Ka Nupepa Kuokoa, Volume III, Number 48, 26 November 1864 — Page 4
| This text was transcribed by: | James Kirkendall |
| This work is dedicated to: | Mohala Hou Foundation |
Ka Nupepa Kuokoa
KE KILOHANA POOKELA NO KA LAHUI HAWAII.
(No Ke Kuokoa)
Honolulu, Nov. 26, 1864.
LUNA HOOPONOPONO: - Aloha oe;
I ko makou wa i lohe mai ai, ua make iho ka Bila e ae ana i ka haawi ana o na wai ona i kanaka, mea e ke kapalili ana o na pana o ko makou mau puuwai i ka olioli, a aole no hoi paha e hiki ia makou ke hai waha aku no ia mea; aka ua olelo nae kahi poe "he mea ma kehewa ka ae ia ana o ke Puhi Rama ma Hawaii nei, ke ole e inu ia ma kona wahi i hanaia ai." Pela io no paha, aka aole i kukulu ae o Beritania, o Amerika, a me na Aupuni nui, i na hale Puhi Rama i mea wale no na ko lakou mau puu e kani, aole oia ko lakou kumu nui i hana ai ia mea, aka no ka waiwai e loaa mai ana ma ia mea. Heaha la ka poino, a me na pilihua e loaa ia kakou ma ka inu ole ana i ko kakou mau rama i puhi ai? Manao anei kakou e ilihune kakou ma ka aua ia ana o na rama i puhi ia ai ma ko kakou mau ipuka a hale?
Aka ua olelo no nae kahi poe, "ua hoohaahaa ia kakou, ma ko kakou aina nei no ku ae lanakila ole ia o kakou, e hele aku imua o ka pa kuai rama, a e kahea aku i kiaha rama, me ka haaheo, a me ka manao iho hoi o ka aina malalo o ko kakou mau kapuni, no kakou ia; a ma ia ae ole ia ana aole kakou e make maluna o ka papa hele hookahi me ka ili keokeo;" aka ke hai aku nei makou, mai loko loa mai o na keena pouliuli loa o ko makou mau naau, ua oi loa ae kakou mamua o ka poe ili keokeo, no ka loaa ole ana mai o ke hiaha wai make ia kakou. He mea keia na kakou e haaheo ai, mai na aupuni ae a pau o ka honua nei. Ina kakou e hele aku ma kekahi mau Aupuni a malaila paha kakou e halawai ai, me kekahi poe i ike, aole he haawina ia o ka rama ia kaua e ke kanake Hawaii, ma ko kaua one nei, a olelo mai paha lakou, "ka! ma kou aina aole oe i ae ia e inu i wahi kiaha rama." Aole auanei kakou e haaheo no keia mea, oiai ua kau aku la maluna o ka manao o kela mea, keia mea, he poe kakou aole i maa ia mau hana.
Aole anei kakou e haaheo e Hawaii nei, no ko kakou lilo ana i (ihoiho kukui,) e hai ana o ka rama he mea poino, no ke kanaka, a nolaila i hooholoia ai e ko kakou mau Kanawai, aole kakou e hamohamo aku i ka heu oia kiaha make. He kiaha nana e lawe aku i ka palule hope o ko kakou mau wahi kua, ke kiaha nana e lawe aku i ka palekoki hope loa o kou wahi puali, a ke kiaha hoi nana e alako aku ia kakou i kela ipuka a hale, keia ipuka a hale, e makilo. Aoe auanei keia he mea na na pua hai wale o Hawaii nei e haaheo ai? Aole anei kakou i oi aku mamua o ka poe nana i lawe mua mai i ka rama i ko kakou mau kapakai nei? Aole anei kakou i oi loa aku, mamua o na aina, nana i haawi mai ia kakou i ka malamalama, a i ae ai hoi kakou, no kakou ka lewa honua o lalo nei? Aka me he mea la, mai ia kakou nei e lawe ia aku ai ke ao ana aku, no keia mea, a ma keia mea hoi ua oi ae kakou, maluna o ka pono kaulike i haawi ia mai ia kakou.
Ua oleloia hoi kakou, ua hoohaahaa loa ia kakou, ma ko kakou hele ana mahope, ma kahi o na aina moka e inu ai i kahi kiaha me ka hopuhopualulu, o ike ia mai e na maka o ke Kanawai, o lalau ia mai auanei ka poe e haawi mai ana ia kakou i ke hiaha, a lawe ia aku, e polukuluku ia mai e ka hamare oolea o ke Kanawai. A nowai ia hewa? No kakou no. Ke olelo nei no makou o na koina a ke Kanawai, i kau ai maluna oia poe, aole i nui; no ka mea ua uhaki oia i ka olelo ae like mawaena o ke Aupuni, a me ia, aka aole oia wale no, ua kono aku oia i ke kino, a me ka uhane, i ka palaho o ka oia mau. Ina e ae ia ka inu ana o ka rama ma Hawaii nei, e nui auanei na "Home Paredaiso," e hoolilo ia i mau (kio opilopilo no na puaa,) aole hoi e pa-e hou na leo oluolu o ka makuahine malaila, aole hoi ka leo nonoi o ke keiki, aka, o ke ke-u ana o na alae holoholopinaau o ke aumoe, a me na kani hoonaikola a na (pueo,) ke lohe ia malaila. E nui no hoi na wahine no lakou na houpo i hakahaka i ka pololi, a me na keiki hele kuewa me ka (malo ole.) He makehewa paha ia makou, ke helu aku i na ino, oia mea ke ae ia mai, oiai ua ike maka no paha kakou i na tausani i hala aku mamua.
I keia wa ua hoopuka ae o Beritania i kekahi kanawai e hooholo ia, aole e haawiia ka rama i na kanaka, a no ke aha la ke kumu ona i manao ai e hana i kanawai like me ia. I ko makou manao aku, no ka ikeia o ka ino oia haua, a no ka pomaikai ole no hoi e loaa mai ma ia mea; a ina no paha e olelo mai paha kahi poe, heaha no hoi ka waiwai o ka rama ke ole e inu ia e ke ao nei, aka, aia ilaila ka pomaikai nui loa. Ina e haalele ke ao nei a pau i ka inu rama, aliala, e hooke-ke ole anei ka noho ana o ke kane me ka wahine, a pololi ole hoi ka ohua o ka hale, a kaniuhu ole hoi na keiki; aole no hoi e hooneoneoia na ohana i na makuakane ole, a o na wahine hoi i poe kane ole.
Manao hai aku i na mea
A PAU NO KE POO OLE O KA LAKOU MAU LETA.
---------
E KA NUPEPA KUOKOA E; ALOHA OE: E oluolu paha oe e hookomo iho e ka Luna Hooponopono i keia wahi manao ma kahi kaawale o kou kino holookoa, i keia kumumanao e kau kehakeha ae la maluna. Eia no ia, "Manao hai aku i na mea a pau no ke poo ole o ka lakou mau leta," e lawe mai nei maloko o ka rumi leta nei.
Nolaila, ke hai aku nei au i na mea a pau, mai lawe wale mai oukou i ka oukou mau palapala maloko nei, ke nele i ke poo leta ole, i na e loaa ke poo leta, e hiki pono ana no ka oukou mau palapala i ko oukou wahi i makemake ai e hoouna aku; a ina aohe poo o ka oukou mau palapala, aole no e hiki pono ana i ka oukou wahi i makemake ai ka oukou mau leta. E pono e kuni mua oukou i na poo leta a loaa, i ole e hoomoe ia ka oukou mau leta ma ka papa, no ka mea, he nui loa na leta a oukou e hoomoeia nei ma ka papa, no ke poo leta ole.
Eia hoi kekahi, mai hoopili hou mai oukou i ke poo leta kahiko i kuniia i ka mea eleele, a i kahakahaia paha, i na oukou e hoopaa mamuli o ko oukou manao, a ina e ikeia ka mea nana ua palapala la i kauia i ke poo kahiko, e ukuia ana no ia e like me kana hana kolohe ana.
Oia la me ka mahalo,
P. W. KAWAILIPOLANI.
Kaopuaua, Honolulu, Nov. 22, 1864.
O Ka Moeuhane,
OIA ANEI KA HELE ANA O KA UHANE MAILOKO AKU O KE KINO.
E KA NUPEPA KUOKOA E; Aloha oe: E oluolu no oe e ka Luna Hooponopono ame ka poe lawelawe e hookomo iho i keia wahi ukana ma kahi kaawale o ka Nupepa Kuokoa.
He like ole ka manao o na kanaka a pau no keia mea. O ka manao o na kanaka a pau ma Hawaii nei, ua manao lakou ua hele maoli no ka uhane mai ke kino aku; a pela no hoi ko'u manao, ua hele io no ka uhane mai ke kino aku; aka, i keia wa, ua hookahuliia ko'u manao, a ke manao nei au i keia wa, aole i hele ka uhane mai ke kino aku.
Eia kekahi mau mea i hookahuliia ai ko'u manao, o ko'u ike maoli ana ma ka moeuhane i ka halawai ana o ko'u uhane me kekahi o ko'u mau hoa'loha, uwe nui au me lakou, a i ke ala ana ae, aia no ma ko'u mau maka na waimaka. Ina ma Waihu kahi e uwe ai ka uhane, aia no na waimaka ma ka maka o ke kino e moe ana ma Honokohau, nolaila, aole i hele ka uhane mai ke kino aku.
Eia hoi, i ka nana ano ma ka Baibala, Iakobo 2:26, "Oiaio no, o ke kino uhane ole, ua make no ia," aka, aole make iki o ke kino i ka wa e moeuhane ana, e hanu mau ana no, a e mahana mau ana no, aka, o ka mea uhane ole, ua make, ua anuanu, ua lohe ole, a ua oni ole, a nolaila, aole i hele ka uhane mai ke kino aku. A ke manao nei au, o ka moeuhane, oia no ke kamailio ana o ka uhane i ka wa e ala ana, ua kapaia he kuko; a o ke kuka o ka uhane i ka wa e hiamoe ai, ua kapaia he moeuhane, a o ke kuko a me ka moeuhane, hookahi no ia. Eia na mea e maopopo ai ka like ana o ke kuko me ka moeuhane.
1. Ua like loa ko laua mama: I ka wa e naue ana kekahi, ua like aku la na manao i Oahu, a i Kauai paha, me ka holo ole o ka manao maluna o kekahi mea kino lana; pela no hoi ka moeuhane, aole i holo ka uhane ma ka moku, ua hiki aku nae i Oahu. Pela ka hoi ana mai, ua hiki wawe loa e like me ka puiwa ana i ka wa e kuko ai; a pela no ka hoi ana mai o ka moeuhane, ua ano like loa ko laua mama ke hele a ke hoi mai.
2. Ua like loa ka nalowale koke ana: O na mea a pau i kukoia i ka la hookahi ua pau loa ka nui i ka nalowale, uuku loa ke koena; pela no hoi na mea a pau i ikeia ma ka moeuhane, a i ke ala ana ae, a noonoo i na mea ana i moeuhane ai, ua pau ka nui i ka nalowale, a o na mea i koe ua hapa loa.
3. O na mea a pau i manao nuiia, a i kuko nuiia, oia no na mea e loaa nui ma ka moeuhane: No ka mea, e mau ana no ke kuko ma na mea ana i manao nui ai, a i ka hiamoe ana, hana mau no ka uhane malaila, no ka me, aole e hiamoe ka uhane, o ke kino wale no; aka, ua nui na moeuhane i like ole me na kuko o ke ao, pela io no, no ka mea, aole mau ke kuko o ka uhane ma ka mea hookahi, ua holo i o ianei.
4. He mea io ole ka nui o na moeuhane ame na kuko: Nui na mea i kukoia i ka wa e ala ana, a lilo koke i mea ole, me he ao ua ole la ma ka lewa, a puhi ia aku la ka makani o ka nalowale koke no ia; a pela no hoi na moeuhane, a ua lilo ka nui i mea ole, kakaikahi na mea io e like me na kuko i hookoia, pela na moeuhane io, na ke Akua no i hoike mai i ke kanaka. A ke manao maopopo nei au, aole i hele ka uhane mai ke kino aku; a iua ua hewa keia kamailio ana mai keke mai. Me ke aloha.
S. K. POIKAOHU.
Ia Z. P. Poliala.
-------
Auhea oe e Poliala, he wahi ninau pokole ka'u ia oe; no ko'u heluhelu ana iloko o ka Nupepa Kuokoa. He eha mau ano Hoomana i komo mai i keia Aupuni ma Hawaii nei, oia hoi keia:
1. O ka Hoomana Kiristiano Kalavina.
2. O ka Hoomana Kiristiano Katolika.
3. O ka Hoomana Moremona.
4. O ka Hoomana Enelani.
A ke ninau aku nei au ia oe e Poliala, mai hea mai kela mau Hoomana? Ua kukulu anie o Iesu Kristo ia lakou a pau.
A ke ninau hou aku nei au ia oe, mai hea mai keia mau Hoomana, Kalavina, Katolika, Moremona, ame Enelani? Mai ia Iesu Kristo mai anei?
E oluolu mai anei oe e Poliala, Kahinalua, a me Hoku no hoi, a me ka poe naauao e ae no hoi, ua makemake au e hai mai, i ka hiki pololei ana o keia hoomana hou i kukuluia ma Peleula, ina he hoomana oiaio kela, makemake au e komo malaila.
1. Owai la kona kumu? Na Iesu Kristo no anei i kukulu?
2. Ehia la ona mau makahiki? E hai mai oukou me ka pololei loa.
Owau no R. HOLOHONUA.
Kulike ole ka hana
A KA MAKUAHINE KOLEA ME KA MAKUAHINE PONOI.
---------
E KA NUPEPA KUOKOA E; ALOHA OE:
Ke waiho aku nei au i ka'u wahi ukana imua ou, a nau hoi ia e lawe ko welo aku i keia wahi puolo ma na kihi eha o keia mau mokupuni.
Elua mea i ikeia ma keia kukulu manao ana, oia hoi ka makuahine kolea ame ka makuahine ponoi. No ka makuahine kolea, nolaila, e wehewehe mua aku au i kekahi ano o ka makuahine kolea, aia a maopopo, alaila, hoopili aku kana hana. Eia paha, ma Hawaii kahi kane, a no Kauai hoi kahi wahine, a hala paha kekahi manawa, ua halawai laua ma ka mare ana, oia hoi ua hoohiki paa laua imua o ke alo o Iehova malalo o kona kanawai, aole liuliu, loaa ia laua na keiki, a ina aole, oia no, a hala kekahi manawa o ko laua noho pu ana, a make iho la hoi kahi wahine, a koe hoi ke kane ame na keiki a luau, a mahope iho, mare iho la ua kane nei i wahine hou aku. A pela no hoi ka makuahine kolea, aka, aole i ka huliia ke ana kau malie o ko'u puuwai, no ka makuakane kolea no keia kukulu manao ana.
Ua maopopo iho la paha ke ano o ka makuahine kolea. I mai auanei paha kekahi poe ia'u, o ka manu e lele hoolai ana ma ke kula, i ano like me ke Ku ka nui, i kapaia kona inoa he Kolea, aole pela, ua oki oe e ka mea e manao ana pela, ame kou kuhihewa nui. Ua akaka aku la paha ke ano o ka makuahine kolea. Eia ka mea i koe, eia kana hana, o ke kuamuamu i na keiki a ke kane, i ka aihue ai, i ke ko, ai palamaunu, (o ke ano oia) o ka ai i ka mea mea kolo, i na he i-a, a ina hoi he mea e ae e hele aku ai i ka hookamakama a loaa mai, ai na keiki a ke kane, oia iho la ke ano, a he nui aku no na hana i koe.
Pela ko'u ike ana i kekahi kane me kana wahine, i ka wa i noho ai laua ame na keiki a ke kane, a holo ke kane he home e aku, noho iho la ua makuahine kolea nei, a hala kekahi paha mau la, ia wa, hoohakaka ua makuahine kolea nei me na keiki a ke kane. Eia nae ke kumu o ka hakaka ana, he loi ai na ua makuahine kolea nei, a kuai aku la no hoi ke keiki a ke kane i ua makuahine kolea nei, o ka laula o ua loi kalo nei, elima iwilei, a o ka loa hoi ua aneane like me na anana ekolu, a o ke kumukuai o ua loi kalo nei, he eha dala ($4.00,) me ka hoi no hoi o ka huli kalo i ua makuahine kolea nei, a i kekahi la ae, kii ua keiki nei a ke kane i ka ai e uhuki.
Ia manawa a ke keiki i uhuki ai i ua loi kalo nei, o ke kuamuamu aku la no hoi ia o ua makuahine kolea nei i ka aihue, me ka olelo aku, "He keu oe a ke keiki aihue i kuu ai?" A olelo mai la ke keiki a ke kane, "Kahaha! ua kuai aku nei no hoi wau ia oe," pane aku la ua makuahine kole nei, "I kou huhuki malu no hoi paha kekahi, oki loa hoi kuu huli ia oe?" Olelo mai la ua keiki nei, "Heaha hoi ke ino o ka huli, no ka mea, ua hana pono iho la no hoi au."
Alaila, helu mai la ua makuahine kolea nei, he keu no oe o ke keiki aihue i kekahi mea e ae, nau ka hoi ka aihue iho i kuu loi kalo ame kuu dala, ame na hana uko ole e ae a ua makuahine kolea nei, me ka hoohilahila nui.
Nolaila, auhea oukou e na kane ame na wahine, a i make ka oukou mau wahine, a koe iho kahi kane ame na keiki, mai noho a mare i ka wahine hou aku, hoa-a na keiki a lalau hele i kauhale e aku e koopilimeaai ai, i ke aha hoi? No ka pono ole o ka hana a ka makuahine kolea.
No ka makuahine pono, oia ke kane i mareia me kana wahine, a loaa ka laua mau keiki, a loaa ole paha, ua noho laua o loaa ka laua mau keiki, olelo aku kahi kane i kahi wahine, e kuai i wahi lole no ke keiki a kaua, ae mai la no hoi kahi wahine, a pela no hoi kahi kane, a ina e hele ka laua keiki i ka lealea me na hoa, a hoi mai i ka hale e ai, ai pu no me na hoa, a aohe hana aku a na makua i ka laua keiki; no ke aha hoi? No ka makua ponoi pela anei ka hana a ka makuahine kolea, aole, aole loa no he like pu o ka hana a ka makuahine kolea me ka makuahine ponoi, a pela aku.
Me ka mahalo no,
S. A. KAUAKAINUU.
OLELO HOOLAHA.
------------
NO KA MEA, UA NOIIA MAI KA MEA nona ka inoa malalo nei, e Kekahuna, no ke kohoia ana he Luna Hooponopono Waiwai no ka waiwai o KAWAHAOKAIA, no Puulani, Kaupo, Mokupuni o Maui, i make aku nei: Nolaila, ke hoikeia nei i na mea a pau, ke pili, o ka Poakolu, oia ka la 16 o Novemaba, M. H. 1864, i ka hora 10 o kakahiaka, oia ka la a me ka hora e hoolohe ia noi ana mai, a me na mea kue i hoike ia, aia ma Kumunui, Kaupo, kahi e hana ai.
ABR. FORNANDER,
Lunakanawai Kaapuni o ka Apana Elua.
Lahaina, Maui, Oka. 8, 1864.
HALE PAI KII.
MALUNA AE O KA KEENA PAI O KA
"Nupepa Kuokoa,"
Emi ka uku no ke kii. E paila no ke kii iluna o ke
ANIANI a me ka PEPA.
E hele mai e na makamaka e pai i ko oukou mau kii.
H. L. CHASE (Keiki.)
142-6m Mea Pai Kii.
A. W. B. NAHAKUALII,
He Loio! A he Kokua!
----------
AIA KONA KEENA OIHANA LOIO MA ka hale waiho Ipukukui Mahu, ma ke Alanui Maunakea, makai iho o Leberty Hall, (Lepekaholo.) Ua makuakau oia e hokua ia oukou ma na mea a pau a oukou e makemake ai e hoopii iloko o na Aha Hookolokolo a pau o keia Aupuni, ma na mea hiki ia ia ke kokua ia oukou, a ua makaukau oia e kakau i ko oukou mau Palapala, oia na Palapala Kuai, Palapala Hoolimalima, Palapala Moraki, Palapala Aelike, Palapala Hoolilo, Palapala Hoopaa, a me na palapala o keia ano keia ano, e hana no oia i na mea a pau e like me ko oukou makemake. A ke kahea aku nei oia ia oukou a pau, e kipa mua mai oukou i ona la, a mahope ia na Loio e ae. E ninau no ia ia, no ka uku oluolu.
Honolulu, Iulai 23, 1864. 140-6mt*
MANUAHI! MANUAHI!
---------
AIA MA KA HALEKUAI O Kililika, ma Wailuka, Maui, kahi e kuaiia ai o na mea o na ano a pau, e pili ana i ka Halekuai penei:
NA LOLE - o na ano, ame na waihooluu a pau.
NA BUKE HIMENI HAWAII - ano hou.
NA BUKE PAKEKE - hoomanao o na ano a pau.
Na Laau hoola maikai a Kauka Jayne, ame Kauka Ayers, e kupono ana i ka hoola ana i na mai o na ano a pau.
O KILILIKA ka Agena no Kakela ame Kuke ma ka mokupune o Maui.
E hele mai oukou e na makamaka a pau e nana i ko'u Halekuai, ame na mea maikai he nui wale maloko - E kipa mai no mai hoomake-e e na hoa o nei mau wai eha, ame keia aina houliuli o ka he kuawa. Ko oukou makamaka.
J. D. HAVEKOST (Kililika.)
Wailuku, Maui, Oka. 4, 1864.
KUAI MANUAHI!
--------
OWAU O AKAO (Pake.) NONA KA HAle Kuai Lole ma Waialua, mokupuni o Oahu, ke hai'ku nei au i na mea a pau ma Waialua nei ame Koolauloa, a kuai manuahi ana wau i keia mau la i na waiwai o kela ano keia ano o kuu Halekuai nei, me ke kumukuai makepono loa; hookahi kala ma ekolu hapaha wale no lawa ka holoku, a pela aku. Nolaila, e hele nui mai oukou, a e wawe mai hoi, o pau e auanei i ka poe hiki mua.
AKAO (Pake.)
Honolulu, Oahu, Nov. 9, 1864 155-2m*
OLELO HOOLAHA.
---------
OWAU O KA MEA NONA KA INOA malalo, ke papa aku nei au i na haole ame na kanaka maoli a pau, aole lakou e kua laau a oki wahie, aole hoi e hoa i ke ahi i ka mauu ame ka nahelehele, ma ko'u aina i kapaia o
PAAUHAU,
ame ko'u mau aina e ae e waiho ana ma ka Apana o Hamakua Hawaii - a ke papa nei no hoi au i ke ki ana i ka pu, a me ka hoohei ana, a i ka hoopaa ana ma kekahi ano e ae, i na Bipi e holo la ma ua mau aina la o'u, a ke papa nei no hoi au i ka poe komohewa i ke alualu Puaa a i ka ho-a ana i na Lio. A o ka mea a mau mea paha e kue ana i keia papa, alaila, e hoopii io oia imua o ka Aha Hookolokolo e like me na kanawai.
JOHN P. PARKER.
Manaaiole, Hamakua, Hawaii, Nov. 1, 1864. 156-2t
LAAU LAPAAU!
AIA MA KAHI O
KAKELA ME KUKE
Ma Honolulu.
J. T. GOWER, - Makawao, Maui.
J. D. HAVEKOST. - Wailuku, Maui.
C. H. WETMORE, - Hilo, Hawaii.
J. W. SMITH, - Koloa, Kauai.
HE LAAU KAHIKO, A HE MAOPOPO NO HOI.
Laau hoopau Naio me na Koe.
A DR. JAYNE.
HE NUI NA PILIKIA O KAMALII I KA Naio a me ke Koe, a pela hei na kanaka makua. O ka hope oia mau mea kolo, oia ka lolo. Oia mau mea kolo hope oia ka lolo, a o ka make hoi i kekahi manawa,a nolaila mai na mai e ae kekahi, e like me ka lepo paa, nalulu, pehu, uleule, a me na mai e ae.
O ka Laau no keia e pau ai ua mau mea ino nei.
Eia hoi kekahi. O ka laau ku pono keia i ka poe pilikia i ka wela o ka houpo; i ka ono ole i ka ai; i ka nawaliwali o ke kino; i ka mai pehu; i ka nalulu hoopailua; i ka pono ole o ka mai wahine, a me na mea like.
Penei no e inu ai i ka Laau hoopau Nalo me na Koe:
Ina no kamalii, e hanai aku i hookahi hapakolu o ka puna ki, i ka manawa hookahi no ke keiki malalo iho o ka makahiki hookahi. Mai ka makahiki hookahi a hiki i no makahiki ekolu, elua hapakolu o ka puna ka pono. Mailaila'e a i na makahiki eono, hookahi no puna okoa ka pono, a mailaila aku a i ka wa kanaka makua, e hanai i elua, a i ekolu paha puna i ka wa hookahi. I ka wa e inu ai, e hui i ka laau me ka pa ha o ka wai maoli. Ola hoi, ina hookahi ka puna laau, alaila, e huiia me na puna wai maoli eha; a pela no e inu ai ma ke kakahiaka, awakea a me ke ahiahi. Aka, i nui ka pilikia, alaila, pono no elima inu ana i ka la, penei; kakahiaka, kiekie ka la, awakea, auwi ka la, ahiahi.
E inu mamua o ka ai ana, aole kokoke mahope iho.
Laau hoopaa Hi a Dr. Jayne,
JAYNE'S CARMINATIVE BALSAM.
---------------
He laau maikei a oluolu hoi kela no ka Hi, ka Nahu, Nalulu, Wela o ka Houpo, Haoa, Hoopailua wale, Luni, Luai maku, ono olo i ka ai, Nahu me ka uwe no hoi o na keiki uuku, a me na mai like he nui.
Emo ole ka oluolu o ua mau mai nei i keia laau.
Penei e inu ai, i ka inu ana hookahi. Ina he keiki akahi paha ona malama, a elua paha he unikumamalua paha kulu a hiki i ka iwakalua ka pono.
Ina he keiki mai na malama eono a hiki i na malama ewalu, he hapalua puna ki ka pono. Mai ka makahiki hookani a hiki i elua, e inu no ia i puna ki okoa. Mai ka hiku a i ka walu o ka makahiki, elua puna ka pono, a no kanaka makua, he puna mui ka e inu ia i ka manawa hookahi.
A inu ea, e hui me ka wai maoli uuku, (a like a like ka wai me ka laau,) a pela e inua ae ai. Ekolu, eha elima paha inu ana i ka ia hookahi, e like me ka nui o ka pilikia.
I akaka nae. Ina he nui ka wela, a ina ua komo kekahi ai pono ole iloko o ka opu, e aho e moni e mamua i mau Hu'ale Ola, a i ole, e inu i wahi paakai, a i wahi aila paha, i hemo e ka mea ino oloko, alaila e inu i keia Laau hoopaa hi.
Ina e luai ka mea mai, mahope o ka inu ana i ka Laau, a pau a i ka luaiia, e hanai hou aku no e like me mamua: a pela no a pinepine, a oluolu hoi ko loko, a waiho malie no hoi ka laau ma ka opu.
Aohe a makou mea e noi aku ai i ka lehulehu, hookahi wale no o ke kauoha aku ia lakou e HOAO PONO i na Laau Kunu a Kauka Jayne, hoike aku ai i ke ola o na mea a pau i hoakakaia no kana mua aau. Ua hoola, a e hiki ana no ke hoola i ka mai KUNU, NAHU, a me ke ANU, a me na mai e ae no hoi he nai wale; a e na mai HOKII no h i ola nui, na mai i oia ole i na laau e ae. E aho e hoao oukou ka poe i mai ia.
HE KUHA KOKO ANEI KOU?
HE KUNU ANEI KOU?
HE EHA ANEI KOU KANIA-I?
HE KUNU UMI ANEI KOU me ka NAE?
AOLE ANEI HE KUNU OO OU?
AOLE ANEI OU MAI KUNU?
AOLE ANEI OU MAI NAENAE?
AOLE ANEI OU EHA MA KA umauma?
AOLE ANEI OU KUNU KALEA?
ALOLE ANEI OU HU MA KA iwiaoao
A ina ua loaa ia oe ia mau mai, alaila, e ike oe i ke ola i ka LAAU KUNU a Kauka Jayne.
NA MAI HOOPAILUA.
Mai o Ke Ake!
Mai Nalulu a me ka mai Dyspepsia.
(O ka nawaliwali o ka puu hoowali ai, iloko o ko kakou mau waihona ai.)
-------
He pono ke ai koke i ka laau a Huaale Ola a Kauka Jayne, he laau oluolu, a he ola no hoi. Aohe no he mai i nele ke makemake i na laau hoonaha; a mai nui no hoi ka poe e ola ana, me ka oluolu no hoi, iona e hoomaopopoia, a e inu ia no hoi ua mau laau la. Aole no e oluolu pono kekahi mea, oiai e inoino ana oloko o kona kino; a ua ulu nui ae no hoi ka mai, a i kekahi manawa ua make no, a ina e maiama pono ia a e inu hoi i na Huaale Naha, alaila, ola no. No ka hooiaio ia ana mai o keia mau mea, nolaila, ke hoolaha ia aku nei ka Huaale Ola a Dr. Jayne.
Me ka hiki ke hooia'ku i ka maikai, a na ka hoao ana i hoike maopopo mai i ka oi o ke ole o keia laau mamua o na laau e ae, a me ka maikai no hoi o ka inu ana, a me ke ole maoli no hoi. A ina no e inu ana ia laau, aole no he mau mea i hookapuia oia ka ai ana a me ka inu ana. Aole e ino ke waiho loihi, no ka mea, a hanaia no a maikai loa. A ina e inu ia ua hikiwawe loa ka hehee iloko o ka puu waiho ai. Ma ka inu ana ma ka haawina liilii, he maikai loa no ka naha ana, a he oluolu no hoi, a me ka holoi pau i ke ino oloko o ka opiu.
DISIPEPESIA,
(Oia ka mai ono ole o ka ai i kekahi manawa, a me ka hoowali pono ole ia hoi o ka ai iloko o ka puu moni ai.)
O keia Huaale Hoola a Kauka Jayne, he maikai loa no ka hooikaika ana ia mau oihana o ko kakou mau kino. Ina ua oihi loa ka mai ana, alaila, e hikiwawe ke ola ke inu puia ka Huaale me ka Laau Hoomaemae Koko o hoopau NAIO me na KOE, A Kauka JAYNE, e like me ka mea i kuhikuhiia mawaho o ka wahi o ka laau.
NO NA MAI MA KE AKE,
MAI LENA,
MAI MA KA OPU HANAWAI,
NA MAI WELA,
KA HAALULU,
KA MAI O KA ILI,
KOKO INO,
MAI NALULU,
PAA O KA LEPO,
MAI KUNA,
MAI WAHINE,
ame ka MAI HOOPAILUA.
Ua maopopo loa ke OLA o keia mau HUAALE. A o ka mea wale no i koe i ka lehulehu o ka hoao pono ia mau hua. A he maikai no hoi na laau a Kauka Jayne, no ka hoola ana i na mai
PUHA,
ALAALA,
KAOKAO,
PUUPUU,
PEHU,
KUNAKUNA,
Hanene, Lolo,
na mai wahine, a me na mai e ae, no ke KOKO a inoino mai no i kana LAAU HOOMAEMAE KOKO.
88-1y
THE
Commercial Advertiser
BOOK AND JOB
PRINTING
ESTABLISHMENT
Is acknowledged to possess
THE BEST ASSORTMENT
OF
JOB PRINTING TYPE
Of any other office
IN THE SANDWICH ISLANDS,
And is well adapted to the
SUPERIOR PRINTING!
OF
POSTERS!
OF ANY SIZE,
Either in
PLAIN
OR FANCY
COLORS;
Business, Visiting and Wedding Cards,
On a "YANKEE CARD PRESS."
BILL-HEADS,
Hotel Bills of Fare, Bll Tickets, Circulars, Envelopes, Lw Blanks, Receipts, On a New Ruggles' Job Press.
BOOKS, PAMPHLETS, MINISTERIAL REPORTS, LEGISLATIVE REPORTS, LAWYERS' BREIFS, CATALOGUES, PROGRAMMES, NEWSPAPERS, &c., &c., &c.
On an Adams' Power Press, in the most unsurpassable style of the art,
AND AT
BARELY LIVING PRICES!
Now on hand, a large stock of
SHEET CARDS & CARDS!
Of all kinds and sizes, suitable for BUSINESS, WEDDING, VISITING
And other purposes.
Having long enjoyed the confidence and patronage of the public, in our bisiness transactions, we take the opportunity to return our heart-felt thanks for past favors and respectfully ask a continuance of the same.
HENRY M. WHITNEY
Honolulu, 1864.
AINA KUDALA!
--------
E KUAI KUDALAIA ANA HE MAU HALE ame na AINA KALO me ka AINA KULA, ma kahi noho o Mr. Barnard, ma ka Poalua, Nov. 29, ma ka hora 12 awakea, he 81/4 eka aina, ame ka halenoho e nohola nei e Mr. Barnard, ame na eka aina kalo 4, e pili koke la no, he aina kupono no ke kanu Ko, Laiki, a me ka Pulupulu. Aohe kaumaha o ke kumukuai.
H. W. SERVEANCE (Sevarana.)
154-3t Luna Kudala.
OLELO HOOLAHA.
---------
NO KA MEA, UA NOIIA MAI KA MEA Hanohano G. M. Robertson, Lunakanawai o ka Aha Kiekie e Kahuena, no ka hookohu ia ia i Luna Hooponopono waiwai o KAOPA k, no Koolauloa, Oahu, i make aku nei. Nolaila, ua hoikeia i na kanaka a pau loa, ke pili, o ka Poaholu, oia ka la 23 o Novemaba, i ka hora 10 o kakahiaka, aka ka la a me ka hora i oleloia no ka hoolohe i ka oiaio o keia noi ana mai, a me na mea hoole i hoikeia, aia ma ka Hale Hookolokolo ma Honolulu, Oahu.
L. McCULLY,
Kakauolelo kokua o ka Aha Kiekie.
Honolulu, Nov. 7, 1864 156-2t
A. F. JUDD,
ALAPAKI, (oia ke keiki a Kauka,
LOIO!
---------
Ma ke kihi o ke Alanui Papu, a me Kalepa.
Honolulu, Oahe, Iune 30, 1864. 151-3m.