaa.
Ina i komo kekahi o keia mau holoholona i haiia maluna, he hapawalu dala maoli kauku, no ke poo hookahi, o ka Bipi, Lio, Hoki. Hipa, Kao, Kekake, a me ka Puaa, he hapaumi kauku pakahi. Ina hoopoino lakou na mea kanu, e uku no e like me ka poino, ina uku ole mai, e hoopii no wau e like me ke Kanawai. J. W. MAELE
Kukuiopae, Kona, Hawaii, Mar. 18, 1862. 21-1m
Olelo Hoolaha.
E IKE AUANEI NA KANAKA A PAU. ma keia Olelo Hoolaha. Ua haalele mai ka'u wahine mare ia'u, oia hoi
O Kapoluhi,
aia keia me kana kane manuahi, me Huaailani owau hoi o kana kane i mare ponoia ma ke Kanawai o ka Aina, imua o Iokewe. Kahuna Pope. Ua kekuia mai au. nolaila, aole au e hookaa ana i kona mau AIE a pau ma keia hope aku, i na e hoaie kekahi ia ia, maluna no o oukou iho ko oukou poho. Me ke aloha.
Owau no me ka mahalo, S. KUI.
Paalaa. Waialua, Aper. 25, 1862. 22-1m*
MANUAHI, MANUAHI
E IKE OUKOU E NA KANAKA a pau eia ma ko'u Hale Kuai Bipi, ma
Ulakoheo,
Na io bipi momona loa o na bipi kupaluia a pau o na kuaaina mai, i laweia mai ma ko'u
HALE KUAI BIPI,
a he manuahi loa ke kuai ana. Maanei wale no ke keu o na Io Bipi Momona, Waliwali, a Palupalu hoi,
O na io ma ka ai ana iho, aole hoohalahala iki ka puu i ka on oia mau mea, E hiki ia'u ke kuai aku ma ka paona, a me ke
KUAI MANUAHI,
me ka paona ole. Pono oukou ke hele nui mai e kuai me a'u, i ike io oukou i ka oiaio o na olelo maluna. Ua loihi loa ko'u noho ana ma keia oihana, no kuu aloha loa i na keiki a me ka lehulehu a pau o ke Kaona, a me keia Mokupuni okoa, a no ka pono o ka poe ma ka moana a me ko na aina e, a ua kamaaina loa au ia oukou. E hele nui mai oukou oiai au e noho ana i Kuene na oukou. E wiki mai oukou.
J. W. KAIKAINAHAOLE.
Honolulu, Aperila 25, 1862 22 tf
OLELO Hoolaha.
OWAU O Akahi, KA MEA NONA KA inoa malalo nei. E ike na kanaka a pau: ua hoi mai
O Kaiko,
mai ka palena makai a hiki i ka palena mauka, aohe aina kuai o ka haole i koe, ua hoi mai, eia me a'u; ua komo au iloko o ka
Hale Hoona Kuleana,
ua hana hoi me ka Mea Hanohano, a na hooiaio ia no'u.
Na AKAHI.
Kaoaopa, Oahu, Aper. 25, 1862. 22-4t
PA AUPUNI MA KUALOA.
NO KA MEA, UA KOHOIA MAI mana i mau Luna no ka pa holoholona hele hewa, e ka mea Hanohano M. Kekuanaoa, Kiaaina o Oahu, ke hoolaha aka nei maua, aia ka pa ma Kualoa, Koolaupoko, ua makaukau maua e hana e like me ke Kanawai.
JUDD A me WILDER.
Honolulu, Maraki 1, 1862. 19-3m
AINA KUAI MAKEPONO.
HOOKAHI HANERI EKA AINA KULA ME ekolu eka aina kalo, e kuai makepono ia aku i ka
poe e makemake mai ana, aia ma ka Apana o Waialua, Oahu. E loaa no wau ia oukou, ma ka aoao ma Ewa o ka hale kahiko o Hooliliamanu, ma Honolulu, Oahu. E ninau ia
R. E. WAKEMAN, (Lapaki.)
Honolulu, Aperila 10,1862. 20-lm
Olelo Hoolaha.
E IKE AUANEI NA KANAKA A pau, owau o ka mea nona ka inoa malalo iho; ke makemake nei au e kuai lilo aku i kuu mau Kuleana Aina elua, aia ma Waiohinu, Kau, Hawaii. Apana akahi,
O Kaohe,
ka inoa nona ke kumukuai $500, oia hoi 2 1/2 eka. Apana elua,
O Waimalino,
ka inoa nona ke kumukuai $300, oia hoi 2 1/2 eka. O na kanaka a pau e makemake ana e kuai mai, e hele mai lakou a loaa wau ma ka Pa o Akahi, ma Honolulu nei. Peia nohoi na haole e makemake ana, a i ole ia, e loaa no au ma Waiohinu, i Kau Hawaii, i ka malama o Augate, 1862.
J. D. KANUHA.
Honolulu, Oahu, Aperila 23, 1862. 22-1m*
ILI BIPI, ILI BIPI.
INA OUKOU E MAKEMAKE E KUAI AKU I KA OUKOU mau ILI BIPI,ME KA MAKEPONO LOA.E LAWE MAI IA ADAMU, KA HAOLE KUAI ILI BIPI. MA KONA WAHI, MAKAI IHO O KA HOME LUINA.
E. P. ADAMS.
Honolulu, Aperila 10. 1862. 20-3m
OLELO HOOLAHA.
MAI KEIA LA AKU, MAI HOAIE MAI kekahi i ka'u wahine mare,
IA KAPEHE.
Aole au e hookaa ana i kona mau AIE ma keia hope aku.
KOKA PAKE.
Kalihikai. Kauai, Aper. 8. 1862. 2l-lm
OLELO HOOLAHA.
KA POE JURE KANAKA MAOLI NO KA Aha Hookolokolo Kaapuni, ma ka Apana eha, ma
Nawiliwili, Kauai,
E hoomaka ana i ka Poakolu, oia ka la 6 o Mei, M. H. l862.
Luka no Koloa, Kekaau no Mana, Kahaamaikai no Hanapepe, Kekoa no Koloa, Huluili no Lihue, Keaumaikai no Koloa, Solomona no Lihue, Hepa no Lihue, Kapa no Koloa, Meheula no Koloa, Kawaiku no Mana, Malama no Lihue, Pahikaua no Mana, S. Kaikuaana no Mana, Kaikuahine no Koloa, Naniho no Lihue, Keopu no Lihue, Maewa no Lihue, Elekai no Lihue, Paoa no Koloa, Ainoa no Lihue, Apolo no Koloa. JNO. E. BARNARD. Kakauolelo o ka Aha Kiekie. Honolulu, Aper. 14, 1862. 21-3t
OLELO HOOLAHA.
KE HOIKEIA AKU NEI I KA POE a pau, ina e loaa na Lio a me na holoholona e ae, e hele wale ana makai o
AINA HOU!
ma keia hope aku, e hopuia no, no ke komohewa, a e laweia ma ka PA AUPUNI, e like me ke Kanawa. Ma ke kauoha a ke Keena Kalaiaina.
R. A. S. WOOD.
Luna o na Hana Hou.
Keena o na Hana Hou, Honolulu, Aper. 18, 1862. 21-3t
BUTI & KAMAA MAOLI!
BOOTS AND SHOES
25
YEARS
NO KE KAMAAINA O KA MEA NONA KA INOA malalo, ke manao nei oia e wae ae i na mea e lawa'i o na ANO KAMAA a pau i oi ka maikai mamua o na Kamaa e ae ma ke Kaona o Honolulu nei. A ua loaa mai ma na moku (Artic, a me George Washington, mai Kapalakiko mai. E kuai ia aku no ma ke KUMUKUAI MAKEPONO LOA. Aia ma kou wahi kahiko ma ka HALE UINIHEPA. Ma ke kihi o ke Alanui Kalepa me Alanui Papu.
J. H. WOOD.
Honolulu, Aperila 11, 1862. 20-1m
KAMANO! KAMANO!!
1050 PAHU KAMANO MAIKAI LOA i loaa mai nei. A e kuaiia aku e like me ka makemake o ka poe kuai mai. Ma kahi o 20-3m. H. HACKFELD & Co. (KALEMA.)
OLELO HOOLAHA,
HANA KAMAA LIO!
O KA POE E MAKEMAKE ANA E hana i Kamaa no ko lakou mau Lio, e pono ke hele mai ma ko'u Hale Hana Kamaa Lio, ma ka aoao ma Ewa o ka hale o Kale Kamana mamua, ma ke kihi o ke Alanui Alii me Mauna Kea. Malaila no au e noho makaukau mau ai,
E Hana Mikioi aku!
I na KAMAA no na Lio, o ka poe a pau e makemake ana i mea e Lai ai ko lakou mau Lio ma ke Kaona nei, e hele koke mai. Me ka uku haahaa.
J. MAPE, (Amala.)
Honolulu, Aperila 10, 1862. 20-4t
MAKEMAKEIA
ILIBIPI, ILIKAO, a me ke KELEAWE kahiko. UA MAKEMAKEIA NA MEA I HAIIA maluna e C. Brewer & Co, (Burua ma) ma ko laua Hale Kuai i kai o ka Uapo. E uku no laua i ke kumukuai makepono no ia mau mea. 20-3m. C. BREWER & Co.
OLELO HOOLAHA,
E IKE AUANEI NA KANAKA, NA PAKE,a me na Haole Waiwai o kela ano keia ano. Ke papa aku nei au ia oukou, mai hoaie mai oukou i ka'u wahine mare oHaili kona inoa. No ka mea, ua haalele kumu ole mai oia ia'u nolaila, o ka mea hoaie ia ia, maluna ona ko oukou poho. Eia kekahi, aole loa au e hookaa i kana mau aie mai ka makahiki 1853, a hiki i keia la a'u e hoolaha nei ma ke akea, a pela no hoi ma keia hope aku, a mau loa aku.
L. KAMALIMALI.
Kaauhulu, Ham., Hawaii, Mar. 27, 1862. 19-lm
LALA MANO
A ME KA
Pepeiao Laau.
KE MAKEMAKE NEI NA MEA nona na inoa malalo, e kuai i ka Lala Mano a me ka Pepeiao Laau. Me ka uku aku i ke kumukuai make pono penei : No ka paona hookahi o ka Lala Mano, he 15 keneta. No ka Pepeiao LAAU, 8 keneta no ka paona hookahi.
O ka poe e loaa'na na mea i haiia maluna, e pono e hele mai ma ko makou hale kuai, ma ke Alanui Alii, e pili ana ma ka aoao komohana o ko Daimana ma Hale Kuai.
19-3m UTAI A ME AHEE