Ka Nupepa Kuokoa, Volume XV, Number 46, 11 November 1876 — Page 4
KA NUPEPA KUOKOA, ME KE AU OKOA I HUIIA.
HOLD THE LIGHT UP HIGHER. Gospel Singer 121.
Holo wale ae kekahi
Ma ke kai oonei ; Ole hoe a hoe uli,
Ole lama e. E kuu hoa, nau ka hana,
Hana aloha e I ka mea holo wale
I pae maluna'e. Cho.— Kau ka lama iluna, iluna,
Kau ka lama iluna, iluna, Kai a kau imua, imua, I loaa ke ao. 2
Me ke kiai hale lama,
Kau ka lama a mau ; Moe ole, makaala Ma na po a pau.
Nui no na powa ino
Ma ke kai oonei —
Kiai i na hoa aloha,
A hoola e. Cho.— Kau ka lama, &c.
3 Kau ka lama no na hoa,
Kena mai Iesu — Kai kekahi no kekahi,
Me na lima pu. Kii, hoala i pau ka moe,. Imi i ola'e —
Paa ke aloha, kai iluna Mai ka maka ae. Cho.— Kau ka lama, &c.
4
Kau ka lama iluna, iluna,
No na kini no — Kai a kau imua, imua —
Hooikaika mau. Kii i lama no ka Uhane, Lama olino e, Kau iluna, mai kuu iho,
Kau mau a ola'e. Cho — Kau ka lama, &c.
HAWAII.
HAAWINA KULA SABATI.
HELU 9.— SABATI NOV. 26, 1876. KUMU HANA.— Ke a Petero. PAUKU BAIBALA, Oih. 10 : 1 — 20,
AIA ma Kaisareia kekahi kanaka, o Korenerio kona inoa, he lunahaneri no no kekahi papa koa i kapaia ka Italia.
2 He haipule, a makau ia i ke Akua, a me ko kona hale a pau, manawalea nui no ia i kanaka, a pule mau no ia i ke Akua.
3 Ma ka hora aiwa paha o ka la, ike paka aku la ia ma ka hihio, i ka anela o ke Akua, e hele mai ana i ona la, a i mai la iaia, E Korenerio.
4 A i ka haka pono ana iaia, makau iho la, i aku la, E ka Haku, heaha ia ? I mai la kela iaia, Ua pii iluna kau mau pule, a me kau mau manawalea, i mea hoomanao imua o ke Akua.
5 E hoouna aku oe ano i mau kanaka i Iope, e kii ia Simona, i kapaia o Petero.
6 Ua hookipaia oia e Simona ka hana ili, aia i ka hale ma kahakai ; oia ka mea nana e hai mai ia oe i ka pono au e hana aku ai.
7 A hala aku la ka anela i olelo aku ai iaia, alaila, hea aku la ia i na ohua ona elua, a me kekahi koa haipule o ka poe malama mau iaia.
8 A hoike ana'ku i na mea a pau ia lakou, a hoouna aku la ia lakou i Iope.
9 A ia la ae, i ko lakou hele ana, a hookokoke ana aku i ke kulanakauhale, pii ae la o Petero i kahi maluna o ka hale e pule ai, i ke ono paha o ka hora.
10 Pololi loa iho la, makemake ae la ia e ai ; a i ko lakou hoomakaukau ana, haule mai maluna ona he akaku ;
11 Ike aku la ia, ua weheia ka lani, a iho mai la kekahi puolo i ona la ua like me ke kuina nui i huiia na kihi eha, a kuu ia iho la ilalo i ka honua : 12 Maloko ona na holoholona wawae eha a pau o ka honua, a me na mea hihiu, a me na mea kolo, a me na manu o ka lewa.
13 A hiki mai la kekahi leo i ona la, E Petero ; e ala, e pepehi, a e ai.
14 I aku la o Petero, Aole loa pela e ka Haku ; no ka mea, aole loa au i ai i ua mea pono ole a pau, a me na mea haumia.
15 Hiki hou mai na leo la iaia, o ka lua ia, O ka mea i huikalaia e ke Akua, mai kapa aku oe he pono ole.
16 Ekolu hana ana mai pela, a lawe hou ia'ku la ua paolo la i ka lani.
17 I ko Petero kanalua ana iloko ona, i ke ano o ke akaku ana i ike ai, aia hoi, na kanaka i hoounaia mai e Korenelio, ua ninau mai i ka hale o Simona, a ku iho la lakou ma ka ipuka.
18 Hea mai la lakou, ninau mai la, Ke noho nei anei o Simona maanei, o ka mea i kapaia o Petero ?
19 I ka noonoo ana o Petero i ua akaku la, olelo mai la ka Uhane iaia, Aia hoi, ke imi mai nei na kanaka ekolu ia oe.
20 Ea, e ku oe, a e iho ilalo, a e hele pu
me lakou, mai kanalua ; no ka mea, na'u no lakou i hoouna.
Pauku Gula. " Aole ke Akua i manao mai i ko waho o ke kanaka." Oih 10 : 34.
Mele. Robina.Gula. Mele 26.
1 Ia'u e nauwe meha ana Mai nei ae a i ke ao, E hai au la i ka hana
A Iesu i hana'i no'u. Cho.— Nani, nani, haleluia,
Nauwe malihini au ;
Ke nauwe la ia Ziona,
I kuu home oia mau.
2 Ia'u i nalo a auwana,
Imi Iesu a loaa, Apo mai la, a hoolana, A kai ae ma kona pa.
Cho.— Nani, nani, haleluia, &c.
Pule, i lohe ko na aina e i ka olelo o ke ola ma o Iesu la, a pela aku.
Na Ninau a na Kumu.
P 1, 2. Owai keia kanaka ? nohea ia ? Aia mahea Kaisareia ? Aia ma ke komohana e pili ana i ke Kaiwaenahonua. He kulanakauhale alii no Roma ia. A nolaila mai na kanaka. He luna aha Korenelio ? Owai ka inoa o kona papa koa ? He kanaka aha oia, a makau ia wai ? Me wai ? Heaha kana hana i na kanaka ? Heaha kana hana mau i ke Akua ? He Iudaio anei oia ?
P 5. Heaha ka Korenelio i ike ai ? ma ka hora ehia ? Ka hora 9, oia ka hora 3 ahiahi ia kakou. Aha mai ka Anela ? P 4. Pehea Korenelio ? No keaha kona maka'u ? Heaha hoi kona ninau ? A pane mai ka anela pehea ? Ua lohe a hoapono ke Akua i kana mau pule a me kana hana manawalea.
P 5, 6. Heaha ka ka anela kauoha ia Korenelio ? Aia mahea Simona Petero ? A na Petero e hai i ke aha iaia ?
P 7, 8 Hoolohe anei Korenelio ? Owai kana i hea aku, a hoike aku, a hoouna aku e kii ia Petero ? He mau koa haipule anei kekahi ?
P 9, 10. Ia la ae i ka wa hea ? E aha ana Petero ma ka hora 6 ? He awakea ia ia kakou. Lilo Petero i ka pule a pololi, a makemake e ai. A i ka hoomakaukauia ana o ka ai, heaha ka i haule maluna o Petero ?
P 11, 12. Heaha ka Petero i ike ai ma ke akaku ? Heaha ke ano o ka puolo ? Kauia mai hea mai ? Heaha maloko o ka puolo ? He mau holoholona aha kekahi ? He mau holoholona kapu mamua, hiki ole ke ai ia.
P 13 — 16. He leo aha ka Petero i lohe ai ? A pane aku oia pehea ? A pane hou mai ka leo pehea ? Ehia hana ana pela, a lawe houia'ku ua puolo nei i hea ?
P 17 — 20. I ka noonoo ana o Petero no ke ano o keia akaku, owai ka i hoea mai a ninau nowai ? A i ko lakou ku ana ma ka puka o ka hale, nawai i hai ia Petero ? A kauoha iaia e aha ? Aia mahea Petero ? Papa ka Uhane, mai aha ? No ke aha ? Makau Petero i ka hele pu me na kanaka e, o haumia paha oia. Nolaila ua papu ka Uhane, mai makau.
Mele. Robina Gula. Mele 23.
1 Hamau e ! ke mele mai
Na anela o luna ; Mele nani a maikai,
Oli a mau loa. Aia lakou ma ke ao,
A, mamuli hui kakou, Hui no a mele pu ;
Oli a mau lea.
2 Hamau e ! ke mele mai, Ka puali lani ;
Lira gula, mele e ;
Ola a hoonani. Aina ala a laelae,
Muliwai olino mai ; Lira, pua, lei maikai ; Oli a hoonani. Na ninau o ke Kahu.
Na Makua. Waiho kakou ia Petero mahea i kela Sabati ? E aha ana ? Iaia ma Iopa, owai ka i kii iaia e hele i kahi e ? No ke aha ko Korenelio kii ana aku iaia ? Hai mai i ke ano o Korenelio, kana oihaha, kana hana mau ma ka ohana. Aole oia he Iudaio, he haipule nae. Owai ke komo e aku iloko o ka lani, mamua o na Iudaio ? He kanaka haipule oia, a ike ma ka hihio i kekahi anela, hai mai i kekahi poe haipule ole i ike i ka anela, i na mea kupanaha ma ka moeuhane. Ma ke aha oukou e hoohalike ai me Korenelio ? Pono ke huipuia ke aha me ka pule ? Heaha ke ano o ka pule a me ka manaoio ke ole ka hana maikai ?
Na Keiki. Owai keia lunakoa haipule ? E pule ana oia i kekahi manawa, a halawai pu owai me ia ? Oluolu anei ke Akua i kana mau pule me kana mau hana manawalea ? Pehea la e oluolu ai ke Akua i ka oukou man pule ? Oluolu anei oia ke pule waha oukou me ka hana ole, me ka manawalea ole, kokua ole, makau ole i
ke Akua ?
I ka Petero pule ana maluna o ka hale i ke awakea, heaha ka mea kupanaha i loaa iaia ? Heaha, maloko o ka puolo ? Paipai ka leo iaia e aha ? Hai mai na mea ekolu i kauohaia. Ala, pepehi, ai. Hoole nae Petero no ke aha ? No ka mea, he mau mea haumia a hookapuia iloko o ka puolo. Aole pono ke ai. Makau anei oukou i ka ai a me ka inu i na mea haumia ? Makau anei i na hewa a hoole aku, aole make e hoopa ?
Ke Kula a pau. Kela puolo, me ke kauoha, e pepehi, e ai i na mea a pau maloko, na mea maemae, na mea maemae ole, me kela leo, mai kapa i ka mea a ke
Akua i huikala ai, he haumia, heaha ke ano ? Heaha ka hana mua i maopopo ai, e paa ana na kapu o na Iudaio ? Pehea ka paku o ka luakini i ka wa i make ai Iesu ? Heaha na anela i keia wa ? Hebera 1 : 14. Pehea na hana a ke Akua ? 1 Tim 4 : 4. E aha hoi kakou ? Rom 14 : 21. Hai mai Ioane 8 : 12. Iakobo 1 : 6, 7. me ka pauku gula.
Mele. Him 342 7 — 6. Leo Hosana kamalii. 1 E ku, e ku no Iesu, Na koa paia nei ; E kau ka hae iluna,
E paa o lilo e ; E holo lanakila,
A hee ka enemi, E lilo Iesu Kristo I Haku, i Moi.
Pule, i lilo kakou a pau i mau koa haipule no Iesu. &c.
Haawina no Dek. 3.— Oih. 10 : 34 — 48.
HE
IWAKALUA TAUSANI LEGUE MALALO O KE KAI !
— NA MEA —
KUPANAHA O KA MOANA !
KE ALA O KA MEA HUNA,
— A O KA MEA —
POHIHIHI O KA 1866 !
MAHELE 2.
MOKUNA I. KA MOANA INIANA.
EIA KAKOU ma ka mahele 2, o ko kakou hele makaikai ana ia lalo o ke kai. Ua pau iho nei ka mahele mua, ma ka naue malie hele ana i ka ilina akoakoa me na kulu waimaka a ke aloha, a o na mokumokuahua walohia a ka naau ke mau nei no ia iloko o'u. Penei, ma waenakonu o keia kai nui e naue hele ai o Kapena Nimo a hiki i kona luakupapau ana i hoomakaukau e ai iloko o kekahi wahi hohonu loa o keia moana. Aia ma keia wahi aohe pilikia e hiki i laila, e haulani ai i ka hiamoe kau o na poe aukai o ka moku Nautilo, na poe i pine ia kekahi i kekahi a paa like ma ka make e like la me ko lakou pili paa ana i na wa ola. " Aole kekahi o lakou e pakele mai keia paa ana no ka make." O na poe luina a pau o ka Nautilo, ua like ko lakou pilihua me ko'u pilihua no keia hele ana a hiki i ka luakupapau.
O ko'u wehewehe maikai ana imua o ko'u hoa maikai Kosila no na mea e pili ana i keia mea, ua lilo ia he mea oluolu maikai i ko kuu makamaka maikai manao.
O keia manao o ke Kapena o ka Nautilo, he mea hilu no ia, i ike ole ia iwaena o na lehulehu, ka hoowahawaha i ka uhi ana o ka lepo o ka aina maloo maluna o ko lakou mau kino ; a upu no kona manao e holo oia iloko o ke kai a waiho na iwi iloko o ka opu o ka moana lipolipo. A ma ko'u manao o Kapena Nimo wale no paha ia i kona ano.
He oiaio, o na hana o ka po i hala aku o makou, mai laila mai ko makou hoopaahao hoi ia ana iloko o keia keena pio, pau ka hiamoe a na Kapena Nimo wale no ka hana, kuu pau ia ka holo o ka moku, naka ka moku i ka ua mea o ke kuu pau ia o ka ikaika o ka enegini. A o na eha o ke kanaka i make ai ala hou mai la ia iloko o ko'u hoomanao ana, oiai, ua ikaika loa ka hana a na ohe mahu i hoopihaia me ka uila. Aole no e nele ka eha hou o kekahi, ke noha hou kekahi ohe uila.
Ma keia wa, aole mea moakaka iki ia'u, a o ka noho wale iho la no iloko o ka pouli o na noonoo ana ; aka, no ka manao nui o'u e paa ona moolelo no makou, nolaila, ua hoao au ia'u iho, e kakau i moolelo no makou.
Ma ke awakea o ka la 21 o Ianuari, M. H. 1868, pii mai la ka hulipahu me ka ohenana e imi i ke kiekie o ka la. Pii aku la au ma ka oneki e nana ai i na mea e hana ia ana. A ma ka'u ike aku i ua aliimoku nei, aole lohe i ka'u olelo, oia hoi ka olelo Farani, nolaila, oia noho mumule wale iho la no ka maua.
I ua aliimoku nei e nana ana me ka ohenana, pii mai la kekahi sela, e hoomaemae i ke aniani o ka ipukukui. O keia ipukukui, na laua ia me ka paa a me ka maikai loa a me ka hoonui lilo ole. O Kapena Nimo no ka mea nana i noonoo keia ipukukui, he uila ka mea e a ai, a ua hiki e ike na wahi a pau o ka moku me keia ipukukui. A i ka makaukau ana o ka Nautilo e holo hou iloko o kana huakai aukai, iho aku la au ilalo o ke keena nui. Ua paa na pani aoao i ke paniia, a o ka ihu o ka moku ia wa o ke komohana.
O ko makou holo aku la no ia me ka pakika lua ole i ka ili o ka Moana Iniana, he moana akea, nona ka ili he 1,200, 000,000 eka. O ka holo ana o ka Nautilo, mawaena no ia o na anana he 50 a
me ka 100 ka hohonu malalo o ka ilikai, a he mau la ko makou holo ana ma ia
ano.
A hala he mau la ia makoa o ka holo ana, ike makou i na manu nui o ka moana, oia hoi na kaupu a me kekahi mau ano manu e ae he nui wale. A o na poe uhai holoholona o makou, iliki aku la i ke kipa a make kekahi mau manu, a loaa ae la ia makou he mau io makamaka o na mea lele o ka lewa.
O ke aliali o ke kai, ua hiki loa ia'u ke ike loa aku i na ano i-a a pau maloko aku o na pani aoao o ka Nautilo ; a mawaena o keia mau i-a, he mau mea ano e loa i ike ole ia e a'u mamua. A ma ka hoao ana e ai, ua ono maoli no kahi mau i-a, a o kahi naua wale no ka io.
Mai ka la 21 a i ka 23 o Ianuari, he 250 legue ka holo o ka Nautilo i na hora he 24. Ina aole he malamalama uila o ka Nautilo, alaila, aole e hiki ia makou ke ike pono i na ano i-a iloko o keia holo launa ole o ka moku ; aka no ka lako ana i keia malamalama, ua hiki loa i na i-a ke pipili loa mai ma na aoao o ka Nautilo, a ma ia mea i hiki loa ai ia'u ke ike pono aku i na ano i-a a pau.
Ma ke kakahiaka o ka la 24 o Ianuari, ike makou i ka Mokupuni o Keeling, aia ma ka latitu hema 12 deg. 5 min., a ma ka lonitu 94 deg. 33 min., ua paapu o luna i ka niu ; ua ike ia no hoi o Mr. Darwin laua me Kapena Fitzroy. Hookokoke iki aku la makou i kuaau o ua mokupuni nei ; a kuu aku la makou i ka upena a hei mai na i-a o ia moana ia makou he nui wale, o kela a me keia ano, a me na pupu o kela a me keia ano. Aia mawaena o keia mau pupu, he mau mea nani loa i kupono loa no na pahu hoikeike. I ka nalo ana aku o ka Mokupuni o Keeling mai ia makou aku, nana iho la wau, aia hoi ko makou ihu ia wa, he komohana akau, oia hoi ka ihu e hiki aku ai i ka Anemoku o Iniana.
O ko makou holo ana mai keia haalele ana ia Keeling, he holo akahele loa, me ko makou emi mau nae iloko o ka hohonu loa. I ke ana ana i ka hohonu o keia moana, aole i hiki iki i ka papaku o 7,000 anana. O ka wai olalo, ua anu mau, aole e like me ka wai ma ka ili o ke kai, a oia kekahi mea e hoike mai ana i ka hohonu loa.
Ma ka la 25 o Ianuari, ea ae la makou ahiki i ka ilikai, a kuu pau ia aku la ka holo o ka Nautilo, me ka paio ana me na ale kawahawaha o ka moana. A o ka'u no ka makaikai i ke kai ; a ma ka auina la, ike ia aku la kekahi mokuahi e holo ana ma ka ihu like me ko makou. Aole nae e hiki i ka mokuahi ke ike mai ia makou, no ka haahaa loa o ka Nautilo iloko o ke kai. A ma ka'u koho wale ana, he mokuahi ia, no ka Hui P. O. i hooholoia mai Ceylon a i Kikane, me ke ku iki ana ma King George's Point a me Melebona.
Ma ka hora 5 o ke ahiahi, uhi mai la na omamalu a ka po, maluna o ka moana, a o wau a me Kosila, hookahi a maua hana o ke kuka ana no na mea e pili ana i ka makou wahi e holo nei. A ia wa ahiahi, lana mai la na auwaalalua ma ka ilikai, me ka o ana i na pea o lakou e hookahakaha ana ma ka ilikai a he mea nani okoa no ia i ka maua nana aku. E like me ka hooponopono ana o ke kanaka i kona waa pela no keia mau holoholona liilii.
Ua aneane e hala ka hora o ka lana malie ana o ka Nautilo mawaena o na kohola i noho ia e keia mau holoholona. A ma ke ano e loa o ko makou moku, nolaila, ua laka loa no keia mau holohona aole puiwa, a holo aku la hoi. Ho ka aneane ana e molehulehu loa, pu-a ia ae la na pea o ua mau auwaalalua nei, a luu aku la iloko o ke kai.
Ia la ae, o ka 26 ia o Ianuari, hiki makou i ka Poaiwaena, a mai laila aku hiki ma ka hapa poepoe akau. Iloko o ia la, he mea e loa ia'u ka ike ana aku i ka lehulehu loa o na mano ma ia kai, e hoopuni mai ana ia makou. A he mea weliweli loa ia no ia kai.
O kahi Nede Lana nae, piha loa oia i ka olioli, no ka loaa ana he mau hoa paio nona e lealea ai, a ua pau no kekahi mau mano i ka make iaia.
I mea e pau loa ai na mano mahope o ka Nautilo, nolaila, ua kuupau ia ka holo o ka moku, a pau loa ae la na ohana mano mahope pono o makou.
Ma ka la 27 o Ianuari, hiki makou mawaho o ke Kaikuono o Benigala, a ike aku la makou i ka lana mokaki mai o ke kino make o kanaka o Inia ma ka ilikai, i pau i ka lilo i i ka waikahe nui o ka muliwai o Ganges.
O na heana nae o ka poe make, ua noke wale ia e na manu Vuleture i ke kikokiko, hele a pohoa, a he manaonao ke nana aku. O ke koena iho hoi o na heana, hao aku la hoi na ilikani o ka moana.
(Aole i pau).
KA HUNT'S LAAU OLA
(HUNT'S REMEDY)
HE LAAU LAPAAU HOU, MAI AMERIKA MAI !
He Laau Maikai keia no
Na mai pehu o ka opu,
Na mai o ka puupaa a me ka opu mimi,
Mimi-paa, Mimi-eha, Mimi-helelei,
Ka lepo gravel iloko o ka opu-mimi,
Ka mana ole, kapalili, hui ono ole ka ai.
Na Mai Wahine,
NAWALIWALI O KE KINO,
LEPO ULA ILOKO O KA WAI MIMI,
MANOANOA PAHA KA WAI E like me keokeo o ka huamoa,
Like paha me na kaula silika keokeo, eleele, lenalena paha ; a i ole ua like paha me
ka lepo i anaiia i na iwi keokeo, a i ka mimi ana, ua wela oioi ka
mai, me ka eha nui o ke kikala a me ka puhaka.
HE NUI NA HOIKE e ola nei, ka poe i loohia i keia mau mai i haiia maluna ae,
ua pau lakou i ke ola maikai, no ka inu ana i ka
HUNT LAAU OLA. ("HUNT REMEDY)!"
UA HAAWI mua ia keia laau, e kekahi kahuna lapaau naauao, i ke kanaka mai
pehu o ka opu, e noho ana me ka ohana a Mr. Hunt ; John Hunt kona inoa, he 45 kona
mau makahiki, he kanaka nui poepoe, ua loohia i ka mai pehu. Ua haawiia kela me
keia laau no keia mai, aole nae oluolu ; ua mahuahua mau kona pilikia, ua pau loa ke
kino a me na wawae i ka pehu ; ua kokoke paa loa ka mimi ; kokoke pau loa ka hanu
ana ; a ua mahuahua loa ka wai iloko o ke kino. Aole hiki iaia ke moe ilalo ma ka
moe, nolaila, ua noho wale no iluna i ka po a me ke ao. Pela mau kona popilikia a hi-
ki i kona hoao ana i keia laau, a ke kahuna i kuhikuhi mai ai. A i kona inu ana i ke-
ia laau, ua hoomaka koke ka oluolu. Ua paipai koke ia ka puupaa i ka laua oihana ;
ua puka hou ka wai mimi a nui wale ; ua emi koke mai la ka pehu o na waewae ; a ua
oluolu hou ke ake-mama i ka hanu ana ; ua oluolu a maikai ka io o na lala, a e hoi nui
mai ana ke ola maikai, alaila, me ke kuhihewa, ua waiho oia i ka laau i kekahi mau
la. Ua pono ole nae ka waiho ana ia manawa, no ka mea, aole i ola io maoli kona mai
pehu. Ua molowa hou na puupaa i ka laua oihana, a ua mahuahua hou ka wai iloko o
ka opu, a ua popilikia hou e like me mamua. Alaila, ua inu hou oia i ua laau la, a ma
ka hoomanawanui ana, ua lanakila hou auanei maluna o ka mai, a ua ola io maoli, a
ua hoomaka hou oia i kana oihana mawaho o ka hale.
Oia ka lapaau mua ana me keia laau ; a mai ia wa mai, (he 25 makahiki) ua ha-
hanaia keia laau e like me ka hana ana o Mr. Hunt, a ua haawi na kahuna lapaau i ke-
ia laau i ka poe mai pehu a me na mai like.
Mai ia manawa mai, ua ikeia, e mahaloia hoi keia laau, mai o a o, e na kana-
ka, a ua inu ia hoi ma ke ao ana a me ke ao ole ana mai o na kahuna lapaau ; oia ka
mea i hoola mai i na kanaka he nui, ka poe pilikia i ka mai pehu, a kokoke i ka make.
Na kuhikuhi no ka inu ana :
E INU I KE PUNA TI PIHA, a hala na hora 4, alaila, e inu hou. E mahuahua
liilii nae a hiki i elua puna ti piha — a hiki hoi auanei i puna nui piha.
NO KE KEIKI hookahi makahiki a hiki i na makahiki eono, e haawi 5 kulu, a hi-
ki i na kulu 20 ; eha hora nae mawaena o ka haawi ana.
KUMUKUAI, he - - $1.50 no ka omole.
DILLINGHAM & CO.,
762 3m 774 Na Agena no ka Pae Aina Hawaii.
ANOIA I KA LEHULEHU,
E kipa mai a e nana
i kumaka ka ike i na waiwai na-
ni i loaa mai nei iloko o na
La Kulaia iho nei.
Penei ke ano o ua mau waiwai la :
Na wati a me na kaula gula,
a na Ledee a me na Keonimana !
NA KAULA OPELE A NA LEDE
NA KOMO GULA NANI O KELA A ME KEIA
ano o na Lede a me na Keonimana !
NA KUPEE GULA,
NA LIPINE GULA,
Na gula pepeiao o na wahine !
e oaka ai i na pepeiao, a e hulali ai
hoi na manamana lima, a e
kilipohe ai hoi na ai.
Na komo humuhumu gula a me ke kala,
Na pihi pulima gula wahine a kane,
Na laketa gula lei wahine nani,
Na komo daimana o na Lede.
Na kaula laketa,
Na pine omau kihei,
Na laketa aniani,
Na huka gula wahine.
NA LAKO HALE.
NA PUNA,
NA PAHI,
NA KIAHA, KALA,
NA APO KALA,
NA KAWELE holoi lima,
NA O DALA o kela a me keia ano,
a me na mea nani e ae no he nui wale.
E kuaiia aku ana no
ma ke kumukuai haahaa loa i ko
na wahi e ae o ke taona nei.
UA MAKAUKAU NO HOI NA
mea nani no kanaka makua
a me na kamalii.
Na Kamaa Paa Loa,
e loaa no maanei e like me ka
makemake ; a ina e loaa
koke ka ino, he hiki
no ke hoihoi mai.
M. McINERNY.
Kihi o Alanui Papu a me Kalepa. 763 3m 774
Lole Makepono ke Kuike !
E LOAA NO IA MA KAHI O
KAKELA ME KUKE,
— E LAA NA —
AHINAHINA,
KALAKOA,
KEOKEO,
LEPONALO,
Pena, Aila, Aniani,
Na Mea Piula,
Kopa, Aila Honua.
Aila Hoomaloo,
Kui Kakia, Pakeke,
Tabu, Kaula, Noho lio,
Hulu-palaki, na Pulumi.
A he Agena no hoi no na Mokupuni o Ha-
waii nei no na
LAINAKINI-NAO,
LAINAKINI-MAOLI,
PALULE KALAKOA,
ALAPIA, KELEPA, KILISA,
Na Lole kupono i ka wawae,
Palule Huluhulu,
Na Lole Huluhulu,
Na Lole no ka hoohehelo ana
Lipine, lihilihi, a me ia mea'ku
— A HE —
MAU MEA AI KAHI
Ka Palaoa, Kopaa,
Raiki, Pia, Hoohu,
Paakai, Huaala,
Pia Kulina, &c
— A HE —
LAAU LAPAAU KAULANA LOA
A Dr. JAYNES.
Laau Kunu,
Laau Hoomaemae Koko,
Laau hoopau naio,
Penikila, Huaale,
A me na Laau Hamo, a pela'ku.
759 ly 811