Ka Nupepa Kuokoa, Volume XLIII, Number 29, 17 July 1908 — HE MELE NO KA MOKU HAWAII. [ARTICLE]

HE MELE NO KA MOKU HAWAII.

Heaha nei hana a Hawail, Hoohaehae nei i ke Kaiaulu. Ua kohu olali no ka moana, Ka pakika, ka pahee ka holo imua, Hoike ae ana i kona nani, I ka hae Hawaii i ke kia liope. E ha'i ae ana i ka lehulehu, He kuini au no ka Pakipika. He kaeaea no ka moana, No na kai anu o Kaleponi, Good-bye ke aloha e ka lahui, A hoi mai au me ka lanakila. A waho o ka Hale Ipuknkui, E haawi ke aloha ani hinaka. Kaalo mawaho o Kaimana Hila, Hao mai na ale oehuehu. Au ana i ke kai o Pailolo, Ka moana kai nui kai lipolipo. Aole i hopo Kapena Harris, Ka alona o ke kai o Kaleponi. Ke kilohi iho oe ia Hawaii, Kohu mahimahi i ka ili o ke kai. Hooheno ana me ke Kualau, Me ka punohu ula pio i ka lewa. E o e Hawaii i ko lei, Nene ahiu o,Hawaii. Hakuia e KAUAKUKALAHALE.