Ka Nupepa Kuokoa, Volume VI, Number 3, 19 January 1867 — KO'U HELE MALIHINI ANA. [ARTICLE]

KO'U HELE MALIHINI ANA.

HELU 2 He wahi mokupuni luhi, aia mawaho ae o Lae Rose, oia hoi ka lae Hikina o Berazila. O Feroanedo Narona kona inoa, a ua 180 paha mile kona kaawale mai ka aina aku. I laila kahi a makou i kalewa ai a pae iuka, e loaa ai kekahi mau pono. He pukiki wale no a me na negero ka nui o ku uka poe. He mokupuni neoneo, he nui na pali kahakai; a ua loaa kekahi mea ano e ma laila, oia hoi he lae pohaku e winiwini loa ana iluna me he kia la. Ua 800 kapuai ke kiekie o keia kia pohaku, ua oi loa ae mamua o Leahi a e ku mai nei, a me he aha la la ia puu ke nana ia mai ka moana mai. He ehuehu ko laila mau kai, aohe malie e like me ko na mokupuni o ka moana Pakifika, a nunui na ale ke popo mai, ma na lae pohaku ma lalo o ka ili kai, oiai aohe akoakoa o ia mau kahakai. Aohe no he hiki ia.makou ke kamailio pono aku i na kamaaina, aka ua kuana mai a lakou mai he mau hipa a he mau manu koloa, i mea e pono ai ka makou papaaina, aohe no i mahiai ia kela mokupuni e loaa ai na mea ulu ia makou. I ka nana'ku he inu waina ka puni o ko laila poe, oiai he poe koa no Berazila ka nui. Ua kokoke keia mokupuni i ka Poai Waena, mai laila aku he makani ka holo ana i ke Komohana akau e imi pololei ai ia Amerika Huipuia, no ka mea o ka makani, he makani kamaaina mai ka Hikina mai, a he lai ka holo ana o ia hapa o ka moana. I ke kokoke ana aku nae i Amerika Huipuia, a hala hoi ka latitu 32*, komo aku makou i keia wahi ino o ke Gulf Stream. He muliwai mai mehana ke ano o keia mawaena o ka moana mai ke kai kuono mai o Mekiko,—he au ikaika e kaa aku ana ika Akao. I laila loaa ia makou ka ino—ka hekili nui, a me ka

makani lauwili i o a ianei, aole no i launa aku ko Kepa Honi mau makani i keia, a ike pono aku la au i ke ano mau o ka moana Atelanika Akau he ano oolea. A hala keia muliwai kaikuono komo makou i na kai pili kahakai, he mau kai omoomao keia aohe uliuli pono mai e like me ka moana nui, aole nae i ikeia aku ka aina, ua uhiia mai e na ohu paa loa o ia wahi, ia wa la kuu ia iho la ke kepau ana hohonu (sounding line) a ikeia 100 anana ka hohonu o ke kai. Ekolu la o ko makou kalewa ana i loko o keia pouli O ka ohu, me na makani opili mai ka akau mai, a aohe ike pono ia, o kahi hea ia o ka aina ka i kupono ia makou. O Nupota ma Rokilana, oia ka makou awa i makemake ai e komo. Ilaila na iini o na naau o makou, ka poe i auwana hele i ka moana i keia mau malama elima, me ka hoomanawanui, me he poe la ua noho i ka hale paahao. Ua nui na ma--nao i kupu mai ia makou i loko o ia mau la o ke kali hoomanawaui ana i loko o ka pouli o ka ohu. Eia kokoke mai kela aina nui a kaulana o Amerika Huipuia, ke lau kanaka nei kona mau kulanakauhale, a ke haalulu nei kona mau kaa mahu, a ke kaine nei na huila o na moku ahi a kinikini waie, aole nae makou i ike a lohe aku, pela ka noonoo ana. A eia kekahi, ke makaukau nei makou e haalele i ko hale lana o na malama elima elima, e haalele ana i ua wahi kikihi aloha i pupue ai i ke anu o Kepa Honi, i na wahi rumi o lalo a me luna, i na o neki i holoholo pinepine ia iloko o na hora makaala o ke kulu aumoe kahi hoi e walea ai me na hoa eemoku ma na kamakamailio hoonanea o na po mahina; i na wahi no hoi i halawai ia ai e kekahi mau mea o makou, e pule, eia ke hoomakaukau nei e haalele a hookaawale aku a kau liilii i o a ianei ma ka aina malihini.

I ka auina la o ka la Sabati, wehewehe mai ana na pouli o luna, kau liilii aku la ka ohu, e like me ka ohu o ka liula o ka noho ana mauna o Hawaii, poha mai la ka la, a aia e kau mai ana kekahi lihi o ua aina la. He aina haahaa wale no ka i ikeia aku, aole kuahiwi mauka aku he kahakai me na ahua liilii a me na kauhale kakaikahi. O ke kahakai keia o Long Island, ka mokupuni e waiho loihi la ma ka hema o Conetekuke. Aohe no ano nui ke nana ia'ku, aka nae ua ike pono makou ka poe e nana ana, aia ma uka aku o ia kahawai he aina nui. O ko makou holo no ia a ao ia po ma ka pili aina. He la malie a maikai ka Poakahi, ka la akahi o Mei. E pa maikai mai ana na makani olauniu ma, a ua piha pono ko makou pea. E keokeo mai ana na kia malamalama kuhikuhi moku ma na lae o ka aina. I ko makou komo ana i ke kowa e alakai aku

ana i Nupota, ua kikokiko ka moana i na pea moku he kinikini wale. Akahi no au a ike i ka lehulehu o na moku e like me ia. O ka aina nae e waiho mai ana me he la ua puni ia i ke ahi, no ka mea aohe uliuli mai o na lau nahelehele. I kuu noonoo ana, aole no i puka mai na lau o ka wa kau o kela aina anu, a e koe ana no ka neoneo o ka hoono. I ka waiho mai o na mea a pau, aole i maopopo loa, no ka mea, ua uhi mai he wahi mea powehiwehi uuku, me he wahi pele la i olelo ia e kanaka. A he mea mau no ka ia no ia kai, aole i like me ko kakou kai nei, ka moakaka loa mai o na helehelena aina. Ua kokoke napoo ka la, kuuia ko makou heleuma ma ke awe malie o Nupota I ka nana ana i uka, e kinikini mai ana na hale o kel.a kulanakauhale kahiko. He mau hale [ hepa] ka nui, a o ka mea nui e kau mai ana, o ia no na puka uahi o luna. I ka nana ana mai o ka malihini ia Honolulu nei, aole he mau paka uahi ko ka nui hale, a he mau lanai ko na hale a pau, a ua puni i na laau ulu ma na aoao a pau. Ma na kulanakauhale o na aina anu, he kiekie na hale, a pili kekahi i kekahi, a o keia mea o ka puka uahi he mea i ike nui ia ma na hale a pau. O ka pae ana i uka, no ia palapalai aku ia aku la.