Ka Nupepa Kuokoa, Volume XLVI, Number 50, 10 December 1909 — HE HOOMAIKAI. [ARTICLE]

HE HOOMAIKAI.

I ko makou hoaloha maikai iloko o ka Haku, Mr. A. Paaniani, i na hoi ame na keonimana i haawi ia oukou iho no ka hookauwa ana, me ka nana ole i ka luhi, ka inea ame na hoino ia mai no ka hana maikai. Ka haawi ana hoi i ka oukou mau kokua ana i na keiki hinieni o kuu aina nei, oiai hoi lakou he poe malihini iloko o ke kulanakauhale o Honolulu. Ia oukou hoi e kuu poe keiki aloha iloko o ka malu o ka Ekalesia o Halawa nei, a mamuli hoi o ka oukou huakai iloko o ke kulanakauhale o Ho« nolulu, e wehe ana hoi i mau Ahamele no ka imi ana, huli «na, hooikaika ana hoi i mea e loaa mai ai kekahi mau kokua no na mea e pili ana i ko kakou

luakini, oiai hoi oia e hoomaemae hou ia aku ana. Nolaila, ma ka aoao o ka, Ekaleaia ma o'u nei, ke haawi aku nei i ka hoomaikai nui, ka hoomaikai kiekie loa ia oukou a pau loa ka poe i haawi i ko oukou puuwai lokomaikai, ko oukou lima aloha, e hooikaika ana me ka hoomanavranui i mea e loaa mai ai na kokua no ko makou luakini. A ke haawi pu aku nei au i kuu lima akau aloha, no ka hoolauna ana aku i ka Ekalesia o Halawa me oukou iloko o ka oukou mau hana maikai apau, amo na kokua aloha i loaa ia makou ma ka oukou hooikaika ana. A ke nonoi ae nei au i ke akua mana loa e awaiaulu ia kakou apau iloko o ke apo o kona aloha. I hookahi kakou iloko o ka Haku Amene. J. KAALOUAHI. Kahu o ka Ekalesia o Halawa, Molokai.