Ka Nupepa Kuokoa, Volume XLII, Number 18, 3 May 1907 — MAKEMAKE I KIA HOOMANAO KA HALE MISIONA KAHIKO. [ARTICLE]

MAKEMAKE I KIA HOOMANAO KA HALE MISIONA KAHIKO.

He halawai ka i malamaia ma ke ahiahi o ka Poaono i hala e ka Ahahui o na Keiki o na Misiona Hawaii ma ka home o Kiaaina Carter. O keia no hoi ka hui i ikeia ma ka inoa ka Ahahui Hoahanau. O na lala o keia Ahahui o lakou no na keiki a na Mikanele i hoea mua mai i Hawaii nei no ka hoolaha ana ika Euanelio o Kristo. Eia no ianei kekahi poe o lakou ho"i ka poe ma ka halawai i hoikeia ae nei, aka, o kekahi poe keiki o keia hanauna aia lakou ma na aina mamao a i noho hoi ma na oihana ko'iko'i. 0 kekahi o lakou i lilo i kanaka kaulana oia no ka mea nana i kukulu i ke kulanui o Hampton o Amenka, ka home hoonaauao o na Paele e noho nei ma ka Henfa o Amerika Huipuia. A o kekahi o lakou oia no ka mea i pii ae nei ma kekahi o na oihana kiekie o ke kulamii o Havaka i Amerika. -t) ka halawai i malamaia ma ka Poaono i hala ma ka home o ke Kiaaina, iloko olaila ka noonooia ana no ka malama ana i ka Hale Misiona e ku nei i Honolulu ma ke ano i kia Hoomanao no ka hoomanao i na hana a na 'makua misionari i hala. Ua hooholo lokahiia e malamaia keia hale a e luluia i haawina dala no ka hooponopono hou ana ae i na wahi i popopo, no ka mea, he liale keia i kukuluia mahope koke iho no o ke kipa ana mai o na misionari. He manawa i hala ae ua lilo mai la ua hale nei ia Mr. C. M. Cooke ana ke kuai ana a nana hoi i haawi aku i ka Ahahui Hoahanau a oia ia m keia Ahahui e liuliu nei no ka hana hou ana. Mamua o ke kukuluia ana o ka Hale ua hoohalahala loa ae ka moi i ke kukulu ana i hale a oi ae ka nui mamua o ko ka moi, aka maftope o ka noho hoomanawanui ana, a hala kekahi manawa ua haawi mai la ka moi i kona ae no ke kukulu ana a pela oia i ike nuiia ai a Hiki wale 4 keia wa ona eku nei me ke popopo no nae. O kona mau lako laau mai ka Papa Bosetona mai no ia o Amerika. 1 ka wa e paa ai ka hale alaila e malamaia ana na mea kahiko apau o ka oihana misiona o ka hoolahaia ana o ka Pono Kristiano iloko o Hawaii, a o keia ana kekahi wahi e nele ole ana i ka makaikaiia e na malihini. Eia keia hale ma Alanui Moi, ma ka aoao makai no nae i kupono vke Kula Kaikamahine \o Kawaiahao a manae iho hoi o ka Pa-luakini o Kawaiahao.