Ka Nupepa Kuokoa, Volume VI, Number 9, 2 March 1867 — Na mea hou o Kaupo Maui. [ARTICLE]

Na mea hou o Kaupo Maui.

I KE KILOHANA POOKELA O KA LAHUI HAWAII ;—Aloha oe : Ke hooili nei au maluna o na eheu o ka Manu Au Kai " Ke Kuokoa" i na mea hou o Mokulau, Kaupo. Na Komite o ka A. H. L. o na mokupuni o Maui Nov. 14, 1866.—Ua naue mai lakou (Rev. W. P. Alekanedero, Rev. H. Manase, ame na keiki o ke Kula Kahuna.) mai Wailuku mai kahi poe, a mai Honuaula mai kahi, a hiki i ka lai o Mokulau nei. Moe a ao ae, hoomaka ka hana ma ia la. Nov. 15, 1866.—Ua akoakoa mai na kanaka a piha ka luakini, a penei na hana. He pule, he himeni. Ia Rev. W. P. Alekanedero ka ninaninau ia Rev. P. W. Kaawa i ke kumu o kona makemake i ka Oihana Kahunapule a me ka noho haipule ana, a ia ia no ka Haiolelo. Aia ma Luka, 4: 16, 24. Ka ninau ana i na mea pili i ka hana a ke kahu Ekalesia, e like me ke (Buke lawe lima) mea mau ia oihana. Ninau i na hoahanau, i ko lakou makemake i ke kahu hou, a me ke kauoha i ke Kahunapule hou. Ia Rev. H. Manase ka pule hookohu, ka haawi i ka lima-akau aloha, a me ka olelo ao i ka Ekalesia. Ia P. W. Kaawa ka pule hookuu. I ka hope o ka hana, he lulu dala no ka Ekalesia i ke kahu hou. Hele aku ka huakai a moe ma ka Hale o Cha. K. Kakani ma Kipahulu. Nov. 16. 1866.—Hoomaka ka hana ma ka luakini o Kaupo, akoakoa mai no ka Ekalesia no ka poni ana ia D. Puhi i kahu no lakou. Pule ame ka himeni. Ia Rev. W. P. Alekanedero ame Rev. H. Manase, ka ninaninau i ke kumu o ka makemake i keia Oihana. Ia Alekanedero ka Haiolelo ma Ezekiela 2: 3, 8. Ma ka ninau ana i ka Ekalesia, ua hooholo lakou e hoolilo ia Kipahulu i Ekalesia okoa. Ia Rev. H. Manase ka olelo kauoha i ke Kahunapule hou, a me ka pule hookuu. Ka haawi ana i ka lima-akau aloha ia Rev. W. P. Alekanedero. Ka olelo ao i na hoahanau, ia Mr. Alekanedero. Ka pule hookuu ia D. Puhi. Pau ka hana oia la. Nov. 17, 1866. — Hele aku o Mr. Alekanedero i Hana me kona mau ukali, a hoi mai ana me Rev. H. Manase i Kaupo. Me ke aloha. P. W. KAAWA. Mokulau, Kaupo, Nov. 30, 1866.