Ka Nupepa Kuokoa, Volume XXXVII, Number 18, 6 May 1898 — Page 1

Ka Nupepa Kuokoa

KE KILOHANA POOKELA NO KA LAHUI HAWAII.

BUKE XXXVII.   HELU  IS.   HONOLULU. POALIMA, MEI 6, 1898   NA HELU APAU 2701

 

Hoolaha Loio.

W. R. KAKELA.

Loio a he Kokua ma ke Kanawai

HELUNA HOOIAIO PALAAPUA.

2270

 

LYLE A. DICKEY.

Loio a he Kokua ma ke Kanawai.

Alanui Kaahumanu. Helu 14.  Tel. 682.

   Iloko o ke Keena o ka Lolo Kuhina mamua, a he Loio Hoopii ma ka Aha Apana o Honolulu.

   E hookoia na hana pili kanawai apau mai na Mokupuni mai.

   O A.F. Tavares, Kakauolelo, Maheleolelo a Notere no ka Lehulehu.  1 yr.

 

Hoolaha Kumau.

 

Papa! Papa!

Aia ma kahi o

LEWERS & COOKE

(Lui Ma.)

Ma ke Kahua Hema o na Alanui Papu me Moi.

 

E LOAA NO NA

PapaNouaiki

O keia a me keia ano.

 

Na Pani Puka

Na Puka Aniani

Na Olepelepe

Na Pou

Na O’a

Na Papa Hele

Na Papa Ku

Na Papa Moe

 

Na Pili Hale

O na Ano apau.

A me na

Wai Hoohinuhinu Nani

O Na Ano Apau.

 

Na Palaki o na Ano he Nei Wale.

   Ke haiia aku nei oukou e na makamaka a pau, ua makaukau keia mau makamaka o oukou e hoolawa aku ma na mea a pau e pili ana ma ka laua Oihana no ka

Uku Haahaa Loa

@ like me ka mea e holo ana ma@

@ a @ ka Mea K@

E K@

 

   O ka olelo a na nupepa, na kekahi kanaka o Ohio kekahi mau keiki maikai he ehiku ko lakou nui i kekahi wa loihi i hala ae nei. Mailoko mai o keia mau keiki ehiku, hookahi wale no i make aku.  Ua manaolanaia, ua hoahu oia i ka lako Laau Kunu a Kamalena, ka laau e oia io ai ke kunu ho, kunu kalea, anu ame na kunu e ae, a oia ke kumu o ka pakele ana o na keiki ana eono.  E kuaiia ana e na poe kawili laau laapaau apau ame ka poe kuai laau lapaau.  O Benson, Smith & Co., na Agena ma ko Hawaii Pae Aina.

   E nana ae i ka hoolaha no na leta e waiho nei maloko o ka Hale Leta, ma ko makou pepa o keia la.

 

KA MEA HUNA POHI. H.

Unuhiia e Hooul@mahiehie no “K@ K@haua Poo kela o ka Lahui Hawaii”

 

MOKUNA XXXVII.

He Hauoli Nui.

   A olelo mai la nohoi oia:  “O ko’u manao, aole hiki ia oukou ke haalele iho ia anei i keia wa.  O ka wa maikai e hele aku ai oukou nolaila, oia ka auina la. Ua ike au, ua maloeloe ko olua mau lio i hele mai nei.  A o oe nohoi e Miss Tereveliana, he nanaina maikai ole kou.  He mea pono ia oe ke hiamoe a loaa ona wahi hooluolu ana, a loaa hoi ia oe he ikaika maikai.”

   Ua ae aku ia o Alamira i keia manao maikai o Pegi; nolaila, ua ku ae la oia iluna, me ka hii ana ae nohoi i kona wahi pokii kaikunane, a hele aku la mahope o Pegi iaia i komo aku ai iloko o ka rumi a Jose i puka mai ai.

  He maemae hoi na mea apau o loko o keia wahi rumi.  He mau pale paku keokeo maikai ke uhi ana ma ka puka aniani; he halii onionio maikai ke uhi ana i ka papahele,he moe maikai i haliiia iho me ke kihei maemae.

   I keia wa i huli mai ai o Pegi a kamailio mai la ia Alamira:

   “E kala mai oe ia’u no keia wahi a’u e haawi aku nei ia oe i wahi nou e hooluolu iho ai.  A e hoomanao hoi oe, he hoaloha a makamaka oiaio au nou ame kou pokii kaikunane.  I na i maopopo mua ia’u ko olua mau makua, i na la ua hoouna mua aku i kalohe ia laua, koe wale no nae hoi keia, aole i maopopo ia’u ko laua wahi noho.  Aole loa au e ae, e lilo au i mea kokua hewa mahope o kekahi kanaka lapuwale a puuwai lokoino hoi, like me ka Haku Adelo.”

   “Ke manaoio nei au i kau mau olelo, e Pegi,” wahi a Alamira i pane aku ai ia Pegi, me ka mohala maikai ana’ku o kona mau helehelena, me ka hoomau ana’ku hoi, “Ke haawi aku nei au ia oe i ko’u mau hoomaikai ana no kou mau manao maikai apau, a pela nohoi me kau mau hana maikai, a e haawi mai ana no ko maua Papa ia oe i kana mau hoomaikai ana.”

   I keia wa i puka aku ai o Pegi iwaho, me ka haalele ana iho i ke kaikuahine ame ke kaikunane o laua wale no.

   Ua hoike mai la hoi o Jose i na mea apau e pili ana iaia iho i kona kaikuahine, e hoomaka ana mai ka wa mai o kona aihueia ana mai ko lakou home mai, kona laweia ana i ke kulanakauhale e ka Haku Adelo, ame kona lawe loa ia ana mai ilaila e kekahi kanaka malihini loa iaia.

   Ua hoike aku nohoi o Alamira imua o kona wahi pokii kaikunane i na mea ana i ike ai he kupono ke hai aku iaia.

   Alaila, puliki mai la o Alamira iaia me ka olelo ana aku:

   “E Jose, ua luhi loa ia o kuahine, a me mea pono ke loaa ona hooluolu ana iaia.  Nolaila, my darling, e hiamoe ana au.”

   Aole i liuliu, ua hiamoe iho la ua lede opio nei, a, aia hoi ma kona helehelena, ka hoike ana a ka uhane hauoli ame ka oluolu.

   I ka hele ana hoi a aui ka la, ua ala ae la o Alamire, a e noho ana no kona wahi pokii kaikunane ma kona aoao.

   I ka ike ana iho o Jose ua ala ae kona kaikuahine, pane iho la ia:

   “Dear Sister, when are we going home?”  (E kuahine aloa, a hea la haua hoi aku i ka hale?)

   “Ua hai aku nei au ia oe, aole o Papa ame Mirande i ka hale i keia wa; a o Mama hoi, aia oia i Ladana.  Aole hiki ia kaua ke hele koke aku i Ladana i keia wa,” wahi a Alamira i pane aku ai i kona pokii kaikunane.

   “Alaila, e hoi ana ka paha au i kou home hou e hele aku ai?”, wahi hou nohoi a Jose i ninau mai ai.

   “Aole o’u home e hele aku ai kaua, e kuu pokii aloha.  Aka, e lawe aku ana au ia oe mai keia wahi aku; a o kahi a kaua e hele aku ai, aole au i ike.”

   Alaila, ala ae la o Alamira ahoomakaukau iho la iaia iho.  I ka pau ana, lalau iho la ia i ka lima o Jose a komo aku la laua no ka rumi aina.

   Ia laua i komo aku ai, nana aku la laua maluna o ke pakaukau, aia hoi, e...

 

Lono Hope Loa no ke Kaua!

   Hoomaka ke kana.

   Ua hopupioia e Amerika he elua moku kalepa Sepania.

   Ua hopupioia e Sepania ka moku kalepa Amerika Shenandoah.

   Ua kukala ae o Peresidena Makinile e panikuia na @awa apau o Cuiba.

   O na mokukaua o Amerika e paniku la ia Cuba malalo o Ria-Adimarala Sampson, ke manao la lakou e kipoka aku maluna o na mokukaua o Sepania.

   Ke hoopuipui la o Blanco i na awa apau no ka manao o lele aku na koa Amerika.

   Ua kaheaia he hookahi tausani koa e ka Peresidena no ka nee koke ana aku no Cuba.

   Ma ka la 22 o Aperila i poha mua loa ai ka poka o ke kukala kaua a lilopio mai la ka moku Buena Ventura.

   Aperila 23. – Ua alualuia aku e ka mokukaua Nu Ioka he mokukaua Sepania a ua kipokaia a hiki i ko lakou haawipio ana mai.

 

...ku-ku-ku mai ana ka mahu o na mea ai.  E waiho ana ma ke pakaukau he elua mau pa me na lako apau no ka ai ana.  A homaopopo iho la o Alamira, nona ame kona wahi kaikunane wale no keia mau mea i hoomakaukauia.

   Ike aku la o Alamira e kamailio ana o Pumetona ame Pegi, a me he mea la ma kana hoomaopopo aku, ua pau muapaha ka laua ai ana.

   I ko laua nei komo ana aku hoi, ua ku ae la o Pumetona ame Pegi.  Pane mai la hoi o Pegi:

   “O ka hora ekahi no keia,” oiai hoi ia i huli ae ai a nana aku i ka uwati, a hoomau hou mai la i ke kamailio ana, “Ua makaukau no nae na lio o olua, no ko olua hele ana aku, ke manao olua e hele aku i Dalton i keia la.  He wahi keiki malama hipa ka’u, a nana no e alakai aku ia olua a hoea i Dalton.  Aka, e pono olua e ai i ko olua aina awakea, oiai ua pau mua iho nei ka maua ai ana me Mrs. Pumetona nei.” 

   Mahope iho o ka pau ana a ka Alamira ma ai ana, ua hoomakaukau iho la lakou no ka huakai hele i Dalton.  I keia wa i pane mai ai o Pegi:

   “E ukali aku ana au ia olua a hiki i ko’u wahi e hoi mai ai, a o kahi keiki ke hele pu aku me olua a hoea i Dalton.  He mau kamaaina nohoi ko’u oia wahi.  Eia nae, he wahi hale ko laua i kupono ole i ka mea nona ke kulana elike me kou e Miss Tereveliana, aka, ua lawa no nae ia wahi nou ame kou kaikunane nei e noho ai a loaa ka wa pono e kii mai ai ko olua makuahine ia olua.”

   I kela wa, ua lawe mai la kahi keiki kahuhipa i na lio o Alamira ame Mrs. Pumetona, ame elua mau wahi lio hou.

   Aole nohoi i liuliu, ua kau ae la o Alamira maluna o kona lio, pela nohoi o Pumetona, a o Pegi ame kahi keiki kahuhipa maluna o ko laua mau lio, a o ko lakou haalele aku la no ia i ka hale, no Dalton ke alahele.

   Oiai lakou e hele ana a iho i na haalu a pii a kau iluna o kekahi puu, a iho aku la nohoi ma ia puu a hoea i kekahi kahawai, me ka hele hookikee ana i o a ia nei, elike me ka mea maa mau ma na aina pali a awawa, ala o Pegi ke kamailio la, me ke kuhikuhi ana hoi o kona mau lima i na hipa e maau hele ana ma na puu, ma ke ano nana wale no ia mau holoholona.

   I keia wa i ninau aku ai o Pumetona iaia:

   “Nokeaha nohoi e kuai ole nei oe i keia aina hanai holoholona ou, a loaa mai kekahi puu dala nui ia oe, alaila, hoi oe i Ladana e noho ai me ka oluolu, he ai wale no, aole hoi he hana?”

   “O ko’u manao no ia, aka, aole nae i keia wa.  Aia ko’u kuai aku i keia wahi a hiki i ko’u ike ana i ko George hopena, ia hoi o Negewina.  Malia hoi, e ho’i mai ana no ia mai Australia mai, ke ike oia i ka pilikia o kona noho ana malaila, inanae hoi eia oia ke ola nei i keia wa.”

   “Alaila, manao no anei oe o kau kane ia e mare aku ai ke hoi hou mai oia i Enelani nai?” i ninau aku ai o Pumetona.

   “Nokeaha hoi auanei ko’u mea e mare ole ai iaia?  Manao au, aole oia i poina ia’u; aole nohoi i pau kona aloha no’u nei,” wahi a Pegi i pane mai ai.

   I kela wa i hooho ae ai o Jose, me ke kuhikuhi ana o kona lima imua:

   “Ea, e kuahine, heaha la hoi kela mea eleele e puu mai la mamua pono o kakou?” 
   Nana aku la hoi o Alamira ma kahi a kona wahi pokii kaikunane e kuhikuhi ana, a ike io aku la ia i kekahi mea ano elele e ahua mai ana mamua aku o lakou, aole nae hiki iaia ke hoomaopopo i kona ano.  Huli ae la ia a kamailio aku la ia Pegi ame Pumetona no ua mea elele la.

   Ia wa i nana pono aku ai o Pegi me ka ho-umalu ana iho hoi o kona mau lima maluna o kona mau maka, oiai e nopu hulili ana ka wela a ka la ia wa iluna o ke kula mauu maloo.  A liuliu pane mai la ia:

   “He lio kela ua hina ilalo, a me he mea la he kanaka kekahi ua paa malalo ona.”

   O ko lakou wa ia i hoeu ae ai i ko lakou mau lio e holo aku ai no kahi a lakou i ike aku ai i ka mea elele.  Ua hoea e aku la o Alamira me kona pokii kaikunane no laila, a ike iho la ia me ka manaonao he kanaka ua hina pu me kona lio, a ua paa oia malao o ka opu o ka lio, a ua make hoi ka lio.

   O keia wahi, oia no kekahi o na lua meki weliweli o ia mau kaiaulu.  A me he mea la, mamuli o kona lele ana maluna ae o ua lumemi nei, ua hapa pu kona ikika, nolaila ua ha’i kekahi wawae ona, a ua loaa hoi kekahi poino nui i kekahi mau mea paahana o loko ona, ua lilo iho la ia i heana poino na ka make.

   Ua huli iho ke alo o ke kanaka poino ilalo, a ua la-au hoi kona mau lima ma ka nana aku.

   Lele iho la hoi o Alamira ilalo, me ka hapai ana ae i kona kaikunane a hookuu iho la ilalo, alaila, hele koke aku la ia ma kahi a ke kanaka poino e moe ana, a lalau iho la ia i ka pulima akau o ua kanaka la, alaila, haha aku la ia i kona aoao hema, ma kahi e pili ana i kona puuwai, alaila, hooho ae la ia:

   “Aole i lele loa ka hanu o keia kanaka poino. Eia nae ua pau kona ike.  Ina hiki ia kakou ke hapai ai i ke kino o kona lio e kau nei maluna ona, o kona kaawale no ia mai ke kaumaha mai a nei kino ala ole e kau nei maluna ona.  Poor felloow!”

   Ma ia wa nohoi i hoea mai ai o Pegi ame Pumetona ame kahi keiki kahuhipa.

   Mamuli o ka Pegi mau alakai ana, ua kaa ae la iaia ame kahi keiki kahuhipa ana ke kaikai ana i ka lio make, a o Alamira ame Pumetona ma ka huki ana i ke kanaka poino a kaawaie mai kahi a ka lio i kau iho ai maluna ona.

   Mahope iho o kekahi mau hooikaika ana a kela ame keia mahele o ua mau puali hoopakele nei, aia hoi, ua kaawale mai lake kino o ke kanaka poino.  A ua kakaiia aku hoi ia a ma kekahi wahi kaawale aku, a hoohuliia ai la kona alo iluna.

   Ma keia wa i nana iho ai lakou apau maluna o na helehelena o ua kanaka poino nei, a ia wa i hooho ae ai o Alamira:

   “Auwe! O Hekini keia!  O ke kauwa lawelawe keia a ka Haku Adelo!  E hele ana paha keia i kou hale, e Pegi?”

   Aka, aole nae o Pegi i pane mai ia wa, ua noho mumule loa iho la ia, me ka haikea pu ana ae o kona helehelena, a haule iho la kona mau kuli ilalo, ma ka aoao o ke kanaka poino, me ka hiolo ana iho o na waimaka ma kona mau papalina, a hooho ae la:

   “O George! Dear George!  Ua hoi hou mai oe i o’u nei!”

   Alaila, hapai mai la ia i ke poo o ke kanaka ana i kahea iho ai ma ka inoa o George, a kau iluna o kona u-ha, iaia hoi i kuene pono iho ai a noho ilalo.

   Alaila, ninau iho la o Alamira, me ke pihoihoi nui:

   “Pehea! O Negewina anei keia?”

   “Ae,” wahi a Pumetona i pane ae ai me ka piha pahaohao o kona mau helehelena,  “He oiaio o Negewina keia!  Aole i kana mai ka nui o ko’u makapo.  Pehea la au i ike ole ai a i hoomaopopo ole ai iaia nei!  Kupanaha maoli!”

   “E Miss Tereveliana!  O Negewina io no keia, ke kanaka au i ninau mai nei ia’u,” wahi a Pegi i pane mai ai, a huli iho la ilalo, maluna o Negewina, me ka lomi ana iaia.

(Aole i pau.)

 

AOLE LIKE NA MANAO O NA KAUKA.

   Ua olelo ae o Mr. Thos. E. Webb, o wolverton, Kanada, penei:  “O ko’u ka ma’i i kuikahi like ole ai ka ike o na kauka, a o ke kumu no paha oia like ole ana, no ke ano e maoli no o ua ma’i la o’u, a pahua nohoi ka lakou mau lawelawe lapaau ana ia’u.  He mau makahiki i hala ae nei i hoomaka mai ai keia ma’i i’u.  O ke kauka mua a’u i kii aku ai e lapaau ia’u, olelo mai ia, ua ulu mai ia ma’i noloko mai o ke anu i loohia iloko o kuu poo, i kapaia ke “catarrh.”  Lapaauia nohoi au e ia, eia nae, aole i loaa ka pono ia’u.  Alaila, hele aku la au he kauka hou, a olelo mai la ia ia’u, ua maikai ole na hoohana ana a ko’u ake-paa, a ua loaa hoi au i ka ma’i nawaliwali o ka opu hoowali ai, eia nae, aole ana wahi pono.  Alaila, kii au i kauka hou, a olelo mai ia, ua pono ole loa ko’u opu hoowali ai, a ua maikai olemaoli ko’u kulana ola ia wa – ua manaoio au i keia mau olelo.  Paa nohoi au malalo o kana lapaau ana, eia nae, aole no he wahi waiwai iki, a o ka’u mea i ike, me he mea la ua piha ke kiaha o ko’u popilikia, oiai ua loohia ia iho la au i ka ma’i rumatika.  Pehea la ka nui o ko’u ehaeha ana, aole hiki i ke alelo ke hoike ae ia mea. Alaila, hele aku la au i kauka hou, a nana i olelo i ko’u poe hoa’loha, aole e pau ia makahiki ia’u a o ko’u make no ia.  Ia wa, hoomaka iho la au e ai i na Huaale Ulaula a Dr. Williams, eia nae, ua huhu ke kauka ia’u, a nolaila, hooki iho la au i ka ai ana.  Mahope iho hoi o ka hala ana o kekahi wa okoa, mai ka wa mai a ke kauka i olelo mai ai ia’u, aohe hiki iaia ke hana hou mai ikahi hana no’u, ua koi mai la kekahi hoaloha o’u e ai au i na Huaale Ulaula, a ua ai hou iho la au.  Mahope iho o ka hala ana o kekahi mau hebedoma, ike iho la au e loaa ana kahi pono ia’u mai keia mau huaale mai, nolaila, hoomau aku la hohoi au i ka ai ana, a hiki wale i ka loaa hou ana ia’u o ke ola e hiki ai au ke hana, a ua pau loa ae la hoi ko’u pilikia.  Ina au e makemake ana i laaui apaau no’u, ma keia hope aku,e kii ana au i na Huaale Ulaula a Dr. Williams.

  Aia maloko o na Huaale Ulaula a Dr. Williams na hunahuna laau ola apau e loaa ai he koko hou a maikai, a e ikaika hou ai na aaolo.  He mau laau pahua ole keia no ka locomotor ataxia, lolo hapa, nalulu ino o ke poo, sciatica, nuralagia ame ka rumatika.  A he mau laau maikai loa nohoi lakou no na ma’i o na wahine, e laa ke koko paa, maikai ole o ka hemo ana ame ka nawaliwali.  Ma ka ma’i o na kane i ulu mai noloko mai o ka noonoo pioloke, a piliaiku paha i ka hana.  E kualia ana e na poe kuai laau lapaau apau.

 

   He omaimai iho nei ko ke Kuhina Kalaiaina King i keia mau la aku nei, mahope iho nohoi o kona huli hoi ana mai Kikane mai, a ua oluolu nae i keia mau la iho nei.

 

Lubiana Kasimila

 

   Mahope iho o ka puka ana aku o na huaolelo ana i hoopuka aku ai imua o ke Kauna Gasepa o Valesebuga, ua haka pono loa aku la ia i kana nana ana maluna ona, a ike aku la ia me ka hoohewahewa ole, he nanaina kuoo o ke ano puanuanu ke kau mai ana maluna o ua Kauna nei.

   Aole hoi hiki iaia ke hoomaopopo pono i ke ano oia helehelena o ua Kauna la.

   A ma ka aoao hoi o ua Kauna Valesebuga la, ua haka pono loa mai la kona mau maka maluna o ka lede opio Ariadane, me ka pane leo ole, a hal kekahi manawa, ku malie ae la ia iluna, a pane aku la me ka leo kohu hawanawana:

  “E haalele ana au ia oe. He mea pono ia’u ke kamailio pu me ke Duke Nui.  Ke ike nei au i keia wa, aia he kuhihewa nui i hanaia mawaena ona ame oe.”

   Alaila, huli ae la ua Kauna nei a puka aku la iwaho mailoko aku o ka rumi.

   Ua noho iho la hoi o Ariadane, me ka ulu pihoihoi ana o kona noonoo, oiai aole hiki iaia ke hoomaopopo iho, no ka pono paha, a no ka ino paha, ke ano punuanu o ka helehelena ana @ ike aku ai maluna o ke Kauna; a no ka ikiiki loa o kona noonoo ma kela wa, ua haule iho la kona mau ku@ ilalo maluna o ka papahele, a hookuu ae la oia he mau leo pule imua o kona Makua iloko o ka lani.

   Pule aku la oia no kona palekana a pela pu nohoi no kana mea i aloha ai, ame ka poe apau me ia.

   Ano, e huli ae kaua, e kuu makamaka heluhelu, ma keia wahi o ka kaua nanea, a nana ae i ke Duke Rupereto ameke Kauna Gasepa.

   Ma ka wa i komo aku ai ke Kauna Gasepa iloko o ka rumi a ke Duke Rupereto enoho ana, ua ike mai la ua Duke nei i ke ano e o na helehelena o kona haku hale, aole hoi elike me ka helehelena o ka mea i hoopihaia me ka uhane hauoli, a no ia mea ninau mai la ia:

   “Ea, pehea hoi keia olino ole ana mai o na kukuna o ka hauoli ma kou papalina?  Ua nahuia mai nei nae paha oe e kela kaikamahine; a i ole, ua u-wa’uia mai nei paha oe, me he koeia ana la e na maiuu o kekahi tiga wahine ahiu?”

   Aka, aole i pane aku ua Kauna nei i keia ninau a kana malihini kipa.  Lalau mua aku la ia i ka hue waina a ninini iho la a piha aleale kekahi kiaha nui, a inu ae la.  Alaila, noho iho la ia ilalo, a haka pono aku la kona mau maka maluna o Rupereto, a hala kekahi mau sekona liuliu, ia wa pane aku la ia me ka leo malie ame na huaolelo maopopo a kuio hoi:

   “E Rupereto, ua ika aku nei au i ka Lede Ariadane, a ua loaa hoi ia’u, mai iaia mai he mea ano nui loa.  Aole oia i manao e hoike maoli mai imua o’u i keia mea, aka, mamuli o ka ikiiki o kona uhane no ke ano’o kona hanaia ana, a i ole ia, mamuli o kona hoowahawaha ia oe ame a’u, ua pahemo mai la ia mea, mai kona waha mai.”

   “Pehea?”  I hooho ae ai o Rupereto, “ Ua hoowahawaha oia ia’u?”

   “Ua ike maopopo no oe i kona manao oiaio no’u nei.  He mea makahewa wale no ia oe ke huna mai ia mea ia’u.  Elike no me ka’u i hoike aku nei ia oe ame a’u, ua hoowahawaha io maoli no ia ia oe ame a’u.  Ma ke ano o kona hoike ana mai i keia mau huaolelo ia’u, ua maopopo loa ia’u aia oia ke ku nei i keia wa maluna o kekahi manaolana ikaika no kona palekana mai a oe a mai a’u aku nei hoi.”
   Maanei hoomaha iho la ua Kauna Gasepa nei i kana olelo ana, lalau hou aku la ia i ka hue waina, hoopiha iho la i ke kiaha a inu ae la, alaila, kamailio hou aku la ia:

   “Ua hai mai keia lede opio ia’u, he kaikamahine oia na Ludowigo o Drosendorf; a ua hoole mai oia imua o’u, me ka maka’u ole ame ka wiwo ole, aole o oe kona makuakane, ma ke koko.  O na mea i maopopo ia’u i keia wa, oia keia:  Ka mua – Eia no kona makuakane ke ola nei i keia wa. Ka

 

(E nana ma ka aoao eha.)