Ka Nupepa Kuokoa, Volume XXIV, Number 36, 5 September 1885 — Na Mea Hou o Kamoiliili. [ARTICLE]

Na Mea Hou o Kamoiliili.

Ke noho nei kamaaina o keia apana me ka maluhia i keia wa. Aohe ike nui ia ka ona, koe na aha piliwaiwai, aohe pau o ia hana ino. Aia ma kekahi hale ma Kapaakea kahi o ka piliwaiwai nui e hanaia nei i keia wa. Ua holo ko Kamoiliili kumu kula, o Apolo, i Hawaii no na pule hoomaha. Ua mahuahua na luawai aniani o keia apana ; o ka wai a ke Alii i eli ai e pili ana i ke alaloa, ua hoolimalimaia i kekahi hui mahiai o na Pake. Pomaikai o Kamoiliili i ka nui o ka wai. Ke ulu nui nei ka laiki, a ke hooke aku nei ka laiki i ke kalo, aole nae i nalowale loa ka ai kamaaina. O Keoula kekahi o na kamaaina ikaika i ka mahiai ma ia apana. Ua kaulana ka wai o keia apana i ka poe auau. Aia ilaila kamalii o Makiki a me Punahou e hele nei i ka auau. O ka ipu kekahi o na mea e kanu nui ia ma keia apana i keia wa, ka ipu haole a me ka ipu ala. He maikai no na ipu o Kamoiliili, aka aole e loaa aku ko Waianae a me ko Ewa. Ua hoolimalima nui no hoi kamaaina o keia wahi i ko lakou mau kuleana me na pake, I na makahiki i hala, ua kanu nui ia ka pineki ma keia apana, aka, i keia wa o ka laiki ka mea nui. Ma keia apana ka luawai kaulana o Kanewai, he wahi hoomaha ia no ke Aliiwahine Kamamalu i kona wa e ola ana. He apana nui keia o na kamalii. Pomaikai na makua a me na keiki o Kamoiliili.