Ka Nupepa Kuokoa, Volume XXXV, Number 51, 18 December 1896 — Page 1

Ka Nupepa Kuokoa

KE KILOHANA POOKELA NO KA LAHUI HAWAII.

 

BUKE XXXV.        HELU 51.              HONOLULU.  POALIMA, DEKEMABA 18, 1896.  NA HELU APAU 2629

 

Hoolaha Loio.

-----

W. R. Kakela, Lo@ @ he Kokua ma ke Kanawai.  He luna hooiaio palapala.

@70

-----

Hoolaha Humau.

-----

Wilder & Co., (Waila Ma.

Mea Kuai Papa a me na Lako kukulu hale o na ano a pau, a me na mea e ae a pau e pono ai o ka hale.

Ka@ o Alanui Moiwahine me Papa.

896-@

-----

 

PAPA!   PAPA

Aia ma kahi o

 

Lewers & Cooke

(Lui ma)

Ma ke kahua hema o Alanui Papa me Moi.

E loaano na

 

Papa nouaiki

O kela a me keia ano.  Na Pani Puka, na Puka Aniani, na Olepelepe, na Pou, na O’a, na Papa Hele, na Papu Ku, me na Papa Moe he nui loa

Ny pili hale o na ano a pa@

A me na

Wai hoohinuhinu nani

O na ano a pau loa.

-----

 

Na Balaki o na Ano he Nui Wai.

Ke hai ia aku nei oukou e na makamaka a pau, ua makaukaau keia mau makamaka o oukou e

hoolawa aku ma na mea a pau ili ana ma ka laua oihana uo ka

 

Uku H’aahaa Loa.

I like me ka mea a holo ana ma@ o Laua a me ka Mea Kuai.

Hele Mai a Wae no Oukou ihe.

2396@

-----

 

He Moolelo Nani

No

 

Lubiana Kasimila,

Ka naita o ka

 

Liona Gula o Bohemia

A iole

 

Ka Hui Naita Eleele o ka Lima Ulaula.

 

Mokuna V

 

Ka moolelo o heneri – ka hoouka kaua – ke kulana kupilikii – ka olali o bohemia – ka Liona Gula.

-----

 

I ka hele ana a aui loa ka la, hoea aku la ka huakai i ke kumu o ka pali, a kamoe aku la lakou ma kekahi alanui akea.  Mahope koke iho o ko lakou hoea ana aku ma keia wahi a lakou e hele nei, ua huli hou ae la ka lutanela I hope a kamailio pu ae la me ke kiai hope.

 

Iaia no a huli ae, o ka wa ia I oili ae ai mamua pono aku o kahi a ka huakai e hele aku ana he puaa makanahele.  Ua ike aku la o Lubiana I ka oili ana ae o keia holoholona noho kuahiwi, a oiai he kanaka opio oia I paulehia loa ma na hana uhai holoholona, o kona wa no ia i hoouwila ia ae ai me ka manao e uhai aku oia mahope o ua holoholona la.

 

Ua ike aku la oia i ka holo ana ‘ku o ua puaa la ma kekahi ponaha ululaau a nalowale, a o kona wa no ia I hoeu ae ai i kona lio a holo aku la ma kahi a ka puaa ahiu i nalowale aku ai, me kona huli ole ana ae a kamailio aku i kona poe kanaka.  Aole ana ihe maluna o kona lio ma ia wa, aka. o kana mea kaua e paa ana ma ka makuu o ka noho he koi kaua no ia.  Aole hoi I liuliu kana holo ana aku me ka eleu nui o kona lio, ua ike aku la ia i ka holoholona ana i uhai aku ai e kuu pau ana i kona mama mamua aku ona. nolaila, ua haalele pau aku la oia i ka holo ana a kona lio, me kona nana ole ana ae i kahi e hele nei me ke aiwaiwa nui.  Aole nohoi oia i hoomaopopo iki i ka liohi o keia wa ana e alualu nei i ka holoholona ahiu o ka nahele.

 

Ke ike la nae ia me ka hauoli nui, he lio kona i heluia ma ka papa kiekie loa o na lio holo loa o Geremania. Me kona hookikina ole ana i ua lio la, aia no oia ke hanu la ma ka meheu o ka holoholona a kona haku i makemake ai e loaa.  Pela ka hoomau ana o ua lio nei i ka uhai a holo ana mahope o ua puaa la a hiki wale i kona hoea ana ma kekahi kula palahalaha.  Ma ia wahi ku iho la ia me ka hoike ana mai o kona hiohiona apau, ua loaa iaia ke kulana nawaliwali.  I keia wa hoi i ku iho ai ka lio o Lubiana, a o ka manawa ia o ua Naita Opio nei i ku ae ai, ma ka hookikoo ana i kona kino a pololei, ame ka molio pono ana hoi o na kaula huki o kona lima ame kona i’o uala, oniu ae la ia i kana koi kaua, ka mea ana i wehe ae ai mai ka makuu mai o ka noho, a hiu aku la ma kahi a ka puaa e ku ana.  He mea oiaio, ua lele aku la ua koi la a kapoo pono aku la kona maka ma ka poo o ua puaa la.  Aia hoi, ua ikeia aku la ke kunewa ana ae o ua holoholona ahiu nei o ka nahele a haule make aku la ia iluna o ka honua.

 

Alaila, lele iho la o Lubiana mai luna iho o kona lio, a hele aku la ia a ma kahi a ka puaa e oni ana, unuhi ae la ia i kana pahikaua a me ia me haawi aku la ia i ka ai hope loa e kaili ana i kona hanu.  Nana iho la ia me ka piha hoihoi launa ole , no ke ano a ka holoholona i iilo i pio nana ia wa.  A mahope iho o ka pau ana o kana makaikai ana, aia hoi, ua hoohuli ia ae la kona noonoo ana ma kekahi mea oko@ ae.  Oia hoi, ike iho la ia, o keia wahi ana e ku nei, he wahi ano ponaha laau ia i halii ia mai kona mau aoao apau e ke anoano, a i kona huli ana ae a nana i ka ponaha lani, ike ae la ia ua haalele mai ia ka ikaika o ka malamalama o ka la, aole nohoi hiki iaia ke hoomaopopo aia la ma ke kukulu hea mai kahi aku ana e ku ana i kapoo aku ai ka la.

 

Nolaila, hooholo iho ia oia, he mea pono iaia, ke haalele i ka waiwai ana i alualu mai ai, a e huli hoi oia i hope a huipu me kona poe kanaka, a i kekahi kakahiaka ae e kii mai ai oia iaia.  I ka holo pono loa ana a keia manao iaia, lalau iho la ia i kana koi kaua, a unuhi mai la holoi iho la i na kiheahea koko, a hoihoi aku la a hoopaa iho ia ma ka makuu o kona noho.  Ia wa kau hou, aku la oia maluna o ka hokua o kona lio a hoohuli ae ia i ua lio la ona I hope, ma ke alahele ana i hele mai ai.  Hele mai la oia ma ke alanui me ka nanea nui, oiai e mau ana no ka moali o ke alahele.  He wa loihi okoa keia o kona hele ana.  Aka, ua hoopuiwa loa ia kona noonoo i kona ike ana, ua ku honua iho la kona lio me ka maopopo ole iaia o ke kumu.  Eia nae, i kona hoomaopopo pono ana no ke kumu o ke ku honua ana o kona lio, ike iho la ia ua hoea aku laua i kahi i hihipea loa ai ka nahelehele.

 

Maanei ku iho la ua Naita Opio nei, ike iho la ia ua koikoi loa mai la ka uhi ana mai a na eheu o ka po.  Ike iho la ia ua lalau loa kana alanui i hele mai ai.  Ua lilo keia i mea nana e hoopioloke i kona noonoo.  Huli ae la ia ma o a maanei o kahi ana e ku ana ike aku la ia he wahi punawai uuku, nolaila, hele aku la ia a ma ia wahi lele iho la ilalo.  Ma laila haawi iho la oia I na hoomaha ana, inu wai iho la oia, a hoohainu iho la hoi i kona lio.  Aohe ana hana e ae, o kona hoaumoe wale no ma ia wahi, aia a ao ae, alaila, ike ia aku ka lala maloo me ka lala maka.  Nolaila, mahope iho o kona wehewehe ana ae i na pono apau o kona lio, ua haule aku la ia hiamoe maluna o kekahi punonohu lau laau.  Aole i liuliu mahope iho, aia hoi, ua haule aku la oia iloko o ka hiamoe kulipolipo.  A i keia wa a ua Naita nei e hiamoe ana, ua halawai aku la kona uhane me kekahi moeuhane kupaianaha a kamahao nohoi.

 

Ike iho la ia, ua auwana hele kona uhane iloko o kekahi ululaau, a ua hoao oia e puka mai loko aku o ua ululaau nei, aole nae hiki iaia.  Ike iho la ia e ku ana ia iwaenakonu o kekahi ponaha laau uuku.  Aia na laau hihipea ke ku poai la a puni ia.  Iaia hoi e ku ana me ka noonoo pihoihoi, ia wa i hoohikileleia ae ai kona uhane i kona ike ana ‘ku i kekahi malamalama nani loa e poha mai ana ma kahi ana e ku ana, a ma ia wa hookahi no ike ku la ia i ka oili ana mai o kekahi kino wahine mailoko mai o ke kukuna malamalama ana e ike aku ana, ua aahuia oia me kekahi kapa dala.  Ku mai la oia imua ona me kona nani nui, a he nani hoi ia i ike mua ole ia e ia.  He kohu aneia maoli ke ano o kana ike ana aku i ua ui nei.  Haawi mai la oia i na mino aka ana iaia, a me ka leo oluolu nanahe kauoha mai lo oia e hahai aku iaia, oiai nohoi kona lima i peahi mai ai iaia.  I kona uhane hoi i anehe ae ai e ku ae iluna a hahai aku i ka ui hoopahaohao o ka aina moeuhane, ua puoho loa ae la ia, a hoea loa ana i ke ao malamalama.

 

I kona kuakuai ana ae i kona mau maka a nana ae la, ike iho la ia ua ao io no.  Ike e la ia, aia oia malalo pono o kekahi paia kuahiwi.  Nolaila, ku ae la ia a hele aku la a ma kahipunawai holoi iho la ia i kona mau maka, inu wahi wai iho la.  Imi aku la hoi oia iloko o kona mau paiki ili, loaa iho la iaia he mau wahi popo berena ame kekahi mau wahi apana io pipi, nolaila, paina iho la ia i kona aina kakahiaka.  I ka pau ana o kana ai ana, ua hana iho la oia a paa ka noho ame ke kaulawaha o kona lio.  Kau ae la ia maluna o ka hokua o kona lio a hele huli aku la ia i ke alanui i nalowale ai iaia. 

 

A hala kekahi wa, hoea aku la ia i kekahi wahi moali alanui ana i manao ai oia ke alahele pololei e puka ai oia mai loko aku o ia wahi.  Maanei noke ae la ia i ke o i mea e lohe mai ai kona poe kanaka, aole nae he wahi mea a pane ia mai.  Alaila, hoomau aku la no ia i ka hele ana.  Hookahi hora okoa paha i hala iaia i ka hele ana hoea aku la ia i kekahi ponaha laau, a maanei oia i ike ae ai i ke kau olino iho o ka la ma ka poiuiui o ka lani.  Ike ae la ia, aia ka ia iluna lilo.  O ka mea kupanaha nae, ua ikeia aia ka la ke ku mai la mahope ona, me he mea la ma kana hoomaopopo iho, ua puka mai ka la ma ke komohana.  O ka mea oiaio nae, ua hu-hewa loa kana wahi e hele nei i keia wa.  Iaia nae i manao ai e hoohuli hope ae i kona lio, ia wa oia i hoopuiwaia ae ai i kona lohe ana aku i kekahi leo uwe kapalili, a o ua leo la no kekahi wahine no ia.

(Aole i pau.)

-----

 

Octave Chanute And His Air Ship

 

                Professor Chanute, ex-president of the American Society of Engineers, has been actually flying recently near Dune Park, in Indiana, in a flying machine of his own make.  Some of the flights were 300 to 400 feet in length.

 

                Ke hoike nei keia mau kii maluna ae nei, i ke ano o ke kanaka nana i huli mai nei i kekahi moku lele poai lewa, a pela pu hoi me ke ano o ua moku lele kamahao nei.  O Prof. Chanute ka inoa o keia kanaka, a he Peresidena mua ia no ka Hui Amerika o na Eneginia.  Ua lele io na keia kanaka iloko o ka lewa i keia wa kokoke mai nei ma Dune Park, ma Inidiana.  Ua lele oia he 300 a 400 kapuai ke kiekie iloko o ka lewa.  He nui ka naauao o na poe noeau e hoohanaia mai nei i keia wa.

 

-----

KE PALE ANA I KA MA’I NUMONIA

 

                Ma kela manawa o ka makahiki, e loaa hikiwawe ai i ke anu, a ina e waiho wale ia ana me ka loaa ole o kekahi laau kunu maikai e pau ai kela anu@ alaila, e lilo aku ana ia i ma’i Numonia.  Aole a makou laau maikai e ae i ike ai no ka hoola ana i ke kunu ame ke anu, elike me ka LAAU KUNU A KAMALENA.  Ua hoohana pinepine loa ia e makou keia laau, a ua ikea kona holopono. – Olagah.  Ind., Ter. Chief.

 

                O keia wale no ka laau lapau ikeia ka hololea no ke kinai ana i ka mai Numonia.  Mawaena o na tausani poe i inu i keia laau no ke anu ame ka ma’i la grippe, aole makou i ike iki ua loohia kahi oia poe i ka mai Numonia.  He mea pono I ka poe nawaliwali o na paahana ana a na ake-mama, a ehopohopo ana paha o loaa i ka mai Numonia, alaila, e pono lakou e malama i keia laau.  He 25 a 50 keneta ke kumukuai o na omole.  E kuaiia ana e na poe kawili laau lapaau apau, ame na poe kuai laau; Benson, Smith & Co., na Agena o ko Hawaii Pao Aina.

-----

 

 

Kuhina Foster ame ka Ninau Hoohui Aupuni.

 

Ka Wanana Moewaa A Komisina Bount.

 

Aole he Aupuni Moi hou ma Hawaii.

 

                Ma ka wa i hoea aku ai o Kuhina Foster o Amerika (mamua) i Kapalakiko, ma ka la 24 o Novemaba, ua halawai oia me ka mea kakau o ka nupepa Call, a hoike aku la oia imua o ua mea kakau nupepa la no ka mea e pili ana i ka Hoohui Aupuni e manaoia nei mawaena o Hawaii nei me Amerika Huiia, a pela pu hoi me kona manao ponoi iho no ke Aupuni Repubalika o Hawaii nei, ame ka wanana moewaa a Komisina Blount.

 

                “O ke Aupuni e ku nei i keia wa, i kakoo ole ia nae e kekahi poe Hawaii lehulehu ame kekahi poe haole kalepa, ua manaoia oia ke kulana hooponopono Aupuni maikai loa i ikeia ma ia Pae Aina, a ma ka hoomaopopo aku, ua oni paa maoli kela Aupuni.  Eia nae, ua wanana ae o Komisina Blount iloko o 1893, e kahuli ana ua Aupun la iloko o hookahi makahiki, eia nae, ke hele nei ia i ka manawa hope o ka eha o na makahiki o kona ku ana, malalo hoi o na hiohiona holomua loa.  O kona kahua hana, a o kona Kumukanawai nohoi e hoohanaia nei ia, ua kukala hoonalonalo ole ae ia no ke kahua Hoohui Aupuni me Amerika Huiia, a me ke kanalua ole e onou hou mai ana no ia i ua kumuhana la imua o ke Au hooponopono Aupuni e noho mai ana ma Wasinetona ae nei. 

 

                “Oiai nae, he like ole loa na manao o na kanaka ma ua Pae Aina la no ka mea e pili ana i ka Hoohui Aupuni, aia nae he manao laulaha mawaena o lakou, he mea pono i ke Aupuni o Amerika Huiia ke haawi aku i haina maopopo no ka mea e pili ana ia kumuhana.  O keia kulana maopopo ole o keia mua aku, oia ke kumu i hookulanalanaia ai ka holomua o na oihana imi-waiwai, a hooulu pu ae nohoi i na manao pihoihoi mawaena o lakou.  Ua hookaokao loa ka Moiwahine (i pau) iaia iho, a he kakaikahi loa ka poe mawaena o na poe kahiko i kakoo iaia, i manaoio iki e ike hou ana lakou i kona ho’iho’I hou ia ana aku maluna o ka nohoalii.  Ina e hoohui ole ia ua mau mokupuni la ia Amerika Huiia, ua manaoio loa ia e haulehia aku ana lakou iloko o ka mana hoomalu o kekahi mana Aupuni okoa aku.  Mamuli o na manao kuee i hoouluia mai e na hana o na makahiki kakaikahi i kaa hope ae nei, oia ke kumu e hiki ole ai i kekahi aoao (kalaiaina) ke hookele holo lea I kulana Aupuni Kuokoa, a mamuli hoi o ka ulu nui ana o na ninau kalaiaina ame na oihana kalepa maloko o ka moana Pakipika, ma o na hana la a ko ke ao holookoa e hoonee nei malaila, he mau mea ia e hooulu koke mai ana i na hana e hoohihiaia ai ia mau mokupuni me kekahi mana Aupuni a mau mana Aupuni paha, e paahana nei ma ia hapa o ka poepoe honua nei.” 

 

                Penei hoi ka hoike a kekahi lono mai Kikako mai:

               

                Kikako, Ill., Nov. 29. – Ma nehinei i hoea mai ai o John W. Foster, Kuhina (i pau) ame Mrs. Foster i Kikako nei, ma ko laua alahele huli hoi i Wasinetona mai Honolulu mai.  Elua pule a oi ae ko laua noho ana ma Hawaii, a ma ko Mr. Foster hoomaopopo ana ma na mea ana i ike ai malaila, ua hooiaio loa mai ia i ka manaoio i hapai ai oia, oiai kona wa e noho Kuhina Nui ana no ka Aha Kuhina o Peresidena Harisona, o ka hoohui ana mai a Amerika la Hawaii oia ka hana a keia Aupuni.

 

                “Ke kali mai la ke Aupuni o Hawaii i keia wa, o ka honohoia ae o Peresidena McKinley, alaila, hooikaika hou mai lakou no ka hoohuiia ana mai o ia mau mokupuni,” wahi a Mr. Foster.  “Aia maloko o ke Kumukanawai, e noho nei ko laila poe kanaka i keia wa, he pauku kekahi no ka hoohui Aupuni, a oia kekahi mea nui a lakou e hooikaika ai.”

 

                “Aole he wa e ae i ikeia ai ka holomua o na hana elike me ko keia wa.  Ke holomua la lakou ma ke ano ‘oihana kalepa; oiai o ke oo ko hope mai nei, he oo ko mahuahua maoli ia, a o ke kulana hooponopuo Aupuni malalo o Peresidena Dole, oia ka oi aku o na au hooponopono Aupuni i loaa i na kanaka.

 

                “Ua hoomaopopoia, o ka hopena maopopo loa o kela mau mokupuni, ke hoohui ole ia mai lakou e Amerika Huiia, oia ko lakou hoohuiia ana aku e kekahi mana Aupuni e aku.  He hiki ole loa no kela poe e noho la ma ia mau mokupuni ke hoomalu ia lakou iho me ka holo lea no kekahi wa loihi, mamuli o ke kuee mawaena o kekahi mau poai, ka poe Repubalika ame ka poe Roialiti, ame na kanaka maoli ame na haole.  Hookahi mea maopopo loa, a oia keia, aole loa ka Moiwahine e noho Aupuni hou, a-i-ole-ia, aole no e hoihoi hou ia aku ke Aupuni Moi.  Nolaila, aia ma ko Amerika Huiia aoao ka hana I koe, oia hoi, o ka hana aku me ka hookaulua ole, a i ole pela, alaila e lawe ana kekahi lahui e ae i ko Hawaii Pae Aina.”

----

                 

Liliuokalani ma ke Alahele Paonioni.

 

                Ua loaa mai nei ka lono lauahea ia nei maluna mai o ka mokuahi “Alameda” o ka Poaha nei, Dek. 17, I holo aku nei o Liliuokalani i Wasinetona no ka hoao ana e hoopuhili i ka holo pono ana o ke Kumuhana Hoohui Aupuni.

 

-----

 

Ka Hui Mahiko o Oahu.

 

                Ua lilo i mea “io,” ka Hui Mahiko o Oahu nei i kamailio nui ia i kahi wa i hala ae nei.  Me he mea la, mai ka wa mua loa i hookauhuaia ai ka noonoo iloko o kekahi poe kalai a hooulu waiwai io o loko nei o ka aina no ka hapai ana i keia hana a hoea mai nei i ka hoohonua maoli ia ana o keia hana a lilo i mea “io” maoli, ua hala no he mau makahiki.  Ma ka auina la o ka Poakahi nei, Dek. 14, ua puka-a-maka loa ae la ka mu’o ame ka liko o ua hana la.

 

                O ka Hui o Hakapila, oia ana ka Agena o keia hana hooulu waiwai hou o ka aina.  Oia hui nohoi

kekahi mea kuleana nui iloko o keia mahiko.  Ua manaoia, e hoomaka ana keia hui hou, me ke kumuwaiwai o $1,800,000.  Ua pau i keia wa i ka laweia e ko loko ponoi iho nei poe waiwai ka hapalua o keia mau dala, a me he mea la, aole no e liuliu a pau ke koena i koe i ka apoia ae e na poe mea dala nui i koe o loko nei o ka aina.

 

                Mamuli o ke ku io ana ‘ku o keia hui mahiko hou, e hike ai ke manaoio loa ia, aole e liuliu a hoea ke alahao o Oahu nei i Kahuku elike no me ka makou i hoomahui mua aku ai.

 

                E hoomanaoia hoi o Mr. Dilinihama no ka luaui o keia hana hooulu waiwai.

 

-----

 

                Ua hoike ae nei ka Ilamuki i kona makemake loa e hoopau loa na poe holo kaa hehihehi wawae i ko lakou holo ana ma na alanui hele aoao o loko nei o ke kulanakauhale.  E kauohaia ana na maka’i ma keia mua aku e hopu i ka poe apau e hookuli ana i keia kauoha.

 

                O ka la apopo.  Dek. 19, oia ka ia hoomanao o ke Lii Pauahi, ma na Kula Kamehameha.  E malamaia ana na hana lealea ma ka hora 2:30 o ka auwina la o ka la apopo, a he anaiena himeni ma ka po iho, hora 7:30, na @a haumana o na Kula elua, maloko o ka hale hooikaika kino.

 

                He mea pono i kela ame keia ohana ke loaa ona laau lapaau mama no na ma’i o ka opu.  I laau lapaau puhili ole no ka “Moku ino loa o ka iepo” (Diarhea) Nahu, Umil, Kolera ame na ma’i apau o ka opu, aole he laau lapaau oi aku o ka maikai elike me ka PERRY DAVIS LAAU PENIKILA (Pain Killer).  Ua lawelawela keia laau no na makahiki he kanalima, a ke hana mau ia nei i kela ame keia la, ma na aina apau o ka honua nei.  O ka Hui Kuai Laau Lapaau o Hollister, ka Agena.