Ka Nupepa Kuokoa, Volume XL, Number 9, 28 February 1902 — Aloha ka Hope Ilamuku ia Lakou HIKI AKU HE OHANA POTO KIKO IMUA ONA A HOIKE I KO LAKOU PILIKIA. [ARTICLE]

Aloha ka Hope Ilamuku ia Lakou

HIKI AKU HE OHANA POTO KIKO IMUA ONA A HOIKE I KO LAKOU PILIKIA.

Hiki aku he Ohana Poko Riko Imua Ona a Hoike i ko Lakou Pilikia— He Makuakane. Makuahine ame Elima Keiki Liilii. I keia mau la o ka pilikia he lehulehu na manawa a kakou e ike nei i ka hele maoli aku no o kekahi poe i nele maoli ma keia noho ana a noi aku i ka Hope makai e hoopaa ia lakou ma ka Halewai i hiki ai ia lakou ke loaa na mea ai maikai, a i loaa ai hoi na wahi kupono e moe ai mamua o ka moe ana i ke anu ame ka lepo o na alanui. I ka auwina la Poakahi nei ua hiki aku la kekahi Poko Riko, kana wahine ame ka laua mau keiki he elima a hoike aku la i ka Hope-makai Nui i ko lakou pilikia me ke noi pu ana aku iaia e hoopaa aku la lakou ma ka Halewai i loaa ai ia lakou kahi maikai e moe ai, a i loaa ai hoi ia lakou na mea ai kupono no ka malama ana i ko lakou ola kino. Penei ka moolelo aloha ana i hoike aku ai: "O Filepe Ekana kona inoa. He eono mahina i hala aku nei ua hiki mai la oia i Hawaii nei me kona ohana a hoouna loa ia lakou no ka mahiko o Lahaina. Ua noho hana lakou malaila, a ua maikai no ko lakou noho ana, a ua lawa hoi i na mea e pono ai keia ola ana no kekahi manawa. Mahope mai ua haule ola mai kekahi wahi mai a eha kona wawae a hiki ole hoi ke hele i ka hana no kekahi manawa. Mamuli o keia pilikia i loaa iaia, ua nui ko lakou pilikia ma na mea e loaa ai ka ai a e pono ai hoi kela ola ana. Ua hoomaka pono ai hoi kela ola ana. Ua hoomaka kana wahine e holoi lole i kumu e loaa ai ka lakou ai a e pono ai hoi kela noho ana. Mahope mai ua hooholo laua e hoi mai i ke kaona nei e hoao ai ina e loaa ana kekahi hana maikai e pono ai ko laua ola ana. Ua hoi laua a noho ma kekahi lumi i ona ia e kekahi mau pake ma ka uku hoolimalima o $3.00 o ka mahina. No ka hiki ole ia lakou ke uku i kela uku hoolimalima ua kipaku ia e ka pake mai kela wahi mai a hiki aku imua o ka Hope-Makai Nui." Ua hoolohe ka Hope-Makai i kana mau olelo a i ka pau ana, ua nana aku la oia i ka wahine ame na keiki e holoholo mai ana, a hu ae la kona aloha, oiai he kanaka Hawaii ola, a he puuwai oluolu hoi kona, ua hanai koke oia ia lakou a pau ka pololi, a kauoha e hoomakaukau ia ka hale waiho kaa hehi wawae o na makai i wahi no keia ohana e noho ai a hiki i ka loaa ana o kahi kupono no lakou. Ua pale ia o waho o keia wahi i nalowale ai ko lakou mau whai opeope mai ka maka aku o ka lehulehu, a i ka maona ana ua hoi aku la lakou no

ko lakou home hou. Ua hoomaka ae la ka makuahine e wehehwehe i ko lakou mau wahi kapa, a hoomakaukau i ka home e like me ka maemae i hiki iaia. He ku maoli no i ke aloha ke nana aku. I ka po Poakahi nei ua moe oluolu iho la lakou, ma ke ano he mau malihini na keia Teritori, a o lakou paha na malihini mua loa i malama ia e ka Hope makai me ka paa mua ole o ko lakou mau inoa ma ka Buke nui e hoike ana i ka inoa o ka lehulehu i hele lalau ma keia ao. Pomaikai wale lakou i ka loaa ana he puuwai oluolu, he puuwai aloha o kekahi keiki Hawaii, e nana a e malama mai ia lakou iloko o ko lakou pilikia.