Ka Nupepa Kuokoa, Volume XXXV, Number 36, 4 September 1896 — Ke Alahaoa Hoea i Kahuku. [ARTICLE]

Ke Alahaoa Hoea i Kahuku.

Ua lohe mai makou, aole e liuliu loa na la mai keia wa aku, a ikea no ka moe ana o ke alahao e hoomaka ana mai Waianae aku a hoea i ka mahiko o Kahuku, ma Koolauloa. He nuhou hoohauoli keia i loaa mai ia makou, a, aole wale no paha o makou kai komohia iloko o na manao olioli no keia lono, aka, o ko makou poe heluhelu no kekahi. Ua maopopo ia makou, ke mohala aku nēi ke alahele hookokoke i na kumuwaiwai o na apana aina pili kahakai, e hoomaka ana mai Waianae aku a hoea i Kahuku, a hoea i Honolulu nei, ke kikowaena o na makeke 0 ka mokupuni nei o Oahu. Ua ike mua makou i ke ko ana a ke au o ka manawa, iio ka hoea io ana mdi o keia hana holomua ma Oahu nei, a no ia mea 1 paipai nui aku ai makou i ko makou poe makamaka ame na hoaloha, mawaena o na oiwi ili-ulaula ponoi o ka aina, he mau apana aina ko lakou ma na wahi a keia alahao e moe aku ai, e paa i ko lakou mau apana aina, a e mahi hoi. Mamuli auanei o ka loaa ana o keia alahele maalahi, ma na apana aina i hookokoke mai ma kahi i moe aku ai, e hiki ai i na poe no lakou ia mau apana aina ke hooulu i na mea kanu, na pelehu, na wahi moomoo puaa, a pela aku, i mau kumu hoowaiwai, no ka, hoopiha ana mai i ka makeke o Honolulu nei. Mamuli o keia alahele hou, e hoomama ia ana na luhi nui o ko na kuaaina pii ana mai no Honolulu nei. E waihoia ana paha na lio e lakou, ma ka hapanui o ka manawa, ke pii mai lakou no ke kulanakauhale nei, oiai o ka hanai ana ame ka malama i na lioloholona ma Honolulu nei, he hana nui no ia e umeia aku ai he mau wahi kenikeni mahuahua., Ma ke kaa ahi hoi, aohe e lalama,, mai keia mau hooluhi ana i ke kanaka.

O ka makou leo paipai i na kanaka Hawaii e noho ana ma keia maii wahi, e makaala i ko oukou mau aina, e imi i na mea e ulu ai ka pomaikai. O ka oi aku, o ka poe Hawaii he mau aina ko lakou iloko o na mahi raiki a na Pake i keia wa i kokoke e pau ka manawa hoolimalima, e makaala loa e loaa ona uku hoolimalima maikai ma ia mua aku, a i ole, e komo kino maoli lakou iloko o ka mahi ana i ko lakou mau aina ponoi iho, ina he mea hiki ia. Kokoke loa e hoea mai ka wa e "Kokolo aweawe" aku ai ka uwahi o na "lio mahu" a Dilinihama, ko Hawaii nei kanaka kalaiaina holomua.