Ka Nupepa Kuokoa, Volume XII, Number 10, 8 March 1873 — Page 4
| This text was transcribed by: | Shaun Kamakea-young |
| This work is dedicated to: | Kuulei Young |
Ka Nupepa Kuokoa
KE KILOHANA POOKELA NO KA LAHUI HAWAII.
E wiki e
1.
Ka malihini nauwe nei,
Wa lama nei, e wiki e;
He ino e ke kau ma o,
A ane uhi mai ka po.
2.
Maluna nae kou home e,
Kou wahi maha e maha'i.
Nou na makani, kaa na ao,
A puni oe i na makau.
3.
Ke pa mai nei na ua e,
Na uila ke anapu mai,
A kui na hekili e;
Auhea kou puu e malu ai?
4.
He puu honua maikai nae,
Kokoke hoi, e holo ae;
Mai lohe e, nana io,
Hamama mai ka puka nou.
5.
Iesū ua puuhonua nei,
Malaila no e malu ai,
Ke pa na ua ahi e,
Kou home oia e maha'i
6.
E ku a holo mama e;
Mai kali ma ka papa nei--
Mai nana hoi i hope ou,
Holo a pili ia Iesū.
7.
Auwe kuu Haku! e lalau
Kou lima, a hoopaa ma ia ʻ u,
O hina au ke holo ae.
A puni i ke ahi e.
7.
Na anela, oukou na koo,
Koopono mai i kupaa au,
A holo hina ole no,
Pakele hoi, a malu mau.
HAWAII.
Kumumanao a Rev. J. Manuela i
HELUHELUIA IMUA O
KA AHA EUANELIO O OAHU
ma Kawaiahao, Feb. 12, 1873.
"Heaha ka ka mea haiolelo me ka Baibala i ka mea hoomaloka?"
"O ke ano maoli no o kanaka, ua hewa no mai o Adamu mai a hiki ia nei. Aka, ma ka lokomaikai o ke Akua, ua haawei mai oia i kana Keiki, a o ka poe manaoio ia ia, he ola mau loa, a ua kapaia lakou he poe pono. A o ka poe manaoio ole ia ia, ua kapaia lakou he poe hewa, hoomaloka.
Aole nae oluolu ke Akua i ka make ana o ka poe hewa, aka, i hele mai no lakou me ka mihi, a me ka manaoio i kana Keiki, i loaa ia lakou ke ola mau loa. Nolaila ua hoolilo ka Akua i kekahi poe i poe kaula, a i kekahi i poe kumu, a i kekahi i poe luna haiolelo; a ua kauoha ia lakou e hele aku ma na wahi a pau, e hoohuli i kanaka mai ko lakou hewa mai a i ka pono o Kristo; me na olelo hoopomaikai e like me keia ma Daniela, 12:3. "O ka poe naauao e alohilohi auanei lakou, a o ka poe i hoohuli i na lehulehu ma ka pono, e like me na hoku ia ao aku ia ao aku."
A penei no hoi ma Iakobo 5:20. "O ka mea e hoohuli mai ana i ka mea hewa, mai kona hele hewa ana mai, nana no i hoopakele ae ka uhane i ka make, a nana hoi i hooki i ka hewa a nui loa."
Ma keia mau mea, ua maoppo no ka hana a ke Akua i waiho mai i na haiolelo e hoohuli i na hoomaloka he lehulehu ma ka pono. Eia ke Kumumanao. "Heaha ka ka mea haiolelo me ka Baibala i ka hoomaloka?"
He ninau ano nui keia, a he ninau maikai no hoi. E nana mai kakou ma na mea like. O ka haiolelo me ka baibala ua like me ke kauka akamai, a naauao; a ua piha kona hale kauka i na laau lapaau o kela o keia ano a nui wale; a o ka hoomaloka ua like me ke kanaka mai pilikia, kokoke me make i ka make weliweli loa.
Maanei ka ninau; "Heaha ka ke kauka, me na laau lapaau, i ka mea mai pilikia, kokoke e make?" Eia ka mea mua a ke kauka e hana'i; e hele aku e nana i ka mai, a ninaninau ia ia, pehea oe? heaha ke ano o kou mai? mai pehu anei: he akepau? eha ma ka puuwai? he kunu? he nalulu anei? a pela aku, a maopopo lea i ke kauka ke kumu o ka pilikia, alaila maopopo paha ia ia ka laau e pau ai kona pilikia.
Pela no ka haiolelo a me ka Baibala, he kauka no ia, a ua lako no oia i na laau lapaau o kela a o keia ano, aia no iloko o kona Buke Nui.
A o ka hoomaloka, oia no ke kanaka mai, ua pilikia, kokoke e palemo iloko o ka pahele a ka Diabolo, malaila e uwe ai, a e uwi ai na niho.
Heaha ka hana mua a keia kauka o ka uhane i ka hoomaloka?
Eia no ia. E hele io na la, a ninaninau i ke ano o kona mai. He palake pahe? he molowa? he naau hookiekie? he mai kuku? he mai hiamoe? a pela aku, a maopopo i ka haiolelo ke kumu o ka pilikia, alaila e koho oia i na laau kupono mailoko mai o kona Buke Nui, a lapaau aku me ke akamai, a me ka naauao, a me ke aloha.
Eia malalo ei kekahi mau manao o ka hoomaloka, a me na huaolelo noloko o ka Buke Nui.
Hoomaloka. I aha ke kanawai?
Baibala. "E aloha aku oe ia Iehova i kou Akua me kou naau a pau a me kou aloha a pau, a me kou manao a pau." Mat. @:37
H. ua malama no wau i na kanawai e like me ka mea hiki.
B. "O ka mea malama i ke kanawai a pau, a i haule ia ma ka mea hookahi, ua hea no ia i na kanawai a pau." Iakobo 2:10.
H. Aole anei o Iesu i hoopau i na kanawai?
B. "Mai manao oukou i hele mai nei au e hooole i ke kanawai. O ka hooiaio ka'u i hele mai nei, aole ka hoole." Mat. 5:17.
H. Aole ola ma ke kanawai, ma ka manaoio i ke Akua ka Ola.
B. Ke manaoio nei oe, aia hookahi Akua; ua pono oe; pela no ka poe daimonio i manaoio ai, me ka halulu hoi. Iakoo 2:19.
H. Aole wau hoomaloka, ua pule no i kekahi manawa.
B. "o ka mea haliu aku i kona pepeiao, aole hoolono i ke kanawai, e hoopailuaia kana pule." Sol 28:9
H. Aole anei i kauohaia iloko o kou Buke nui e pule?
B. "He pono ke pula mau, aole e hoonawaliwali." LUka 18:1. "O ko'u manao hoi ia, e pule na kanaka ma kela wahi keia wai, e hapai ana i na lima hala ole, me ka huhu ole, a me ke kanalua ole." 1 Timoteo 2:8
H. Aole wau pono ke hele io na la.
B. "O ka mea hele mai i o'u nei, aole loa wau e kipaku aku ia ia. Ioane 6:37
H. A no ke aha la i loaa ole ia'u ke ola?
B. "Aole oukou makemake e hele mai io'u nei. i loaa'i ia oukou ke ola." Ioane 5:40.
H. Pau, pau, aole wau i manao i kau.
B. "O ka mea manaoio ole i ke Akua, oia ke hoolilo ia ia i mea wahahee; no ka mea, aole i manaoio oia i ka olelo a ke Akua ana i olelo mai ai no kana Keiki. Eia no ka olelo; ua haawi mai ke Akua i ke ola mau loa no kakou, a o ua ola la aia no ia iloko o kana Keiki." 1Ioane 5:10,11.
H. Mamuli, mamuli, huli no.
B. "Hoomanawanui mai la ke Akua i na wa o keia naaupo ana; aka, i keia manawa, ke kauoha mai nei ia i kanaka a pau, ma na wahi a pau loa, e mihi." Oihana 17:30.
H. Kakali no wau i ko ke Akua manawa.
B. "Nolaila i ka olelo ana mai o ka Uhane Hemolele, i keia la, i ko oukou lohe ana i kona leo, mai hoopaakiki i ko oukou naau." Heb. 3:7,8.
H. Aole paha hiki i keia wa.
B. Ke olelo mai nei ka Uhane a me ka wahine mare, E hele mai. A e olelo hoi ka mea lohe, e hele mai. A o ka mea make wai lai, e hele mai ia. A o ka mea makemake, e lawe wale ia i ka wai o ka olu." Hoikeana 22:17.
H. E hooikaika no wau i ka la apopo.
B. "E ke kanaka naaupo! i keia po, e kiiia aku ai kou uhane." Luka 12:20.
"Aole loa oukou i ike i ka la apopo. No ka mea, heaha ko oukou ola? He mahu no ia, i pua iki ae, alaila ua nalo ia." Iakobo 4:14.
H. Heakha la ka'u mea e hana'i i loaa ia'u ke ola?
B. "E Hoolaulea ma oe i ke Akua." Kor. 5:20.
H. Pehea la e hoolaulea aku ai?
B. "Ina e hooiaio oe me kou waha i ka Haku ia Iesu, a e manaoio hoi iloko o kou naau ua hooala ke Akua ia ia mai waena mai o ka poe make, e ola oe." Roma 10:9.
H. Ke manaoio nei no wau ano, me kuu naau a pau
B. "O hele oe; a e like me kou manaoio ia Kristo, pela hoi e hanaia'ku ai nou." Mat. 8:13.
Pela e lapaau aku ai ka haiolelo i ka hoomaloka, a lilo oia i kanaka haipule oiaio.
Pela no hoi he pono i ka haiolelo ke hoopaa naau na pauku o ka Baibala, i hiki ia ia ke lapaau aku ai i na hoomaloka.
Ka Hoike i ka Papa Hawaii a ko
LAKOU ELELE,
i hele aku maluna o Hokuao i na
Mokupuni o Maikonisia, 1872.
(Koena ma ikela hebedoma mai.)
HELU VII.
O ka mea a kakou e kapa nei i ka misiona i Maikonisia, he mau misiona okoa no ia. He mau lahuikanaka okoa kolaila mau kamaaina, okoa ka olelo, aole e hiki ke kamailio pu. O ka lahui o Gilibati, o ka lahui o Makala, O ka lahui o Kusaie, a me ka lahui o Bonebe, a ua hui me lakou ko Mugil a me ko Pinglap. Iloko o keia, ekolu mau misiona okoa ke lawelawe nei.
1. Ko Gilibati, mai Arorae a Butaritari, He 30,000 kanaka malaila; a ua loaa malaila na kumu Samoa eiwa, a me na kumu Hawaii eiwa, a hookahi kumu haole o Binamu; ke hooikaika nei ma Honolulu e unuhi i ke koena o ke Kauoha Hou iloko o ko lakou olelo.
2. O kamisiona o Makala a me Kusaie. He okoa no ka olelo o Kusaie, a okoa ko Makala, aole e hiki ke kamailio kekahi me kekahi; aka, o Mr. Keno ke kumu mua i ao i ko Kusaie, a hoomakaukau i mau buke no lakou, ke noho nei oia ma ke kihapai o Ebona, a hele i kela makahiki keia makahiki e launa hou me ko Kusaie; he kahu ekalesia okoa ko lakou, o Libiak Sa; no ka lahui Kusaie ia, nolaila ua hui keia me ka misiona Makala. Aole i akaka ka nui o na kanaka ma na mokupuni Makala, he umi paha tausani. Aia malaila elua kumu haole, o Mr. Keno, a me Mr. Wini, a elua kumu Hawaii, o Kahelemauna a me Kaaia.
3. O ka misiona o Bonebe, ua komo malaila ko Mugil a me Pinglap; a ke manao nei na misiona malaila, na lakou e mahi i na kihapai nui e waiho ana i ke komohana aku. Elua wale no na misionari malaila i keia manawa, o Mr. Sturges a me Mr. Doane.
He nui auanei ka hana, ke holo hou aku ka Hoku Ao. Aole paha pau, a hala na malama eiwa.
He hana nui ko Mr. Binamu i ka hooponopono iwaena o na mokupuni Gillibati.
Ke makemake nei o Mr. Keno laua o Mr. Wini e kaapuni i na mokupuni a pau i koe o Makala, ko Radak a me ko Ralik, a hoonoho i na kumu Ebona ma na wahi i ae mai na kamaaina e apo mai.
A o na misionari ma Bonebe, he nui ko laua iihi e hali aku i na kumu i na mokupuni e moe ana i ke kukulu komohana, he tausani mile hou aku a keu. "Aia hoi, ke olelo aku nei au ia oukou, E alawa ae ko oukou mau maka, a e nana i na mahinaai; ua keokeo mai ano no ka ohi ana." Ioane 4:35.
Ua like ole na lahui Maikonisia, kekahi me kekahi ma ka lakou ai, ma ka lakou mau hana akamai, a ma ka hana aupuni.
O na mea ai i loaa i ka lahui Gilibati, oia na niu, a me na hala, me ka api; a ua loaa iki ma kau wahi ka ulu hua anoano; aka, ma na mokupuni Makala, ua loaa na ulu maoli, na maia, a me ke kalo; a ma Kusaie a me Bonebe, ua lako i na mea ai e like me Hawaii nei.
Pela hoi ma na hana akamai, o ka lahui Gilibati ka poe hemahema. O ko lakou mau waa, ua kapiliia ma ka humhumu pu ana i na apann papa niu liilii, i hookuiia me na aho niu. O na hale o lakou, he mau kaupaku wale no, ua hamama wale no na paia a me na kala. Olohelohe wale ka nui o kolaila mau kane, a o ka aahu o na wahine, he wahi papalu o na lau niu e uhi ana i ka puhaka wale no. Ko lakou moe, aole hikiee, malalo no mawaena o ka hale, maluna o kahi moena lauhala, a uhiia i kekahi moena like. Ua oi iki ko lakou akamai i ka hana ana i na mea kaua, na ihi niho mano a me na pololu, a me na newa; a o ko lakou mahiole, a me ka paleumauma i hanaia i ka pulu niu me he lole la mawaena, ua paa loa a puka ole i ka ihe.
Ko Makala lahui, ua pau loa i ka aahuia, aole mea olohelohe malaila. He pa-u ko na kane i hoopaaia i kekahi ano lauhala ma ke kikala; a he mau moena pawehe ko na wahine, ma ke alo kekahi, a ma ke kua kekahi, i hoopaaia i ke kaula ma ka puhaka. O ko lakou moena moe, he moena makalii pawehe, i hoonaniia kona mau lihi i ke kilohana. Maikai hoi ko lakou mau eke, a me na hinai, a o na lei hoi e paa ai ke poo. Ko lakou mau hale, ua maikai a paa, a o kolakou mau waa, ua nui me he moku haole la.
Ua akamai ko Kusaie a me ko Bonebe i ka hilo lope makalii o ka maia manila, a ulana i kaei nani me he lole maikai la, a he hana moena ano e ko kou i oi aku ka paa mamua o na moena mai Kina mai.
He aupuni makainana ko na Gilibati mai ka hikina a kokoke pili me ko Makala; malaila wale no ua loaa kahi mau alii, e like me Tarawa a me Butaritari. Aia ko Makala a pau malalo iho o na lii; pela hoi ko Kusaie a me ko Bonebe. Ina e hele ana ke alii ma ke alanui ma Kusaie a ma Bonebe paha, a halawai me na makaainana ma ke ala, moe ilalo namakaainana a hala aku la ke Alii. Ina e noho ana ke Alii ma ke ala, a hiki mai na kanaka, noho ilalo lakou; a olelo mai ke'lii, "e ku a hele oukou." He oi aku nae ka malu ma ka aina alii mamua o na aina makaainana.
Make Emoole.
Me ka wai maka a'u e kakau nei i ka make emoole ana o kekahi mea makamae, a hiwahiwa a punahele loa.
Aole he makua ponoi, a keiki ponoi, a wahine ponoi ka i make, e aho iki ia, uuku ka uwe wai maka ana. Owai la? He kaumaha no ko'u ke hai aku, o Ke Alaula ka Nupepa kamalii Hawaii, ka Nupepa hookahi e kupono ana i ka heluhelu a noonoo kamalii ma keia Pae aina.
I ka manawa hea ka make ana? I ka la 21 o Febuari nei.
Heaha ke kumu o ka make emoole ana? Aia a make emoole ke kanaka, ke keiki paha, alaila kiia aku ka poe nana, he poe kauka paha, he poe korona paha, a hele mai lakou a nana i ka mea i make, i ko waho, a i ko loko pu paha. Huli i ko waho, malia he mau eha, he mau puu, he mau hoailona no ka make i ka pepehiia. A akaka ole ke kumu o ka make ma ka nana ana i ko waho, alaila okioki lakou i ke kino, i ka umauma, i ka opu paha, a nana i ko loko, he mai paha ma ke akepaa, ma ke akemama, ma na puu paa, puuwai; he opiuma, he asenika, he laau make, he hakahaka loa no ka pololi, a oia paha na kumu o ka make. Ina he elemakule, a he luahine ka i make, oia iho la no paha ke kumu o ka make.
Ka ninau no keia, no ke aha ka make ana o ke Alaula? Aia paha na kumu o ka make mawaho ona, aia paha maloko.
1. No ka elemakule anei ka make ana? Aole ia he elemakule, ehiku wale no ona mau makahiki. He kino ui no, he kino ikaika hoi, a maikai ka nana aku, a mahaloia e kekahi poe.
2. No ka make, a haalele ana paha, o ka Lunahooponopono anei ka make ana? Aole i make ka Lunahooponopono, aole hoi oia i haalele, aole i paupauahi; a o kona makemake, e hoomauia ke ola o ke Alaulaa, me ka makaukau hoi e hana, e kakau maikai i na kaao maikai, na mele, na nane, na mea pili i na kamalii, na mea e naauao ai, a e ola'i na uhane. Ka Lunahooponopono ka i minamina loa, a kaumaha, a kaniuhu no ka make ana o ka Nupepa kamalii, no ka pio ana o keia malamalama nui no na keiki Hawaii.
3 No na mea ino oloko, na manao ino, na kaao ino, a mele ino anei ka make o ke Alaula? E okioki, e huli, e nana i ko loko a pau. Ua loaa anei na mea ino, na kii hilahila, na kaao, na mele hoolana pepehi uhane? E huli mai ka makahiki mua 1866 a i ka makahiki hope 1873. Ikaika no na Lunahooponopono i ka imi, i ka noonoo, i ke kakau ana i na mea maikai e hoopiha mai ai i na aoao o ke Alaula, me ka hoole a kipaku aku i na manao pono ole, a kii pono ole, a mele lapuwale, me na olelo hoolaha no na mea kuai. &c.
No ke aha keia make emoole ana o ke Alaula? Eia na kumu a'u i lohe ai;
1. O ka pololi, aole oia i ola i ke dala i loaa na ka poe i lawe. Aole i kaa ka aie i na hapaha. Ina hoi i kaa na hapaha a pau me ke koe ole, aole nae i lawa kona ola. Aole ola ke Alaula i ka hapaha hookahi. He hapalua paha ia o kona ola. A, nohea kekahi hapalua? No ka Papa Hawaii no. Aloha no ka Papa Hawaii, a ae e hookaa i kekahi hapalua o na mea i lilo i ka pepa, i ka inika i ka poe pai, &c.
2. O ka pololi o ka Papa Hawaii, aole dala ma ka waihona dala e hiki ai ke kokua hou i ke pai ana i ke Alaula. Aohe dala e kuai ai i na apa pepa no ke Alaula ke hoomauia, aole hoi he dala e uku aku ai i ka poe pai. 500 dala o ka Papa Hawaii ka i poho i ke Alaula i kela, a i keia makahiki, a hala na makahiki ehiku.
No laila, na ka Papa Hawaii i pepehi i ke Alaula, a make emoole oia no ka hiki ole ia ia ke hoomau i kona ola no ke dala ole.
He kumu lawa no keia i make ai ke Alaula, aole make e nana i na kumu e ae.
Eia ka ninau, e mau anei ka make ana o keia Nupepa kamalii? E wahiia anei ia iloko o ka lua kupapau a palaho loa? Aole anei e hiki ke hoala hou ia mai e like me ke kino make o Iesu, iloko paha o na la ekolu, a i ole ia, iloko ona malama ekolu?
Ua pepehiia Iesu, aole nae ona hewa.
Ua pepehiia ke Alaula, aole hoi oia i hewa.
Ua ala hou mai Iesu, a lilo i mea e ola'i kanaka, me kamalii, a i lama nui no ke ao nei.
Ma ko'u manao, e ala hou ke Alaula, ka Nupepa kamalii, ka Hoku loa no na keiki Hawaii, a e kuhikuhi hou i ke ala ola ma o Iesu la, a e pai hou i na mele e hoomakaukau ai i na keiki Hawaii no ke mele ana i na mele ma ka lani.
Aole nae au i manao, na ka Papa Hawaii e malama i ke Alaula ke hoala hou ia mai, o make hou auanei ia ia no ke dala ole.
He Nupepa kamalii kula Sabati ke Alaula. Na na kamalii kula Sabati wale no keia Nupepa, a na na kumu e ao ana ia lakou maloko o na kula Sabati. E hiki no ka poe e ae, ke lawe, ke makemake, me ka uku nae.
Malalo ae o ka aha hea e hoala hou ia ai ke Alaula? Malalo ae o ka Aha Kula Sabati o Hawaii nei e hoala houia'i oia.
Aia a halawai makahiki keia aha ma Honolulu ma Iune, 73, alail e lilo keia i kumu noonoo, o ka hoaka hou ana i ke Alaula a me ka mea e hiki ai ke hoala hou a hoomau i kona ola.
E nele anei na keiki Hawaii i ka Nupepa ole? Lakou na hoailona no na oihana aupuni, oihana ekalesia, oihana kahuna, oihana misionari, pehea la e loaa'i i ka makaukau no keia mau oihana ke nele lakou i ka Nupepa ole? Pehea la hoi e holo pono ai na kula Sabati kamalii i keia wa ke loaa ole ka Nupepa kula Sabati i na haumana? E ala, mai hiamoe ka poe aloha i a keiki Hawaii.
Na'u ka mea aloha kamalii Hawaii.
HAAWINA KULA SABATI.
HELU XI. SABATI MARAKI 16,
KUMU HAMA. IAKOBA ME ESAU.
Pauku Baibala. Kinohi 27:30-40.
30 A oki ae la ka hoomaikai ana mai a Isaaka ia Iakoba, aneane hoi ole mai o Iakoba mai ke alo mai o Isaaka o kona makuakane, puka mai la hoi o Esau o kona kaikuaana mai kon aimi mea hihiu ana.
31 Hana no hoi ia i ka mea ono, a lawe mai hoi ia mea i kona makuakane, i aku la ia i kona makuakane, E ala mai oe, e kuu makuakane, a e ai iho i ka io mea hihiu a kana keiki, i hoomaikai mai kou uhane ia'u.
32 Ninau mai la o Isaaka o kona makuakane ia ia, Owai oe? I aku la kela, Owau no o kau keiki, o kau makahiapo, o Esau.
33 Haalulu nui loa ihho la o Isaaka, i mai la, Owai? auhea hoi ka mea i kii i ka io mea hihiu, a i lawe mai hoi i o' nei, a ua ai iho nei au a pau, mamua o kou hiki ana mai, a ua hoomaikai au ia i a? Oiaio, oia ke hoomaikaiia.
34 A lohe ae la o Esau i ka olelo a kona makuakane, uwe iho la ia me ka uwe nui loa, i aku la ia i kona makuakane, E hoomaikai mai ia'u, ia'u hoi, e kuu makuakane.
35 I mai la kela, Ua hele mai nei kou kaikaina me ka maalea, a ua lawe aku i kou hoomaikaiia.
36 I aku la oia, Aole anei i pono ke kapa ana ia ia o Iakoba? no ka mea, eia ka lua o kona kaili ana i ko'u pono: kaili aku la oia i ko ka hanaumua pono o'u; eia hoi, ano, ua kaili ae la oia i ko'u hoomaikaiia. I aku la hoi o Esau, Aole anei oe i malama no'u kekahi hoomaikai ana?
37 Olelo mai la o Isaaka ia Esau, Aia hoi, ua hoolilo aku au ia ia i haku nou, a ua haawi aku no wau i kona poe hoahanau a pau i poe kauwa nana; ua malama aku hoi au ia ia i ka palaoa a me ka waina; a heaha ka'u e hana aku ai nau, e kuu keiki?
38 I aku la o esau i kona makuakane, Hookahi wale no anei au hoomaikai ana, e kuu makuakane? e hoomaikai mai oe ia'u hoi, e kuu makuakane. Hookiekie ae la o Esau i koa leo, a uwe iho la.
39 Olelo mai la o Isaaka kona makuakane, i mai la ia ia, Aia hoi, ma ka aina momona kou noho ana, a ma kahi o ka hau o ka lani mai luna iho.
40 I kau pahikaua e ola auanei oe, a e hookauwa aku oe na kou kaikaina: a i ka manawa e loaa'i ia oe ke alii ana, alaila, e haihai iho oe i kana auamo ma kou a-i.
Pauku Alakaiia--"No ka mea, ua ike oukou, i kona makemake ana mahope iho e loaa ia ia ka hoomaikaiia, ua hooleia oia; aole hoi i loaa ia ia kahi i loli hou mai ai, ua imi aku no nae oia ia mea me ka waimaka." Heb. 12:17.
Pauku hui Lahui.--"I aku la Esau i kona makuakane, hookahi wale no anei au hoomaikai ana, e kuu makuakane? e hoomaikai mai oe ia'u hoi, e kuu makuakane. Hookiekie ae la Esau i kona leo, a uwe iho la." p.38.
Kumu noonoo Nui.--Na hope like ole o ka poe pono me ka poe hewa.
Ninau Nui.--Heaha ka pomaikai ke loaa na pono o keia ao, a lilo ka uhane?
A lilo ka uhane, heaha ka mea e loaa hou mai ai?
Mele Him. 22, Leo Cambridge (Waialua) C. Sacra p 134.
Pule.
NA NINAU
P. 30,31. I ka hoi ana mai o Esau mai ka imi ana i na mea hihiu, heaha kana i hana'i na kona makuakane?
Nawai oia i kauoha e imi a e hana ia mea ono nona? p 3,4.
Ua aha Isaaka ia manawa?
Manao oia e aha ia Esau mahope o ka ai ana ia mea ono? Kupono anei ia manao i ko ke Akua makemake? Mok. 25:23.
E hookauwa aku ka hanau mua na ka hanau hoe, ka pololei, aole i ka hanau hope. Iakoba ka hanau hope, oia ka hooilina na ke Akua mai, aole o Esau, ka hanau mua.
Owai ka i hoomanao i ka makemake o ke Akua?
Aloha Rebeka ka makuahine ia wai?
Owai ka Isaaka, ka makuakane i aloha nui ai?
Owai ka i pono, Rebeka, Isaaka?
Ua hemolele loa anei Isaaka?
Ehia hewa ona a oukou i ike ai?
Pono anei ke hoopunahele i ke keiki a ke Akua i hoopunahele ole ai?
Heaha hoi ka hewa, ka hope ino ke hoopunahele ka makua i kekahi keiki, a hoohemahema i kekahi?
A lawe Esau i ka mea ono i kona makuakane, heaha kana olelo ia ia?
P. 32. Ua ninau Isaaka ia Esau. owai oe?
No ke aha ka ninau ana? No ka ike powehewehe, a, no kona kuhi hewa, o Esau no ka mea i hele mua mai.
Ua akaka anei ia Esau, ua hele mua mai Iakoba me ka mea ono?
P. 33. Heaha ke kumu o ko Isaaka haalulu ana?
Heaha hoi kona ninau, a me kona hooiaio ana?
Makemake Isaaka mamua e hoomaikai'ku ia Esau, a i kona ike ana, ua hoomaikaiia Iakoba, ua loli konamanao, a manao ua pono ia hoomaikai ana, no ke aha?
Owai ka mea a ke Akua i aloha'i? Malaki 1:2,3.
P. 34. Na Makua. I ka lohe ana o Esau, ua lilo ka hoomaikaiia ia Iakoba, pehea iho la ia?
Heaha hoi kana i noi aku ai?
P. 35 A pune Isaaka pehea?
Owai ka i maalea?
Na Keiki. Nawai i ao ia Iakoba e hana maalea?
Heaha hoi ia hana maalea ana? p5--24.
E wehewehe pokole mai ka mea makaukau.
Ua pono anei keia ao ana a ka makuwahine i kana keiki e hoopunipuni?
Ua pono anei ka ae ana o ke keiki i keia ao ana mai?
No ke aha keia ao ana e hoopunipuni, a me keia ae ana e hoopunipuni?
No ke aloha o ka makuwahine ia Iakoba, a heaha kekahi?
Owai ka hooilina oiaio?
Ua ike anei laua ia mea, a makau anei o lilo ia ia Esau?
P. 36 Pehea i pane aku ai Esau?
Nohea ka inoa Iakoba? Ua lalau Esau, aole i kaili wale Iakoba i ka pono o ka hanau mua, oia hoi o Esau; ma ke aha i loaa'i ia pono ia Iakoba? Mok. 25:31-34.
O ke kuai ana, oia anei ke kaili wale? Ua hewa paha Iakoba i kona noi ana i kona kaikuaana e kuai i kona pono, oiai e pololi a ane make ana oia; aka, owai o laua ka i hewa loa, o ka mea e noi e kuai, o ka mea e ae ana e kuai? Nana Mok. 25:34, lalani hope. Heb. 12:16. Ua hewa loa o Esau i kona ae e kuai i kona pono.
Ko ka Hanau mua Pno, heaha?
Ka hanau mua, oia kahooilina ina he keikikane, oia ke kahunapule ma ka ohana, ke ole ka makuakane, nona ka palua o ka waiwai, a he kupuna ia no ka mea nui e hiki mai ana, owai hoi ia?
Na Kaikamahine.--Heaha ke kumukuai o Iakoba i haawi mai ai ia Esau no kona pono? Mok. 25:34.
Mahope iho, ua kuaiia kekahi keiki pono ia Iakoba, owai ia keiki?
Nawai i kuai?
Heaha hoi kekumu kuai? Kin. 37:28.
Mahope loa mai, ua kuai ia'ku ke kekahi mamo nui a Iakoba, owai ia mamo?
Nawai i kuai?
Heaha ke kumukuai? Mat. 26:14,15.
Owai ka poe e hoohalike ana me Esau, e kuai ana i ka pono nui o ka uhane, no ka pono uuku o ke kino?
Kuai ia ai no ka paa kamaa owai? Amosa 2:6. 8:6.
Na Makua.--Ua minamina anei Esau i kona pono i lilo aku ia hai?
he aha hoi kona ninau? Aole anei oe i malama i ke aha no'u?
P. 37 Pehea i pane aku ai ka makuakane?
Heaha hoi kona ninau? Me he la, e iini ana no oia e hoomaikai aku iaia ke hiki.
P. 38. Mau no ke noi o esau e hoomaikai mai ka makuakane ia ia, ina loaa kekahi hoomaikai, hookahi wale iho no, he mea liilii paha no ke kino, oluolu anei oia?
Me ke aha kona noi ana?
P. 39, 40. Ua ae anei ka makuakane e hoomaikai ia Esau? Heluhelu ia mau pauku.
Ua ae no i kekahi hoomaikai e pili ana i ke kino, i keia ao, ua ae anei oia e hoihoi i ka pono o ka hooilina ia ia, a hoonele ia Iakoba? Heb. 12:17.
Oukou a Pau.
I na lilo ka pono o ka uhane ma ka hana hewa, a lealea ana, a ma ka po e noi aku ai kekahi me ka uwe waimaka e hoihoiia mai ia pono ia ia. e loli anei ka manao o ke Akua, a hoihoi mai no?
A noi aku i wahi kulu wai hookahi e hoomaalili i ke alelo i wela i ke ahi, e loaa anei? Luka 16:24-26.
Ua loaa kekahi mau pono ia Esau, heaha ia mau pono?
Me ke aha hoi e loaa'i? I ka manawa hea i ko ai keia mau wanana? II Sam. 8:14. II Na Lii 8:20,22.
He mau pono mau anei keia, a he mau pani kupono no na pono i lilo aku?
Esau, heaha ke ano? no ke aha? Owai kekahi inoa? No hea ia inoa?
Iakoba, heaha ke ano? no ke aha?
O wai ka inoa hou mahope? no hea mai ia inoa?
Mahea na mamo o Esau i keia wa? na mamo hoi o Iakoaba?
Pono anei ke imi i ka pomaikai ma ka hoopunipuni ana?
Oluolu anei ke akua ia Rebeka me Iakoba i ka laua hana maalea ana?
Heaha ka Pauku Alakai? ka pauku hui Lahui? ke Kumu noonoo nui?
Ka ninau Nui /
Mele.--Him. 365, Leo Elparan, C. Sacra p.46.
Pule a hookuu aku. HAWAII.
"KA NUPEPA KUOKOA."
Is published in Honolulu
EVERY SATURDAY.
$2.00 per annum, or $1.00 per six
months, in advance.
ADVERTISEMENTS not exceeding 10 lines, inserted once for $1.00 twice for $1.60; and $2.00 for one month; all advertisements must be paid for in advance.
KANIKAUS will be cahrged 1.00 per page, or 4 cts. a line
PAYMENTS FOR ADVERTISEMENTS, Subscriptions or kanikaus amy be paid to any of the Agents of the Kuokoa or may be enclosed in a letter to the Publisher.
ALL SUBSCRIPTIONS must be PREPAID. NO names either of foreigners or natives will be inserted on the subscription list until paid for. This rule must be strictly adhered to on account of the low subscritption price
THE OFFICE OF THE KUOKOA over the Post Office. Office hours from 9 A.M. to 4 P.M.
H.M. WIHTNEY, Publisher.
Bound Volumes of the KUOKOA for sale at the office over the Bookstore-$3.50 each.
Persons having complete sets of the above, can have em bound by paing $2.00 each
NA BUKE
HOOLAHAIA E KA PAPA HAWAII
Baibala Hemolele Nui ili eula nani me na kuhikuhi ma na a ao.....$12 00
" " Nui ili eleele kaekae wai gula.....5 00
" " uuku iki ihi " ".....8 00
" " Pananaiki iho ili eleele.....4.00
Kauoha Hou ili gula nani me na kuhikuhi.....3.00
" " eleele kaekae wai gula.....1.00
" " " ......75
Kauoha Hou Hapa Haole.....75
Lira Hawaii 1848 me ke kanawai......25
" " 1855.....25
Moolelo Ekalesia.....50
Haiao ili lahiahi.....10
Hele Malihini ana.....25
No ko ke Akua ano......25
Lira Kamalii......25
Hoike Palapala Hemolele.....25
Moolelo o Heneri Opukahaia.....25
Hoike Akua.....25
Weheweheia.....25
Ninau Hoike ili manoanoa.....25
" " " lahilahi....10
Kumumua Kula Sabati.....10
Buke Lawe Lima.....10
He Buke no ka Pope.....10
Ui Kula Sabati Helu 3.....25
" " " " 4......25
" " " " 5......25
Buke Euanelio a Ioane.....10
Himeni .....1.00
Himeni Ili nani.....1.75
Na Kauoha Hou Pakeke
Ili Gula nani.....1.50
Ili eleele kaekae nani......50
Ili eleele......35
Kauoha Hou Pakeke me na Halelu
Ili Gula nani.....1.75
Ili eleele kaekae wai gula.....50
Ili eleele......50
Na Halelu Pakeke
Ili Gula nani.....50
Ili eleele kaekae wai gula......30
Ili eleele.....20
Ka Hae Hoonani (Buke Mele)......25
Buke Wehewehe Huaolelo Baibala.....2.00
" " " Ili nani.....3.00
Eia na buke haawi wale
Palapala Liilii--
Helu 4--Makemake anei oe i ke ola
Helu 6--E hele i o Kristo la.
Helu 7--Ka hoi ana mai o ke Keiki Uhauha
Helu 11--No ka hoohiki wahahee i ke Akua
Helu 16--Ka Kehia ana o ka Ahaaina a ka Haku a ma ka Bapetiso ana.
Helu 17--Mai hana ino i na holoholona
Helu 18--No ka mahi ana, kuai ana a me ka inu ana i ka Awa.
Ka Davida Malo Kumumanao.
Ka Moolelo o Batimea Puaaiki.
J. F. POKUE.
Kakauolelo o ka Papa Hoeke o ka Ahahui Euanelio o ko Hawaii Pae Aina.