Ka Nupepa Kuokoa, Volume XXXV, Number 25, 19 June 1896 — Kai Mimiki ma Kauai. [ARTICLE]

Kai Mimiki ma Kauai.

Ma ke ku ana mai o ka mokuahi Kimo Maki mai Kauai mai, ma ke kakahiaka Poalua nei, i loheia mai ai he ikaika loa ke kai mimiki i ikeia ma Kapaa ma ke kakahiaka Poakahi. Ma ka hora 7:30 o ke kakahiaka (Poakahi) ua ike ke kapena o ka mokuahi "Maki" i ka nee ana o ke kai ma ke ano mimiki, aole i liuliu iho, ua ike aku la oia i na waapa elua o ka moku i holo aku no uka o ka uwapo e nenee ana i ka pue-one. A o ka wa no ia a ke kai i paialewa ino ae ai i ka moku me ka pukalaki nui, a oni ana o "Maki" me he wahine haa la no Hopoe. Ua hoi pupuahulu mai na waapa me ka nui hoikaika a pili i ka moku, oiai ia e hula olapa ana. Hooikaika iho la ke kapena me kona poe kanaka e hemo mai ko lakou wahi i mouo ai. Ua hemo io no lakou, mahope iho o ka mokumoku ana o kekahi mau laina elua. O kahi a ka moku e ku ai, he 12 kapuai ka hohonu; aka, ma ka wa i mimiki ai ke kai ua hoonuu iho la ka iwikaele o ka moku i ke one ame ke ako'ako'a. Ua ikaika nohoi ke kai hoee ma ke awapae o Kilauea. Ma Nawiliwili hoi ua holo-a-ia ke kai iluna o ke alanui Aupuni. Ua olelo ae kekahi poe kahiko o Kauai, akahi no a ikeia kekahi kai mimiki keikikane elike me keia, a lele e wale ae la no ko lakou hauli, ma ka ninau ana, "E ke Kiai, Heaha ko ka po?"