Ka Nupepa Kuokoa, Volume X, Number 16, 22 April 1871 — Page 4

Ka Nupepa Kuokoa

KE KILOHANA POOKELA NO KA LAHUI HAWAII.

Oh Little Fret. (Long Fellow)

1. Na wawae liilii hooauau

Ma kahi oli a makau

A luhi, una, a eha no.

Akahi no a hoomaka'e

E heihei a hoihi ae

Ma ke aia wana, apuupuu:

2. Owau ka i ku la ma ke kae

O kahi lua e maha'i,

Ke nana a wanana no

I na kaumaha, na luuluu

E kau mai ana no ma o.

Aloha au la ia oukou.

3. Na lima liilii lawe nei,

Haawi ae, a lawe mai

Loloa ka wa imua i o.

Owau ka i maa i ke kakau.

Ka lawe hana buke ao,

Aloha au la ia oukou.

4. Na puuwai liilii paa nei.

A koni me na kuko e.

I nui ae na pomaikai:

Peia na lia o kuu puuwai.

Ikaika, wela, mamua'e.

Ano no nae, ke pio nei.

5. Na uhane liilii a ai ai

Me na kukuna i pa mai

No luna no ka la laelae.

Nana i ko'o, ke napoo nei

Kuu la, a ulaula e,

Kuu uhane hoi ke lele ae.

HAWAII.

 

E HELE ANA WAU IHEA?

I KA LANI ANEI? I KA PO PAHA?

 

            E manaoio aku i ka Haku ia Iesu Kristo. alaila e ola oe.

            O ka mea manaoio ole mai, e hoahewaia oia.

            No ka mea, ua aioha nui mai ke Akua i ko ke ao nei, nolaila, ua haawi mai oia i kana Keiki hiwahiwa, i ole e make ka mea manaoio ia ia, aka, e loaa ia ia ke ola mau loa.

            E auhulihia ka poe hewa a pau ilalo i ka po.

            O ka mea makewai, e haawi wale aku au nana i ka wai puna o ke ola.

            Ina paha i like ko oukou hewa me na kapa ula, e keokeo auanei ia me he hau la.

            Ano ka manawa e maliuia mai ai, eia hoi, ano ka la ola'i.

E imi oukou ia Iehova, oiai oia ma kahi e loaa'i, e hea aku ia ia, oini oia ma kahi kokoke. E haalele ke kanaka hewa i kona aoao, a e hoi mai oia io Iehova la, a e lokomaikai ia ia; a i ko kakou Akua hoi, no ka mea, e kala nui loa nuanei oia.

 

Nu Hou maikai.

 

            Mai ka hebedoma haipule mai a hiki i keia wa, ua lana pono ka manao haipule ma ke kulanakauhale o Clyde, Nu Yoka. Ua hui na ekalesia euanelio i keia hana maikai. I mai la ka Nupepa i paila ma Clyde, penei; Ua akoakoa kanaka iloko o na hale hana, e haipule i ke Akua a aumoe loa; a no ka pilikia o ka poe e imi ana, ua hele lakou a hooala i na hoahanau i ke aumoe, e pule no lakou. O kekahi poe paahana. paakiki, launa ole mai mamua, oia kekahi poe e imi aoa ia Kristo. Ua piha loa ka luakini i kela po i keia po, aole nae maluhiluhi kanaka i ka hele i ka pule. Akahi no a launa nui mai ka poe hewa ma keia mau kulanakauhale. Ekolu paha haneri a keu ka poe e hauoli ana i ka Haku. Kupaianaha ka hana a ka Haku ma Clyde, a me na kulanakauhale e ae ma keia okana o Nu Yoka. Aia ma Rose kekahi; ma Wolcoot kekahi; a ma Red Creek no hoi." N.Y.O.

            Ke palapala mai nei kekahi. mai Helderberg. N.Y. mai, penei; "Mai ka la mua o Feberuari mai, hookahi haneri a keu aku ka poe i huli mai ma ka pono, a ke mahuahua nei ka manao haipule iwaena o kanaka. Ua piha loa ka halepule i kela ahiahi i keia ahiahi. me ka poe kiai a noonoo nui i ko lakou pilikia iloko o ka hewa. He mea kupaianaha keia hana, no ka mea, i ka wa mamua aku nei, he nui ke kua, a me ka mokuahana iwaena o keia anaina kanaka. E hoomaikai nui aku i ke Akua, no kona lokomaikai mai  i keia wa." N.Y.O.

 

O kakou wale no.

 

            Ke alakai nei ka mai ia kakou ma kahi mehameha, a waiho ia kakou ma kahi mehameha, a waiho ia kakou me ke Akua wale no. Ua alakaiia kakou iloko o kona keena mehameha, a malaila ua kamailio mai oia me kakou, he maka no he maka. Ua hookaawaleia ko ke ao nei, ua pau ko kakou manao nui ana iaia; aia no kakou me ke Akua wale no. Nui na hua lokomaikai, a me ka oiaio, ana i hai mai ia kakou. Ua pau aku na mea a kakou i hilinai aku ai mamua; a i keia wa, e hilinai ana i ke Akua wale no.

            Ua maopopo, o na mea o keia ao, he lapuwale; he mea ole ke kokua ana mai o kanaka. O ka menemene o kanaka, ua haalele ia kakou; a eia kakou me ke Akua wale no; i ike kakou, ua lako, ua pomaikai kakou, ke aloha mai a menemene mai ke Akua ia kakou.

            I mai la kekahi penei: "Ina aole au pilikia i ka eha, a laila, aole au i launa nui me ke Akua. No ka nui o ko'u eha. aole hiki ia'u ke hiamoe i ka po: aka. ua hookeia ke Akua i kona aloha mai ia'u ia manawa.

            O ka mai o ko'u kino mai ke Akua mai no ia. Ina e pau e kana hana ana mamua o ko'u make ana, oia kekahi mea e hoomakaukau mai ia'u e hele i ka lani." N.Y.O.

            "E ko makou Haku, e ume mai ia makou me na kaula o kou aloha; e ume mai ia makou me kou maemae Hemolele, a me ka nani o kau hana maoli; e ume mai ia makou i ka pono o kou make ana, a me ka mana o ka Uhane Hemolele; e ume mai ia makou, e ka Haku maikai, a e hahai makou mamuli ou." N.Y.O.

 

KA PAIO ANA O REV. J BIKANELE

ME KEKAHI KAHUNA MOREMO

NA MA WAIPIO, HAWAII I KA LA 25

o MARAKI, M. H. 1871.

            Ua heluheluia keia palapala imua o ka Aha Euanelio o Hawaii Akau, ma Iole, Kohala Akau. Maraki 30, i hala ae nei.

            He kuleana anei ko na Kahuna Moremona iloko o ka Baibala Hawaii. e pono ai ke hoohaumana i na kanaka, a bepetizo ia lakou iloko o ka inoa o ka Haku o Iesu Kristo?

            I mea e kuleana'i na kahuna Moremona iloko o ka oihana laa a ke Akua, e pono ke pili lakou ia ia. Ua akaka keia, "I loaa ole i kekahi ka uhane o Karisto, aole nona ia."

            Aka, i ko'u paio ana me kekahi kahuna Moremona i ka la 25 o keia malama no, ua hiki ole iaia ke hoike mai i kona pili me ka Baibala Hawaii a kakou. Aole hiki iaia ke hoike mai i kona pili, no ka mea, aole ona kuleana iloko o ka olelo a ke Akua. E like me ke kaawale ana o ka hikina mai ke komohana aku, pela kona kaawale mai ke Akua 'ku.

            Iwaena nae o kana kamailo ana, ua pane mai ua kahuna Moremona nei, ua manaoio oia i ke Akua, a ua pili oia i ka Baibala malaila. Aka, he ole kana olelo ana pela, no ka mea, eia ka olelo a Iakobo:

            "Ke manaoio nei oe, aia hookahi Akua ; ua pono oe : pela no ka poe daimonio i manaoio ai me ka haalulu hoi.

            E ke kanaka lapuwale, ke makemake nei anei oe e ike aku, ua make ka manaoio ke ole kana hana ana?

            Aole ka poe Moremona i hoolaha i ke Baibala ma Hawaii nei, aole lakou i hana i kekahi mea e akaka'i he poe manaoio maoli lakou i ke Akua. He ole loa no.

            Ua hai lakou i ka olelo a ke Akua, a ua hoohaumana i na kanaka ; aole nae me ka manaoio maoli lakou i hana'i, aka, me ka hookamani no. Ua hana no lakou mamuli o ke ano o " Balaama a Bosora. ka mea i makemake i ka uku o ka hewa."

            O ka buke a Moremona i hoolaha ma Hawaii nei, a ua akaka, ma ka lakou hoolaha ana, ua pili lakou me ia buke, a ua manaoio i na mea i hoikeia mai maloko ona. Ina no i manaoio maoli lakou i ka Baibala, ina no ua hoolaha lakou ia Buke Hemolele e like me ko lakou hoolaha ana i ka buke a Moremona.

            Aka nae, o ka hoike i oi aku mamua o na hoike a pau e akaka'i ke kupono ana o kekahi mea no ka oihana laa a ke Akua, oia kona hoolohe pono ana i ka ke Akua. a me ka noho hemolele ana malalo Ona.

            Aole na kahuna Meremona i hoolohe pono i ke Akua, a aole hoi lakou i noho hemolele.

            1. Ma ka lakou hoopunipuni ana, mai ke Akua mai ka buke a Moremona, ua akaka ko lakou kue i ke Akua, a he hoike no ia o ka hoolohe ole.

            Ua akaka ma Hoikeana Mok. 22 : 18, ua papaia ka hookui ana mai o kekahi mea hou. Ua paa ka Baibala mai Kinohi a Hoikeana. He makehewa ke pakuia mai kekahi buke hou aku. oiai, ua lawa ka Baibala e noho nei no ke ola uhane a hiki i ka hopena o keia ao.

            Ma ka hoao ana a na kahuna Moremona e hookui mai i ka buke a Moremona i ka Baibala, ua akaka, ua ahewaia lakou ma ku olelo a Paulo ma Galatia, Mok. 1 : 8-9:

            "Ina paha o makou, a he anela paha mai ka lani mai, i hai aku i ka euanelio kue i ka makou i hai aku ai ia oukou, e hoomainoinoia oia.  

            Me ka makou i olelo ai mamua, pela hoi au e olelo hou aku nei, a i hai aku kekahi ia oukou i ka olelo kue i ka mea a oukou i loaa'i, e hoomainoinoia oia."

            O na buke a Moremona, he kaao ia i haku wale ia e kekahi kanaka, i mea e hoonanea iaia iho i kona noho ana me ka onawaliwali ma ka hale. Ua pili ua kaao nei me na Ilikini o Amerika, a ua oleloia, o lakou na ohana he umi a ka Iseraela i lawe pio ia e ke alii o Ausuria, a hookaawale ia mai ko lakou aina 'ku.

            I ka loaa ana o keia kaao ia Iosepa kamika, ala mai la ka manao hoopunipuni iloko ona, a e like me Mahometa i hana'i. ua hoolaha oia i kana olelo wahahee iwaena o na kanaka, he kaula oia mai ke Akua mai, a ua loaa iaia he buke hou, oia ka buke a Moremona.

            Heaha la ka inoa kupono e kapa'aku ai i ke kanaka i hoopunipuni ino e like me neia? Aole anei he ane Karisto oia, he huelo no ke diabolo e like me ka Isaia i olelo mai a : " O ke kaula i ao mai i ka wahahee oia ka huelo."

            A no ka ulaula o ka ili o na kanaka Hawaii e like me ko na poe Lukini. a no ka okipoepoe ana hoi : nolaila. ke ao hele nei na kahuna Moremona. he poe Isaraela keia lahui kanaka Hawaii - he mamo ka! lakou na Aberahama.

            I ko'u paio ana me ke kahuna Moremona i ka Poaono o kela pule aku nei, ua kamailio loihi mai oia no keia kumumanao. He nu hou keia, a he nu hou ano nui no. kupono ke hoolahaia ma ke Kuokoa, i lohe keia lahui kanaka a pau, he Iseraela lakou - he poe mamo na Aberahama.  Aole i pau.

 

HALAWAI KA AHAHUI EUANELIO O

HAWAII AKAU, MA IOLE, KO-

HALA AKAU, MAR. 30, M. H. 1871

 

            Ua hoomaka ia ka hana ma ka hapalua hora haipule.

            Kohoia na luna o ka Aha, Rev. S.C. Luhiau i Luna Hoomalu, o S. Kamelamela ke Kakaoolelo.

            Kohoia o Rev. J. Bikanele, Rev. E. Bona a me S. Kaaua, i Komite hooponopono i na lala.

            Hoike mai ke Komite. no Hamakua Hikina o S. Kaaua ka Haiolelo, o S. Kamelamela ka Elele. No Hamakua Waena, o Rev. J. Bikanele ke Kahu, o Asa ka Elele. No Hamakua Komohana, o Rev. J. Bikanele ke Kahu, o Mio ka Elele. No Waimea, aole Kahu, aole Elele. No Kohala Hema, o Rev. S. Aiwohi ke Kahu, o Kahoohuli ka Elele. No Kohala Komohana, o Rev. S.C. Luhiau ke Kahu, o Kekuewa ka Elele. No Kohala Akau, o Rev. E. Bona ke Kahu o Paku ka Elele.

            Hooliloia o Rev. J. F. Pogue me ke Ana ina, i mau hoa kuka no ka Aha.

Kohoia o Rev. E. Bona, S. Kaaua, Ka hoohuli, i mau Komite imi hana.

HOIKE HAPAHA MAI KE KOMITE.

1. Hapalua hora haipule, i kela a me keia la.

2. Hoike Kihapai.

3. Heluhelu Haawina.

4. Na Palapala Hoopii.

5. Elua elele no ka Ahahui nui ma Honolulu.

6. I mea nana e hai aku i na hana o keia Aha, imua o ka Ahahui nui ma Honolulu.

NA HOIKE KIHAPAI.

            Heluhelu mai o S. Kaaua i kana Hoike no Hamakua Hikina.

            Heluhelu mai o Rev. J. Bikanele, no Hamakua Waena ; a pela no, no Hamakua Komohana.

            Heluhelu mai o Rev. S. Aiwohi, i ka Rev. L. Laiana Hoike noka ekalesia o Waimea.

            Heluhelu mai o Rev. E. Bona i kana hoi ke o ka ekalesia o Kohala Akau.

            Kohoia o Rev. S. Aiwohi, nana e hoike aku i na hana o keia Aha imuo o ka Aha hui nui ma Honolulu.

            Kohoia elua elele no ka Ahahui nui ma Honolulu, o S. Kamelamela, a me Kahoe huli ; me na hope elua, o Mio a me Kekuewa.

            Hapaiia imua o ka hale kekahi kumumanao, no ka Nupepa a me na buke liilii.

            Hoike mai o Rev. S. C. Luhiau i kana hoike, no Kohala Komohana.

            Hoopaneeia ka hana me ka pule a Rev. J. F. Pogue.

            Maraki 31, Akoakoa hou ka Aha e hoomaka ana me ka hapalua hora haipule.

            Heluhelu mai o Rev. S. Aiwohi i kana hoike no Kohala Hema.

HELUHELU HAAWINA

            Heluhelu mai o S. Kamelamela i ka Rev. L. Laiana Haawina. Pehea la e pono ai ka poe i bapetizoia, ke bapetizo hou ia?

            Heluhelu mai o C. H. Haae i kona Haawina. Heaha ka waiwai o ka pule ohana?

            Heluhelu mai o Rev. J. Bikanele i kona Haawina. He kuleana anei ko ke kahuna Moremona iloko o ka Baibala Hawaii? E hoouna ia keia kumumanao, e paiia i ke Kuokoa.

            Heluhelu mai o Rev. S. C. Luhiau i kona Haawina. O na la mahope i ike ia ma II. Timoteo 3 : 1, o ka manawa hea la ia?

            Heluhelu mai o Rev. E. Bona i kona Haawina. O ka la i ike ia ma Kinohi 1:- he la maoli paha, he la loihi anei?

            Ua hooholoia keia kumumanao e paiia ma ke Kuokoa.

            Heluhelu mai o Molale i kana Haawina ma Halelu 2: S ; pela no o S. Kaaua i kana Haawina. Ina e hanai ole, a hanai hapa wale no na hoahanau, i ko lakou kahu, a Haiolelo paha, Heaha ka ke kahu e hana'i

            Heluhelu mai o S. Kamelamela i kona Haawina, ma II. Petero 1: 21; pela o Ka laukoa i kona Haawina, ma Hebera 7:26

            Hoike mai ke Komite Imi Haawina no ka manawa e halawai hou ai.

            1. O ke aha la ka mua, o ka manaoio ana a nui, a o ka mihi paha? C. H. Haae

            2. Ua pili anei i na kamalii o ka poe hewa, na olelo a Iesu? "E ae aku i na kamalii uuku ke hele mai imua o'u?

                        Rev. S. Aiwohi.

            3. O na kanawai umi, o ka mea hea lakou kai oi? Rev. S. C. Luhiau.

            4. E wehewehe ia Roma 6 : 4.

Rev. E. Bona.

            5. Pono anei ke hooliloia ka la Sabati, wa e hele ai i kauhale e ike ai i na makamaka? Rev. J. Bikanele.

            6. Ka lapuwale hea la i ke Akua ka me e olelo ia nei ma ka Baibala, ua oi aku i mamua o ke akamai o kanaka? S. Kaaua

            7. Ua hoohiki wahihea anei ka poe i uhai wale i ka berita mare?

S. Kamelamela.

            8. No ke aha la i olelo ai o Iesu : "Ua oi aku ka mea uuku loa iloko o ke aupuni o ke Akua mamua o loane Baperizo? Molale.

            9. Pono anei ke hookomoia na kamalii iloko o ka ekalesia? Mio.

            10. Heaha la ka hewa o Kaina i maliu ole mai ai ke Akua i kana mohai?

J. Welewele

            11. Heaha la na hoailona e akaka ai ka hoohanau hou ia ana o ka naau?

Kanealai.

            12. He mea hoola uhane anei ka bapetizo ana, he hoailona wale no paha?

Kalaukoa.

            13. Heaha ka olelo a Iesu ia Petero. e kala aku i ka hala o ke kanaka a i kanahiku hiku kala ana ; he rula anei ia no ka hooponopono ekalesia ana? Rev. L. Laiana.

            Noi mai o Rev. J. Bikanele me Mio, e hoi i Hamakua, no ka pilikia. ua ae ka Aha.

Kohoia ke Komite e kuka pu ai me ka Aha Euanelio, o Hawaii Komohana. no ka hoohui ana ; o Pogue, Bona, Luhiau.

            Hoopaneeia ka hana, hookuu ka Aha, me ka pule a Mio.

            Aperila 1. - Akoakoa hou mai ka Aha. a hoomaka ka hana ma ka hapalua hora haipule.

            Kahea ia na lala, ma ka heluhelu ana i ka moolelo no ka la i hala.

            Heluhelu mai o Rev. S. Aiwohi i kona Haawina. Heaha la ke ano o ka huaolelo make, i olelo ia ma ka Baibala?

            Hapaiia kekahi kumumanao imua o ka hale, me ka wehewehe nui ana. Hooholoia.

            I ka manao o keia Aha, he mea pono ole ke lawe kekahi kahunapale. i kekahi oihana e aku, nana, no ka mea, e lilo auaneiia i mea e nawaliwali ai kana oihana nui, a koikoi, ana i hoohiki nui ai

            Hapai hou ia kekahi kumumanao, imua o ka hale. O na ahaaina, o ke kipa ma kauhale, a o ka hoolewa kupapau paha ma ka la Sabati. ku anei ia i ka maluhia oia la?

            Hooholoia. - Ke manao nei keia Aha, he mea ino ke keakea nui i ka maluhia o ko ka Haku aupuni, o ke kukulu ahaaina, o ke kipa ma kauhale, o ka hoolewa kupapau i ka la Sabati, he mea ia e hookaawale ai mai ka ekalesia aku o Karisto.

            Ua noi mai o Bona e haawi ia Haae i palapala ae Haiolelo. Ua lilo o Pogue i mea alakai ninau ia Haae : a pau ka ninau ana, ua aponoia. a ua haawiia ka palapala Haiolelo.

            Hoopaneeia keia Aha, a halawai hou aku ma kahi a ke Komite hui. e pane mai ai ke maopopo ; pule o Bona, me Pogue.

S. Kamelamela,

Kakauolelo.

 

Ke Kaula kamahao.

HELU 1.

            Mai kuhihewa, ea, he Kaula kanaka, he kaula wanana keia : aole ia. He kaula aha la? He nui ke ano o na kaula, he kaula lopi humuhumu, he kaula ilihau, he kaulahao, he kaula kila, he kaula dala, he kaula gula. Aole nae o keia mau kaula, ke kaula kamahao. He mau kaula ike maka ia keia. Aka, o ke kaula kamahao, he kaula ike maka ole ia ia. He kaula nani loa ole e oi loa ana ka nani i ko na kaula e ae a pau loa.

            Kahaha! a heaha la kona ano? Ua like ia me ke anuenue, ke hookahuliia a pili ka pio waena i ka honua, o na welau i ka lani. Ka welau mua ma ka lani no ia, a iho mai laila mai, a i ka honua, a pii aku ma kela aoao, a paa hou aku i ka lani, aole loa e hemo. aole moku.

            E hai mai oe i na apo o keia kaula kamahao, ehia? E aha? Iini nui makou e lohe.

Eia na apo, na'u e kakau me ka wehewehe i ke ano, a na oukou e helu i ka nui.

            Ae, ae, e hana mai oe.

            Eia ke apo mua. Ke Akua o Iehova ma ka lani ia, ka welau mua, oia hoi ke kumu, ka hoomaka ana, he apo paa, a paa i ka heleuma lani naueue ole.

Eia ke apo elua ka logou e iho mai ana mai ke Akua mai. He apo nui loa keia ma ka lani ka aoao luna, ma ka honua ka aoao lalo. A lilo ka Logou i kanaka a noho pu me kanaka ma keia ao, a ikeia kona nani.

            Eia ke kolu o na apo, na anela, na lakou i hai mai i ka hiki ana mai o ka Mesia e Iesu ke kalahala, ka hoola, ke alii o na Iudaio, a o ko na aina a pau. Lakou hoi ka poe kokua ia Iesu i kona noho ana ma keia ao, ma ka mauna o ka hoowalewale, ma na mauna kahi i pule mehameha ai, ma ka mala o Getesemane, kahi i pule ai oia a kahe ka heu me na kulu koko ; ma ka puu o Kalevari kahi i kaulia ai oia ma ke kea a make ; ma ka lua kupapau, a olokaa aku i ka pohaku a ala hou mai oia mai ka make mai ; ma ka pii ana'ku  iluna i ke ao, a wehea na puka o ka lani, a komo lanakila oia a noho ma kona noho alii nani a mau loa. A hoi hou mai no na anela mai ka lani a i keia ao, e kokua i na Lunaolelo, i na kahunapule, i ke kukulu ana i ke aupuni o Iesu, i ka lawelawe ana na ka poe pono, i ka hookupaa ana ia lakou a hiki i ka hopena, i ke kii ana mai i ko lakou mau uhane e kaikai aku i ka lani. A ma ka la hope, ka la hookolokolo e iho pu mai lakou me Iesu ka Lunakanawai e hui pu ma ka hookolokolo ana me he poe juri la oiaio ea, he apo nui keia.

            4. Eia kekahi apo nui. Ka Uhane Hemolele, oia ka mea nana i kuhikuhi o Iesu ka Mesia keia, o ke keiki punahele a ke Akua keia e hoolohe oukou ia ia. A nana no hoi i kokua nui ia Iesu i ka hana ana i kana mau hana mana, a kokua hoi ia ia i ka halihali ana i na kaumaha he nui wale e kau ana maluna iho ona.

            A, mahope o ka make ana o Iesu a hoi aku i ka lani. ua hoounaia mai ka Uhane Hemolele i keia ao i hope ponoi no Iesu, e kokua i na haumana i ka haiolelo ana, i ka paipai ana, i ka hoohuli ana mai i na kanaka ma ka pono, i ka hoomaemae ana, i ka hooluolu ana, i ka hoohauoli ana, i ka hoomalamalama ana, i ka hookupaa ana, i ka hoomakaukau ana no ka lani.

            He apo nui keia a e paa ana me ka moku ole a hiki i ka hopena.

            Eha apo o keia kaula kamahao i halia a weheweheia. He mau apo nui keia a paa mau. Oia na apo e hui ana kekahi me kekahi mai ka lani ka welau mua, a i ke ao nei. A ma keia hapa, keia aoao o ke kaula pio nani i iho mai ai na makana. na pono, na olelo hoopomaikai he nui wale ma keia ao.

            A, ma na apo hea, a ihea e hui ai keia mau apo ena a pii aku ma kekahi aoa o o ke kaula pio nani a loaa na pono, na pomaikai ke ola, ka nani ma ka lani, ka welau hope o ua kaula kamahao nei? Heaha la ia mau apo? A ehia hoi? E hai mai oe i lohe makou.

            Ae, ae, ke ae mai ka Haku. No ka helu elua paha ia. E hoopaanaau nae i keia mau apo mua eha. Ke Akua, Iesu, na anela, ka Uhane Hemolele.

 

Olelo Paipai

 

            Ke kokoke mai nei ka manawa e pau ai ka makahiki Misionari o kakou, nolaila, e hoouna koke ia mai na Dala Mahina Hou, a me na Dala kokua e ae a pau i ka Puuku o ka Papa Hawaii. a i ke Kakauolelo paha. Mai palaka, a molowa paha o hookomo ole ia'aku na Dala i ka Hoike Makahiki a ka Puuku, a hilahila oukou. Mai kali. E hooili koke mai.

            Eia kekahi : E hoopiha mai kela a keia Kahu ekalesia i ka Papa Helu o na ekalesia e like me ka hana mau. E akahele oukou i keia hana, i pololei loa ka Papa.

J. F. POKUE,

            K.P.H.,

 

HAAWINA KULA SABTI.

HELU XVIII. APERILA 30, 1871.

KA RULA GULA.

Pauku Baibala, Mataio 7: 1-12.

 

1. Mai manao ino aku, o manao ino ia mai oukou.

2. No ka mea, me ka manao ino a oukou e manao ino aku ai. pela hoi e manao ino ia mai ai oukou. Me ke ana a oukou e ana aku ai, pela no hoi e anaia mai ai no oukou.

3. Heaha kau e nana aku ai i ka pula iki i loko o ka maka o kou hoahanau, aole hoi oe i ike i ke kaola iloko o kou maka iho?

4. Pehea la hoi oe e olelo aku ai i kou hoahanau, E homai na'u e unuhi ka pula iki noloko mai o kou maka, a he kaola no ka hoi iloko o kou maka iho?

5. E ka hookamani, e unuhi mua oe i ke kaola mailoko ae o kou maka iho. alaila oe e ike pono ai ke unuhi ae i ka pula iki maloko o ka maka o kou hoahanau.

6. Mai haawi aku i ka mea hoano na na ilio, aole hoi e hoolei i ka oukou  mau momi imua o na puaa. o hehiia ilalo e ko lakou mau wawae, a e kepa mai hoi lakou e moku oukou.

7. E noi, a e haawiia na oukou ; e imi, a e koaa hoi ia oukou ; e kieke, a e weheia no oukou.

8. No ka mea, o ka mea noi, ua haawiia nana ; o ka mea imi, ua loaa no ia ia ; a o ka mea kieke, ua weheia nona.

9. Owai la ke kanaka o oukou e haawi aku i ka pohaku na kana keiki, ke noi mai ia i berena?

10. A i noi mai ia i ia, e haawi aku anei oia i nahesa nana?

11. Ina paha oukou ka poe hewa i ike i ka haawi aku i na mea maikai na ka oukou kamalii, he oi nui aku ko oukou Makua i ka lani ma kona haawi ana mai i na mea maikai na ka poe e noi aku ia ia.

12. O na mea a pau a oukou e makemake ai e hanaia mai ia oukou, e na kanaka, oia ka oukou e hana aku ai ia lakou ; no ka mea, pela no ka ke kanawai a me ka poe kaula.

            Pauku Alakai. - O na mea a pau a oukou e makemake ai e hanaia ia oukou e na kanaka, oia ka oukou e hana aku ai ia lakou. Mat. 7: 12.

            Kumu noonoo. - Ke kanawai o ke aloha.

            Ninau ano nui. - Heaha ka mea e noho kuikahi ai na kanaka?

            MANAO WEHEWEHE. - P. 1-6. O ka mea i papaia ma keia mau pauku, oia no ko kakou hoahewa wale ana ia hai. E ao mai ana o Iesu, ua pau pu kakou iloko o na hewa aohe me i kina ole. Nolaila ina e ikeia ko kakou ano hoahewa. a loiloi aku, aohe ole ka imiia mai o ko kakou mau kina, a me ka hoolahaia no hoi o lakou. O ka "manao ino aku" oia ka manao koke ana ua hewa kekahi. Aole no e ao ana o Iesu, e oluolu wale kakou i na hewa maoli o hai ; aka e akahele ma ka hoahewa. Eia hoi kekahi, e hoohuli malu, a e alakai malie ; mai hoahewa leo nui, o hoohilahilaia mai auanei ke kukalaia kekahi hewa o kakou.

            P. 3. 4. 5. He olelonane kahiko no keia no ka poe Rabina, oia hoi na kumu Iudaio. Na Iesu nae i hoopili i ke kanawai e nana mua i kou hewa iho, a pau ia, alaila e ao aku ia hai.

            P. 6. O na "momi" oia na mea laa o ka euanelio. Mai hoonoa wale i keia mau mea, i ke kamailio noonoo ole aku i ka poe haumia o ka manao, a me ka poe hoomaloka.  Pela Iesu. Kali keia a ikeia ka manao haahaa a mihi, a hoomana, alaila haawiaku kela i na waiwai o ka euanelio. Eia hoi kekahi : Mai haawi wale i kou ano noho ana i na kanaka, e kamailio hooheneheneia : e hoolaa ia oe iho. Pela me ka noho ana o kau ohana. E hookapu i na mea huna o ka ohana.

            P. 7-11. No ka nawaliwali o ko kakou manaoio, nolaila ua hoohalike o Iesu i ka Makua ma ka Lani me na makua maoli o kakou. He lohe lakou ke noiia aku. E oi anei ko lakou aloha mamua o ka lokomaikai o ka Makua waiwai, hemolele ma ka Lani?

            P. 12. O ka Rula Gula keia i oleloia. Aia maloko o keia pauku ka io o na pauku a paa mamua iho, a aia no hoi maanei ka io o ke kanawai a me na olelo-ao o na kaula. Ina e malama i keia rula hookai, alaila e pau na kue a pau o ke ao nei.

            NINAU. 1.  Heaha ka "manao ino" i oleloia ma keia pauku? Pane. O ka hoahewa wale. Ina kakou e hoahewa wale aku, alaila pehea kakou? No ke aha ke kupono ole o ka manao hoahewa? Aole anei e pono ke hoahewa i kekahi mau hana? Heaha ka mea i papaia ma keia pauku?

            3, 4, 5. Ma ko wai maka e nana mua ai kakou? Heaha ke ano o kela olelo. "he pula ma ka maka o ka hoalauna?" Heaha ke kaola ma kou maka? Ahea e makaukau ke kanaka e ao aku ia hai?

            6. Owai na "puaa a me na ilio i oleloia ma keia pauku?" Heaha ka mea pono ole ke waihoia imua o lakou? Ua hoohalikeia na momi me ke aha? Heaha na mea a ka poe hewa i hoowahawaha ai? He mau waiwai keia no wai?

            7-11. Ia wai e haawiia na makana a ke Akua? Owai ka poe e loaa ana? Ia wai e weheia ana ka puka? Ua hoohalike o Iesu i ke Akua ma ka Lani me wai? Pehea ka makua kanaka ke noiia mai e ke keiki? He hemolele loa anei ka makua kanaka? Owai ka i oi? o ko kakou mau makua maoli paha ; o ka Makua ma ka Lani paha? Ina pela, owai ka e lohe koke ana, ke noi aku kakou? Ke manaoio nei anei kakou pela?

            12. Heaha ka Rula Gula? Heaha ke alakai no kakou ma na hana me hai? E hana aku ia lakou pehea? Heaha maloko o keia rula pokole? Ina e malamaia pehea ke ao nei?

 

KA NUPEPA KUOKOA,

HOOPUKA MAU IA MA HONOLULU

kela Poaono keia Poaono

$2.00

No na mahina he Umikumamalua!

$1.00 no na mahina eono,

ME KA HOOKAA MUA MAI.

NA OLELO HOOLAHA - aole i oi mamua o 10 laina no ka hoopuka hookahi ana, $1.00 ; alua komo ana, he $1.50 : hookahi malama, $2.00. Kulu mua ia mai ke dala o na olelo hoolaha a pau e hoounaia ana mai e pai.

KANIKAU - he 4 keneta no ka lalani hookahi - penei : he 25 lalani, $1.00 ; 50 lalani. $2.00 ; a pela'ku.

KA UKU NO NA OLELO HOOLAHA - ka uku pepa, a me ka uku o ke Kanikau, e haawiia no ma ka lima o na Luna o ke Kuokoa, a i olelia, e hoouna mai ia Kauka Kulika.

NA UKU PEPA A PAI E HOOKAA MUA MAI NO - aole e kauia ka inoa o kekahi haole a kanaka maoli paha. ma ka @ ka poe lawe pepa ke ole e hookaa e mai mamua. K@ ke hiipoiia keia mau rula, no ka mea, he emi no ka auhau no keia nupepa.

AIA KE KEENA O KA NUPEPA KUOKOA - ma ke keena i noho mua ia iho nei e J. W. Aukina, @aiuna ae o ka Hale Leta. O na hora hana, mai ka eiwa o kakahiaka, a i ka eha o ke ahiahi.

H. M. WINI. Luaa Hoopulia

"KA NUPEPA KUOKOA."

Is published in Honolulu

EVERY SATURDAY

$2.00 per annum, or $1.00 per six months, in advance.

ADVERTISMENTS not exceeding 10 lines, inserted once for $1.00 twice or $1.50 ; and $2.00 for one month ; all a advertisements must be paid for in advance.

KANIKAUS will be charged 1.00 per page, or 4 cts. a line.

PAYMENTS FOR ADVERTISEMENTS. Subscriptions or Kanikaus, may be paid to any of the Agents of the Kuokoa, or may be enclosed in a letter to the Publisher.

ALL SUBSCRIPTIONS must be PREPAID. No names, either of foreigners or natives. will be inserted on the subscription list. until paid for. This rule must be strictly adhered to on account of the low subscription price.

THE OFFICE OF THE KUOKOA over the Post Office. Office hours from 9 A.M. to 4 P.M.

H. M. WHITNEY. Publisher

            Bound Volumes of the KUOKOA, for sale at the office over the Bookstore - $3.50 each.

            Persons having complete sets of the above, can have them bound by paying $2.00 each.

 

NA BUKE

HOOLAHAIA E KA PAPA HAWAII.

Baibala Hemolele Nui ili gula nani me ua kuhikuhi ma na aoao...12 00

"   "   Nui ili eleele kaekae wai gula...5 00

"   "   uuku iki iho, "   "   ...8 00

"   "   Pananaiki iho ili eleele...4 00

Kauoha Hou ili gula nani me na kuhikuhi...3 00

"   "   eleele kaekae wai gula...1 00

"   "   "   ... 77

Kauoha Hou Hapa Haole... 75

Lira Hawaii 1848 me ke kanawai... 26

"   "   1865... 85

Moolelo Ekalesia... 50

Haiao ili lahilahi... 10

Hele Malihini ana... 25

No ko ke Akua ano... 25

Lira Kamalii... 25

Hoike Palapala Hemolele... 25

Moolelo o Heneri Opukahala... 25

Hoike Akua... 23

Wehewehehaia... 23

Ninau Hoike ili manoanoa... 23

"   "   "   lahilahi... 10

Kumumua Kula Sabati... 10

Buke Lawe Lima... 10

He Buke no ka Pope... 10

Ui Kula Sabati Helu 3... 25

"   "   "   "   4... 65

"   "   "   "   5... 25

Buke Euaneliio a Ioane... 10

Himeni... 50

Himeni ili nani...1 00

Na Kauoha Hou Pakeke.

Ili Gula nani...1 50

Ili eleele kaekae nani... 50

Ili eleele... 35

Kauoha Hou Pakeke me na Halelu.

Ili Gula nani...1 75

Ili eleele kaekae wai gula... 60

Ili eleele... 50

Na Halelu Pakeke.

Ili Gula nani... 50

Ili eleele kaekae wai gula... 30

Ili eleele... 20

Ka Hae Hoonani (Buke Mele)... 25

Eia na buke haawi wale.

Palapala Liilii-

Helu 4- Makemake anei oe i ke ola?

Helu 6- E hele i o Kristo la.

Helu 7- Ka hoi ana mai o ke Keiki Uhauha.

Helu 11- No ka hoohiki wahahee i ke Akua.

Helu 16- Ka Eehia ana o ka Ahaaina a ka Haku a ma ka Bapetizo ana.

Helu 17- Mai hana ino i na holoholona.

Helu 18- No ka mahi ana, kuai ana a me ka iau ana i ka Awa.

Ka Davida Malo Kumumanao.

Ka Moolelo o Batimea Puaaiki.

J. F. POKUE.

Kakauolelo o ka Papa Hooko e ka Ahahui Euanelio o ko Hawaii Pae Aina.