Ka Nupepa Kuokoa, Volume III, Number 10, 5 March 1864 — He Oiaio ia Manao. [ARTICLE]

He Oiaio ia Manao.

E ka Nupepa Kuokoa e; Aloha oe: - Ua kapalili maikai mai ko'u akeniau, ame ka hoihoi nui loa mai o ke akemama no na huaolelo a ko kakou makamaka a W. Pinehasa Wood, e paipai mai ana i kona mau hoa, oiai he mau waha olelo lakou no na makaainana iloko o ke kau Ahaolelo kau Kanawai o ko Hāwaii nei Pae Aina e hiki mai ana. Penei ka mea i nui loa mai ai o ko'u hoihoi ame ka olioli no hoi.

Eia no ia : O kana olelo kauoha i kona mau hoa Lunamakaainana i kohoia iho nei no keia makahiki, mai ka la kiei mai ma Kumukahi, a ka la lawe a Kanoa i ke kai o Lehua. Eia no kana olelo kauoha i kona mau hoa, " E pono ia kakou e na mea i kohoia iho nei i waha olelo no ka lehulehu no keia kau Ahaolelo e hiki mai ana, e hui mua aku kakou me na makaainana o ko kakou mau apana i kohoia iho nei i mau Lunamakaainana kakou nana e noonoo i na mea kupono, a ina manao kupono ole e haiia mai imua o kakou, a i hiki hoi ia kakou ke wehewehe pono aku i ke ano o kela ame keia. He oiaio no ia, pela io ko'u manao, no ka mea, i ka lani no ka ua, waele e no ke pulu o lalo nei. PeJa hoi keia, mamua e hui e ai kakou, o oukou o na Lunamakaainana, a o makou hoi o na makaainana, hui pu kakou kamailio i na mea kupono, o noho auanei kakou a loaa mai i ka olelo a Solomona, penei: " Hilihewa ka manao ke ole ke kuka." He oiaio no ia, aka, ina he oluolu ka makou mau Lunamakaainana e like me kou manao maikai la, alaila pono, no ka mea, he nui loa no na mea i like ma ko W. Pinehasa Wood manao, o ko makou apana o Honolaiu nei, mai Maunalua, a Moanalua. Eia nae, aole he wehewehe iki mai o ua poe maua nei, eia iho ia no paha ko lakou manao, ua pono iho la no makou, hookahi a makou mea nana aku o ka hiki mai o ke kau Aha-

olelo, he mau poheo ka makou o ka pule. Ina pela ea ? Ahea hemo ae keia mau pilikia, ame keia kaumaha? A auhea ko oukou mea i lilo ai i mau Lunamakaainana? Aia anei malalo o ka puu dala; ina pela, aole pono ke ku mumule, a nana i ua puu dala la. Eia no ka pono io maoli, e kuikahi mai ka manao o oukou e like me ko W. P. W., o hele mai a Maunalua, a Wailupe, Waikiki, a holo loa aku i Moanalua ; a pela hoi ko Ewa, Waialua, ame Hauula; a pela no hoi ko Kauai, Hawaii, Maui, ame Molokai, a pela aku. Ina pela ka oluolu like o ko oukou manao, alaila, e ola auanei ka lahuikanaka ame Aliiolani Kamehameha V., i na aole oukou e hana pela, alaila, nalowale na manao maikai e ae a pau, a lilo i mea ole loa. Me ka mahalo. W. H. Mana, Kakaoko, Honolulu, Oahu, Feb. 15, 1864.