Ka Nupepa Kuokoa, Volume XLIII, Number 21, 26 May 1905 — Page 2

NUPEPA KUOKOA, POALIMA, MEI 26, 1905.

 

NA WARENA OPIO

ILOKO O KA ENAENA O KA LUKUWALE.

He Moolelo o ka Lukuwale Ana ia o na Pelekane ma Inia.

-----

MOKUNA V.

HAHANA KE KAUA ME NA SIPOE.

-----

            "Aia he wahi hale uuku mamua," wahi a Mekia Warena i pane ae ai me ke ano ikaika o ka leo, "ina kakou ilaila a e hoea hoi ilaila i ka wa kupono."

            A ia lakou no hoi a komo iloko o ua wahi hale nei a pani paa ia mai la ke panipuka e lakou ua hoea aku la ua poe koa kaulio nei mawaho o ua wahi hale nei, a he hale pohaku kino ikaika kona e hiki ole ai ke wawahi maalahiia, oiai he luakini kona ano, a ma keia wahi i hahana ai ke kaua o na aoao a elua.

            "E hoolu-a aku i na mea kaumaha apau e loaa ana ma ke panipuka i paa ai ia e hiki ole ai i ka enemi ke komo mai," wahi a ka Mekia i kauoha aku ai i kona poe koa kakaikahi loa o eha ko lakou nui; a me ka hoolohe kauoha no hoi i eleu aku ai lakou me ka manao hana maoli a kanakamakua hoi.

            "E Danalope e ki aku i na enemi ma ka pukaaniani me ka hoohakalia ole," wahi hou a ke kauoha o ka Mekia. "O ko kakou wahi manaolana wale no, oia ka hiki ia kakou ke paa aku i keia poe lukuwale mai ke komo ana mai iloko nei, a hiki i ka wa e hoea mai ai o kekahi kokua i maopopo ole, e manaolana aku nae kakou oiai aole e nele ka loheia mai o ka leo o na pu a na ia mea e ume mai i ko kakou poe koa ianei no ka hoopakele ana."

            Alaila me ka hoohakalia ole hou iho ua kani aku la ka Kapena Danalope pu-panapana e ki ana hoi i na enemi e pupulu ana mawaho pono o ke panipuka.

            "Ano, e na Warena Opio, e miomio ka olua ki ana a e hala ole i hookahi poka me ka loaa ole aku o kekahi enemi, aka e loaa pono aku ka ma-ka, a i mea e hiki ai e malama i ka manawa aole nae i ka hoopau manawa wale," wahi a ka makuakane i waiho aku ai i kana kauoha i na keiki mahope iho o ko lakou hooikaika ana i ka hoopili ana i kekahi paukulaau nui mahope pono o ke panipuka.

            "A o ko'u manawa keia," wahi hou a ua Meki nei a ki aku la no hoi oia i na Sipoe huhu nui wale. "Ki pololei, e Nede me ka hoohala ole i kekahi. Ua makaukau anei oe e Mena?"

            "Ae, e Meka," wahi a Kapena Mena.

            "A o kau aku e Dike, me ka hoopololei loa i ke ki ana - e kani aku," wahi hou a ka Mekia.

            A i keia manawa e ki nei kahi puali uuku oloko o ka hale aole he poka i hoohala wale ia oiai ua loaa pono kela ame keia Inia i kau pololei ia aku e ki a pau lakou i ka make, a eha no hoi kekahi a oia no hoi ka manawa i haluku mai ai na poka a na Sipoe ma ke panipuka a ma na pukaaniani o ua wahi hale nei no ke ki ana mai ko loko poe.

            "Nee i hope," i kahea leo nui ae ai ke alakai o na Sipoe, "a o na koa o ka laina hope, o lakou ke paa i na lio o ka laina koa kaulio mamua, mahope iho o ko lakou lele ana ilalo a e wawahi aku i ka puka."

            A i ka manawa pokole loa i hooloheia ae ai ke kauoha a ke alakai a holo aku la na koa Inia imua ma ka puka me ka ikaika nui, eia nae, aole i nele ko lakou hui ana ma na poka lele pololei o ka pualikoa uuku oloko o ka hale, a waiho make ana kekahi hapa o ua poe Sipoe nei, a oia hoi ka mea nana i hookuemi mai i ko lakou paukiki nui ana imua. Ua ki hoomauia mai no na Sipoe me ka hala ole o ka make i ke kau ana maluna o kekahi poe Inia a waiho eha no hoi kekahi poe, no ka mea, aole he poka pu-panapana e hala me ke ku ole o kekahi aka, iloko o ia make no ame ka eha, aole i kuha'u iho ua poe nei aka ua nee mai no lakou a ku ana mamua o ka puka me na pahikaua ame na pukulaau e manana ana iloko o ka lewa.

            "E pahu aku i ke panipaka me ko oukou ikaika apau," wahi a ke alakai i kauoha aku ai me ke oolea, a lele aku la ma kahi o umi koa Inia no ka wawahi ana i ka puka, a he uuina wale no ka mea i loheia aka he oia mau no na kikina puka, aole he mea a manuhe'u iho.

            "E hoomau i ke ki ana ma ka pukaaniani." wahi a Mekia Warena i kauoha aku ai i na Kapena, "a owau ame na keiki nei - ma ka puka no hoi makou e ki ai."

            A i keia manawa e hoomau nei i ke ki ana; ua loaa pono aku no na Inia, a nui ae la ka leo hooho hohewale, a aole no hoi i u iho ua pau aku la ua poe nei i ka puhee a mamao koke aku la mai ka puka aku.

            "Owau ka mea o kakou i ku i ka pu aia ma kuu poohiwi," wahi a Kapena Danalope.

            O keia wale no na olelo i puka pono mai ke Kapena mai me ka lohe pono ia aku a o ke koena aku i koe aole he loheia aku no ka mea ua uwa ae la na Sipoe me ka ikaika nui, a i ka nana ana aku o na Warena opio ua hoopuiwa nui loa ia laua i ka ike ana aku i na Inia e hapai mai ana i kekahi paukulaau nui no ka wawahi ana i ka puka.

            "Aole e pono e lanakila ka wawahi puka a keia poe me kela paukulaau nui," wahi a Mekia Warena "a he mea pono ia kakou e ki aku ia lakou - i ka poe e hapai mai nei i kela paukulaau" a hoomaka aku la no hoi ka lakou ki hou ana.     

            He nui no na Sipoe i loaa aku i na poka a ka pualikoa uuku oloko o ka hale a waiho make ana kekahi poe a eha no hoi kekahi, aka aole lakou i haawipio a hiki wale ka paukulaau nui ma ka puka, a i ka manawa mua no o ka pahu ana ua na-ha liilii ae la ke panipuka mai luna a lalo a waiho hamama ana ka ipuka.

            "Eleu mai kau elau-pu e Kapena Mena," wahi a Warena, "o oe ame a'u na mea kupono ma ka ipuka nei e paio aku ai ma ka paa ana i ko lakou komo mai, a aole no lakou e hiki ke komo mai a pau i ka manawa hookahi no ka mea aia he elua wale no e hiki ke komo ma keia ipuka, a o oe e Kapena Danalope, e ku no oe ma kou wahi iho me ka hoomanawanui a e ki mau aku i ko waho poe. A o olua e na Warena opio, e hoopiha mau i ka olua mau pu me ka hoohala ole i ka manawa, a ina lakou e komo mai iloko nei alaila o ka elau-pu ka mea kaua e paio aku ai."

            I ka manawa no i hamama ae ai ka ipuka ua uwa koke ae la na Sipoe me ka leo haahaa o ka lanakila, a hoomaka mai la no hoi lakou e paukiki nui no ke komo ana mai iloko o ka hale me ka nana ole ae heaha la ka mea e kauia aku ana maluna o lakou.

            "Imua! a make na ilio," wahi a ke alakai i hooho leo nui ae ai me ka ikaika nui o kana kauoha.

            "O oe aku ka mua," wahi a kekahi koa Inia i pane aku ai i ke alakai, "o ka mea maa mau o ke kaua, na na aliikoa ke alakai ana mamua, nolaila o oe ka mua e komo ai."

            "Alaila e uhai mai ia'u," wahi a kekahi o na aliikoa, he kanaka ano aoo, i piha kona umauma me na mekala hoohanohano.

            Kau ae la oia i kana pahikaua iluna a hoomaka aku la ka nee ana imua o ka ipuka e hamama mai ana, a nee pu aku la no hoi kona mau koa ma kahi paha o iwakalua poe koa mahope o ke aliikoa. A i hakalia no a ku ua aliikoa nei ame kekahi o kona mau koa, ma ka ipuka a maloko iki iho, ua loaa pono mai la laua i na elau-pu a Mekia Warena ame Kapena Mena a lilo iho la no hoi na Inia he mau pio i make koke ia manawa, oiai ua komo pono aku na elau-pu ma ko laua mau opu.

            A hala hoi keia mau Inia, ua kau koke aku la he elua mau koa hou, oiai, ma ka onou ia ana mai e ka hapanui e nee mai ana a waiho make ana no hoi laua i ka honua, a ia manawa koke no i komo aku ai na elau-pu a na Warena Opio iloko o ka nui koa e nee ikaika mai ana ma kahi ipuka uuku, a ma keia manawa i hoomaopopo iho ai ka poe mahope mai i ka hiki ole ia lakou e hoonana mai a uwa lanakila ae la ka aoao pale, oia hoi kahi pualikoa uuku o ka hale.

            Ua lilo loa keia i mea nanauki loa na ua poe Sipoe nei, a i ka hookuemi iki ana i hope aia hoi lohe ana lakou i ka uwa ame ka haukawewe ana mai o na kapuai lio a i ka alawa ana ae o ka poe o hope, aia hoi he pualikoa Pelekane mahope o lakou mawaho mai he puali i hoea mai no ka hoopakele ana, oiai, ua loaa i ua poe Pelekane nei i ka lakou mau poka a emoole ua puhee aku ka poe Inia i pakele aku a o ka hapanui ka i waiho make iho i ka honua.

            A o ka puali Inia kaulio e hoomoana ana i kula ma kahi mamao aku i ka hale e hailukuia nei, ua pau mua aku lakou i ka puhee me ka nana ole ae e hoopakele i ko lakou poe e ulupaia nei e na Pelekane a aole no hoi i u iho aia hoi aole hookahi wahi kino Inia ola ma kahi kokoke i ua wahi nei o ke kaua a e waiho mokaki ana hoi na Inia make iluna o ka honua.

            "Ikaika maoli ka oukou kupale ana ia oukou iho," wahi a ke alakai Pelekane o ka puali hoopakele, iaia i nee mai ai a kokoke i ka hale. "I ka'u hoomaopopo iho ua waiwai ole no ka'u kokua i haawi iho nei, e na keonimana, oiai i ka nana aku ua lawa maoli no oukou me ka ikaika e paio ai i na enemi. E oluolu ia'u e ninau aku owai la oukou a mai hea la i hoea mai ai?"

            "O, o oe no ia e Siboda," wahi a Warena, "ua poina anei oe ia'u? Eia no na Kapena Danalope ame Mena me a'u?"

            "Huro, e hoomaikaiia ke Akua," i uwa olioli ae ai ke aliikoa, "ua hoopakele mai Oia ia oukou, a ma ka makou nae i noonoo wale ae ai no ua pau oukou i ka poino mamua o ka hiki ana mai o ka makou kokua. Ke olioli nui wau no keia hui ana," a lululima pumehana iho la na aliikoa a pau pu me na koa ma keia hui aloha ana, a o ka hope loa no hoi oia ka hui ana o na Opio Warena o kahi puali uuku me na aliikoa o ka puali hoopakele.

            "He mau aliikoa anei laua i hoea hope mai nei i komo iloko o kou puali?" i ninau aku ai o Siboda, "a ina o laua kekahi iloko o kou puali alaila o laua na aliikoa Inia mua loa a'u i ike ai i ke ku oiaio mahope o kakou, a ku-e aku hoi i ko laua poe Inia kipi."

            "He mau keiki ponoi laua na'u," wahi a Mekia Warena i pane aku ai.

            "Heaha," i hooho puiwa ae ai ke aliikoa, me ka akaaka leo nui ana ae, me ka manaoio iloko ona he hoomakeaka wale no ia a ka Mekia.

            "He oiaio keia a'u e ha'i aku nei ia oe, a e pau no kou kuhihewa ina e holoi ae laua i ke pena i hapalaia aku ma ko laua helehelena," wahi hou a Mekia Warena; a oia no hoi ka manawa a Kepana Danalope i kokua aku ai i na olelo a ka Mekia Warena, ma ka pane ana aku, "a he mau opio no hoi laua i oi aku mamua o ke ano mau o na opio no na makahiki elike me ko laua. E hoomaopopo oe i ka wiwoole i hanaia e keia mau opio, ma ka hoopakele ana ia makou ekolu nei, ia makou e noho pio ana he poe paahao na kekahi pualikoa Inia a hoopakeleia makou e keia mau keiki opiopio mailoko mai o ka punana o ua pualikoa Inia nei."

            "Ina aole keia mau opio i hoopakele ia makou," wahi ana i hoomau aku ai, "ke manao nei wau ua make mua makou mamua o keia hui ana. Aka o ka ninau nui wale no he mea ai anei kau o Miruta nei, oiai ua hele keia a pololi maoli?" O kekahi no hoi, aia he poke iloko o kuu poohiwi nei a e oi aku ko'u hauoli a maha a ono no hoi ka ai ana ke weheia a hemo keia poka mai a'u aku. Aole he manawa no ka hoolohe ana i ko makou moolelo, a he moolelo loihi no hoi. Pehea oukou e noho nei ame na mea o Miruta nei?"

            "Aole no i ka makaokao loa o Miruta, aka ua lawa iki no hoi ia i ka malama ana ia makou; e pono nae kakou e naue i keia manawa. He mau mea ai anei ka kakou e ke Kakiana?" wahi a ua alakai nei i huli ae ai a ninau aku la i kekahi o kona mau hoahele, a ua koa nei hoi i hele mai ai imua o kona alakai no ka hooko kauoha.

            "Aole hookahi e kuu Haku," wahi a ka pane.

            "Ua loaa anei ka poino ma ko kakou aoao?" i ninau hou ia aku ai oia.

            "Aole hookahi," wahi a ke Kakiana.

            "Ehia make o na enemi?"

            "Aia he umi-kumamalima koa make a'u i manao ai, aia maloko o ka kakou helu, a he umi-kumamaiwa maloko o ko lakou nei."

            "Ha, ikaika no keia puali uuku o na Pelekane," wahi a ke alakai o ka puali hoopakele i hooho ae ai. "E liuliu kakou no ka hoi ana e na hoa, a ua manaoio wau i ka nui o ko oukou olioli i ka pakele ana o keia mau aliikoa o kakou, i pakele ma ka haalele ana aku ia Sanadinafa."

            A haawi hipahipa huro ae la na koa no keia lanakila i loaa ia lakou iloko o keia lukuwale ana. A ku laina hou ae la lakou, he puali pu-raifela helu kanaono a huli hou aku la no Miruta.

MOKUNA VI.

NUI NA ALALAI MA KE ALA.

-----

            I ka manawa i hoea aku ai na malihini me ka puali hoopakele i ke kahua hoomoana o na koa Pelekane i Miruta ua puni koke ae la lakou i na koa o ke kahua, oiai ua makaala loa ae la lakou i ka wa i loheia ai na kani pu ana o ke kaua i hooukaia, a ua hookuuia ae la no hoi ia mau rula ikaika, ma ka manawa i maopopo ai, a nui no hoi ka olioli o na hoa o ka puuki hookahi o ka weliweli nui.

            I ka manawa pokole no i holo koke ae ai ka lohe a puni ke kahua hoomoana, a pau mai na mea apau e lululima me na malihini i pakele mai ka make mai mahope iho o ka haalele ana i Sanadinafa. A mahope koke iho no ua laweia aku la lakou i kahi o ke alakai nui, a o Kapena Danalope, ua lawe loa aku oia i kahi o ke kauka no ka wehe ana i ka poka oloko o kona poohoiwi.

            Ua loaa iho la ka ike maopopo i na Warena ame na kepan hoaaloha o ka au like ana mai i ko lakou pakele mai ka lukuwale i maopopo ko lakou make ina aole na hoopakele ana, a nui ino ko lakou hoomaikai no ia mea a no ke kaa hou ana iloko o ka huina o na hoaaloha, a ma ke papakaukau a lakou e nonoho ana no ko lakou paina ahiahi ua nui ino ko lakou aloha i ka loaa hou ana he manawa e noho ai ma ka papaaina o ka poe naauao a malamalama, oiai, aia wale no lakou iloko o ka pouli maloko o na la he umi i hala ae.

(Aole i pau.)

 

MAKAIKIU

PETERIKA MAFE.

Ke Kolopa Uneune i na Nihiliti.

Ka Hoopakele o ke Duke Kiekie.

-----

MOKUNA VII.

HOOMAKA'UKA'UIA O PAULO OLOVEKA.

            "Heaha hoi keia," wahi a kekahi i pane ae ai.

            O keia haule ana o keia poe me ka haluku nui oia ka mea nana i hoala mai i ka poe e hiamoe ana iloko o ua hale nei a kiei ae la kekahi poe ma na puka aniani e ake ana e ike mai i ke kumu o ke ala ana mai o keia haluku nui, a iho mai la no hoi kekahi poe ilalo. Holo mai la hoi kekahi poe mai kekahi mau hale e aku e ku kokoke ana, a piha ae la ia wahi i na kanaka.

            No Borisa hoi ame kona hoa, ua kiei aku la laua iloko a @ aku la me ka awiwi, alaila huli ae la a holo aku me ka mama i hiki ia laua ke holo.

            Mai kahi a ka makaikiu e pee ana ua hiki no iaia ke ike aku i na mea apau e hanaia ana mawaho. He elua mea i ko ma keia hana ana i hana ai oia hoi ka hoala ana i ka poe e noho ana ma ia wahi a nui na kanaka i akoakoa ae; o ka lua, oia no kona ike maopopo ana i ka poe i hahai aku mahope ona.

            He elua mai waena ae o kela poe ekolu i haule ai ma ke alapii, oia no na kanaka i noho aku me Ivana ame Borisa. O ka @ oia no ka bakipa nana i hookuu aku iaia i waho. O ke @ i ku pu ai me Borisa oia no kekahi o na Nihiliti a ka makaikiu i ike ai iloko o ka halawai i loaa ole no nae ka inoa ia Peterika M@. No Ivana aole oia iwaena o keia poe.

            "He kanaka hoomamao maoli no o Ivana iaia iho mai ka @ aku," wahi a Peterika iaia iho no, me kona kaumaha i ke komo pu ole ana mai o Ivana me kona mau hoa.

            Ua pi-o-o maoli no ka poe e noho ana ma keia hale a aia kekahi poe ke hoike la i ko lakou mau manao e pepehi i keia poe @ hiamoe o ka wanaao ia lakou e makaukau ana e haalele iho ia wahi.

            Ua puka aku o Peterika iwaho mai kona wahi i pee ai a @ ke huikau pu la me na poe oia wahi, a e like me ka nui ana mai o na kanaka i hele ae ai pela no hoi ko ka makaikiu palekana loa ma kana mea i hana ai.

            Iloko o elua a i ole ekolu paha minute mahope mai ua hiki loa i ua makaikiu nei ke haalele iho ia wahi me ka hoohuoi ole ia mai e kekahi Nihiliti, ina aia kekahi o lakou malaila ia manawa.

            Ma ka hoomaopopo a ka makaikiu ua hoopuhili maopopo loa ia ua poe Nihiliti nei, no ka mea mahope o ka hoike ana aku o ua pee la i ko lakou kumu o ke komo ana iloko o ka hale a hoomalielieia na manao uluku o ka poe e noho ana ilaila, ua huli aku la lakou a hoi no ko lakou mau wahi pakahi.

            No Peterika hoi, ua hooholo iho la oia iloko ona he mea pono ole nona e hoi pololei i kona wahi, nolaila, ua hele aku la oia no kekahi hale hoolimalima a malaila oia i hoololi loa ai i kona ano. Alaila kali iho la oia no kekahi manawa mamua o kona haalele ana iho ia wahi a hoi anu la no kauhale, a hiki aku la ilaila i ka hora ekolu o ka wanaao.

            Loaa aku la iaia he leta na Nikoloka i kakau e hoike mai ana ia Peterika ua kaawale aku oia ame Kikalina no kekahi hana @.

            "Ke manaolana nei wau ke holopono mai nei kau hana." i heluhelu iho ai o Peterika i na manao hope. "Ina he makemake kou e ike aku ia Paulo Oloveka e hele aku oe i ka Hotele Waladofa. E ha'i aku oe i ko'u inoa iaia a he manaolana ko'u e hookipa mai ana kela ia oe."

            Waiho ae la o Peterika i ua leta la a noho iho la oia e noonoo.

            "He mea maa mau no hoi keia," wahi a Peterika, "aia ka h@ o ko'u wa e makemake ai e loaa mai na kokua ana a Nikoloka Kaaka ia'u alaila oia iho la kona manawa e paa ai i kekahi ahana okoa. Heaha no la hoi, e hana hookahi ae no wau i keia hana."

            Mamua o kona hoi ana e moe ua hoolilo aku oia i kekahi m@ wa ma ka nana ana ame ka huli ana i na lako uwila a Nikoloka Kaaka a hoao pakahi iho la oia ia mau mea.

            O na olelo a Petero i ha'i mai ai iaia e pili ana no ke "kanaka loea" ame kana mau hoakaka e pili ana i ka hoohioloia ana o ka hale ilina oia na mea nana i hoala i ko Peterika noonoo. Aia iloko o ka makaikiu ka manao e lilo mai ana ka mana o ka uwila i mea kokua iaia, a o keia poe elima e hahai nei mahpoe ona aole e @ ko lakou hoomau i ka huli ana mai iaia.

            "Ina au e loaa ana i keia poe," wahi a Peterika iaia iho, "he mea  pono ia'u e hana i kekahi hana e paa ai keia poe elima ia'u."

            O ka waihona uwila pakeke e like me kela a ke kanaka loea i lawe pu ai me ia a i ha'iia mai hoi iaia e Petero aole ia he mea hou i makaikiu oiai aia he elua a ekolu oia ano iloko o ko Mikoloka Kaaka keena oihana.

            Koho iho la oia i kekahi o keia mau mea ana hoi i manao a ua lawa kupono no kana mea i manao ae e hana a hoopaa iho la ma ia mea me kona apo-opu i mea e loaa ai ke ki nana e hookuu a @ paa ai ka uwila i kona lima i ka manawa ana e nao iho ai iloko o ka pakeke o kona puliki. Alaila oki iho la oia he wahi puka iloko o ua pakeke nei a hookomo ae la i ke ki iloko olaila. Ma keia hana ana a ka makaikiu ua hiki iaia ke hele me ka lawa ole i ua mea la iloko o kona lima, a he mea hoi ia e kaawale ai kona mau hana @ ke pale ana ae iaia ke uia oia me na pilikia.

            Mahope o ka pau ana o keia ua hoopaa iho la oia i kekahi @ o ka uwea keleawe me ka waihona uwila, a o kekahi poo hoi ua @ iho la oia a loihi kupono e hiki ai iaia ke ku pololei iluna me ka pa no nae o ia poo iluna o ka lepo. Me keia poo e lewalewa ana ilalo ua hoopaa iho la oia i kekahi wahi apana kila i mea e kaumaha ai.

            O ka lua o ka uwea iho la no oia me ka waihona uwila. O keia ka uwea loihi o umi-kumamalua kapuai a ua pokaaia a paa, a aia no hoi ma kekahi poo o keia uwea ua hoopaaia he wahi apana hao kila uuku. O keia ka uwea ana i manao ai e hoolei imua o na Nihiliki i ka po me ko lakou ike ole mai, a o keia hoi kekahi o na hana hoopuhili a ua makaikiu nei i manao ai e hana aku maluna o kona mau enemi.

            Mahope o kona oki ana he mau puka hou aku ma kona mau pakeke ua pau pono iho la kana mea i manao ai a ua hiki hoi oia ke hoohana aku i keia mea i ka oni hookahi ana o kona lima hema me ka nui ole o ka hana.

            I ka pau ana o keia mau hoolala ana wehe ae la oia i ka waihona uwila ame kona mau pono apau a noho iho la oia e noonoo i kana hana nui hookahi i koe oia hoi ka hooko ana i ke kauoha a na Nihiliki i waiho mai ai nana e hana e pepehi ia Paulo Oloveka.

            "Well, he mea pono no ia'u e hooko aku i keia kauoha," wahi a ka makaikiu iaia e noonoo ana; "aka o ka ninau nui pehea la wau ehana ai me ka loaa ole aku o kekahi poino ia Paulo Oloveka ame ka poino pu ole hoi o ko'u ola?"

            O keia kekahi ninau ano nui a pohihihi a ka makaikiu e noonoo ana a he mea hoi ia nana i luaiele i kona noonoo ma o a maanei.

            "He mea pono ia'u ke hooko i ka'u mea i ae ai i keia poe lapuwale," wahi hou a ka makaikiu iaia iho, "a ke hooko ole wau e lilo ana wau i mea ino loa ma keia ilihonua."

            No kekahi mau minute aia oia ke holoholo la iloko o kona lumi me ka noonoo nui. Mahope mai noho iho la oia ilalo o kekahi manawa, a ho-a ae la i kona ipupaka a noho iho la e heluhelu buke eia nae aole i maopopo iaia kana mea e heluhelu ana oiai kona noonoo nui apau aia maluna o keia ninau nui nana i huki aku i kona