Ka Nupepa Kuokoa, Volume XI, Number 39, 28 September 1872 — Page 3
| This text was transcribed by: | Walt Kekoanahenahe Bodnar |
| This work is dedicated to: | Halau -- Malamalama 'O ka Mahina |
Ka Nupepa Kuokoa
KE KILOHANA POOKELA NO KA LAHUI HAWAII.
Ka Mea Hanohano P. Nahaolelua,
PERESIDENA O KA HALE
Ahaolelo o ke Aupuni Hawaii.
Ke waiho haahaa aku nei ke Komite o na Aha Hookolokolo i ko lakou hoike no ka palapala hoopii i haawiia ia lakou e noonoo, e kue ana i na Lunamakaainana i kohoia no ka apana o Molokai, oia o na Mea i Mahalo ia D W. Kaiue a me L. Nuton.
Ua halawai ke Komite no keia hoopii, a @ mai ka mea kue, o Mr. J. Kaluaipihaole a me kona mau hoike.
Ma ka palapala hoopii, ua oleloia, ua hana pono ole ma ke koho balota ana maka mokupuai o Lanai, (ua komo ia mokupuni iloko o ka apana o Molokai,) aka, iloko o na inoa he 81 kakauia ma ka palapala hoopii, he 28 wale no o lakau he poe e noho ana ma Lanai, a o ke 50 i koe no Molokai ia poe, @ aole lakou i ike i na mea i hana ia ma ke koho balota ana ma Lanai.
O ka hoike mua, oia o Papu, ua olelo mai ia na hooweliweli mai o Solomona Kahoohalahala iaia, oia no ka Lunakanawai apana Lanai, a ole nae oia ka Peresidina o ka Papa Nana koho, no ka mea, oia kekahi o ka poe e manao ia’na e kohoia. Ua olelo nae keia hoike, ua haawi oia i kona balota no Mr. Kaiue, aole no Solomona Kahoohalahala.
O ka hana pono ole i olelo ia ma ka palapala hoopii, oia hoi keia-Ua haawi o Papu i kona balota, oiai aole i kakauia kona inoa ma ka Papa Helu inoa o ka poe kupono i ke kino, ole hoi i hoike mai oia i kona palapala hookaa auhau, a ke ae mai nei keia hoike, pela io no.
Ma ka manao o ke Komite, o ka mea e @ ai no ia mau mea, oia no ka waiho ana mai ka Papa Helu inoa o ka poe kupono i ka haawi balota, kahi i hookomo ole ia ka mea o ia kanaka, a me ka palapala hookaa auhau kekahi, a ina ua hookoeia ia palapala, alaila he mea ia e maopopo ai ua haawi ia mai imua o ka Papa Nana.
Aole no i hilinai nui ke Komite mamuli o ka olelo o na hoike elua i koe, oia o Kamai a me Kaai, nana i hoike mai, o laua pu me kekahi mau kanaka e ae he 16, ua makemake lakou ia Mr. Kaluaipihaole, aole nae i haawi balota lakou, no ka mea, wahi a ka olelo, ua hooweliweliia e Mr. Solomona Kahoohalahala, i kana olelo ana e hoopaahaoia ana lakou ina e haawiia ana ka balota e ae, o kona wale no a me ko Mr. Kaiue; no ka mea, aole no i hoike hoomaopopoia imua o ke Komite he poe kupono kela mau kanaka he 16, e haawi balota, malalo o ke Kanawai.
Ma ka Buke Auhau o Lanai, ua ikea, aole i hookomoia ka inoa o Kamai ma ka Papa Helu mua o ka Luna Auhau, a ua ae mai o Kamai, aole oia i hookomo iho i kona inoa ma ia hope ae.
Oiai, ke hoahewa nei ke Komite i ka Poe Papa Nana Koho Balota ma Lanai, no ko lakou ae wale ana aku i ka Lunakanawai apana, a mea e ae paha, e hoopuka i na olelo e like me ka mea i haiia imua o ka poe koho balota, aka hoi, aole i akaka i ko makou manao o ke kumu hookahi wale no ia a lakou i haawi ole ai i ko lakou mau balota; a ua minamina makou no ka lawe ole mai o ka mea kue i na mea hoike e hoomaopopo lea ai i ka oiaio ma keia hihia.
I ko ke Komite wehewehe ana i ke Kanawai e pili ana i na hihia hoohalahala no ke koho Lunamakaainana, aia a hoakakaia, ua komo kekahi mamuli o ka hana kolohe, alaila he mea ia e hoolilo ai i kona koho ana i mea ole, a e hakahaka ai kona noho; aka, o ka haawi ana, a haawi ole ana paha, o kekahi mau balota mamuli o ka hana kaulike ole, aole ia he mea e hoolilo ai i mea ole ke koho ana.
Ua loaa ia Mr. Kaiue he 167 balota ma Molokai, a he 77 ma Lanai. A Mr. Nuton he 114 ma Molokai, me ka nele ma Lanai. O Mr. Kaluaipihaole, he 93 ma Molokai, me ka nele ma Lanai. O Mr. Nazareta, he 95 ma Molokai, me ka nele ma Lanai. O Mr. Solomona Kahoohalahala, ua nele ma Molokai, a he 78 ma Lanai.
Ua maopopo ke kuleana o ko Mr. Kaiue noho ana mai iloko o keia Hale Ahaolelo, no ka mea, ua lawa kona mau balota ma Molokai wale no e kohoia ai.
Ina i haawiia no Mr. Kaluaipihaole, kela mau balota he 18 i oleloia ua hooweliweli ka poe nona ia, alaila ekolu ona balota i koe e hoohalike ai me ka nui o na balota i haawiia no Mr. R. Nuton, ma Molokai wale no.
No keia mau kumu, ke manao nei ke Komite, e hoopanee loa ka noonoo ana o keia palapala hoopii.
A. F. JUDD,
D. H. HITCHCOCK,
L. AHOLO,
P. NUI,
J. A. KAUKAU.
Honolulu, Mei 9, 1872
Pane ia D. Kaukaha.
MR. LUNA HOOPONOPONO; Aloha oe:
Aia ma ka “Nupepa Kuokoa” o ka la 14 o Sepatemaba, Helu 37, i puka ae ai ka pane kohu ole a ua D. Kaukaha la, e pale kue ana i na mea i hoikeia e Makaainana o Hanalei me Anahola, me ka hoopuka ana i na olelo ku ole i kona ano naauao, me ka manao paha e mohaiia’na kela kanaka no kona inaina. Ua piha makehewa ka nupepa i na olelo waiwai ole a ua ua la o Hanalei a me Anahola, e hoomaikeike mai nei ia makou na makaainana.
Wahi au e hookamaemae ae la, e ninau mua iho ka ka lehulehu, Owai la keia makaainana i kapa iaia iho, o Hanalei a me Anahola ? O oe no ke ninau i kau, aia ka a ike ia mai la kou palaleha, a manao mai oe na makou e ninau kau. Ke hai mai nei no hoi oe, ke mau la no ka ke kuikahi o ia mau makaainana he 195 me oe.
He oiaio, ua kuikahi pu lakou me oe i ka la koho balota, aka, ma ka ikeia ana ma na nupepa, he palaleha oe, a ua kapa pu ia aku hoi maluna ou na inoa lehulehu, oia hoi keia, He u-a no Hanalei, He alakai no na hana eepa, He piha ka waha i ka lepo. A ma keia ano, ua hilahila makou, me ka mihi iho iloko o makou; a ua waia pu na hoi keia apana ma o kau mau hana eepa la, e nanakee mau aku ai makou ia oe.
Ke waha-nui mai nei no hoi oe ma ua pane la au, o ka apana ka o Anahola ka palaleha, no ka hoouna ole mai i palapala hoopii. O oe no ka palaleha nui, a eia mai kou palaleha i lohe oe: O kou ae ana aku i ka hana kanawai ole a ke Kuhina Waiwai, oia hoi kona unuhi ana ae i ke dala mai ka waihona ae o ka lehulehu ilihune, a kiola aku la no ka hotele, me ka ae ole o ka Hale Ahaolelo.
Pehea, ua kamailio mua ia no nae paha no keia mea, (hotele) i ke Kau Ahaolelo o ka 1870, a ua hookaawaleia i haawina? Ke hai aku nei au no ka lehulehu, aole loa i hookaawale iki ia i haawina! Eia ka ka Pauku 15 o ke Kumukanawai la i hoike maopopo mai ai: Aole loa e kaulia, a e ohiia kekahi dala kokua a o kekahi dute paha, a o kekahi auhau paha o kela a me keia ano, me ka ae ole o ka Hale Ahaolelo; aole hoi e unuhiia ae kekahi dala oloko o ka Waihona Dala o ke aupuni, me ka ae ole o ia Ahaolelo, koe nae ka hiki ana mai o na pilikia, oia ke kaua, ke kauaia mai e ka aina e, ke kipi, ka mai ahulau a me na poino e ae o ka lehulehu, i ka wa i akoakoa ole ai ka Ahaolelo; aole hoi ma ia manawa, me ka ae ole o na Kuhina a pau a me ka hapanui o na hoa o ka Ahakukamalu, a na ke Kuhina Waiwai e hoike pakahi aku i ka Ahaolelo no ia mau dala i hooliloia.
Nolaila, ina ua hoike mai ka pauku 15 Kumukanawai, e like me kela i hoikeia ai la maluna, alaila, eia na ninau, He kaua anei keia? He kaua ia mai anei e ka aina e? He mai ahulau anei? He pilikia anei keia o ka lehulehu ilihune o Hawaii nei i ka hotele?
Ke lana nei kuu manao me ke kanalua ole, e puana aku i hookahi haina no keia mau ninau a pau, oia hoi keia, Aole!
A ina hoi oe e pane mai ana, o kekahi no keia o na pilikia o ka lehulehu i koiia mai ai e ka Pauku 15 o ke Kumukanawai, alaila, ke pane aku nei au, He eepa oe, a he hupo nui no ke ao holookoa, e hiki ole ai ke hoopoinaia i na keneturia he lehulehu. Nolaila, ua pono loa no ke kapa ana o Hanalei a me Anahola ia oe, he Palaleha, a ua palaleha io no oe i kou ae ana aku e kau iho keia mau haawe kaumaha Kanawai ole ma ko makou mau hokua, a na makou e leho.
Eia ma ka hope loa o kau pane, e koi mai ana oe, Ina he manao e pa-pa leo hou, he makehewa ka hoolaha nupepa ana, e aho no ka hele aku i ou la e pa-pa leo ai iwaena o ka lehulehu makaainana o Hanalei a me Anahola, ka poe nana oe i koho.
O kau no ia, aka, ke lana nei kuu manao, ua oi aku ka pono o ka hoopapaa ana ma na nupepa, i nui ai ka poe nana e ike a hooholo no lakou iho, he ole loa ka hele aku ilaila, he uuku ka poe nana e uwa ke hoka oe ia’u. Pela no hoi au ia oe. Nolaila, ina e hoka oe ia’u ma ka hoopaapaa ana ma na nupepe, alaila, ua nui ka poe nana e uwa mai Hawaii a hala ae i Niihau, pela no hoi au ia oe. Aole nae no ka maka’u ia oe ke kumu e hele ole aku ai ilaila, aka, no ka makemake kekahi e lilo keia i kumu ao i ka lehulehu, koho aku ma ka poe kuokoa, hoopono, a imi hoi i ka pono o ka lehulehu, aole i ka pono a ka mea hookahi wale iho no. Me ke aloha.
Na kekahi Makaainana o Hanalei a me Anahola.
Hanalei, Kauai, Sept 20, 1872.
He inoa no W. S. Kakeikikauai.
He inoa kei no Huipa,
No ka lipine pua o ka hema,
E anoi lipo hau anu,
Heaha nei hana lokoino,
I maliu iki ole iho ai,
Me ka luhi lei o kakou,
Ku oe a ma-lo,
Aohe mea ike wale iho,
E hihiu oe la i Manua,
I ke alanui hele malihini,
Hiu na pea kau mahope,
Palamimo launa ka helena,
Kanu na huli ulu i ka lima,
Ahai ka ua i ka pupuhi,
Pau na ale o ka nahele,
I ka alo ia Moiekeanu,
Hele i ka loa me ka laula,
Ka hookele ana o ka ino,
Lilo oe me Kapena Kuke,
Ka imi a loaa Hawaii,
Ua lohe wale mai makou.
I ka poe heluhelu nupepa,
Ua hoi kou moku i ka home,
E kalepa hou a maikai,
Hoi hou mai no ianei,
E ku i ke awa ua maa,
Haina ka inoa i lohe,
Kekikikauai he inoa.
John Pihanakalani.
Na Keiki Alii Geremania.
Ma ke ku ana mai nei o ka Idaho, ua kau mai maluna ona, he elua mau Keiki Alii Geremania, oia na Alii na Mea Kiekie Augustus a me Phillip. He mau keiki laua no ka ohana hookahi, oia na keiki ponoi a ke kaikuaana o ke kane a Victoria i make. O ko laua makemake ke kaapuni honua, a oia keia e hele nei. Eia iho malala ko laua wahi moolelo:
O ke keiki Alii Augustus, he keiki muli, nona na makahiki he iwakalua kumamahiku, oia ke keiki ponoi a ke kaikuaana o ke kane a Victoria, a kaikuaana hanauna mua o ke keiki Alii o Wale a me ka ohana alii Keikie o Enelani. Ma kona ano kino, he loihi oia, a he nanaina hiehie. He maikai kona mau hiohiona. Ke ulu nei ma kona auwae na kahiko mau o ka umiumi, a pela no hoi kona mau umiumi luna. Ke kahiko nei oia me ka hiehie. O kana wahine, oia no kela wahine nona ka ino Teresa, (Thresa) Franboise, ke kaikamahine a ka Emepela o Berazila, Don Pedro II., ka mea ana i mare ai i ka 1864, i ka malama o Dekemaba. O kona inoa piha, oia o Lui August Marie Endres, Duke o Soxe a me ka Adimarala o ke aumoku Berazila. He moopuna oia na Earnest II., ke poo e noho nei i keia wa o ka ohana o Saxe-Coburg a me Gotha.
O keia Keiki Alii, o Augustus, ua like oia me kona makuahunawai kane, ka Emepera o Berazila, a he inoa kaulana kona ma Berazila, ma ke ano he haku o na palapala. Ua kakau oia he mau buke e hoike ana i kana huakai kaahele ia Europa Hikina a me Amerika Hema. A ke kamailio moakaka nei oia i na olelo Beritania, Farani, Geremania a me ke Panilolo.
Ua olelo mai keia alii, ke lana nei ko laua manao, e puni pono ka laua huakai ma ka malama e Mei 1873; a i ka wa e puni ai, alaila, e hoi hou ana o Pilipo i ke ao koa, a e hele ana ia i Viena i ka Hoikeike nui, ma ke ano he Elele mai ke aupuni aku o Berazila.
O ke Keiki Alii Pilipo, ke Keiki mua, he iwakalukumamawalu makahiki, ua holo mua oia i Amerika, he 4 makahiki i hala ae nei, a ua makaikai i na kulanakauhale nui malaila. O kona inoa piha, oia o Ferdinand Phillippe Marie Auguste Raphael, Duke o Saxe, a he Lutanela Kanela no na koa Landwehr ku i ka wa o Pourgeoise. He helehelena omali oia i kona pokii, a he ano haeleele a pokole kona kino, a aole hoi he popololei ma kona ku ana. He hiohiona poupou, a ke kau nei ka makaaniani iaia. Ua ukaliia oia e kekahi lunakoa o ka puali koa o Ausetoria, a he wahi kauwa Italia kana.
Mahalo Piha i ka Luna Makaainana
o Puna, Hawaii.
E KA NUPEPA KUOKOA E; Aloha oe:
E oluolu oe e auamo aku i keia wahi ukana; he mea nui a he mea hauoli no hoi i na makaainana o Puna, Hawaii, ka lohe hou mai o ko makou Luna Makaainana J. Nawahi. Penei ke kumu nui o ko makou mahalo piha ana iaia:
I ka wa a ke Kilauea i amo hele mai ai i na luna nei o makou a hiki ma Hilo, ua hoohala iki oia malaila no na la helu eha, a i ka lima o ka la ua hoomaka mai oia e hele kaapuni ma keia Apana me ka hai ana no na mea a lakou i hana ai; a ua piha loa makou i ka mahalo nona, no ka mea, o kana mau kamailio ana mai, a me ka ke Kuokoa hoi, malaila makou i manaoio ai, a me ka hai pu mai no hoi o kekahi poe i ikemaka i kana mau hana maloko o ka Hale Ahaolelo.
Nolaila, ua piha loa makou i ka mahalo nui nona; no ka mea, ua ikeia, aia no ia ma ka aoao o na makaainana, ka poe na na ia i koho aku.
Nolaila, ke haawi aku nei makou i na olelo hoolana maikai loa nona.
A, penei no ia; O oe no ko makou Luna Makainana, ke hiki aku i ka M. H. 1874, malia o oi ue ka nui o ka poe kuokoa oia makahiki, e like me kou ano, a me kekahi poe e ike he 10 o oukou, alaila, o ka pau no ia o ka pilikia ke hiki aku ia kau.
Me he mea ia no paha, o makou wale no ka i mahalo ia ia, o kekahi poe e ae no peha kekahi, aka, o makou no nae kaoiaku.
Ma ona la no makou i lohe mai ai, no ke kulana o kela a me keia Luna Makaainana.
Eia ka ninau a kekahi poe, aohe hoi he ike nui ia o kou mau manao ma na nupepa?
eia ka pane ana aku malaila, no ka mea, aole au i hoomakaukau mua i wahi kope mamua ae o ko’u haiolelo ana, a waiho aku ma ka lima o na Kakau Nupepa.
I paa no ka Keo Kaaka, no kona hoomakaukau mua no i kana kope.
Eia hou keia ninau, he oihana no nae paha kau i hoi mai nei? Eia ka haina, Aole e like me ka’u i hai mua aku ai ia oukou, aole au e lawe ana i kekahi oihana aupuni.
O na Kamailio ana o keia ano, aole no ia na ka poe i koho aku, aka, na ka poe pili Kumaho’a no ia.
Nolaila, o ko makou manao paa, o ka pili mau o keia inoa ia ia, (“Honorable”) a e ike pu no kakou e ka lehulehu, e hiki hou aku ana no ilaila, (“Hale Ahaolelo”) o ka M. H. 1874 a mau loa aku, a e kapa pu ia no hoi, he “Inoa ala.” Me ka mahalo.
NA MAKAAINANA.
Puna, Hawaii, Sept 4, 1872.
Ma ke awakea Poalua iho nei, ua kuai kudalaia ka aina o Kaeleku, ma Hana, he ekolu mile a me ka hapa mai ke awa aku o Hana, a ua lilo ia Mr. A. Unna, no na dala he $850.00. O ka nui o ka aina, he eono haneri eka.
NA OLELO HOOLAHA.
MAHOPE aku o ka la mua o Sepatemaba, 1872, o na Bipi a pau i kuniia me na hao EB a i oleia WB e lilo no ia no ka mea nona ka inoa malalo iho, aia wale no ka pakele a ua kuai mua ia i kekahi poe e ae a ua kuniia i ko lakou mau hao kuni.
Wailuku, Maui.
W. H. BAILEY.
He Mele Lahui Hawaii-O KEIA MELE I haku loea ia e Hon. Mrs. Lilia K. Dominis, ua loaa mai nei ano, he lehulehu o ua kope o keia mele kaulana mai Kapalakiko mai, a e loaa no ma ke kumukuai haahaa, he hapaha, ma ka Hale Kuai Buke.
(555 2m) H. M. WINI.
NO ka mea, ua haalele kumu ole mai ia’u a i ko’u wahi noho, ka’u wahine mare oia hoi o Mrs. KAIHUA APO, nolaila, ke papa aku nei au i na mea a pau loa, mai hoale mai oukou iaia, o poha oukou, no ka mea, aole au e hookaa ana i kana mau aie mai keia la aku.
APO Pake)
Lahaina, Maui, Sepatemaba 3, 1872. 4ts 563
UA HAALELE mai o Mrs. KANIHO CNOCKER i ka’u ai a me ko’u wahi moe, a na hele aku mamuli o kona makemake. Nolaila, ke papaia aku nei na mea a pau aole e hoaie iaia, a o ka mea hookipa iaia ma kekahi ano, e hoopiiia oia ma ke Kanawai. GEORGE CROCKER. (KEOKI KALAKA)
Honolulu , Sept. 16, 1872. 564-2at
KA MOKUMAHU KILAUEA.
NO KA HANA HOU IA ANA O KA Mokumahu Kilauea, nolaila, aole oia e haalele ana ia Honolulu a hiki i Okatoba 7, e holo kaapuni ana ia Hawaii.
SAMUEL G. WILDER,
E nana mai,-KE hoolaha, a ke hoike aku nei maua maua mau inoa, a hookaawale ia maua iho, mai ka noho hope, a luna hooponopono ana no RUTA KAMAKEA wahine mare a @ e like me ka mea i hoolahaia ma ko kakou @ o na malama i hala, no kekahi mau kumu, @ hou ia mai maua, he mau luna hooponopono no @, mai keia la aku.
H. KAUAIHILO.
G.W. PUNIHELE.
Kaluanui, Koolauloa, Oahu, Sept 23, 1872. 565 4ts*
E IKE auanei na kanaka a pau, owau o ka mea nona inoa malalo iho, ke papa aku nei au i ka poe @ haole, na pake, a me ua kanaka a pau o kela a me keia ano, mai hoaie mai oukou i kuu wahine MRS. KINA, MAKA. @ iaia, maluna no ona ko oukou poho, aole au @, no ka mea, ua haalele kumu ole mai oia ia’u, a i ko maua wahi noho. A o ka mea a mau mea paha e hookipa a malama paha iaia, e hoopii no au ma ke Kanawai, mahope iho o ka laha ana ma ka Nupepa Kuakoa. APAI.
Honolulu, Sepatemaba 10, 1872. 565-2ts*
E IKE auanei na kanaka a pau, o makou o ka poe nona ka inoa malalo iho nei, oia hoi o D. H. AIAI, JHNO KAOPUA, K. KEAWE. Ke papa aku nei makou i na holoholona komo hewa maluna o ko makou aina hoolimalima, e waiho ana ma Pelekunu, Molokai, no ua lio, bipi, hoki, miula, puaa a peia aku, aole e hele wale ma ko makou aina i hoikeia ae la maluna, a ke waiho aku nei makou i ka hopu ia J. W. M. Poohea, a o ka mea kue i keia e uku no $1.00 no ke poo, a ina e hoopoino i na mea kanu e uku e like me ka nui o ka poino, a i ole e uku mai, e kii mai ka mea nona ia holoholona me ke dala pu mai, ke kauoha ia aku e ko makou luna. E lilo koia i Kanawai mai kona ia e puka aku ai ma ka nupepa “Kuokoa.”
Pelekunu, Molokai Sepatemaba 3, 1872. 656 8ts*
E IKE auanei na kanaka a pau, owau o ka wahine mare a Mr. S. Kaaina, kuu kane mare ana i hoolaha manaoino ae nei ma ke kii kilohi o ka nupepa “Ke Au Okoa” i kuu haalele iaia, a hele mamuli o kuu makemake. Ke hai aku nei au ina ano kanaka a pau mai Hawaii a Niihau. Aole au i haalele iaia wai ko maua la i mare la ai a hiki i keia la a’u e hoolaha nei, eia no au ma ko maua home ponoi nei, me ka maua kamalei, oia no ka i haalele mai ia maua, a o ke kuau o ka hoe kana e malama `ia, a no kona pepehi mainoino ana iho nei ia’u me kona mau lima i hele a pepeekue i ke ka o ka moku, me kona ike iho paha i ka ino o kana mea i hana ai, a no keia hana ino ana ana, ua hilahila loa ia, a oia kona mea i miki ae nei a hoolaha ma ke “Ke Au Okoa.” Ke hai aku nei au ina mea a pau a me kuu kane, he mana hiki ia’u ke aie ma ka inoa o kuu kane mare, oiai, aole mea nana e malama ko mana ola, oia wale no o ke kane, aole no hoi i weheia ko maua berita mare.
Mrs. MAILI KAAINA.
Honolulu , Oahu, Sepatemaba 26, 1872. 563 4ts*
O WAU o ka mea nona ka inoa malalo, ke papa aku nei au i na mea Lio, bipi, hoki, miula, kao, puaa, moa a me na kanaka o na ano a pau, ua kapu lea na mea ulu oluna o’u mau aina kuai, aole e okiia na puhala a ohi hoi i ka lauhala. Ina e loaa ia’u a i kuu luna paha John Aimoku, e uku no ka mea holoholona i $1.00 no ka lio, he 50 keneta no ka bipi, hoki, miula, a he hapaha no ka puaa, kao, moa. A o na kanaka, e uku ke kane i $1.00, wahine $.50 keiki he $.25. O ka mea kue, e hopuia no e a’u a e kuu luna paha, ke komohewa a hoopoino i na mea oluna o kuu mau aina kuai, oia o Kalii, Kilo a me Kawahamano, e waiho ana mawaena a Pauwalu a me Waiauu, Koolau, Maui. E lilo keia i Kanawai, mai keia la aku a hiki i kona laha ana ma ke Kuokoa a mau loa aku.
J. PIWAI.
Kalii, Koolau, Maui, Sept 23, 1872 565 4t
$1.00 no ka Holoku
-MA KO’U-
HALE KUAI LOLE,
-MA-
KAUNAKAKAI MOLOKAI!
E LOAA AI I NA MEA A PAU NA
LOLE MAKEPONO LOA!
I EMI LOA IHO KE KUMUKUAI MALALO
O NA HALE KUAI E AE!
-MA NA-
POAONO A PAU LOA,
HE LA KUAI MANUAHI LOA IA!
E. C. FOUNTAIN (MEKI.)
Kaunakakai, Molokai. 565 3m
JUDD A ME LAYTON.
(ALANI KAUKA A ME LAYTONA.)
NA MEA KUAI MEA AI O NA LAKO AI A a pau, na mea niu a me na mea hoomaomona lio. Halekuai malalo o ka Hale Mu, Alanui Papu, Honolulu. 475 ty
NU HOU! NU HOU!
Ano ua Loaa mai a e Malama mau ia’na Makou
I NA ANO A PAU O
NA MEA HAO!
NANI KELA!
KULALI KA HAO!!
Na palau, Oo Haole, Huihuipalau, Kopala, Kope, O, Kaulahao Bipi, Lei Bipi, Lei Hoki, Ili Kauokaa, Paahana Amara, Opumakani, Kamaa Lio, Kamaa Hoki a pela ‘ku. KUI HAO O KELA A ME KELA ANO, PAAHANA KAMAA O KELA ME KELA ANO, NA MEA LAKO KUMEKA, IPU-KUKUI, IPU-KUKUI HELE PO, IPU-KUKUI MANAMAMA, AILA-MAHU O DOWNER A ME NA PA-PALAI, &c. Na Ipu Hao o Kela a me Keia Ano. KA OI LOA AKU O KA MAIKAI a me ka nui O NA ANO A PAU O NA MEA HAO, NA LAKO KAA, PENA o kela ano keia ano, iloko o ka Aila a maloo no hoi. AILA PENA MOA, AILA PENA MAKA, MAKAU, AHO LAWAIA, UPENA A ME NA AHO UPENA. KUKAEPELE PENA! E KUAHA ANA KEIA MAU MEA ME KA MAKEPONO. MAKA HALE KUAI O DILLINGHAM & co., Maka he Helu 95 a me 97, Alanui Moi, Honolulu, a ma @, Hilo, Hawaii. 559 6
HALE HANA KAMAA BUTI
-A ME NA ANO A PAU.-
AGIU PAKE.
NO KA HANA ANA I NA
HILA AULII HAIKAI
EKOLU-HAPAHA.
No ka hana ana i na Kamaa Kahiko me na ili Farani me ka oki ana ina he loihi a pokole paha.
E HELE MAI OUKOU.
No na Kamaa a pau a’u e hana ai no oukou mai keia la aku, a ina e ikeia ka paa ole o ka hana ana iloko o na mahina elua, alaila e hoihoi mai na’u e hana hou. Ke ano kahuli ka Hila, a hemo paha ua Ili a me ka humuhumu ana, alaila e hui pu ma ka uku i olelo mua ia. Alaila o ka mea nona ke kamaa e hele pu me a’u i ka Hotele e ai a maona, a na’u e uku me ke kika manuahi, me ka holo pu i kuu lio i hookahi hola. E ai me ka luu lima ke aloha. O na kamaa i hala na mahina ekolu aole e kii ia mai alaila kuaiia ma ke kudala no ka hala o ka manawa. He nui na Ili Noho-Paniolo, Kaulakeehi, Ili Pale wawae, me ka uku haahaa loa. E hele mai.
NO. 65, Alanui Nuuanu. AGIU PAKE.
357 6m*
Kuai & Hoolimalima Paha!
Oia na hale ma ke Alanui Maunakea, e nohoia nei e Mr. @ ka hale noho a Hale Kuai paha. @
A. SINGER.
Ma ka Hale. 525 3t
AGIU & AKIONA.
O MAUA E WEHE ANA I
HALE PAI KII
-No na mea a pau-
MA ALANUI NUUANU, HELU 65.
E loaa no na ano a paa o na Kii maikai loa e like me ka oukou makemake. E nahaia no a maikai kupono ae ka uku aku ia loa. E hele nui mai. O na lole komo i ka wa e pai ai eia no @ i kupono no na kane a me na wahine. Na kuka paina @ a me na mea hoonani a pau me na @ no a pau, a me na peahi maikai a me na pua @ maikai. E @ me na Kii pepa a me na Kii aniani, e like me ka oukou makemake. Keokeo paha, eleele paha, ulaula paha. Ma ka wa e pai ai ke kii e @ mea ia ka hapaha o ka @ a pau ka @ a laila lawe ke kii. Me ka mahalo. @
HONOLULU DISPENSARY.
KE hoopaa mai au i ka @ wale ana i na mai o kela a me keia ano, mai keia la aku, no ka hiki ana mai o ka mai puupuu @ ma keia kulanakauhale, nolaila, e lilo ana au a me ka'u poe haumana, ma ka oihana @.
G. P. JUDD (Kauka)
PAAP KUHIKUHI MANAWA HOLO
-O KA-
MOKUAHI HAWAII
“KILAUEA.”
Okatoba 7………..Kaapuni ia Hawaii.
Okatoba14……………………..Kona.
Okatoba 24……..…Kaapuni ia Kauai.
Okatoba 28……....Kaapuni ia Hawaii.
141 3m* @
HOOLAHA
-A KE-
KEENA WAIWAI!
I MEA E MAKE PONO AI KE DALA A KA POE e makemake ana e hoopukapuaa; ka lakou mau puu dala liilii, nolalia, e hoopuka ana ke ao pua i na Bana o ke Aupuni Hawaii, ma na puu dala liilii he $100, $200, $500 a $1,000. me ka ukupanee ma ka 9 hapahaneri no ka makahiki, me ka ukuia o ka ukupanee i kela a me keia hapaiua makahiki, ma ka waiwai ia, he $100, no ka @ hookahi, a pela aku. E loaa no i ka poe a pau ka pomaikai ma ka hele ana aku i ka Waihona Dala Aupuni, no ka manawa aole e emi malalo o ka 5 makahiki, aole hoi e oi aku mamua o 20 makahiki.
ROBT STERLING.
Keena Waiwai, Sept. 20 1872 564 2m
KUAI KUDALA
MAKA POAONO, SEPT. 28 ma
KA HORA 12 o ke AWAKEA,
ma kahi o ka hale @
E KUAI KUDALAIA ANA ELUA HALE,
E ku la ma Kamakela, Honolulu, i noho
mua ia iho nei e Mr. W. Pinehana Wood.
C.S. BARTOW,
Luna Kudala.
Honolulu , Sept. 17, 1872 564 2t
UA MAKEMAKEIA
E KA POE NONA NA INOA MALALO Ma ke kuai ana aku i na HA-KO, MAKOLOA a maa ka pono @ paha no ka olena @. Ua makemake pu ia hoi @ ana mai o na @ hoikeike o na mea ninauia a ma na kumukuai no ke @ hookahi, no ka haina @ ma ka 100,000 a oi aku paha.
Honolulu, Sepatemaba 12, 1872. 563 4t
J.W. Keawehunahala, W. H. Davis & Co.
LOIO! LOIO! LOIO!
UNUHI olelo Hawaii a me ke kakau Palapala o na ano a pau. Keena hana, aia makai o ka huina o na Alanui Papu a me Moiwahine, ma ke alo ponoi o ka Hale @ ma Honolulu.
542-6ms