Ka Nupepa Kuokoa, Volume XXIV, Number 20, 16 May 1885 — Page 4

Ka Nupepa Kuokoa

KE KILOHANA POOKELA NO KA LAHUI HAWAII.

 

Ka Nupepa Kuokoa

 

No ka Makahiki,……………$2.00

No Eono Mahina,……………1.00

KUIKE KA RULA.

 

Poaono………………….MEI, 16, 1885.

 

HOALA HOU I KAU HANA

(Revive Thy work.)  G. H. No. 223.

 

1.

Ala'e ka Uhane e,

A e hoala hou

Kau hana mana e ola'i

Iwaena o makou.

Cho.    Ala'e------Ala'e-------

Houa nui mai;

A nou ka nani no a pau,

Makou ke pomaikai.

 

2.

Ala'e, ka Uhane e,

Kou lima e hapai.

E hoohaalulu nui mai,

I lohe lakou nei.

Cho.    Ala'e, &c.

 

Ala'e, ka Uhane e,

E hoomanao maikai,

Iwaena o ka inaina nei,

E lokomaikai mai.

Cho.    Ala'e, &c.

 

5.

Ala'e, e ka Uhane e,

Hookiekie ae

I kou inoa kaulana e.

Hoohuli nui mai.

Cho.    Ala'e, &c.

                                                HAWAII

 

Haawina Kula Sabati.

            Haawina Kula Sabati, X, Iune 7, 1885.  Kumuhana, Ka ke Akua kauoha ma o kana Keiki la, Heb. 1;1-8.  2;1-4.

            O KE Akua, o ka mea i olelo pinepine mai i na wa kahiko i ka poe kupuna, ma kela mea a me keia mea, ma ka poe kaula,

            2  Oia ka i olelo hou mai ia kakou i keia mau la muli iho nei ma ke Keiki, ka mea i hooliloia e ia i haku no na mea a pau, ma ona la hoi ia i hana'i i ka lani a me ka honua.

            3  Oia ka olinolino o kona nani, a me ka like loa o kona ano maoli, e hoomau ana i na mea a pau ma kana olelo mana iho, a, hoolilo iho la ia ia iho i mea e maemae ai ko kakou hewa, noho iho la ia ma ka lima akau o ka Moi maluna lilo;

            4  A ua hookiekieia'e maluna loa o na anela, e like me ka oi ana o ka maikai o kona inoa i loaa ia ia, mamua o ko lakou.

            5  No ka mea, o ka anela hea kana i olelo aku ai i kekahi manawa, O oe no ka'u Keiki, i keia la no ua hoohanau aku au ia oe?  Eia hoi, E lilo au i Makua nona, a e lilo oia i Keiki na'u?

            6  Eia hou hoi, i kona hookomo ana i ka makahiapo i ke ao nei, i iho la ia, E hoomana mai ka poe anela a pau o ke Akua ia ia.

            7  A ua oleloia mai hoi no ka poe anela, Ua hoolilo oia i kona poe anela i mau makani, a i kana poe kauwa lawelawe i lapalapa o ke ahi.

            8  Aka no ke Keiki, O kou nohoalii, e ke Akua, e mau loa ana no ia; a he hoailonamoi o ka pono ka hoailonamoi o kou aupuni.

MOKUNA II.

            NOLAILA hoi, e pono e lelepau kakou ia mau mea a kakou i lohe ae nei, o haule ia kakou i kekahi manawa.

            2  No ka mea, ina i kau paa ia ke kanawai i oleloia mai ma ka poe anela, a ua hoopai pono ia ka hala, a me ka hoopale a pau;

            3  Pehea la uanei kakou e pakele ai ke malama ole i ke ola nui nei; ka mea i haiia mai i kinohi e ka Haku, a i hooiaioia mai hoi ia kakou e ka poe i lohe;

            4  O ke Akua kekahi e hooiaio pu mai ana ma na hoailona, a me na mea kupanaha, a me kela hana mana, a me keia hana mana, a me ka haawi ana mai o ka Uhane Hemolele, e like me kona makemake?

            Pauku Gula, Pehea auanei kakou e pakele ai ke malama ole i ke ola nui nei. Heb. 2;3.

            Manao nui, Ua pono ia kakou e hoolohe i ka ke Akua kauoha ma o kana Keiki la.

NA HELUHELU LA.

Poakahi,          Heb.  1:1-14.

Poalua,                          "       2:1-18.

Poakolu,             "                  3:1-19.

Poaha,               "            4:1-16.

Poalima,             "           5:1-14.

Poaono,              "           6:1-20.

Sabati,            "      7:1-28.

            Mele, "Punawai Kahe Maemae," Hoku Ao Nani, p. 90.

            Pule, I paipai ia na mea a pau e imi i keia ola.

NA NINAU.

            Mahea ka haawina o keia la?  I na hea ke kau ia ana?  I ko Paulo noho mua ana ma Roma.  Ia wai ke kakau ia ana?  I na Iudaio karistiano ma Suria.  Ia wai ko ke Akua olelo ana i ka wa kahiko?  Heb. 1;1.  Ma owai la?  No ke aha kona olelo ana i kanaka ia manawa?  Nawai e ao i kanaka ke ole ke Akua?  Ke ole oia i hoike mai no na mea i kinohi, nawai la?  Nawai e hoike mai no ke Akua a me kona aloha?  Nawai e hoike mai i ka ino o ka hewa, a me ka poino e waiho ana no na mea e hoomau ana ma ka hewa?  Nawai e hai mai no ka lani a me ke ala e hiki aku ai ilaila?  Ua ike anei kekahi mea e ae i na mea e hiki mai ana, a hiki ke alakai pono i kanaka e like me ke Akua?

            O ke Akua wale no ka mea hiki ke haawi mai i ke kanawai hoopololei i ko ke kanaka noho ana.

            Ua hoike ia anei na mea a pau i ka mea hookahi?  Ehia makahiki mamua o Kristo ke kakau ana i kinohi?  Ehia makahiki mawaena o Malaki a me ka hanau ana o Kristo?  400.  Owai kekahi o na kaula @ Ma ke aha ko ke Akua hoike ana i kona manao ia lakou?  Ma na moe uhane, &c.

            Ma owai la ka olelo hou ana?  p. 2. Ma ke aha i oi ai keia, i ka hoike mua?  Aole o ka olelo wale no i na haumana, aka, ua hoikeia ke ano ma ka noho ana.

              Pehea ka Iesu olelo ma Io. 14;9?  Ma ko Iesu make ana, ua hoike ia ke aha?  Ko ke Akua ano, kona hemolele, kona aloha, i hiki ole ke hoomaopopo ma ka hoike e ae.  Owai ka elele nana e hoike mai i na mea i hai ole ia ma ke Kauoha Kahiko?  Ua kupono anei o Iesu, ke Keiki a ke Akua i mea hana e hoike pau mai i ko ke Akua makemake?  Heaha kana hana nui?  Col. 1;16.  Mat. 28;18.  Io. 1;1-3.  ma ke aha e ike ai ko ke Akua nani?  Heaha ka mea e mau ai na mea a pau? p. 3.

            Heaha kana i hana'i no kakou?  Aia mahea i keia wa?  Ua hookiekie ia o Iesu maluna owai?  p. 5.  E hoomana na anela ia wai?  Heaha kana olelo no na anela? p. 7. He mau elele no ke aha?  Heaha kana olelo i kana Keiki? p. 8.

            Ka wai aupuni e mau ana?  Pela anei na aupuni o ke ao nei?  Heaha kona hoailonamoi?  p. 8.  I ka lohe ana i keia mau olelo a Iesu, na ke Akua mai, heaha ko kakou pono?  2;1.

            O aha?  Pehea e haule ai?  I ma ka hoomaopopo ole ana i ka waiwai nui o ia olelo.  2 Ma ka lilo loa ana ma na hana o ke ao nei.  3  Lilo i na lealea.  4  Hoopanee wale a i ka wa kaawale.  E ao i keia; aole e pomaikai ana kekahi i na olelo o ke ola, ke ole e malama ia ana; aole o na hewa nui wale no e poino ai ka uhane.  E make auanei ka uhane ma ka noho wale ana no.

            Pehea na kanawai &c. i haawiia ia Mose, ua makaala anei na Iudaio i ka malama ana? Pehea auanei na kauoha a Iesu, aole anei e makaala i ka malama ana ia mau mea?

            Pehea ka põe malama ole i na kanawai, hoopaiia anei?  Nahelu, 15; 30, 31.  Kan. 17; 12, 13, Ina hoopai ia ka poe malama ole ia mau kanawai, pehea auanei ka poe hoolohe ole i keia kauoha? p. 3. No ke aha ka pakele ole?  He kumu anei no ka malama ole ana?  Aole anei o ka malama ole ana, he mea ia e paakiki ai ka naau?  He wahi e ae anei e ola ai kakou, ina haalele i keia? Aole anei i hoike ia ko ke Akua aloha nui ma ka haawi ana i keia ola no na kanaka a pau?

            Aole anei i hoomaopopo kekahi, o ka malama ole, hana ole, a noho wale paha, he mea ia e poino ai ke kanaka?  Haalele kekahi i ka hana, me ka manao e ola no ia ma ka noho palaualelo ana, poino auanei oia.  E moe ana kekahi me ka mai, aole nae malama i na kauoha a ke Kauka,---e make auanei oia.  Pae anei ke kanaka ma kela kapa o ka muliwai ina kahe ikaika ka wai i lana malie wale no oia, aole hoe me ka ikaika?  O na poino e loaa ana i kanaka, no loko no o ka malama ole a hana ole.

            Ina he poino e hiki mai ana ma na mea pili kino no keia noho wale ana, aole anei e oi ana ka poino no ka uhane ke malama ole i keia ola nui?

            Heaha keia ola?  Nawai i haawi mai?  Heaha ke kumukuai?  Owai ka mea a ke Akua i haawi mai i ola no kanaka?  Ua noho anei oia ma ke ao nei?  He oluolu anei ka noho ana maanei?  Pehea kona make ana?  Make oia ma ke aha?  He nui anei kona aloha no kanaka hewa?  Makemake anei oia e make kekahi?

            Nawai i hai mua mai no ke ola?  p. 3.  Nawai i ao hou aku i kanaka no keia nu maikai?  Owai kekahi o ia poe i lohe i ko Iesu hai ana i ka olelo?  He nui anei na hana mana a Iesu?  Ua hana mana anei na haumana?

            Mahea ka haawi nui ana ia lakou ka Uhane Hemolele?  Nowai mai keia mau pono?  I me aha?  I mea e maopopo ai i kanaka na ke Akua i hoouna ia poe e lawelawe nana.

            Mele, "Ke Ola," Hoku Ao Nani, p. 204.

            Pule, I hoolohe na pokii i keia kauoha. 

Gerizele.

KE KAIKAMAHINE ALOHA I KA MAKUA I

HOAHEWAIA E MAKE, A HOOLE AOLE OE

E MAKE.

            O Keoni Kokerana, he haku aina ia no Sekotia, ua hoahewaia oia e ke alii e make, aia ka palapala hoahewa iloko o ka eke leta ma ke alanui.  E noho ana o Keoni ma ka puka o ka halepaahao me kana kaikamahine o Gerizele.  Hai oia i kona aloha hope iaia me ka olelo, E make ana au.  Hoole ke kaikahine, Aole oe e make, e papa.  Pane ka makua, Ke kue mai nei ke alii ia'u, ke kue mai nei ke kanawai, a ke hele mai nei ka palapala kauoha e make au.  E make ana no au, mai kuhihewa oe e kuu kaikamahine makamae.  Hoole no ke kaikamahine, E kuu makua, aole oe e make.  Ka nalo no ia o ke kaikamahine.

            Ma kekahi po, ku kekahi malihini ma ke alanui lawe leta, he ano e kona maka, ka maka maoli ua hunaia, e kali ana oia no ka hoea mai o ka lawe eke leta, a iloko o laila ka palapala hoomake o Keoni.  I kona hoea ana mai, lalau ua malihini i ke kaula waha a hoopaa ia, a kena iaia e iho mai ilalo.  Ua haha koke ka lawe leta i loaa kona pu panapana, a i ka makaukau ana e ki i ka pu, lalau ka malihini i ka lawe leta, a kulai iaia ilalo ma kona kua, a lawe i ka eke leta, a nalo aku iloko o ka pouli.

            Ma ia hana ana ua loaa he 14 la no ke ola kino ana o Keoni, a he mau la hoi ia e noi ana kona kahunapule i ke alii e kala i ka hewa o Keoni a e hookuu aku iaia.  Kakau hou ia ka palapala hoomake ia Keoni a hookomoia i ka eke leta, a hoomaka aku ka lawe leta e hele.  Hoea hou ua malihini nei ma ke ala, a noi i wahi waina a i wahi berena.  Olelo lakou aloha ino oe no kou hele ana ma keia po iloko o ka ua me ka pouli loa.  E nalowale ana paha oe, ua hoole oia, aole.

            Hele aku oia me ke kali no ka lawe leta.  I pakele ka lawe leta i ka poino o ka lawe leta mua, hou ke kepa iloko o kona lio a holokiki loa oia.  Emoole a kani kahi pu, a puiwa loa kona lio, a i ke kani ana o kana pu, hoolei kona lio iaia ilalo.  Ka lele no ia o ua malihini nei a ku kona wawae maluna iho o ka lawe leta, a kena oia iaia e haawi pio mai oe ia oe iho ia'u.  Ae no oia a lawe ka malihini i ka eke leta, iloko o laila ka palapala hoomake elua o Keoni, a nalo aku oia iloko o ka pouli, ma ia hana ana, ua loaa hou ia Keoni he 14 la hou o ke ola kino, a no ke noi a kona kahunapule i ke alii e kala i kona hewa, a hookuu aku iaia.

            Mamua o ka pau ana o ia mau la ua hiki mai ka palapala na ke alii mai, a e olelo ana, @ @alaia ka newa o Keoni.  Ka wehe koke ia no ia o ka puka o ka halepaahao, a hemo mai o Lord John Kokerane mawaho me ka hookuu loa ana aku iaia.

            I kekahi la mahope iho, e ku ana o Keoni mawaena o kona mau makamaka i akoakoa ae e aloha iaia no kona hookuuia ana.  Hoea mai ua malihini la me ka maka ano e a ku ma ka puka a kena Keoni e ae iaia e komo mai.  Komo oia a olelo, E kuu haku, eia na leta elua, e heluhelu a e hoolei ia iloko o ke ahi.  Heluhelu no Keoni ia mau leta, oia ka na leta elua e kena ana e hoomake ia Keoni, a hoolei ia iloko o ke ahi.  Alaila ninau Keoni:  Ia wai la ko'u aie ana?  Owai la keia malihini me ka maka ano e?  Hoolei hoolei oia i kona maka ano e (mask); aia hoi, o Gerizele nei, ke kaikamahine a Keoni Kokerane.  Hooho ka makua, "E ka lani lokomaikai; kuu keiki; kuu hoola a me kuu Gerizele ponoi."

            Aka, he moolelo oi aku i keia, ua hoolahaia ka palapala hoomake mai ke alii mai o ka lani a o ka honua.  O ka uhane i lawehala e make ia, ua hiki mai ia palapala maluna o ka lio eleele o ka po mau loa, e make kakou.  Aka he malihini nae i uhiia me ka lole ano e, lalau oia i ke kaulawaha o ua lio nei a hoolei i ka mea maluna iho ilalo, a ku kona wawae eha a pulu i ke koko maluna iho ona, oiai ua anapu mai mai ka nohoalii mai, "Ua kala ia, ua hookuuia, e wehe i ka puka, e moku ke ka ula hao."

            A ma keia la, ke ku nei kou uhane imua o ua malihini nei, a i kona wehe ana i kona lole ano e, e ike oe, he iwi oia no kou iwi, a he io no kou io, kou kaikuaana, kou Karisto, kou kalahala, kou ola mau; e hooho oli ka honua me ka lani, ua lanakila ma o Iesu Kristo la

He mea hewa, a make au,

Aloha nae Iesu,

A lilo ia i pani no'u

Me kuu Hoola pu.

                                    DR. TALMAGE.

 

            Unuhiia e Hawaii.

 

Kii i na niu, a wawahi a ninini i

ka wai maluna o na huila.

            I ka huki ana i ke kaa o Iakanaka i kekahi la, ua paa loa na huila aole nee iki; olelo ke kahuna pegana ua huhu ke akua, e kii i na niu a wawahi a ninini i ka wai maluna o na huila.  Ua hana ia pela a holo no ke kaa.  Ua pau ka huhu o ke akua, hooho ke kahuna.

            Holo ole anei ka hana a ke Akua ka hana misionari paha?  E kii i na niu, na kenikeni, na pule, a ninini iho maluna o na huila, alaila holo ka hana.

                                                            DAY SPRING.

 

(Puzzle) He mea kupanaha.

            He puzzle, mea kupanaha, wahi a kekahi kanaka i kona kahunapule: o kela pauku ma Roma, 9; 13, Iakoba ka'u i aloha ai, a o Esau ka'u i hoowahawaha ai.  Ninau ke kahuna, Heaha ka mea kupanaha?  Pane ke kanaka, Ko ke Akua hoowahawaha ana ia Esau.  A pane ke kahuna, Eia nae ke kupanaha i oi ae, o ko ke Akua aloha ana ia Iakoba.

            Ae, he mea kupanaha ko ke Akua aloha ana i keia ao hewa, a haawi mai i kana Keiki Hiwahiwa e make i ola ka poe manaoio iaia. Io. 3: 16.

 

Ka ili i hoopihaia i ke aha?

            Pepehiia ka manu maikai a minamina ia i kekahi manawa, a waihoia na hulu pela; ke kino nae ua hoomaloo ia a hoopiha ia me kekahi mea e ino ole ai, a ma ka nana aku, he manu maikai e like me ka manu ola, a kuhihewa he manu ola io no.  Eia nae he manu hookamani i piha i ka mea io ole.

            Ka hoopili ana.---Ka poe haiolelo e malama i ko oukou omole ili, e hoopiha ia i na mea io, na mea e maona ai ka poe pololi a makewai; e hoopiha ia i ka baibala, i ka euanelio, ka olelo hoi a Iesu, a o Iesu Karisto ke kahua nui.

            Maluna ona e kukulu ai i ka haiolelo, e komo Iesu iloko o na haiolelo a ka Iesu mau kauwa.                                               H.

 

MOOLELO O KA A. O. I. P. K. O

MAUI.

 

            La hana 1, hora 3 auina la.  Halawai ka aha, kohoia o Rev. J K Hihio i lunahoomalu, J Kulailua kakauolelo mau a hoomakaia na hana me ka himeni a me ka pule a L Naauao me Waiwaiole, a hoomaopopo ia na hoa o ka aha i hiki mai, a aole he nui.  Noi mai o Naauao e lilo na hoa a pau i mau hoa kuka a ua aponoia.  Kohoia o Naauao, Pali me Makekau i komite imi kumuhana, a ua aponoia.  Hoike a ka lunahoomalu o ke komite:

            1  Hoike a na Paresidena.

            2  Hoike a na elele.

            3  Heluhelu haawina.

            4  Hoike a na komite hoeueu.

            5  I waihona dala no keia aha.

            6  Komite no keia aha i ka ahahui ma Honolulu.

            7  Kahi e halawai ai ka aha.

            Paia, Haiku, Keanae, Hana, Kipa hulu, Kaupo, Waikapu, Wailuku, Waihee, Kahakuloa, Honokohau, Olowalu, Kaluaaha, Pelekunu me Waialua, a me Kalaupapa, aole i hiki mai ko laila poe Peresidena, hope P---, Kakauolelo Puuku, Elele, a me Alakai himeni.

            Huelo o Kekipi he elele, Honuaula o Kaiwi he Presidena.  Kaanapali o Kahopukahi he elele.  Lahaina o Naauao he hope P---, Lahainaluna o Make kau he elele, Kaunakahakai o Pahupu hope P---, Kuimehena elele, Waialua a me Honouli o Kaulana he Peresidena, Halawa o Kaiwipalaoa he Peresidena.

            Na kumuhana mai ka 1-7, ua heluhelu pakahi ia a hoaponoia.

            1  Kaiwi no Honuaula, Naauao no Lahaina, Pahupu no Kaunakakai, Kaulana no Waialua, Honouli, Kaiwipalaoa no Halawa.

            2  Kekipi no Huelo, Kahopukahi no Kaanapali, Makekau no Lahainaluna, Kuimehena no Kaunakahai.

            3  Na Naauao i heluhelu mai i kona haawina, 'O ka hoonee ia ana o ka A. O. I. P. K. o na mokupuni o Maui ma kahi apana e aku mai keia wahi ae, he mea anei ia e holomua ai ka pono karisetiano?

            4  Hoike mai o Poohea no na ahahui o Molokai, a ua nui loa ka mahalo o ka aha no kona hooikaika i ka hana a ka Haku a me ka iho ana i na pali o Koolau.

            5  He ekolu dala me hapalua i luluia a o A Pali ka puuku.

            6  O Pahupu ke komite i ka ahahui nui ma Honolulu, he elua dala a keia aha i makana ai.

            7  Ua hooholo loa ia i Molokai e hui hou ai keia aha, ma ka Poalua mua o Sept. 1885, hora 10 kakahiaka, ma ka luakini o Kaluaaha.

            Na ka lunahoomalu i hoouna aku i na haawina heluhelu i na Peresidena o na ahahui o Kaunakahakai, Waialua & Honouli, Halawa, Lahainaluna, Honuaula no ke kau e hiki mai ana, me ka hoomau no i na haawina a ka poe mua.

            Na ka lunahoomalu mua e malama i ka haiolelo i ka wa e noho hou ai ka aha.  Heluheluia ka moolelo o ka halawai i hala a aponoia.  Noi mai o A. Pali e hoouna i ka moolelo i ka nupepa KUOKOA a me Ko Hawaii Pae Aina a ua hooholoia a ua hookuuia na hana me ka himeni a me ka pule a Manase me Kaiwi.                                J. KULAILUA.

                                                                                                                        Kakauolelo.

 

HAAWINA HELUHELU.

            Ma ka euanelio a Luka 1: 3, a hapa hope, penei:  "E palapala hoakaka ia oe e Teopilo, he mea i kaulana."

            Maluna o ia mau huaolelo i hoakaka ia ae la maluna, e kukulu iho ai ko kakou ninau ana penei:  Heaha na mea i kaulana ai o Teopilo?  Ma ka huli ana a hoomaopopo iloko o na buke wehewehe Baibala a na makua kahiko ua loaa kekahi mau mea i kaulana ai o Teopilo.  He nui a he lehulehu na mea ona i kaulana ai, he 15 ka nui, a penei na hoakaka ana:

            1  He hooponopono buke kaulana ia iwaena o na Iudaio, a nana i hoopuka kekahi buke paani kaulana o ke ao nei.

            2  He luna maluna o na ekalesia o ka aina o Suria, me he aliikoa la maluna o kona poe koa.

            3  I ka makahiki 180 ua noho ma ka oihana bihop@ no ke kulanakauhale o Anetioka.

            4  I ke au ia Tiberia ka Emepera o ka aina o Iudea, o Teopilo ka mea i noho ma ke ano he hope nona.

            5  Ua noho ma ka oihana lunakanawai no ke kulanakauhale nani o Ierusalema.

            6  Ua lawelawe i ka oihana loio a ua noho haumana oia malalo o kekahi kumu ao kanawai oia o Rabi Simona Kamika no na makahiki he 2 1/2.

            7  He luna kaahele maluna o kekahi mau kulanakauhale, oia o Roma, Surakausa, Rekiuma, a me Puteoli, a he haku manao pu oia me Iosepuka.

            8  Ua noho ma ke ano Kahuna Nui, mahope iho o ka hoopau ia ana o Ionatana kona kaikuaana mai ka oihana kahuna ae.

            9  No ka olelo Helene kona inoa a o ke ano, ke aikane a ke Akua, ka makamaka o ke Akua, ka hoa'loha o na kanaka me ke Akua.

            10  Ua noho haumana oia malalo o ka Lunaolelo Luka, ma na mea pili i ke Akua, a me ka hana hai euanelio, alaila he kahunapule o Teopilo.

            11  He kakauolelo kaulana o Teopilo, ma na mea pili kalepa, a he hoahui oia no kekahi hui kalepa o na mea liilii

            12  He akamai pookela ma ke kalai olelo ana, ka hooponopono ana i na moolelo, a me na mea o kela a me keia ano.

            13  He haku moolelo no hoi o Teopilo, a he lehulehu na buke moolelo i hoopukaia, me ka haule ole o ka mea kaulana Teopilo, a me kekahi mau mea, ua hui pu oia me ke 'lii W. Basil.

            14  Ua kaulana no hoi ma kekahi mau mea liilii, oiai oia e uuku ana.

            15  Ua hoopukaia he buke kaulana ma ka inoa o Teopilo, i kapaia, "Teopilo ke Alohilohi."

            O keia iho la na mea i kaulana ai o Teopilo, i imiia e ko oukou hoa; aka, ke noi aku nei au i ko oukou oluolu, ina ua latio ole ko kakou mau noonoo no keia mau mea i hoakakaia ae la, alaila, ma ka mea a oukou i ike ai he pono, oia ka oukou e malama.  Aka, ua hooia nui mai kekahi o na makua huli baibala no na mea i haiia ae la maluna, oia o Kauka Kalaka, Kauka Kamika, Kauka Kapuaimalamalama me Kauka Matini, no keia mau mea e pi@i ana ia Teopilo.            Me ka mahalo.

                                    SAM'L. KAUIHOU.

 

            O ka la Sabati i hala ka la 10 o keia mahina, oia ka manawa i hoolahaia no ka hoolewa ana i ke kino o ka Moiwahine Kanemake, a no ka nui loa o ka ua, ua hoopaneeia.

 

Kauka H .Ioanekona Sepia.

(Dr. H. Johnstone Spear.)

            Ke hoike aku nei imua o kona poe mai a me ka lehulehu i loohia ia me na mai, ke hoomau nei no oia i ka lapaau ana i na mai aai a me na mai e ae me ka lanakila kamahao.  E na Lede a me na Keonimana, e hoomanao oukou, o ka hoolohilohi oia ka mea aihue i ka manawa, nolaila, e hele mai e hoola ia!  Aole nana ana i ke ano o ka pilikia, e hele mai a na ke Kauka e nana i kou ano mai.  Aohe ou lilo no ke kuka ana, nolaila e oluolu e hele mai a e hoomaopopo no oukou iho ina he ike ke Kauka e nana i ke ano o kou pilikia a me ka ole.  Ina he hiki iaia ke lapaau ia oe a ola, e hai aku no iaia pela; a ina aole, e hai aku ana no ia ia oe ia mea: no ka mea, aole ia e lawelawe ke ole e maopopo e ola ana iaia.

            He makaukau loa o Kauka Sepia i ka lapaau ana i na mai o loko o ke kino, ma mai aai, na mai o na wahi huna, na mai o ka puumimi, a me na mai e ae.  He lapaau ia na mai o ka ili me ke ola pono.  He lapaau ola oiaio keia no na mai i ulu mai no na hana naaupo o na la opio, etc., etc., a me na mai o na wahine aole laau ai iwi e haawiia.

            He lehulehu wale ka poe mawaena o kanakolu a me kanaono makahiki, ke noho nei me ka oluolu ole mamuli o ke ano hinape wale a me ka nawaliwali mamuli o kekahi kumu hiki ole ia lakou ke hoomaopopo.  He nui ka poe i make mamuli o keia kumu, me ka maopopo ole.  E hiki no ia Kauka Sepia ke hooiaio aku ke ola o ia ano mai a pau, a e hoihoi ia mai no ka ikaika o ke kino a puni.

KE HOOOPAA NEI AU E LILO KA'U

$1,000 ke ola ole kekahi mai a'u e lawelawe ai a ola ole.  AOHE auhau o ke kukakuka ana.  Aohe lilo o na launa aloha ana.

NA HORA HANA.

            Mai ka hora 9 a i ka hora 12 A. M., a mai ka hora 12 i ka hora 4, a mai ka hora 6 a i ka 8 P.M.  Na la Sabati, mai ka hora 10 a i ka 11 A. M.

KUKAKUKA ANA, AOLE UKU.

NO KA NANA PIHA ANA I KE ANO ME KE KULANA O KA MAI, A ME NA KUHIKUHI $5.00.

            I kipa mai; a i ole e kakau ae ia

                        KAUKA H. IONEKANE SEPIA.   

HELU 29 ALANUI BERITANIA, kokoke i ke Alanui Nuuanu, Honolulu.

 

NA HOOLAHA KUMAU.

 

HALEPAI O THOS. G. THRUM

 

O KA NUPEPA

 

SATURDAY PRESS me KUOKOA

 

ALANUI KALEPA, HONOLULU

 

Malaila e paiia ai na ano a pau o na

 

BUKE,

            HOIKE O NA KULA,

                        HOIKE A NA KOMITE,

                                    NA HAAWINA KULA SABATI,

PAPA KUHIKUHI O NA ANO A PAU,

            HOOLAHA NUNUI A LIILII,

                        BALOTA, LIPINE PAPALE,

                                    TIKETA, WAHI LETA,

                                                BILA PAI HAKAHKA.

                                                            HOOLAHA KUDALA,

&c.,     &c.,     &c.

 

Iloko o ka wa pokole a me ka auhau haahaa.

 

A me ka halekuai o THOS. G. THRUM

ma ALANUI PAPU, e loaa ai na

 

Kalana kakau o na ano a pau,

Wahi Leta                   "           "                       "

Inika                            "           "                       "

Penikala                       "           "                       "

 

Mea Hoopipili, buke hoomanao,

Peni gula a me kumu gula,

Kii, a me na laau,

Buke kii o ka ohana,

Buke kii a na keiki,

Na mea paani a na keiki,

Kaa a na keiki,

Kaa huila lua o na opio.

A he Agena no ke ana lole pepa o na

Keiki a me na wahine

 

No ka hoailona ana i na lole me na inoa ponoi e hookoia na kauoha a pau no na papa inoa ke waihoia ma keia halekuai me ka uku pu o ka papa inoa i makemakeia.  Uku no ka inoa hookahi me ka inika a me ka hulu, $1,50 ina ma ka papa inoa keleawe, a ina ma ka papa inoa dala, $2.

            O na kauoha pau mai na mokupuni e hookoia ina e hoouna pu ia mai me ke dala a me ka moakaka pono o na hoakaka ana.

                                                THOS. G. THRUM

 

M THOMPSON, (KAMIKANA)

HE LOIO A KOKUA MA KE KANAWAI

            Keena hana maluna o ka Hale Pohaku o Kamapela, (Campbell's Block,) Rumi helu 8 me 9.  Puka komo e huli pono la i ke Alanui Kalepa, Honolulu.

 

PAPA!  PAPA!

AIA MA KAHI O

LEWERS & COOKE,

(O LUI MA)

ma ke kahua kahiko ma alanui Papu a me Moi.

E loaa ai na

PAPA NOU AIKI.

o kela a me keia ano.

 

Na Pani Puka, Na Puka Aniani, Na Olepelepe, Na Pou, Na O-a, Na Papa Hele, Na Papu Ku, A me na Papa Moe nui loa

 

Na Pili o na Hale o na Ano a Pau.

 

Na Pepa Hoonani, Na Pena o na Wai e pau Na Kui mai ke Nui a ka Makalii, Na Ami Puka, Na Ami Puka Aniani, Na Ami o na ano a pau, Na Aila Pena, o kela me keia ano Na Aila Hoomaloo, he lehulehu wale, Na Aila e ae o na ano a pau.

 

NA WAI VANIKI

A ME NA

WAI HOOHINUHINU NANI!

O NA ANO A PAU LOA.

NA BALAKI ANO NUI WALE.

 

A ke hai ia aku nei ka lono i na Makamaka a pau, na makaukau keia mau Makamaka o oukou e hoolawa aku ma na mea a pau e pili ana ma ka lana oihana

 

NO KA

UKU HAAHAA LOA.

 

E like me ka mea e holo ana mawaena o

LAUA a me ka MEA KUAI.

 

E Hele mai! E lawe no hoi koo ka @ olu ame

 

Makamaka makemake @aikai.

 

NA HOOLAHA KUMAU

 

KAKELA & KUKE,

 

E laa na pahiolo, koi hole, hamale, koi nui a me liilii, kila, wili puaa, rula, apuapu, kui o na @ a pau, kala kaa, hao hoopaa pu@

 

pohaku hoana, kepa, lei @ @ la hao ilio, pahi, upa, pahi umiumi, kalapu, kope hulu, pulupulu oepa@ lakala, lina hao, ami, kee@, a me

 

KAULA OPU

 

Palau o na ano a pau.  Oo, ho, kopala, pe, @ kua, hao kope, au hoa a aku, kua bipi, lei bipi, kaula hao bipi, uwea pa, uwea keleawe, hao pa@ piula, kaa palala, ipuhao, @

 

PA-PALAI MAKAU ME KE AH@

 

Ili wai, papa holoi, kopa ala, kaula kuaina, hu'akai, ehi wawae, hulu pena, a pela aku.

 

Pena wali, kini nui a me liilii o na ano a pau, me ka pepa kuhikuhi, pena keokeo, aila pena, aila hoomaloo, vaniki kaa, a me vaniki moe.

 

PENA HOOMALOO

a me aniani hale

AILA MA@U, AILA MIKINI, AILA @, AILA KAA, INIKA KAMAA

 

PAUDA, KUKAE@LE, KIAN@ PAUDA, UIKI IPUKUKUIONA ANO HE NUI A LEHULEHU

 

LOLE MAKEPONO

 

E laa na

 

AHINAHINA, KALAKOA.  KEOKEO, LEPONALO, HULUHANU, UWE-WAHINE, KUI HUMUHUMU, A ME KA LOPI.

 

Ke Kuike o loaa no ia ma kuhi o

 

Kakela & Kuke!

 

NA MEA PIULA,

 

Mikini Humuhumu

 

Mokini a WHEELER a me WILSON

MIKINI A WILCOX ME GIBBS

NA MIKINI A

REMINGTON.

 

He nui loa na mea hao me na ukana e ae o na ano a pau, aole hiki ke hai pau ia aku, hewa i ka wai na maka ke ike.

 

Laau Lapaau Kaulana Loa

A DR. JAYNE,

LAAU HOOMAEMAE KOKO, LAAU HOOPAU NAIO, LAAU KUNU, PENIKILA, HUAALE, PAAKAI, LAAU HOOPAA HI, A

 

Me na Laau Hama a Pala 'ku.

 

Kakela me Kuke.