Ka Nupepa Kuokoa, Volume XX, Number 7, 12 February 1881 — Page 4
| This text was transcribed by: | Kalihi Uka |
| This work is dedicated to: | Samuel Manaiakalani Kamakau |
Ka Nupepa Kuokoa
KE KILOHANA POOKELA NO KA LAHUI HAWAII.
KA NUPEPA
Kuokoa me ke Au Okoa
I HUIIA
No ka Makihiki $2. Eono Mahina $1.
Dala Kuike ka Rula.
KOMITE HOOPONOPONO.
Hezekia Aea.
POAONO, FEBERUARI 12, 1881
HOIKE HUI O NA KULA SABATI.
I na kula Sabati o Hawaii akau me Hawaii komohana. Aloha oukou.
Oiai, ke kokoke mai nei ka pule mua o Maraki, nolaila, e aia ae e Hawaii komohana, e ku hoi oe e Hawaii akau, a e hoomakaukau no ka ia hooili kaua, nawai la ka lanakila, imua e Hawaii komohana, e lawe hoi oe e Hawaii akau i ka pahikaua a me ka mahiole o ke ola, i lanakila oe.
A ke paipai ia aku nei na kahu kula, na kumu, na haumana, e hele nui ae kakou a pau, i ku maka ka ike i ka nani o ka aina haaheo o Koha a. Me ka mahalo, ka oukou kauwa haahaa. W A MIO.
E halawai ana ka ahahui kula Sabati, ma ka Poaha mua o Maraki, ma ka auina la hora 1 1/2 pm e akoakoa nui ae na lala a pau ma ia la. W A MIO.
HE LEO KAHEA!!!
E na kula Sabati me na ekalesia euanelio mai Hawaii a Niihau. Aloha oukou.
Ke hai aku nei au i lohe oukou, ua ane makaukau ka Buke Himeni hou no ka hoouna ia ana aku i Nu Ioka e pai ai.
Ua lohe oukou i kona ano, he buke nui keia, 300 a oi aku na aoao, ka nui ia o na himeni me na leo, kupono no na himeni a pau e mele ia e na kamalii.
Aka, nui no na himeni i hookomo ia iloko o na anaina nui, na anaina ekalesia, nui na himeni kupono i na kula aupuni, ua unuhi ia noloko mai o na buke mele kula maoli.
Ua hoolilo ia kekahi mau aoao ma ka wehewehe pokole ana i na kumu mua mele, na mea kokua i ke ao ana.
Aole buke himeni no na kula Sabati ma ka olelo Hawaii i keia wa. Ua pau na Lei Alii i ke kuai ia, ka poe i nele, aole akaka ka wa e hoolako ia ai. Ina puka hou mia, he buke okoa no ia, he buka maikai loa no. Aka o keia buke hou, okoa kona mau himeni me kona mau leo. He mau leo hou loa ka nui.
O ko ʻ u makemake e wikiwiki ke pai ana o keia buke hou. Aole nae e hiki ke hoouna ia aku ia i Nu Ioka e pai ai ke hele pu ole ke dala uku no ke pai ana, a hana wahi ana. Aole ae ka poe pai e pai ke ole e loaa e ole aku ke dala.
Ua hai e aku au mamua, 1,500 dala, oia ka puu dala a ʻ u e imi ana.
Ekolu Mahele.
Ia ʻ u $500
Ina kula Sabati $500
Ina Ekalesia $500
$1500.
Ua makaukau ko ʻ u mahele $500. Pehea ko ua kula Sabati me ko na ekalesia?
Eia ko ʻ u leo kahea. Na dala o na kula Sabati pakahi, e oluolu e hoihoi ia aku ika Puuku nui Pres Henere Waterhouse o honolulu, a i kona hope paha, ke kauoha ia. na dala e na ekalesia pakahi e oluolu e hoihoi ia aku ia Rev A O Polepe, ke Kakau Leta o ka Papa hawaii i Honolulu a i kona mau hope paha, ke kauoha ia.
A lohe au, ua lawa ke dala, ko ʻ u wikiwiki no ia i ka hoouna aku i ka buke me ke dala pu i Nu Ioka, i pai koke ia, a hoiho koke ia mai me kona ano nani. Na ke Akua e kokua mai i hooko ia ko kakou makemake like. Me ka mahalo. LAIANA.
Haku mele Hawaii,
Waimea, Hawaii, Jan 25,1881.
P.S Mea hoakaka. Ke ninau mai nei anei na kula Sabati me na ekalesia e kokua mai ana, heaha ko makou pomaikai no ka haawi e ana i ke dala e pai ia ai keia buke hou?
E ia ka pane ana. E lilo ana 1000 kope o na buke nei. Ua like ia me 1.50 no ka buke hookahi. Aka, hookahi wale no hapalua ka uku no ka buke hookahi i ka poe e kokua mai ana. 1000 buke i kuai ia ma ka 31 1/2 pakahi.
Ua loaa mai 500 dala, he uku aha ia, eia ke ano. He mea ia e pai hou ia ai kekahi tausani hou o ua buke nei, ke pau ke tausani mua, haahaa ka uku no ke pai alu ana no ka mea, ua paa mau ke kepau o ka buke mua, aole i hoohololei ia. Aia a pau ke pai mua ana, aole emo a loaa mai ke pai alua ana, ke kauoha ia aku. Heaha ka pepehi i koe? LAIANA.
AOHE MEA HIKI OLE I KE AKUA.
Hiki anei ke puka mai kekahi mea mai kai mai loko mai o Nazareta, ae, hiki no i ka mana o ke Akua.
He Nazareta Waimea mamua aku nei. He wahi ino, he wahi waonahele, waoakua, he wahi maloo.
Me he la ua haalele ia e ke Akua. A pela io no, ua haalele io ia e ke Akua a loihi. A ana kuhi ia ua haalele loa ia. Ua mau nae ka pule a kekahi poe he uuku nona. A ua mahuahua ka pule ma ka hebedoma haipule. Ma ka Poaha oia hebedoma, hoomaka ke Akua e hoolohe i ka pule, a e hoike i Kona mana. He hapahaole Isaac Y Davis, kekahi haumana ia no ke kula mua a Laiana wahine ma Iulai 1832, ku oia imua o ke Akua, o na anela, o na kanaka, a mihinui, a hai mai i kona manao e lilo loa no ke Akua.
Aole paha he hewa i koe i hana ole ia e ia. Nui ke ao ia ana, ka paipai ia ana, nui ka lohe a me ka ike, ka naauao, nui loa nae ka hewa.
Oia wale no ka haumana oia kula mua i koe, aole i huli mai, nui ka pule nona, nui ko ke Akua hahau ana ia ia.
Nui na pilikia kino i hooili ia mai maluna on a. Ua ko ka pule, aohe mea hiki ole i ke Akua. Mana ka Uhane o ke Akua.
Ka la ahaaina o ka Haku ka la Sabati elua o Ianuari. Aole nae he ahaaina no ka nui loa oka ua me ka makani.
Noho no na kanaka ma na hale, me ka ninau paha, he mea aha keia ino nui?
He mea paipai paha ia kakou e mihi i pakele i ka ino o ko ke Akua inaina e kau mai ana.
Nui no na la ino, malie nae ma ka la Sabati. Akoakoa kanaka ma ka luakini, me ka hoololohi nae, me ka manao ana, e malama ia ana ka ahaaina a ka Haku.
Ke kumu olelo ma ia la, aia no ia ma Lunakanawai 7,2-8. Ka manao nui, ka poe nona, aole o ka poe makau a hopohopo, aole o ka poe hoololohi, aka, o ka poe wikiwiki, makaala, e naue awiwi ana i ke kaua. Ua hele mai oukou me ka manao e kukulu ia ana ka ahaaina a ka Haku.
Aka, ma ka nana ʻ na, he poe makau a hopohopo kekahi, he poe hoololohi oukou a pau koe nae na kamalii, lakou kai wikiwiki mai Aole oukou i makaukau no ka ahaaina a ka Haku. E hoolilo ia keia mau la i wa e hoomakaukau ai.
Aohe mana nui ka pule, hookahi wale no huli, i nui ka pule, i mahuahua na huli, a hiki i ka umi paha a oi aku.
Ma ka Poaha oia hebedoma, he halawai pule hui, ma ke kuhi ana he uuku ka poe hele mai, eia nae, ua nui. He mau hali hou. Ma ka nana aku, eia maanei ka Uhane o ke Akua.
He halawai hui hou ma ke ahiahi Poaono.Ua piha ia halawai. Halawai hui hou ma ke kakahiaka Sabati hora 7, piha hoi ia halawai.
Hookani ia ka bele no ka halawa nui akoakoa wikiwiki mai kanaka ma ka luakini ua pau ka hoololohi ana. he Sabati Penetikoka ia. He la hauoli ma ka lani a maanei hoi. Ua kokua mai ka Uhane Hemolele. Ua haawi mai Oia i mau hua mua he 10, elima hapahaole, a elima kanaka maoli.
Ua haawi aku lakou ia lakou iho no Iehova a mau loa aku. E ola lakou ke hoomau ma ka pono a hiki i ka hopena.
Aole i pau na hua hou ma keia umi. He mau hua hou no ma na hale, aole hiki i ka luakini no ka pilikia.
E na haipule, e hamau i ka pule no Waimea, i hoomau ia ka hana a ka uhane Hemolele maanei, no ka mea, nui ka poe paa, kiki i koe, i hoohuli ia mai lakou, a hui pu me keia huakai hou, a naue pu aku i ke Kanaana hou. Ke Kahu.
Waimea, Hawaii Jan 25,1881.
LETA MAI MAIKONISIA MAI
Butaritari, Novemaba 25,1880
Rev. A O Polepe, Aloha nui oe, me ka ohana.
E hai nui ae oe i ko ʻ u aloha nui piha mau i na makamaka a pau o ka aina hanau, mai Hawaii a hiki loa aku i Niihau.
No kahi ola kino o makou. Ke ola hapapauea aku nei no makou i keia la. Ua hala loa na wahi la ikaika, ke iho ae la ma o.
No ka hana a ka haku ma keia mau Kihapai. Ua nu hou loa, ua huli mai na kanaka ma ka pono o ka Haku, auwe! weliweli ua mea o ka hoomaloka, a me ka paakiki o lakou nei, i na makahiki he umikumamaha i hala aku nei. Aia la ua kaakaa ae la na wahi maka, a ke ioio ae la na wahi waha o lakou.
Ua hoi hou mai ka poe i haule ai i na hewa o keia ao. Ua mihi mai lakou, a ua hoi hoi ia iloko o ka ekalesia, he mau la hauoli keia o makou me ka poe i huli mai i ka pono, piha mau na halawai i na kanaka, aole pela mai mua mai.
No ke kuai buke. Ua pau loa ka ʻ u mau wahi koena buke i ke kuai ia mai e kanaka
Ua nele loa makou in a buke, eia ke kumu i nele ai, ua lawe kalepa hele au iluna o na moku o Samoa a me Tahiti, nolaila, nele ka aina nei i na buke.
Eia ke kumu o kuu kalepa hele ana iluna o na moku, no ka pau i ka ai ia e na mu ai puke, no ka waiho loihi ana i ka rumi kuai puke, aole kuai nui iki o na kanaka o keia aina mamua, aka, i keia wa ke kuai mai nei eia nae, ua nele loa wau i na puke, ke kauoha leo nui aku nei au ia oukou i mau puke i na e holo mai ana kahi moku ohi kanaka o ke aupuni Hawaii, e hooili mai, no ka me ua nele loa kanaka i huli mai i ka pono in a puke. Eia ka nui o na puke, eono haneri me kanalima, penei ka mahele ana i na puke, 200 Kauoha Hou, 200 Himeni, 200 Wareboki, 50 Warebai.
Kaapuni ana i na kihapai. Ke kaapuni pinepine nei no maua me ko ʻ u wahine a me na keiki. I keia kaapuni ana aku nei a makou, paho makou i ka moana, pau loa na wahi pono kino i ka lilo i ka moana, koe mai ke ola no keia mau la. Na kahi waa nae i kokua mai ia makou.
He wahi waapa uuku loa a popopo, nui ka liu, nolaila, ke kumu o ke paho ana o makou, mawaena o Makiu a me Butaritari ko makou wahi i paho ai.
He iwakalua kumamalima mile mai Butaritari aku a i Makiu, i ko makou hoi ana mai, ma Makiu ko makou poho ana i ka mo ana.
No ka inu rama o keia aina. Ua hookapu loa ae nei ke alii a me na elemakule aole e inu rama ka aina nei.
Ua maluhia ka aina nei i keia makahiki e hele nei.
Ua pau wau maanei, owau o kou pokii.
J W KANOA.
WORK FOR JESUS.
Joy & Gladness.
1
E ala na paa han nei.
A hana no Iesu,
Kahea Oia e ala ae,
E ala a hana pu.
Cho.
E hana no Iesu,
Mai paupau aho e,
E hana no Iesu;
Ka Haku e ola ai.
2
Nana io, nana ia nei,
Ke waiho nei ke ao
Iloko o ka hewa e,
A me ka make pu,
Cho
E hana no Iesu, &c.
3
Ke ao, pairai , a hoala ae,
Ka hana nui nei.
Ke kii a huli a apo ae,
A hoihoi mai.
Cho
E hana no Iesu, &c.
4
A, me ke aha e hana ai?
A hea hoi e pau?
Me ke aloha a ikaika e,
A pau ke ola ou.
Cho.
E hana no Iesu & c.
Hawaii
Haawina Kula Sabati.
HELU 8, SABATI, FEB 20, 1881.
KUMUHANA
Ka haiolelo ana a Iesu Pauku baibala
Luka 4:14-21.
14 A hoi aku la o Iesu ma ka mana o ka Uhane, i Galilaia; a kui aku la kona kaulana ia aina a puni.
15 Ao mai la oia iloko o ko lakou mau halehalawai, me ka hoonaniia ʻ ku e na mea a pau.
16 A hiki hoi i Nazareta i kona wahi i hanaiia ʻ i, komo ia, mamuli e kana hana mau i ka la Sabati, iloko o ka halehalawai a ku iluna ia e heluhelu.
17 A haawiia ae la ia ia ka buke a Isaia ke kaula, a wehe ae la ia i ka buke, loaa ia ia kahi i palapalaia ʻ i;
18 Maluna iho nei o ʻ u ka Uhane o Iehova , no ka mea, ua poni mai la oia ia ʻ u e hai aku i ka euanelio i ka poe ilihune; ua hoouna mai kela ia ʻ u e lapaau i ka poe ehaeha ma ka naau, a e hai aku i ka hoola ana i ka poe pio, a me ka ike hou naa i ka poe makapo, a e hookuu i ka poe i hooluhihewaia.
19 A e hai aku hoi i ka makahiki e aloha mai ai ka Haku.
20 Hoopaa iho la ia i ka buke, hoihoi ae la i ke kahu, noho iho la ilalo; a kau aku la na maka o ka poe a pau iloko o ka halehalawai maluna on a.
21 A hoomaka oia e olelo mai ia lakou, O keia palapala i komo ae nei i ko oukou mau pepeiao, ua hookoia i neia la.
Pauku Gula. P 18, hoopaa naau.
Manao nui. No ka poe ilihune ka euanelio.
Na heluhelu. 1 Luk 4;1-21 2 Mat 4;1-25, 3 Io 1;19-51, 4 Io 2;1-25, 5 1, 3;1-36, 6 Io 4;1-43, 7 Isa 61;1-11.
Mele , him 236. Lohea ka leo mai Sinai.
Pule i hoohanau hou ia e ka uhane hemolele.
Ka wehewehe me ka Ninau ana.
Ka manawa, Aperila paha 1 1/2 makahiki, mahope o ka helu 7.
Kahi i hana ia ai. Nazareta ko Iesu home mua.
Na Iuna. Kaisaram Tiberio, ka moi o Roma, Ponetio Pilato ke kiaaina o Iudeam Herode Anetipasa ke kiaaina o Galilaia.
Na hana e hana pu ia ana. Hoopaa ia o Ioane Babetite ma Maraki, ma ka halepaahao o Herode, a o oki ia kona poo mahope iki iho.
Na hana mawaena o ka helu 7 me ka 8.
Helu Iesu i Betebara a bapetizo ia e Ioane Mat 3,13-17.
Ko Iesu hoowalewale ia, Luk 4;1-13.
Hoi hou Iesu i Betebaza, a kuhikuhi ia e Ioane,Oia ke Keiki Hipa a ke Akua, &c Io 1:15-51.
Loaa na haumana mua na Iesu, a hele pu Oia me lakou i Galilaia.
Ka hana mana mua, ma Kana Io 2;1-11
Ka Pasoa mua me na hana a Iesu malaila, Io 2;14-35.
Ke kamailio ana me Nikodemo, Io 3;1-21.
Haiolelo Iesu ma Iudea Io 4;2
Kipaku ia e na Iudaio, Io 4;1-3
Hele oia i Galilaia ma ke ala o Samaria, a kamailio me ka wahine o Samati Io 4;4-42.
Haiolelo oia ma Galilaia.
Hele hou oia i ka ahaaina ma Ierusalema.
Hele hou oia i Galilaia, haiolelo hou, a hana hou i na hana mana, a puka Oia i Nazareta, kahi i haiolelo ai ma keia haawina.
Nui na hana iloko o ka makahiki hookahi me ka hapalua.
P 14. Mai hea Iesu i hoi mai ai? Ma kahi i hoowalewale ia ai, hoi Oia i hea? Me ke aha? Pehea kona kaulana? Ua hoolahaia Kana mau olelo ano hou, me Kana mau hana mana, hana kupanaha ma Iudea, a me ma wahi e ae.
P 15. Heaha kana iloko o na halehalawai? Me ke aha ia e na kanaka?
P 16 A hiki Oia Pehea? Kahi aha ia? Heaha kana hana mau ma na Sabati? Ma keia ua komo pinepine Iesu mamua iloko o na hale halawai, a ua haawiia ia la ka heluhelu ana ma ka buke heluhelu, oia hoi ke Kauoha kahiko. A akamai paha Oia i ka heluhelu.
P 17 Ka buke hea kai haawiia ia Ia i keia wa? Ua mahele ia ke kauoha kahiko i 52 mahele e like me ka nui o na Sabati ma ka makahiki, elua hapa o ka mahele, ka hapa moolelo, ka hapa kaula a Halelu. A pau ka makahiki ua pau na mahele he 52 i ka heluhelu ia, alaila, hoi hou lakou i ka mahele 1.
Ka mahele ma ia Sabati, ma Isaia kekahi hapa.
P 18.19. Aia ma Isaia hea ia mahele? 61:1-2.
Oia paha ka mahele. Na Iesu paha i haalele i ka mahele ponoi, a heluhelu i keia mau pauku i pani no ia. Ka mahele akoa, he 21 pauku ia. Aka, hookahi wale no pauku me ka hapa ka Iesu i heluhelu ai. Oia ka hapa e pili ana ia Ia iho. A oia Kana kumu haiolelo. Heluhelu like oukou i keia mau pauku elua.
P 20,21. Heaha ke ano o ua buke nei? He owili, aole he buke maoli. Ua weheia ka owili mamua. A pau ka heluhelu ana, owili ia a paa e like me mamua. Ke ano ia o na buke ma ia wa.
Hoopaa Iesu i ka buke a hoihoi aku Ia ia wai? I ke kahu, oia hoi ka luna o ka hale halawai. Noho Iesu ilalo, pela ka poe haiolelo ia manawa, aole ku iluna, ku iluna mamua e heluhelu, alaila, noho ilalo a wehewehe a ao aku. Pehea na maka o na kanaka? He leo ano e, he maka ano e paha ko Iesu. He mea ano anela, ano Akua paha, ano oluolu, ano aloha, ano mana. Loihi paha kona wehewehe ana.
Ke ano o keia wanana. No Iesu ia, maluna On a ka Uhane, Mat 3:16. Na ka Uhane Oia i poni mai, i mea hoomakaukau ia la e hai i ka euanelio.
Ua hai no Oia i ka euanelio i ka poe ilihune, a i ka poe waiwai hoi.
Ua lapaau Iesu i ka poe ehaeha ma ka naau, i ka poe mai, i ka poe nawaliwali, e hooluolu i ka poe kanikau, e hai i ka hoola ana i ka poe pio, pio ia satana pio i ka hewa, i ka poe enemi. Pau ka noho pio ana malo Iesu la.
Haawi Iesu i ka ike i na makapo, makapo maoli, makapo ma ka naau.
Hookuu Iesu i ka poe i hooluhi hewa ia, na kauwa kuapaa maoli, na kauwa kuapaa na satana, a na ka hewa. Ua hai Iesu i ka makahiki e aloha mai ai ka Haku, ka makahiki Iubile ia o ke ao nei, ka milenio, ka wa e lilo ai na aupuni o keia ao, i aupuni no Iesu.
Mele, him 498. Puhi i ka pu oukou.
Na ninau a na Kahu.
Na kane. heaha ke kumuhana ? Owai ka haillelo ma ka helu 7? Na ke aha i hooki i ka Ioane haiolelo ana?
Akahi no anei a haiolelo Iesu? Mahea Kana haiolelo mua? Pehea ka loihi o ka manawa mawaena o ka helu 7 me ka walu?
Ma wahine. Hai mai i kekahi mau hana a Iesu iloko o ia makahiki me ka hapalua, Kona bapetizo ia, hoowalewale ia kekahi mau hana mana.
Na ui me na keiki. Ma ke aha Iesu i lanakila ai maluna o na hoowalewale a satana Ma ke aha oukou e lanakila ai ke hoowalewale ia? Hai mai lo 3;5/
Ke kula a pau. Hai mai i ke kumu olelo o ka Iesu haiolelo. Nohea mai? Pili anei ia ia Isaia ke kaula Pili no kekahi hapa, Aka, ma o Iesu la wale no ka hooko pia ia.
Heaha ka hana nui a na haumana a Iesu? E hai i ka euanelio ia wai?
Nui anei na ilihune, na pio, ka poe ehaeha, a hooluhi ia? Nui wale maanei a ma na aina e. E kokua i ka hai ana, i ka hoolaha ana i ka olelo a Iesu ka mea e waiwai ai, e ola ai.
Mele, him 499. E oli, e oli, oe ae ka milenio.
Pule i hiki koke mai ka milenio.
Haawina no Feb 27. Luk 5;12-26.
Na Misiona.
HELU 49.
Inedia.
Mana anei ka hana a ua misionari ma Inedia, oia hoi Hinedu. Ka nui o na kanaka, 150,000,000 a oi aku paha.
He poe hoomana kii lakou a pau mamua, ma ka puka ana o na misionari malaila ma ka mak 1800, mamua iki ake, mahope iki mai paha, aohe paa mawaena o na kanaka maoli i hoomana ia Iehova.
Ma ka makahiki 1857, ua loaa ke 91,393 ka poe i haalele i ka hoomanakii, a huli mamuli o Iehova. Ma ka makahiki 1878, ua mahuhua ia poe a hiki i ka 295, 929, mahope iho ma na makahiki 79,80, nui na kausani hou i huli mai.
Nui na ekalesia me na kahu maoli, nui na kula me na kumu maoli
Nui na buke ekalesia, me na buke kula. Holo ao na hana ekalesia, na hana hoonaauao, na hana ekalesia, na hana hoonaauao, ua hana maikai, nui nae na mea keakea, nui ka hoonaauao ka naaupo, nui na miliona i koe iloko o ka pouli a me ka make. E mau ka pule ae lakou.
Austeralia.
Oia hoi Nuholani. Akaka no ia mau mokupuni nui i na kanaka Hawaii.
nui na kamaiina mamua, i ka makhiki 1606 ka wa i komo ai na haole Europa malaila. Ma keia wa nae, he 15,000 wale no na kanaka maoli oiai 1,500,000 wale no na haole Europa.
He poe eleele na kanaka maoli, aole nae i eleele loa e like me na negero. He poe hopo no, ane nele i ka hoomana ole. He mau uhane ino ko lakou i manaoio ai, a pono ke hoolaulea la i ole e hana ino mai. Aole o lakou kahunapule, aole heiau, aole mohai. Ko lakou manao, aia a make lakou, lilo lakou i poe Europa.
Hina ilalo, he kanaka eleele, lele iluna he kanaka keokeo. I ka wa e make ai, he eleele, a ala hou ae he keokeo.
He kanaka maoli kai li ia mamua aku nei, hooluolu oia ia ia iho ma ka manao, e lele hou ana iluna, he kanaka keokeo, a loaa a nui wale na kenikeni, hupo io ea?
Hiki nae ke ao ia, ke hoohanau hou ia e ka Uhane Hemolele. Pela e hoomau ai i ka pule.
Nu Guinea
Ma ka akau ia o Auseterelia, o Kupa he keiki a kekahi alii o lakou, oia kai hana i ka honua, i ke kai me ka lani, o lia, he mamo na kekahi alii e ae, oia kai hana i ke kanaka.
O Kaitapu, oia kai hoapono, hoahewa, hoopomaikai, hoopoino. Oia ka mea a kanaka i makau nui ai, a imi nui e hooluolu iaia.
O kekahi kahuna o Taitapu kai hele i ka wa kanu e kaumaha i na mohai i ulu pono, a hua nui na mea i kanu ia.
Tirava ka inoa o ka uhane, maikai kekahi uhane, hewa kekahi uhane, in a maikai, pomaikai ke kanaka, in a hewa, poino.
Aia a make ke kanaka, hele ka uhane i Erema, he aina ma o loa aku ma kahi e napoo ana ka la, ilaila na pama, ai no na uhane i na hua a ana, mahope iho hoi hou na uhane i ka honua a komo iloko o na kino kanaka e ae.
Aia a mek ke kanaka, hooke ai na hoa a kunia ke kupapau, aole i hoopiha kokeia ka lua i ka lepo, hoolei hapa ia mamua, a kali i hiki i na hoa ke nana hou, pela i hoolei liilii ia ai a lawa ka nana ana,alaila, hoopiha loa ia ka lua.
Nui ke aloha i na keiki, i na make ke ke iki a kanu ia, aole liuliu, a wehe ia ka lua, a hapai ia ke kupapau o ke keiki, ahoni ia, a kanikau ia, a hoihoi ia iloko o ka lua.
A hana hou no pela a loiih. A hana no hoi i mau ahaaina no na keiki i make.
Aloha nui, ea, i na aina naaupo, aole nae e mau ana ka naaupo. Ua weheia ke alaula malaila, ua helelei na kukuna malamalama maluna o na kanaka.Ua huli mai kekahi poe.
Ua haalele i na akua lapuwale. Ua hoomaka e hoomana ia Iehova , a e lile i poe haumana na Iesu. E lana kamanao, e mau ka pule no ia mau aina pouli.
Aole i pau.
KALE KULIKA.
LUNA HOOIAIO PALAPALA KUAI,
Molaki, a me na palapala oia ano.
LUNA HOOIAIO PALAPALA
Aelike mawaena o na haku me na Kauwa.
Luna Haawi Palapala Ae Mare
Me ke kihi o ke alanui Moiwahine me Kaaihumanu, kulanakauhale o Honolulu, ko Hawai Pae Aina. 906tf
KALE NILEKONA
KAUKA LAPAAU,
Keena ma ke kihi o Alanui Papu me Hotele
HONOLULU,
O na mai o ka Maka,
Pepeiao a me ka Puu,
UA MAKAUKAU OIA MA KA LAWELAWE ANA.
KAUKA EMEKONA.
E LOAA O KAUKA EMEKONA MA KONA Keena Hana ma ka Hale Kauka o Dr Hoffmann, (Kauka Hopemana) ma ka Helu 24 Alanui Kalepa, mai ka hora 9 a 11 o ke kakahiaka, a mai ka hora 2 a 3 o ke ahiahi.
He keiki keia o ka aina o Hawaii nei, a ua noho oia he mau makahiki ma Nu Ioka, a ua makaukau i ke pale keiki, a i ka lapaau ana i na mea mai fiva, na mai maoli a me na mai haole o na ano a pau. Ua akamai oia ma na olelo elua. 981 6m
MAKEMAKEIA.
Ua makemake ia ka poe mea ILI KAO MALOO a me na ILI BINI, a pela hoi me na ILI MIKO o na ano a pau, e kuai mai i ko lakou mau ILI me makou, a e haawi no makou i ke KUMUKUAI KIEKIE LOA o ko kakou Makeke.
C BREWER & CO. (Bareua Ms.)
Honolulu Sept 29 1880 996tf
C.C Coleman.
Amara a he Mea Hana Mekini
Kapili Kapuai Hao Lio
A ME KA
Hana ana i na Kaa Lio. &C.,
Hale Hana na ALanui Alii, e kokoke la i ke Alanui Papu.
905 tf
He Nui Anei Kou Makemake i na Mekini Humuhumu Lole?
Ina pala, alaila, e kipa mai no ma ka Halekuai
O
KAKELA A ME KUKE.
A malaila oukou e ike ai a makaikai i na ana MEKINI a WHEELER a me WILSON mai ke $46 a hiki i ke $50 ke kumukuai o ka mea hookahi.
Na MEKINI a SINGER.
ma ke $50 pakahi, me ke ano
MEKINI a WILCOX me GIBBS, me ke $30 a hiki i ke $50 ke kumukuai.
I mea e pau ai ko oukou kanalua e na Mekini, e nana mai no me ke kuihe ole, a e ike no oukou hoi. 862tf
UA MAKEMAKE IA
NA ILI BIPI,
NA KIWI BIPI,
NA IWI BIPI.
E haawi ia no ke kumukuai kiekie o ka oukou makeke nei e H. Haokfeld & co.
Honolulu, Mei 23, 1880
RICHRDA F BICKERTON.
[PEKETONA]
LOIO a he KOKUA ma ke KANAWAI.
E HELE ANA OIA IMUA O NA AHA HOKOLOKOLO a pau o keia Aupuni ma na ano hihia a pau., ina paha ma Oahu nei, a ma na Mokupuni e ae.
Ua makaukau mau oia i ka hana ana i na Palapala nui kanawai o kela a me keia ano.
Ua hiki no hoi iaia ke hoaie dala aku ma ka moraki ana ma aina, ma ka ukupanee haahaa loa.
E hanaia na hana me ka hikiwawe a ma ka uku haahaa.
Keena hana, Helu 23 Alanui Kalepa, elua puka ma o aku o ka hale kauka o Kauka Minuteole.
KAUKA BERODI.
(O KE KULA MUI O KANADA)
Ua makaukau au i ka lapaau ana i na kanaka Hawaii no na ano mai a pau. Ke kahea aku nei au i na poe i loohia i ka mai e hele mai ia ʻ u
KEENA OIHANA
Aia ma Alanui Papu, Helu 129, mauka iho o ka Hale Kamana o D Burrons.
996tf
E. Cook Webb. M.D
HOMEOPATIKA.
(Kauka o ka Halemai Homeopatika, ma ka Mokupuni Wards N.Y.)
KEENA OIHANA.-Helu 60, ALanui Papu. Makaukau mau e lawelawe i na pilikia mai o na wahine a me ka kamalii.
HORA HANA.-Mai kakahiaka a hora 10 am.-2 a i ka 4 pm. 967 4m
PAPA! PAPA!
NO
ALLEN & ROBINSON
UA WEHE AE NEI MAUA I
PA KUAI PAPA
MA
KA UWAPO O PAKAKA
Na Papa Ulaula o na ano a pau.
Na Papa Paina o na ano a pau.
Na Pili Hale Ulaula.
Na Pili Hale Keokeo.
Na Pepa Molina.
Na Pena a me na Aila Pena ʻ
NA KUI O NA ANO A PAU.
NA PANI PUKA a me
NA PANI PUKA ANIANI.
NA PANI PUKA a me
NA OLEPELEPE.
NA LAKO KUKULU HALE
O NA ANO A PAU!
E KUAIIA MA KE
KE KUMUKUAI HAAHAA LOA
O keia Makeke.
ALLEN & ROBINSON
Honolulu
LOLE MAKEPONO
Ke Kuike.
E LOAA NO IA MA KAHI O
KAKELA ME KUKE!
E LAA NA
Ahinahina, Kalakoa,
Keokeo, Leponalo,
Pena, Aila, Aniani,
NA MEA PIULA!
KOPA, AILA HONUA, AILA HOOMALOO
Kui Kakia, Pakeke,
Tabu, Kaula, Noho Lio,
Hulu Palaki, na Pulumi.
A ME
AGENA NO HOI NO NA MOKUPUNI O HAWAII NEI NO NA
Lainakini-nao,
Lainakini Maoli,
Palule Kalakoa,
Alapia, Kelepa, Kilika,
Na lole kupono i ka wawae.
Palule Huluhulu,
Na Lole Huluhulu,
Na Lole no ka hoohehelo ana
Lipini, Lihilihi, &c.
LIPINE, LIHILIHI, &c.
A ME NA
Mikini Humuhumu MakeponoLoa!
A HE
MAU MEA AI KAHI
Ka Palaoa, Kepaa,
Raiki, Pia, Hoohu,
Puakai, Huaala,
Pia Kulina, &c.
A he Laau Lapaau Kaulana Loa
A DR JAYNES.
Laau Kunu,
Laau Hoomaemae Koko,
Laau He opau Naio,
Penikila, Huaale
A ME NA LAAU HAMO, A PELA ʻ KU!
840tf