Ka Nupepa Kuokoa, Volume XXII, Number 43, 27 October 1883 — HUNAHUNA MEA HOU O KA LAI A EHU. [ARTICLE]

HUNAHUNA MEA HOU O KA LAI A EHU.

E ka Nupepa Kuokoa, Aloha oe:—^ He wahi mea hou ka'u e panee aku nei imua ou; a nau ia e kaana ae. Ma nehinei Oct. 14, oia ke Sabati. Ua loaa aku kekahi Pake i uka o Kailua e ako lau uala ana. Olelo ia aku iaia, he lapule keia, olelo mai kela, he lapule no ia oukou, ia makou aole lapule. O Akana ka inoa o keia Pake. Ma ia wahi koke no, a i keia la no. Ua pii ae la ke kai mawaena o Haanio, a me kana wahine, a no ka nui huhu o Haanio, ua lawe ae la oia i kana pu panapana a kau pololei aku la i kana wahine, me ka olelo pu aku, "mai no oe a pane hou mai o ike oe i ko make ia'u i keia wa." Ia wa no i kuu pau aku ai oia ika ikaika o kona huhu, a no na ulia, ua pakele ka wahine, a lele aku la ka poka a ku i ka pahu wai, a kahe mai la ka wai iluna o ka moena mai ka puka mai o ka poka. Ika lohe ana o Kauahuliwaa ike kani o ka pu, holo jnai oia a olelo mai, e waiho oe ia mea, he mea makau. Ia wa no oia i huli ae ai a kau pololei aku la i ka pu imua .0 Kauahuliwaa, me ka olelo pu mai, "mai kamailio mai oe,' oku oe i ka poka o kuu pu, aole o'u minaminu i kuu ola." Haalele hou ae la oia i ke kani o kana pu, holohio aku la ka poka a puka mawaho oka hale, me ka hoihoi hou mai o kona lima me ka pu a kau pololei iho la ma ke kua o kana wahine, oiai kana wahine e moe ana ilalo no ka makau i ka make. I ka' ekolu manawa o kana ki ana, lele pololei ka poka a ku ka wawae o kekahi ilio. a ua ki aku i kekahi mau poka ma kahi e, a pakele ke ola oka poe a pau malaila. Aole i • akaka loa ke kumu 0 keia hana, no ka ona mai no paha. Ma Kailua ponoi. He wahi lelekowali kamalii i keia la Sabati no, aole nae i ike mai ka mea nona ka hale, a me ka pa. He kowali keia no na keiki ponoi a ka mea nona ka pa, aka, aole ia mau keiki i lelekowali, no kahi e mai na kaikamahine 1 lele i ke kowali i keia la. O keia mau hana, he hehi Sabati maopopo. E ka Pake, mai maiiao oe e hoohalike i ke Sabati o Kina me ko Hawaii nei, aka, e malama oe i koonei Sabati. E Haanio e, e kapae loa ae i ke kani o kau pu ilalo i ka honua, mai lawelawe hou aku ia mea, oiaū he hopena weliweli ko lakou iluna o ka amana. E na makua mea keiki, e malama 1 ka kakou mau hapuu, mai na hana hehi Sabati ae, e kapae ae ia mau hana no na la noa. Owau no. J. Kaelemakule. Kailua, Hawaii, Oct. 15, 1883.