Ka Nupepa Kuokoa, Volume XXXVII, Number 6, 11 February 1898 — Ka Ahaolelo ame ka Aha Kuluna. [ARTICLE]

Ka Ahaolelo ame ka Aha Kuluna.

Ma keia Poakolu ae e noho mai ai ka Ahaolelo o ke Aupuni, elike me ke kuhikuhi ana a ke Kumukanawai. Ua ike a ua hoomaopopo hoi makou, he Ahaolelo keia i manaoia e halawai pu ana ia me na hana e pili ana i ka hooponopono hou ana i ko kakou Aie Aupuni, ke hooholoia ke Kuikahi Hoohui Aupuni, mamua o ka noho ana mai o ua Aha la. Oiai, o ka Aie Aupuni o Hawaii nei, oia kekahi mea ano nui iloko o ke kuikahi. Aka, a hoea mai i keia wa a makou e puka aku nei, aole loa i loaa iki mai ka lono e hooia ana ua hooholoia ke Kuikahi Hoohui Aupuni e ka Aha Senate o Amerika Huiia; a nolaila, ke ku nei keia kumuhana e pili ana i ko kakou Aie Aupunl i mea e hookunana mai i ka noonoo o ka Aha Kuhina no ke ano e hana aku ai imua o ka Ahaolelo. Aka, o ka Aha Kuhina no nae ka mea i maopopo ia hana. Ua lohe wale ia mai, aia ka Aha Kuhina, ma ke kulana mahae-lua, ma ka mea e pili ana i ke ano o ke lawelaweia ana aku o na hana Aupuni, ke hoopanee hou ia aku ka noonooia ana 0 ke Kuikahi Hoohui Aupuni a no kekahi wa hou aku. Ua manao kekahi mau hoa elua o ka Aha Kuhina, he mea pono ke pokepokeia na uku o na luna Aupuni i kaupalena ole ia ka hoemiia ana ma ke Ka.nawai, a hoea 1 ke ana haahaa kupono e lawa pono iloko o na loaa o ke Aupuni; e hoopau ana hoi i kekahi mau luna Aupuni, a e hoopanee ana hoi i ka hana hou o loko nei o ka aina, a hiki i ka wa e holo ai ka hoohui Aupuni. O ka manao hoi o kekahi mau hoa 0 ka Aha Kuhina, oia no ka hoomau ana 'ku i na hana kuloko o ka aina— ka hoomaemae ana i na alanui, ame na hana e ae, mamuli o ka hoaie dala hou ana no. No makou iho, ua ikeia ka waiwai nui o na dala i hooliloia e ke Aupuni iho nei no ka hana ana i na alanui mai Hawaii a Kauai. Aia no he lehulehu loa o na hana hou i koe aole 1 hanaia e ke Aupuni, oiai nae he mau hana no ia no ka pomaikai o ka lehulehu. He lehulehu loa no na Aupuni o ke ao nei e ola nei i keia la, maluna o ko lakou Aie Aupuni; aka, manao nae makou, aole he mea pono ia Hawaii ke hookaumaha hou iaia iho me ona Aie Aupuni hou i mea e lilo ai ia i kumu hookanalua nui no ka holopono ana o ka "Hoohui Aina" e upuia nei i keia wa.