Ka Nupepa Kuokoa, Volume XVI, Number 25, 23 June 1877 — Page 4
| This text was transcribed by: | Shaun Kamakea-young |
| This work is dedicated to: | Hawaiʻinuiākea School of Hawaiian Knowlege |
Ka Nupepa Kuokoa
KE KILOHANA POOKELA NO KA LAHUI HAWAII.
LITTLE ACTS OF KINDNESS.
Caeerful Voices, p.84.
1
Hua pana iki.
Hua. A E I.
Hua pela like.
Mele do re mi.
Hua heluhelu,
Hua helu e,
Kahi, 'lua, 'kolu
Helu pololei.
2
Pane i ke kumu,
Pane akahai
Kii i ka burumi,
Burumi a maemae.
Kii a hali mai la
I bakeke wai:
Paa i na haawina,
Paa naau maikai.
3
Kaka i wahie,
Kahu ahí e
No kou mau makua,
Hana awiwi,
Ole nae olani
I ka bana e.
Ke kena lakeu ia,
Kena iho nei.
4
Holo a paani,
Pana pua e,
Kini popo paha,
Holo e a pee.
Nani no ka oli,
Lealea e,
Kani mai ka bele,
Hoi koke mai.
5
Waiho i ka baka,
Baka puhi, nau,
Ino no ka waha,
Ino ka naau
Waiho i ka nuku,
I ka wahahee;
Mau a mau ka aloha,
Me ka pololei.
Hawaii.
HAAWINA KULA SABATI.
HELU 2--SABATI, IULAI 8.
KUMUHANA.--Paulo ma Anetioka.
PAUKU BAIBALA--OIhana 13:26-41.
26 E na kanaka, na hoahanau, na mamo a Aberahama, a me ka poe o oukou nei e makau i ke Akua, ua hoounaia mai ia oukou nei ka olelo o keia ola.
27 No ka mea, o ka poe i noho ma Ierasalema, a me ko lakou mau alii, aole lakou i ike ia ia, a me ka leo o na kaula, ka mea i heluheluia i na la Sabati a apau, ua hooko lakou ia leo i ko lakou hoohewa ana ia ia.
28 Aole no i loaa ia lakou kekahi hala e make ai, aka, nonoi aku la lakou ia Pilato e make ia.
29 A pau ae la na mea i palapalaia nona, i ka hookoia e lakou, lawe mai la lakou ia ia, mai ka laau, a waiho maloko o ka hale kupapau.
30 Na ke Akua no ia i hoala mai mai ka make mai.
31 Ikeia mai la no ia i na la he nui e ka poe i hele pu me ia, mai Galilaia mai a Ierusalema, na lakou no ia i hoike aku ai i kanaka
32 Ke hai aku nei makou i ka olelo maikai ia oukou, i ka olelo hoopomaikai i haiia i na kupuna;
33 Oia ka ke Akua i hooko mai nei i ka lakou mau mamo, ia makou, i kona hoala ana mai ia Iesu; e like me ka mea i palapalaia ma ka Halelu elua, O oe no ka'u Keiki, i keia la wau i hoohanau ai ia oe.
34 A no kona hoala ana mai ia ia mai ka make mai, aolhe hoi ia e hoi hou i ka palaho, i mai la ia penei, E haawi aku wau ia oukou i ka lokomaikai oiaio o Davida
35 No ia mea, i mai nohoi ia ma kahi e, Aole oe e haawi aku i kau mea hoano e ike i ka palaho.
36 Aka, o Davida, hookauwa aku la ia na kona hanauna, ma ka manao o ke Akua, a hiamoe iho la ia, a hui pu ia iho la me kona poe kupuna, a ike i ka palaho.
37 Aka, o ka mea a ke Akua i hoa'a mai ai, aole ia i ike i ka palaho.
38 No ia mea, e ike pono oukou, e na kanaka, na hoahanau, ma ona la, ua haiia aku ia oukou ke kala ana o ka hala.
39 A o na mea a pau; aole e hiki ia oukou ma ke kanawai o Mose ke hoaponoia, ua hoaponoia no ma ona la ka poe manaoio a pau
40 Nolaila, e malama pono oukou, i hiki mai auanei maluna o oukou, ka mea i oleloia mai ai e na kaula;
41 E ka poe hoowahawaha, e nana mai oukou, e pilihua hoi, a e hoomawale; no ka mea, ke hana nei au i ka hana i ko oukou mau la, ina e hai aku kekahi ia oukou ia hana, ina aole no oukou e manaoio mai.
Pauku Gula. "Ke hai aku nei makou i ka olelo maikai ia oukou." p32
Mele--Mele hou 8--7.
1
Maikai wale kau olelo,
Kau olelo, e Iesu;
Nu maikai a hoohanoli,
Lohe pono, hoopae pu.
2
Eia makou ke hoolohe,
ke hoolohe ano no,
Me ka imi, hoopaa pono;
Ona ia ia makou.
Pule i hoopaa ia , a malama ka olelo maikai a Iesu.
Na Ninau a na Kumu.
Haalele kakou ia Paulo ma, ma Perege no Pamepulia. Aole akaka ka hana malaila. He poe hoomaloka paha ko laila, makaukau ole e hoolohe i ka Iesu olelo. Haalele lakou ia Perege, a hele i Anetioka no Pisidia. Anetioka okoa keia. Aia Anetioka mua ma Suria. Aia keia Anetioka ma Pisidia, ma ka akau ia o Pamepulia, ma Asia Uuku. Aole nae ia iloko o Pisidia, aka, nolaila no. He poe Iudaio no malaila. he Sunegoga (hale halawai Iudaio) kolaila. A ma ka la Sabati komo ae la Paula ma iloko o ia Sunegoga. Ua piha ia i na Iudaio. Heluhelu ka luna i ke kanawai a me ka na kaula. A pau ka heluhelu ana, kii ka luna ia Paulo ma, me ka olelo, Ina he olelo paipai ka olua, e olelo mai.
Ke ku no ia o Paulo iluna a hoomaka i kana haiolelo. Hoike oia i ko ke akua wae ana i na kupuna, ia Aberahama ma, i kona hookiekie ana i ka Iseraela, kona lawe ana ia lakou mai Aigupita a Kanaana, a kipaku aku i na lahuikanaka ehiku, a haawi i ko lakou aina i ka poe Iseraela. A haawi oia i maa lunakanawai no lakou no na maka hiki 450. A mahope iho, ma ko lakou nonoi ana ia Samuela, ka lunakanawai hope, i alii, Ua haawi oia ia Saula i alii no lakou. A mahope iho, kapae oia ia Saula, a haawi ia Davida, he kanaka kupono i alii no lakou.
A na Davida mai ua hoopukaia he mamo, o Iesu, i alii a i mea e ola'i ka Iseraela me na kanaka a pau.
Ua hai mua ia Iesu e Ioani Bapetite me ka paipai ia. E mihi oukou, a e manaoio i ka mea e hiki mai ana.
P 26 Ka olelo aha ka i hoounaia mai ia wai? O wai ia poe makau i ke Akua? He poe kanaka e, ua lilo nae i poe hoomana e like me na Iudaio.
P 27. Owai ka i ike ole i ke aha? Naaupo ka, ka poe heluhelu mau i ka ke Akua olelo? Aole anei pela kekahi poe maanei?
P 28. Hoahewa wale ka lakou ia Iesu me ka loaa ole o ka hewa iloko ona? Pela paha kekahi poe hoahewa wale ia Iesu, i na hoahanau. A nonoi lakou ia Palato e aha? Ae anei Pilato? Ae no ka makau aole no ka ike ana i ko Iesu hewa, ua hoole oia, aole ona hewa iki.
P 29. Hanaia keia mau mea no ke aha? Make Iesu a kanuia mahea?
P 30, 31. Na wai Iesu i hoala? a ikeia oia e wai mahope o kona ala hou ana? No na la ehia, he poe hoike lakou no keaha?
P 32. Heaha ka pauku gula? Hai mai i keia pauku.
P 33, 24. Owai na mamo? Mahea na pauku wanana no ko Iesu ala hou ana? Ke ala hou ana mai ka make mai ua like ia me ka hoohanau ia mai. Ua lilo ka mea i hanauia i keiki na ka mea nana i hoohanau. Pela Iesu, ma kona ala hou ana, ua lilo oia i keiki na ke Akua, a i alii mau loa hoi, e like me ka ke akua olelo ia Davida, aole oia e nele ana i ka hooilina no ka noho alii. Iesu ia hooilina, ia alii mau loa.
P 36, 37. Ma keaha i maopopo ai, aole o Iesu i ike i ka palaho? Ua ike anei Davida i ka palaho? Ae. Nolaila, he wanana ka Halelu 16. p 10 no Iesu, ka mamo o Davida.
P 38, 39. Heaha na pono e loaa ana ma o Iesu la? Ke kala ia o ka hewa--ka hoaponoia ma ka manaoio, aole ma ke kanawai.
P 40, 41. Hai paanaau ma i keia mau pauku.
Aia mahea? Isaia 29:14. Habakuka 1:5
Mele. 8--6. Leo.
1
Hoolohe e na kamalii,
Me na makua pu,
I keia olelo paipai mai;
Hoolohe a makau.
2
Ke kau nei no ka make mau,
Maluna o oukou;
E holo iloko o Iesu
O hoopaiia ano.
Na Ninau a ke Kahu.
Na makua. Mahea keia haiolelo a Pualo? Ehia Anetioka? Anetioka hea keia? Heaha ka Sunegoga? Heaha ka hana mua ma ka Sunegoga? Heaha ka hana hope? Owai ka i konoia e haiolelo maloko o keia SUnegoga? Heaha ka hapa mua o ko Paulo haiolelo? Ka hapa waena? ka hapa hope a hoopili?
Na keiki. Hai paanaau mai i ka himeni mua. Owai ka mamo kaulana a Davida? Heaha Iesu? he keiki, he kalahala, he alii. Hiki anei ia oukou ke lilo i mau keiki na ke Akua? Ae. Hai paanaau mai Ioane 1:12
Ke kula a pau. Na manao pili. 1 Nui ka poe heluhelu i ka baibala a lohe--a kula a hoopaanaau--naaupo no nae--a make no. 2 Mai paulele ma ka ike, ma ka lohe pinepine--E makau, e weliweli, e mihi, e manaoio, e hana.
Mele. 7--Leo.
1
Kula no, a kula mau,
Aole nae i naauao,
Lohe lea ia Iesu,
Ao a ao a mele pu.
Nani no ka naaupo,
Ke hookuli hou makou,
Hewaloa, make e;
Iesu, e hoola mai.
Pule, &e.
Hoike Kula Hui makahiki
ma Imiola, Waimea, Hawaii,
MA KA LA 5 O IUNE 1877.
He mea hoakaka ma @. Eha hoike kula la aupuni iloko o ka makahiki. Ekolu hoike kaawale. Hookahi hoike hai. Ma na hoike kaawale, ua kaawale kela me keia kula, a hoike ia ma kona halekula iho. Ma ia mau hoike kaawale, loihi no ka hoike ana ma na mea i ao ia ma ka wa kula. He hoike nui ia i maopopo ka ike o na haumana ma na buke i aoia ma ka Helunaau, ma ka Helukakau, ma ka Buke Honua, a pela aku. Aole noi ia hana e ae, na mele, na haiolelo, na olelo kike, me na mea hoohauoli, hoolealea i na makua.
Ma ka hoike hui, aole nui ka hoike ana ma na mea i ao ia. Aole makemake na makua, me ka poe makahiki e lohe ani no na mea i ao ia ma ke kula, o ko lakou makemake nui e lohe, e ike i na mea hoohauoli, hoolealea.
Nolaila, ma keia hoike kula hui, uuku ka manawa i haawiia i ka hoike ma ka Helunaau, Helukakau, buke Honua, &e. ma na mea hoohauoli i haawi ia'i ka nui o ka manawa.
Ka nui o na kula, ewalu ka pono; aka, eono wale no i hiki mai. No ka noho ana ma kahi loihi, a inoino ke aha paha ke kumu e hiki ole mai ai o na kula elua i koe aku. O na kula i akoakoa mai; Ko Puako, ko Kawaihae kai, Kawaihae uka, Waiaka, Waikoloa, me ke kula haole a Miss Jane Davis. Penei na hana:
1 Ka akoakoa ana o na kula eona ma ka halekua, a kai a huakai me na hae a me na pahu. Na koa kamalii o Waikoloa ka i alakai a hiki i Imiola
2 Ke mele ana o Waikoloa.
Leo. " Spring's Here! Cheerful Voices
p. 111.
1
Oli e, oli e,
La hoike maikai nei,
Kani a hookani ae,
La maikai no nei.
Cho--Ho, ho, ha, ha,
Welo nani, e nahae,
Kani pahu, kane ae,
La maikai no nei, &e.
3 Ka pule ana a ka Kahukula me ke koho ana i na Komite nana i ka hoike ma ka Helu, ma ka Palapala Aina, ma ka Himeni. &e.
4 Ke mele pakahi ana o na kula.
Waikoloa.--"Play After Work."
Waiaka.--"Kahuhipa maikai."
Pauko, he mele i haku ia o ka huipu ane.
Kawaihae-kai--"Maipaupau aho oe."
Kawaihae-uka.--"Kuu Baibala."
Kula haole.--"Wont you vonlunteer"
5 Na kula a pau ma ke Kumumue, Ao Kiko, Helakamalii, Helunaau, mok 1 me ka 2, me ka mele pakahi ana o na kula.
6 Na kula a pau ma ka Buke Ai Heluhelu, ma ka Helunaau. mok. 3-05 me ke mele pakahi ana o na kula.
7 Na kula a pau ma ka Helunaau. mok. 6-13, me ke mele pakahi ana o na kula.
Waikoloa.--"Vacation is coming."
8 Na kula a pau ma ka Helunaau, mok 14-15, me ke mele pakahi ana o na kula.
Waikoloa.--"Mabela Ray."
Waiaka.--"Lei Rose," &e.
9 Na kula a pau ma ka Arimatika, mok. 1-7, me ke mele pakahi ana o na kula.
Waikoloa.--LIttle Acts of Kindness.
Waiaka,--"Paikau pu"
10 Na kula a pau ma ka Palapala Aina. Me ke mele ana.
Waikoloa.--"Little Fairy."
1
Hiwa iki a mimiki,
Holo awiwi;
Hele lele, a memele
Me he namu e, &e
Waiaka.-"Ke ku nei na pokii."
II Na haiolelo, na olelo kike, na mele.
Kawaihae kai. LUa mimilo.
" " Olelo Polapola
" " Olelo kike o ka baka.
Wa koloa.--Mele. "The Banner of the Cross"
1
Kau ka Bana iluna'e,
Bana o Hawaii e,
Ala'e na koa e,
Kaua no ia Bana nei.
Cho.--Bana lai, Bana paa, &e.
12 Ka paikau ana o na koa lii, me na pahu &e, me ke kaua ana o Rusia me Tureke, a lanakila Rusia.
13 Ke mee ana o Waikoloa;
Leo--"Colombia Beloved Land."
Hawaii nei, ka aina lai,
Nou no kuu mele nei, &c.
14 Na Buke kakau @m@
15 Na olelo hoike, paipai, &e, a na Komite, &e.
16 Ke mele hope. Waikoloa.
"Vacation's Coming."
E mele no ka wa hoomaha,
Eia ia, ua puka mai, &e.
Me ka pule a hookuu aku.--Ua piha Imiola i na kanaka, i na makua, i ka poe makaikai, mai kka hora 9 a hiki i ka hora 5. Maikai loa keia hoike hai.. Ua piha lakou i ka olioli, a nui ka mahalo ana.
LAIANA
Luna Kula.
HE KANIKAU ALOHA NO
William Pitt Leleiohoku Leleipelekane
KALANIKUPUOLIKOLANI OLEAKAHELE.
He uwe keia he aloha ia oe,
E kamakalani ka Haku Ohua
Ohua, Ohuanui i ka la lailai,
Hoolai hoophu ana i kou manawa,
Mapu o kahanu o ke Kiuwailehua--a,
Ko inoa--e.
Aloha kuu haku kou milimili,
Oia ia e kanikau aloha nei,
Aloha au e kani a a hia,
E kani a ana ia oe,
E kaniuhu an ae nei,
E uwe aku ana ia oe,
O oe wale mai ana no ke aloha,
Kuna ka la i ke kino a nalo,
Hai mai nei i ke kino he mana--o,
E Kamakulikalawale,
E ka haku lekea i ka lani,
O oe ka mana i lele aku nei,
I lele auwana mina ka lani,
Lele keehi ku i keahana,
O oe hoi i nele nalo aku--la,
Nalo aku la ka hiona,
E ke kupulau maohaoha,
O ka ohaoha o ka uhi i kupu mai ai,
Kupu mai ke aloha oia wale no,
I kahai ai ka ulu oha ka lau,
O Piilani W, a Kama,
Ka ia nana i holo ka ilikai,
E pau ai ka loa ke anana,
Ana hoi ke aloha la e kuu haku,
E ke kau mana o Haona--e,
Nani kuu haohao ia oe,
I ka pili no a kaawale,
Oia ho--i--ea.
Oia ia e u nei, e mihi nei--e,
E mihi ae ana au i kuu minamina,
I ka haule o kuu mea makamae,
Lilo kuu mea i imo, i-ini a loko,
O loko la ua waliwali i ke aloha,
Ua hele a pepehu ia e noho nei,
I ke koele honua ia e ka mihi,
Mihi ka mihi, aole e loaa,
uwe ka uwe aole e pau,
Aole e pau i ka nui o ke alo--ha,
Ua liliha, ua koli nia,
Ua kumakena ia e noho nei,
O ke kumu ia o ka ha,
he maka no ke alo--ha,
Aloha kuu milimili,
O ka aina kai opua i kalai,
He lai he pohu hoi maloke,
He eka mawaho, he olikopua i ka moana
Hoi no ka uhane maloko,
I ka malu hale o Hulihee,
He luana he nanea ilaila,
O ka puni lealea a Kalani,
I ka wala kiaha uala,
Ai hoolamalama i ke kino,
Ko kino wailua ke aloha,
Aia me Hiku i ka uka,
Hooip me Lia i ka nahele,
Hele hookahi aku nei o Kalani,
Ua huna aku la na maka i Palehuna,
Aia i ka uka o haiaimalama,
Ko-inoa-e.
AHAULA HANAIOLE.
S L Kahanaalanui,
Kakau Mele.
Kaakopua, Honolulu, Iune 19, 1877
Na anoai o ka malu Ulu o Lele.
I ke kehau o ka wanaao o ka la umikumamakahi o Iune, e pa kolonahe ana ka makani, lohe ia aku la ka leo kani kuhuluku o na pahu ame ke kani uheuhene lua a ka leo o na ohe a Sam K. Kaaiai ma, kii nohoi o ka mea kani wale no ia, ei aku ono ka hoi ka oi o ka "Aha Mele Lihauanu Club," o keia no ka Aha Mele "Maui Ponoi," a ua hoololi ia aenei a o "Lihauanu Club" i keia wa, o Elia me Hose na alakai.
Ma ka wehewehe ana mai o ka ao, ike ia aku la na lani, ua pololi, aohe kau ia e ke ao. o na kuahiwi hoi e waiho kahelahela mai ana, ia manawa na kai aku la ka aha mele Lihauanu Club ma kahi o ke Kiaaina, a ua makana ia mai la e Kamiki, he mau kiaha wai hoihoi a ke aloha. A ma ka auina la, ua hoomkaia na lealea o ka la, he heihei au, mai uka aku nei o kahaone; a mamua o ka ihu o Neki, huli mai mahope, a hiki hou no iuka nei, a he mau mea lealea e ae no kekahi, he heihei eke, heihei kamalii, holo a puni ka pa o Hale Aupuni.
No ka Poi Manako--Ke ai mai nei kekahi poe kauhale o ko makou wai nei i ka poi manako me ka oio a me ka samano, he halale ia o ke kai la, he maona no nae, a hoawaewa no hoi ka kekahi poe iloko o na umeke, a ua kapa ia kaua ino a eha-ko-ko.
No ka piliwaiwa--Ua neo iho nei ka piliwaiwai, hookahi no ka holapu ana iho nei a Kauhane, a me ka eleu hoi o John K. Richardson, ua oki oe i nui ana ka waha i ka naunau
No ka wiliko--He oiaio, ua kuai aenei o Mr. J.S. Campbell i koai kuleana o ka aina mahiko apau ia Mr H.Torton no na dala $500,000, o ke k umu o ko Campbell kuai ana i kona hapa, aole i ma apopo, aka, he koho wale uku, ua lawa oia no kela mau polohuku a me kana mau loaa e ae o na makahiki a lana i luhi pu ai, a akahi no a wehe ka laua pili mai ko laua wa mahuihea ole o kahi loaa, a hiki i ka wa i hana ai ka haawe a lana.
Hipa--Aia makahi o Jack Hema, hookahi hipa ekolu wawae, elua waawe mua, a hookahi wawae hope, no Lanai mai, he koena paha na Kaululaau.
SAM K. KAIHUMUA.
Opaeula Lahaina Iuna 14, 1877.
KA AILA BALAKI A PINKHAMA!
He Mea
OLE KA WAI I KEIA AILA HAMO!
Palupalu Maikai na Ili Hooluu.
Ke noi haahaa ia'ku nei oukou, e hoao iho i keia
Aila Balaki, Hamohamo Palewai, Hoopalupalu Ili.
E kuai a e hoao i na Buti, Kamaa, Ili Kaao Kaa, a i na mea ili hooluu e ae paha i loaa ia oukou Ua lana loa ka manao, i na oukou e hoao ana pela, e mahalo ana oukou, a hoomaikai aku auanei me ke kanalua ole. Ina e hamo pinepine ia i keia
AILA BALAKI HOOPALUPALU ILI,
E mau no ka palupalu maikai o na ili, me ka nakaka ole. Aole hoi no ka wa ua wale no e pono ai keia Aila, aka, no ka wa la kekahi. He 50 keneta no ke tini.
Aila Inika Balaki Hoomau Ili a PINKHAM.
He mea maikai loa, i hanapaka maoliia no ka hoopalupalu ana i na ili kaa lio, na kaulawaha io, na noho lio, a pela aku. E hoao oe--Kumukuai no ke kini 75 keneta.
Na Olelo Mahalo.
HILO, Nov. 5, 1875.
Ua hoao pono wau i na Aila Hamo Kamaa e ae, a ua hoao pono no hoi i ka Aila Hamo Balaki a G.S. Pinkham; a ua hiki ia'u ke olelo me ke kanalua ole, o keia Aila ka helu akahi, a me ka oi o ka maikai, o na Aila Balaki a pau a'u i hoao ai. A.O. FORBES.
Ua hoao maua i na Aila Hamo Kamaa a G.S. Pinkham & Co., a ua oi aku ka maikai mamua o na Aila Hamo Kamaa mai na aina e mai.
R.A. LYMAN,
S. KIPI.
Hilo, Nov. 10, 1875. Kiaaina o Hawaii.
HILO, Nov. 10, 1875.
Ua hoao pinepine au i na Aila Hamo Kamaa a G.S. Pinkham & Co., a ua manao no au oia ka Aila Balaki Kamaa maikai mamua o na aila e ae a'u i hoao ai mamua, a he oiaio keia.
C.K. HAPAI.
HILO, Nov. 10, 1875.
No ko'u ike oiaio loa o ka Aila Hamo Kamaa a G.S. Pinkham he Aila maikai loa no ka Hoowaliwali i ka ili. D. KAMAI.
Hanaia e G.S> PINKHAM & Co., ma Hilo, Hawaii.
E kuaiia aku no e BOLLES& Co., Agena. ma Honolulu. 793 3m 815
ANOAI I KA LEHULEHU,
E kipa mai a e nana,
i kumaka ai ka ike i na waiwai na
ni i loaa mai nei iloko o na
La Kulaia iho nei.
Penei ke ano o ua mau waiwai la:
N Wati a me na kaula Gula,
a na Lede a me na Keonimana!
NA KAULA OLEPE A NA LEDE
NA KOMO GULA NANI O KELA A ME KEIA
ano o na Lede a me na Keonimana!
NA KUPEE GULA,
NA LIPINE GULA
Na gula pepeiao o na wahine!
e oaka ai i na pepeiao, a e hulali ai
hoi na manamana lima, a e
kilipohe ai hoi na a-i.
Na komo humuhumu gula a me ke kala,
Na pihi pulima gula wahine a kane,
Na laketa gula lei wahine nani,
Na komo daimana o na Lede,
Na kaula laketa,
Na pine omau kihei,
Na laketa aniani,
Na huka gula wahine.
NA LAKO HALE.
NA PUNA,
NA PAHI,
NA KIAHA, KALA,
NA APO KALA
NA KAWELE holoi lima,
NA O DALA, o kela a me keia ano,
a me na mea nani e ae no he nui wale.
E kuaiia aku ana no
ma ke kumukuai haahaa loa i ko
na wahi e ae o ke taona nei.
UA MAKAUKAU NO HOINA
mea nani no kanaka makua
a me na kamalii.
Na Kamaa Paa Loa,
e loaa no maanei e like me ka
makemake; a ina e loaa
koke ka ino, he hiki
no ke hoihoi mai
M. MCINERNY.
Kihi o na Alanui Papu a me Kalepa.
J.M. Davisdon,
Loio a Kokua!
HALE Oihana, maluna ae o ka Hale Kuai Buke o Wini, ma ke koena i noho mua ia iho nei e J W Aokina. Ua makaukau oia e lawelawe i na hihia o kela a me keia ano, imua o na Aha Hookolokolo a pau o kela Aupuni.
E. T. Halolani.
LOIO!
EIA HE $20,000 E MAKEMAKE ANA E hoaie aku ma ka ukupanee haaha loa mai ka $200 aku a pil ae ma ka moraki ana i na aina, Ua hoomakaukau e no oia i na palapala aelike, hoolimalima, moraki a me na hooilina, a he hiki iaia ke hoomaikai i na aina loaa ole na Palapala Sila Nui.
Hale Oihana, aie ma ka "Real Estate Exchange" Helu 31. Alanui Papu. Honolulu,, malaila oia e loaa ai i na kanaka a pau, ina he mau ai na kuai a hoolimalima ko lakou, a e hoopaa ia me ka uku ole 792 3m 815
MAI KEIA LA A MAHOPE AKU NEI,
O KA UKU O KA
OHUA ONEIKI O
NETI MERRILL,
Mai Honolulu aku a me ka hoi ana mai he
ELUA DALA!
E.D. CRANE. (Kapena.)
Mar. 16, 1877
Lole Makepono ke Kuike!
E LOAA NO IA MA KAHI O
KAKELA ME KUKE,
E LAA NA
AHINAHINA,
KALAKOA,
KEOKEO,
LEPONALO
Pena, Aila Aniani,
Na Mea Piula,
Kopa, Aila Honua,
Aila Hoomaloo
Kui kakia, Pakeke,
Tabu, kaula, Noho lio,
Hulupalaki, na Pulumi
A he Agena no hoi no na Mokupuni o Hawaii nei no na
LAINAKINI-NAO,
LAINAKINI-MAOLI,
PALULE KALAKOA,
ALAPIA, KELEPA, KILISA,
Na Lole kupono i ka wawae,
Palule Huluhulu,
Na Lole Huluhulu,
Na Lole no ka hoohehelo ana
Lipine, lihilihi, a me ia mea'ku
A HEH
MAU MEA AI KAHI
Ka Palaoa, Kopaa,
Raiki, Pia, Hoohu,
Paakai, Huaala,
Pia Kulina & e.
A HE
LAAU LAPAAU KAULANA LOA
A Dr. JAYNES.
Laau Kunu,
Laau Hoomaemae Koko,
Laau hoopau naio,
Penikila, Huaale,
A me na Laau Hamo, a pela'ku
802 3m 813
Papa! Papa!
NO
ALLEN A ME ROBINOSN.
Ua wehe ae ei maua i
PA KUAI PAPA!
MA KA
UWAPO O PAKAKA.
Na papa Ulaula o na ano a pau.
Na Papa Paina o na ano a pau.
Na Pili Hale Ulaula.
Na Pili Hale Keokeo.
Na Pepa Hoonani Hale.
Na Pepa Molina.
Na Pena a me na Aila Pena!
NA KUI O NA ANO A PAU!
Na Pani Puka a me
Na Pani Puka Aniani.
Na Pani Puka a me
Na Olepelepe.
Na lako kukulu Hale
O NA ANO A PAU
E kuaaiia ma ke
Kumukuai Haahaa Loa!
o keia Makeke.
ALLEN & ROBINSON.
Honolulu, Aper 13, 1876. 804 3m 813