Ka Nupepa Kuokoa, Volume XXXIII, Number 24, 16 June 1894 — Kula ka Waimaka Uwe ka Opua. [ARTICLE]

Kula ka Waimaka Uwe ka Opua.

E Mr. J. U. Kawainui, Esq. Lunahooponopono o ka Nupepa Kuokoa, ame ko Hawaii Pae Aina i Huiia; Aloha oe:— E oluolu oe a me kou mau keiki hoonoho hua medala o kou keena pai, e hookomo iho i na anoai o ka Panalaau Mai Lepera o Kalawao nei. Poakahi, lune 4, haalele aku makou i ka pa ohana o Damiano Home kahi a na lehulehu i hoopunana iho ai i na la i kaalo ae mahope, a e hiamoe nei i ka hiamoe kapu o Niolopua, a ua kuni paa ia no hoi ke aloha no ia home a ka ehaeha i noho ai i na la malihini a hiki i ke kamaaina ana, nolaila, kulu iho na waimaka no ka hoemanao i kahi i noho ai, a e nalo ana paha kona hea mau ia ana ma na leta a na makamaka ma keia mua aku, nolaila, e oili aku ana ka inoa hou o ka pa ohana ma na nupepa o keia mau la iho, Balauwina Home. O keia mau hale hou e ku nei me ko lakou mau hiohiona nani, a me ke kilakila maoli no, ka haleaina, hale kuke, hale kui ai, hale hoahu palena, kopaa, raiki, hale auau, hale hooluolu o na keiki, hale kauka, a me na hale moe, a me kahi paani o na kamalii, he nani ke kilohi aku ma o a maanei, me he kahua heihei la ke palahalaha, ka hale humuhumu o ka makuahine Marie Virgine ke hoonani ia nei na pa-pohaku aole no i pau ka hana ana a na kamana, ke hoomaemae nei no, a eia makou i na hale hou kahi i noho ai i keia mau la. Nui ka malie o Kalawao nei i keia mau la, panoa ke kula, maloo na mea kanu, kaulai na kahawai i ka la, he like me he la he wailiula no Mana, ka haale mai i ke kula o ua mea o ka malie maoli. Ke ano o ka noho ana o na mai, he maikai no ke i ola kino o kekahi poe, a he palahe no hoi kekahi, he ku i ka manaonao na hana a ka mai. HENRY KAAUWAI, Baluawina Home, Kalawao, Molokai, Iune 6, 1894.