Ka Nupepa Kuokoa, Volume XL, Number 44, 31 October 1902 — Page 1

Ka Nupepa Kuokoa

KE KILOHANA POOKELA NO KA LAHUI HAWAII.

 

Hoopukaia i na kakahiaka Poalima apau.

 

BUKE XL.—Helu 44.

 

KAIKUKUI NUI O 500 LAMALAMA

 

Halawai na Repubalika ma Emma Kuea.

 

MAKEMAKE KE KEIKIALII E PEPEHI I KE KANAWAI MA`I LEPERA.

 

            Ma ka Poano i hala aku nei oia ka la 25 o Okatoba, i hoike ae ai na Repubalika i ko lakou manao hana ma ke ane kanakamakua, ma ke ka`i kukui ana ma na alanui o ke kulanakauhale ame ka malama ana i ka lakou halawai makaainana ma Emma Kuea no ka hookipa ana mai i ke Keikialii Kalanianaole ko lakou alakai nui e holo moho @lele nei no Wakinekona i hoi mai mai kana huakai kaapauni haiolelo kaiaiaina ma na mokupuni o na Honoapiilani ame Hawaii. Ua hoike mai na hana i hanaia i ka ohohia nui la.

 

            Ma ka hoomaka ana i ka lakou hana, @ hoomaka mua ma ke ka`i kukui ana, a he elima haneri ka nui o ka poe i komo ae iloko o ia hana, ma ka hoomaka ana mai, mai ka pa alii mai a moe mai la ka huakai ma ke alanui Moi a he nana maoli no ke nana aku. @ ka manawa e hookokoke aku ai ka makaikai aole e nele kona hoomaopopo aku i ke kumu o ke oi ana o na kukui ina kahi aoao a i kekahi aoao mamuli @ ka hookikakaha o na kanaka maloko @ ka lakou mau laina oiai lakou e maki ana. He ku maoli no i ka makahehi i ka nana ana.

 

            A hiki lakou i ke alanui Nuuanu ua huli ae la ka huakai no ia alanui a hiki i ke alanui Beritania, huli malaila a loaa mai ke lanui Papu, huli ma ia alanui, pela no hoi ka huli ana ma ke alanui Hotele a hoohiki loa aku lakou i ka Emma Kuea ma ka huli ana o ka huakai ma ke alanui Alakea. I ka manawa i hiki aku ai o ka huakai me ka uhai pu ia e na kanaka, na wahine ame na kamalii e nono e mai ana kekahi heluna nui o na kanaka i ka paka no ke kali ana i na haiolelo. Ua alakaiia ka huakai kukui e ka puali puhi ohe o na Pukiki.

 

            I kela manawa ua piha kui loa ka paka i na kanaka nona ka heluna i oi aku maluna o ke kaukani. Ua hoomaka koke ia no ka halawai ma ka hoolauna ana mai o R.N. Boyd i ka lunahoomalu o ka halawai John Lake, a ma ka John Lane hoolauna i lohe aku ai na makaainana i hiki ae malaila i na leo o na moho kuloko ame ko ka moho eleie Kalanianaole a ua apoia aku no na olelo me ke ohohia.

 

            Ma ka haiolelo a ke Alii ua hoike ae oia o ke kau kalaiaina o na Home Rula e hoohana nei aia na manao kalai maluna o ka hoino pili kino pili i na haole, mea ae no na haole keko, na haole elelu ame na mea like he hoonui ino hoi e hoi mai ai e nahu. E lilo ana ka ino ho mai ai e nahu. E lilo ana ka ino i mea e naluea ai na noonoo maikai o kela poe o Wakinekona o ka hoino ana i ko lakou mau hoa o ka ili hookahi maanei ua like no ia me ka eha e loaa aku ai i kela poe olaila. Mamuli o ka leo i haawiia mai mai ke anaina mai e noi ana i ke Alii e haawi aku i mau olelo ma ka olelo Beritania pela oia i kuu aku ai a eia kekahi o na manao:

 

            “Ke noi aku nei au ia oukou e koho mai ia`u ina no, no ka hele wale ana no i Wakinekona no ka pepehi ana i ka bila kanawai ma`i lepera a Wilikoko no ka mea oia ka mea hoohaahaa inoa loa i ko kakou aina nei. Heaha la ka mea e panaiia mai ana ma ka aoao o na malihini ke hele aku ilaila ke hoike aku mai Hawaii aku nei ka hele ana mahope iho o ka hookomo ana mai i na ma`i lepera o Amerika Huipuia. Hookahi mea maopopo oia ka nana kee ia mai aole hoi o ka apo ahaoha ia mai.

 

            Mahope o kana haiolelo ua hele aku oia i Waiakamilo, Kalihi a hai aku i ka olelo i ko laila poe.

 

Hoihoi o Boyd he $3000 i ke Teritori.

 

            Ma ka auwina la o ka Poakahi nei Okatoba 27, i hoihoi ae aie ka Luna Nui @ na Hana Hou James H. Boyd i ke keena o na Hana Hou ma ke ano no ke Aupuni he $3,000 ma ke dala gula, ua hoi@ ka huina dala i loaa mai iaia mai ka @ hui mai a Theo. Davis, mai no na alanu@i o Hilo, Ua haawiia ae ke dala i ke kupakako kiekie Mr. White mahope ih@ ka hui kuka ana o Mr. James Boyd @ame Komikina Aina Aupuni E. S. Boyd ame ke Kiaaina ame ke Kakauolelo @ o ke Teritori.- O keia ka huina dala @ haohao nui ia a i keia manawa ua pau@

           

            Mahope iho a k@ a pau ana o ka lakou hui ana ua hoike @ mai la ke Kiaaina: “E pili ana i ka hun@ na dala o $3,000 mai ka Hui mai o Theo. @ Davies Ma, ua hookomoia mai e ka Lu@ Nui a na Hana Hou Mr James H. Boyd ma ke ano he loaa no ke aupuni hok@ o ke keena o na Hana Hou.” [@the alignment on this section was difficult to read with a diagnol portion missing and line alignment off]

 

E KOHO IA KALANIANAOLE

 

HOPUIA O JAS. H. BOYD

 

Hakoko oia no kona pono no elua manawa.

 

KOKUAIA E KALANIANAOLE AME KE, KAHI MAU HOALOHA A HEMO HOU IWAHO.

 

            O ka Poakolu nei oia kekahi o na la uluaoa loa ma ke capitala o keia Teritoi mamuli o ka hookala ana o ka hao kila i ka hao kila maluna o na mea e pili ana no ka ninau nui i kamaaaina ia kakou e pili ana no na hana aupuni kuloko o kakou nei.

 

            La auwina la ua hopuia ae o Boyd mamuli o ka hewa apuka i ke dala o ke Aupuni nona ka huina o $1,650, a i ka manawa i lohe ai ke Keikialii Kalanianaole, ka moho Elele Repubalika, a o ka puuwai hamama i piha i ke aloha nou e Hawaii, ua hele koke aku oia me kona mau hoaloha a waiho aku i $3,000 pela no ka hookuu ana mai ia Jas Boyd, a loaa hou iaia ka lanakila mai ka umii ana o ke kanawai iaia iloko o ka halepaahao.

 

            O kela mau dala $3,000 i haawiia ai no ka hana ana i ke alanui o Hilo, aole i huikau aku ia me keia hihia o James Boyd i hopuia iho la. Eia iho malalo nei ke ano o ka palapala hopu i hoohikiia ai imua o Lunakanawai W. L. Wilikoki a i hoopiiia e Henry C. Meyers, ka hope Luna Hooiaio o ke aupuni:

 

            “O Henry C. Meyers, Hope Luna Hoiaio, Teritori o Hawaii, oia ka i hoohiki pono e olelo ana:

 

            O James H. Boyd o Honolulu, Mokupuni o Oahu, Teritori o Hawaii, e noho ana ma ke kulana Luna Nui o na Hana Hou o ka Teritori o Hawaii, a ma ia ano he kanaka lawelawe no ke aupuni o ka Teritori o Hawaii, a ma ia ano he Luna Nui o na Hana Hou, a i waihoia aku ai maluna ona e ua aupuni nei ka malama ana i na dala apau o ke aupuni i oleloia i waihoia aku ai ma kana malama ana, o James H. Boyd i oleloia, Luna Nui o na Hana Hou i olelo mua ia, iloko o ke Keena Oihana Hana Hou o ka Teritori o Hawaii i oleloia, hana iho la ma ka la 10, a i ole, ma kau wahi o ua la la o ka mahina o Iune, 1902, ma Honolulu, Mokupuni o Oahu, Teritori o Hawaii, i ke kalaima a apuka a lawe a apuka mai ke Keena o na Hana Hou i oleloia, o ka Teritori o Hawaii i oleloia, i kekahi mau dala, oia hoi he huina o $1,650, no ka waiwai io o $1,650, a oia no hoi ka waiwai o ke aupuni i oleloia o ka Teritori o Hawaii, a hana ma ia wahi me kona manao iho e hana kalaima a apuka a hoolilo i ke dala i oleloia, oia hoi he $1,650 no kona pono iho, e kue ana hoi i ka Pauku 158 o ke Kanawai Hoopai o 1897 o ke Teritori o Hawaii.

 

            Kakauia a hoohikiia imua o`u i keia la 29 o Okatoba, A.D. 1902.

 

W. L. WILIKOKI,

Lunakanawai Apana o Honolulu, Oahu.

 

(Kakauinoaia) HENRY C. MEYERS, Hope Luna Hooiaio, Teritori o Hawaii.

 

            Ua noi ae ke Kiaaina ia James Boyd e waiho aku i kona hookohu, a ma ka Poalua nei ua hoouna aku oia he leta e hoole ana. I ke kakahiaka Poakolu mai, ua hele aku oia a hoa e komo aku iloko o kona keena, eia nae ua paa koke ia oia e ka makai Elvin. Ua hakoko aku oia me ka makai a hiki i kona manawa i hoopau ai i kana hakoko a pane aku la oia i ka makai me ka leo oluolu: “Aole he mau manao ino.”

 

            Ia kakahiaka no ma ka hora 10, ua hele hou aku oia me kona loio F. E. Thompson a hoao hou e komo iloko o kona keena, aka, ua halawai aku la laua me elua mau makai e kiai ana ia manawa. Ua hakoko hou aku o James Boyd a hiki i kona paupauaho ana hoopau ae la oia ia hakoko ana a pane aku la i kona loio: “Ua lawa anei oe?”  “Ae, ua pono iho la,” wahi a kona loio.

 

            Ma ia auwina la no, ua hanaia ka palapala hopu i hoike mua ia ae nei, a mahope koke iho loaa i na lima aloha o ke Keikialii Kalanianaole, L.LO. McCandless ame E. C. Winston a hookuuia mai oia mai Kuapapanui mai.

 

            Aloha no o Kuhio ia oe e ke kanaka Hawaii a lalau mai kona lima aloha a mawehe ae i kou pilikia. Pehea hoi o wilikoki? Aole i ka lewalewa iho. Owai la kou hoaloha oiaio e ke kanaka Hawaii a owai la ke kanaka Samaria o na la i hala ame keia mau la. O ka puana e o iho ai, o Kalanianaole ua kanaka Samaria la, alaila, heaha kau hana? A hiki mai ka la 4 o Novemaba no Kalaniaanaole kou balota. Pela anei?

 

            Ma Waialua ke Keikialii i ke ahiahi Poaha nei. Mai Honolulu aku nei kekahi poe i holo aku ai ma ke kaa-ahi a hui aku me ia i Waialua.

 

            O ka helu hope keia o ka kakou milimili (Kuokoa) e maalo aku nei imua o oukou e kona poe heluhelu mamua o ka la koho balota ae nei, Novemaba 4, nolaila, ke kono ia aku nei oukou e noonoo pono i ka mea e koho ai aole i ka poe hupo a wahakole iloko o ka ahaolelo. Eia iho ka aoao Repubalika ka poe hana i ka pololei ame ke kaulike, nolaila mai hoohewahewa ia lakou.

 

KA MOHO ELELE NO WASINETONA

 

KEIKIALII JONAH KUHIO KALANIANAOLE.

 

NA MOHO SENATOA.

 

D. P. R. ISENBERG.

W. C. ACHI     L. L. McCANDLESS.

 

O KEIA MALUNA AE NA KII O NA MOHO SENATOA O KA AOAO KALAI AUPUNI REPUBALIKA NO KA MOKUPUNI O OAHU NEI NO KEIA KAU KOHO BALOTA AE. HE POE KANAKA KOIKOI WALE NO LUNA O KA AINA A HE POE MANAO PAA E HANA I KA MEA PONO. NA OUKOU E NANA A KOHO IHO IA LAKOU.

 

HE LEO I MUA O KA LAHUI MAI KA AINA MAI O KA EHAEHA

 

Ia oukou e na kini, na ohana ame ka lehulehu o makou e noho mai la i ka aina, e hoolono a e mailu.

 

            I keia mau la iho la ua lawe hele ia ae la ka palapala hoopii a Wilikoki iwaena o makou na ma`i no ke kakauinoa ana, e Kanoealii Hutchison ame kona mau paalalo.

 

            E hoomanao oukou e ka lahui, o keia kanaka o Kanoealii oia no ka mea nana i hoopuka ae i kekahi olelo o ka uahoa, i ka wa i malama ia ai ka halawai makaainana ma Beretania Hall, no ka noonoo ana i ka Bila Ma`i Lepera a Wilikoki, a eia ua mau olelo la:

 

            “Makemake au e ike ia oukou e o`u mau hoa ma`i e rula ia ana me ka pauku hao.” I kona wa i hoopuka ai i kela olelo, ua kokoke loa oia e pau: ka haehae ia; ina aole na kiai o ka maluhia malaila, ina no ua hookoia ka inaina o na ma`i.

 

            E lawe ia aku ana keia palapala imua o oukou, i kumu e manao mai ai oukou he hana pono a maikai ka Wilikoki e koi nei e hookomoia makou malalo o ke Aupuni Federala.

 

            A mamuli o ke ano kuhihewa, a ano pouli maoli no, ua kakauinoa aku la no kekahi o ko makou mau hoa ma`i, a i mea e hoonui loa aku ai i ka heluna o na inoa, ua laweia mai la na Kokua e kakauinoa i keia palapala, ka mea aole loa he kuleana e kamailio i na mea e pili ana i ko makou mau pono na ma`i.

 

(Nana ma ka aoao 8.)

 

LILONAOLAIKA ULA O KE AHI

 

Manuunuu ke Ola o ka Poe i Poino.

 

LELE MA NA PUKAANIANI I WAHI E PAKELE AI KE OLA.

 

            I ka hora 2:10 o ka wanaao Poaha nei, Oct. 30, i ka makai kaulio McCormick e iho mai ana ma ke alanui Nuuanu ua ike aku la oia e a ia ana ka hale o E. B. Friei, e ku nei mawaena o na alanui Bates ame Judd. Ua ki ae oia i kana pu panapana i ka lewa a holo mai la me ka paukiki nui no ka pahu ma ke kihi o alanui Nuuanu ame Pauoa a haawi mai la i ka hoailona o ka pauahi, a huli hoi hou aku me ka hoaia ana i ka poe e hiamoe ana iloko o ka hale. Ua ala koke mai la ka poe o ka hale a ike i keia poino.

 

            O ka poe e moe ana iloko o ka hale ia manawa oia iho keia:

 

            Manaoia ua pau i ke ahi.

 

            Mrs. E. B. Friel ame kana kaikamahine o 15 makahiki, Miss Etta Friel.

 

            POE I EHA.

 

            Mrs. Nigel Friel Jackson. Ua mo`a pu kona helehelena ame kona kino, a me he mea la e make ana oia. Ua manao pu ia no hoi ua moni oia i ka uwahi ame ke ahi.

 

            Georgia Friel, he kaikamahine nona na makahiki he 10. Ua lele mai oia ma ka puka aniani o ka hale elua a hiki i ka honua a loaa iaia ka poino ma kona wawae.

 

            KA POE I PAKELE.

 

            Edward B. Friel, Georgia Friel, Anna Voeller, Mr. ame Mrs. E. B. Watson ame Leon Tobriner.

 

            O na mea no laua no ola i lilo aku, ua ikeia no laua ma ka puka aniani, kahi hoi a Georgia i lele ai iloko o ka lima o ka makai, a ua kuheaia aku laua e lele mai, aka, ua nalo hou aku laua.

 

            O ka hale ia manawa ua puni i ke ahi, a ua manaoia ua pau ko laua mau kino i ka a ia e ke ahi.

 

O Leon Tobriner, M. ame Mrs. Watsons, he poe hoolimalima lakou a ua pakele ae ko lakou mau ola. O ko Mrs. Nigel Jackson pakele ana mai mamuli no ia o kona hele kino ana iloko o ke ahi a puka iwaho.

 

            Ua hoomaka ae ke ahi ma ka aoao mahope o ka hale, e pulumi ana i ka lumi kuke a komo loa aku i ke alanui pii e pii ana no ka hale elua. Ua a hikiwawe aku a hiki i ka puka ana i ke alo, a o ke oaniani makami o Nuuanu ka mea nana i hooi loa aku i kona a ana. He hale laau keia, nolaila, aole no i nele ka a ia e like me ka pepa.

 

            I ke kakahiaka Poaha nei, ua hopuia ae o Nigel Jackson ma ke ano ua hoohuoiia nana i hana i keia hana. Ma ka hoike a e. B. Friel, ua hoomaka`uka`u mau aku o Nigel Jackson iaia me ka olelo pu aku e pepehiia ana ka poe e noho nei ma ia wahi. I ka po Poalua, ua hoaoia ae e puhi i ka hale, aka, ua ike mua ia mamua o ke ko ana oia makemake.

 

            O keia Nigel Jackson no ka mea a ke Kuokoa i hoike mua aku ai, ua hoopiiia e kana wahine no ka hookaawale ana ia laua mai ka berita male a laua i aelike ai mamuli o ka hana pono ole a Jackson i kana wahine. Ua hoi aku o Mrs. Jackson me kona mau makua, a noho aku keia Jackson e hoonaukiuki i ka ohana o kana wahine. Ua manaoia malalo o keia kumu i loaa mai ai ka poino i ike ia ae nei.

 

Na Moho Repubalika

 

            Eiak iho na inoa o na moho Repubalika no ka Mokupuni o Oahu nei. Na oukou e wae a e koho iho, mai poina nae i ke koho i ka Elele.

 

            ELELE I WAKINEKONA.

            Jonah Kuhio Kalanianaole.

 

            NA SENATOA.

 

            W. C. Achi,

            D. P. R. Isenberg,

            L. L. McCandless.

 

            NA LUNAMAKAAINANA.

 

            Apana Eha.

            Wm. Aylett,

            Frank Andrade,

            S. F. Chillingworth,

            W. W. Harris,

            John Kumalae,

            Carlos A. Long,

            Apana Elima.

            Nainoa,

            Bn Naukana,

            J. M. Ezera,

            Henry Vida,

            J. L. Kaulukou,

            Jas. E. Shaw (Kimo Ko.)

 

            I ke komo ana o Kuhio iloko o ka aoao Home Rula Repubalika, a hoi mai o Wilikoki a wehe ae i ka inoa Repubalika, ua wehe pu ae oia i ke Keikialii, mamuli o kana mau hana; nolaila, ua Repubalika oiaio ia mamua o kona komo ana i moho Repubalika.

 

KE AWA O PUULOA

 

Aole i hoohanaia ke Kao eli i ka pule i hala.

 

OKAIKAI, NOHA NA PAIPU A MAIKAI OLE NA MEA HOOLANA.

 

            “Me he mea ia o ka eli ana i ke awa o Puuloa, oia kekahi mea nana e hookuemi hope i ko America hana ma ke kahua hoolulu mokukaua maanei no kekahi manawa,” wahi a kekahi kanaka hana o ke kao eli awa o Puuloa i ka la Sabati nei. “Oia hoi, ina e noonoo iho i ke kulana e ikeia nei i keia manawa, alaila, he manawa loihi no ke hala ana, mamua o ke komo ana o kekahi moku ma keia awa.

 

            “O ka pilikia e ikeia ana mahope o ka eli ana i keia awa, oia no ka makani ma ke kukulu hema, ke kai nui ame ke au oia no na mea nana e hoopiha hou aku i kahi e eliia nei me ke one, a ina e piha, hou ana e pono i na moku nui ke hookele ia me ke akamai maoli a e koloia hoi e kekahi moku kolo ikaika, a ke ole e hana ia pela e ili ana na moku ma ka aoao o ke awa oiai he ikaika maoli no ka nalu o keia wahi.”

 

            Aole i hoohana ae na Hoahanau Cotton i ka laua mau mea eli awa i keia pule aku nei. I ka la mua i hoomaka ai ka hana, ua hoomaka ae ke okaikai a ua hookuikuiia ke paipu ilalo o ka papaku o ke awa a hiki i ka noha ana. Ua hoololi koke ia ae ke kulana o ke kao eli i hiki ai i ke alapii e paa ana i ke paipu ke hoololi ia ma na wahi e makemakeia ai a e poino ole ai ke loaa hou kekahi okaikai e like me ia i ikeia iho la. Ua hooponopono hou ia ae kahi i poino a ua paa i ka la Sabati nei a ua hoomaka hou ia ka hana ma keia mau la iho nei.

 

            O kekahi pilikia i loaa oia no ka paakiki maoli no o ka hookahua ana i ke kao eli. Mamuli o keia kumu ua lawe hou ia aku i mau heleuma kaumaha i hiki ai ke paa iho i ke kao ma kahi i manaoia ai.

 

            Mamuli no o ke okaikai ua hiki ole i ke paipu ke paa iho i ka papaku o lalo a ua hiki ole ke paumaia ke one iloko o na kao i hoomakaukauia no ka lawe ana i ke one, nolaila, ua waihoia ae keia papa hana. E hoomoeia aku ana i 1,000 kapuai paipu a ma keia mau paipu e laweia aku ai ke one. Ua hoike ae na kanaka e hana nei malaila he mea paakiki no ka hana ana i keia awa mamuli o ke okaikai mau.

 

Hoeueu Beckley ia Hilo

 

            Ma ke ku ana mai o ke Kelaudine i loheia mai ai na hana hoeueu a ka Akimarala Beckley (Moeheau) i ko Hilo poe oiai oia ilaila mamua o ka hoi ana mai o ka moku i Honolulu nei.

 

            Wahi ana, “Ua nui ka hoeueu i haawiia i ka poe o Hilo ma ko`u aoao ma ka po Poaha. Ua malamaia ae he halawai nui ma ka halekeaka Kepani. O ka aina e ku la ua halekeaka nei no`u ia. Ma ka hoomaka ana i ka haiolelo ua hai aku wau ma ka olelo Beritania alaila ma ka olelo Hawaii. Ua ike no oe ua noi ia mai au e na Repubalika e komo ma ia aoao a ua ae aku wau, a o ka mea e hoike ana i ka`u hana, me keia au i hana ai: Owau kekahi o na alii kiekie o ka aina e like no me Kuhio. He mau alii no maua a elua. Ua hele mai oia mai ke komohana mai a ike ia`u i ka hikina he ike ma ke ano i kuluma ia makou a he hana hanohano na`u ka apo aloha ana aku iaia. O ka`u hana ma ko`u aoao oia ka hooikaika nona a o ka`u hana e hana ai oia ka hoolilo i ka hapanui o Hawaii no ke Keikialii.

 

            Ua hoike aku wau i ka poe o Hilo he mea pono e loaa ia Hilo i mau palekai, i alanui hao a puni ka mmokupuni, a i kaa-uwila e pii ai i ka puu Pakipika O ka manao nui a`u i kalele ai oia no na pale-kai no ka mea i ka manawa e hookomo mai ai o ka mokuahi Korea i Hilo nei e hiki ana iaia ke holo iloko o ke awa me ka maalahi a oiai ma ke awa o Honolulu ua puikaika kahi kuleana, a o ka mea wale no e hana ai no Hilo oia ka hana ana i na palekai, a ua lilo loa keia manao i mea hoohauoli loa i ko laila poe, ko lakou mea i ikaika ai ma ke kupaa ana. Aia he mau hooho mahalo i haawiia mai no`u. Ua noi pu aku wau i na wahine e hana pu a ua hai aku wau ia lakou o ka hana maikai loa na keia aina e hana ai oia ke koho ana no Kuhio. O ko`u komo kokua ana no ke Keikialii he mea ano nui ia ia lakou, no ka mea, ua hoomaopopo na kanaka Hawaii he ike mua wau i na mea e niki mai ana.l Ua hilinai mai lakou ia`u a ua hai aku wau ia lakou e lawe lilo ia o Hawaii no na Repubalika.”

 

I HOOKAHI PUUWAI NO KE KEIKIALII KALANIANAOLE.

 

            Ke hooma-u mai ne ka hoi ko Kulanihakoi i na kini o Honolulu nei i keia mau la. Ua hiki no, o ka Ua Kukalahale no la hoi keia.