Ka Nupepa Kuokoa, Volume XXXVI, Number 51, 17 December 1897 — He Hookipa maikai. [ARTICLE]

He Hookipa maikai.

Nui no na hookipa a na kamaaina o Lahaina nei. Piha pono ka home noho o Lunakanawai Kahaulelio. Aia malaila o Lunakanawai Kaapuni J. W. Kalua kahi i noho ai me ka hookipa oluolu a pumehana i kana mau malihini, ka Loio Kuhina, ka Hope Loio Kuhina., Kakauolelo o ka Aha Thompson, ame ka mahele-olelo Kahikina Kelekona ame kekahi mau kiure. Ilaila no i noho iho nei ka Lunamakaainana S. Kaai o Hana, a i ka po nei ka hoi ana maluna o Kalaudine. Malie keia mau la a mahuahua no na i'a o ke kai i amu ia. E malama ia ana he aha mele nui inaloko o Halealoha i keia po Poaono iho, e na manu o Lahainaluna no ka pomaikai o kekahi mau hana kuloko i ku i ka pono. He wahi kanaka uiiku wale no kela i hopu ia no ka pepehi-kanaka o Wailuku, he wahi kamaaina no no Honolulu mamua. I ka pule au i ke Sabati nei, a ua loaa ia'u he pomaikai i ka lohe ana i na mea apau i kamailio ia a i mele ia malaila. Oia mau no o Rev. A. Pali, aole i loli ae.