Ka Nupepa Kuokoa, Volume XLIV, Number 2, 12 January 1906 — J. K. NAONE UA HALA. [ARTICLE]

J. K. NAONE UA HALA.

Ma ka po o ka la S o keia mahina me he aihue la i ka po. ua kipa a'e la na lima menemene ole o ka make ma ka home o John K. Naone, ma Pauoa, Honolulu nei, a kaili aku la i ka uhane mai ka hale kino aku o John K. Naone, i ke 64 makahiki, 11 malama ame 7 la o kona ola ana, a waiho iho la i ka lepo i ka lepo. 0 John K. Naone, oia ke keiki hope a ka Makua Naone me Pele, kana \vahine mua. O Hao, oia ka mua, o Hama, o Daniela, o Meli, na keiki mua mamua o ka mea i hala aku la. Ua hanauia oia i ka la 31 o lanuari, 1841, ma Pauoa, a ua hoonaauaoia oia ma ke Kula'lii o Kahehuna. Ua maleia oia me Mele Ahia, aole na'e he hua i loaa a'e ma ko laua 'kihapai. Ua noho lunapaahao oia no kekahi mau makahiki, a he luna auhau hoi no ka Apana o Ewa no kekahi mau makahiki. 1 ka wa o na Kamehameha, ua komo oia iloko o na pualikoa kiai, a he lukanela hoi no ka pualikoa o ka Haku o Hawaii. Ua noho kapena oia no ka pualikoa Prince Own, a he alii kipu hoi no ia puali. He hoahanau oia no ka Ekalesia o Kawaiahao, a he lala no kona papa himeni no kekahi mau makahiki. O ke pena kana hana makaukau loa, a ma ia ano hana no oia i lawelawe ai a hiki wale i kona palupalu ana a waiho okoa. He makua oia no ka Apana o Pauoa ma na hana pili i ko ke Akua Aupuni, a oia no hoi ka luna pa-ilina o ia apana. He ikaika oia ma Jia hana pono apau, a i ke Sabati mamua iho o kona make ana. ua hele no oia i ka halawai kakahia&a ame na halawai o ka auwina la. a ma ia mau halawai ua ikaika kana mau olelo alakai. Ua papaia oia e kona kauka aole e hooikaika i ka olelo ana, oiai aia iloko o kona puu■wal ka pilikia; aka na'e ma kela mau halawai i hoikeia a'e nei ua uhakiia iho la ia mau a'o ana. a o ka hopena ua loaa mai ka luaiakoko nana i hoonawaliwali loa iaia, a hala wale aku la. Alohg. no!

Ma ka auwina la o ka Poalua nei i maneleia aku ai koha kino wailua, a waihoia ma ka ilina o Pauoa.