Ka Nupepa Kuokoa, Volume LIV, Number 32, 11 August 1916 — KA HOME NO NA KEIKI MAKUA OLE MA MANOA. [ARTICLE]

KA HOME NO NA KEIKI MAKUA OLE MA MANOA.

Aole he kiahoomanao pookela e ae a Mr. G. N. Wilcox o Kauai i kukulu ae ai nona iho i kona wa e ola nei, elike la me kana makana o kanalima kau* lani dala i haawi ae ai no ke kukulu ana aku i home no na keikikane makua ole mauka ae nei o Manoa. O keia kekahi 6 kana mau kokua manawalea lehulehu i haawi ae ai no na Lana maikai maloko nei o keia Teritore, a īna pela iho la ke ano a kekahi poe kuonoono e ae iloko nei o ka aina e hana ai, ma ke kokua ana aku i ka poe nēle a pilikia maoli, ua hoopiha aku lakou i kekahi heluna nui o na ohana ma Ha'waii nei, me na manao hauoli, e hoohauoli pu ia aku ai no hoi lakou, no ka lakoa mau hana kokua aloha. Mamua koke aku nei no, he mau pule kakaikahi wale ae nei no i hala, ua haawi makana ae o Mr. B. F. Dillirigham he mau kaukani o na kaukani dala, no kekahi aaau home, ame na hale o ka lehulehu; he kiahoomanao ia nona, e ku mau aku ana iloko o ka noonoo o ka poe i hoopomaikaiia , mamuli o ia man makana. He poe e ae kekahi iwaena o kakou, i haawi pu ae i na makana, ma ke ano kokna, no kela mau home, a no kekahi nau hana kokua e ae; aka nae he hookahi mea a ke Kuokoa i ike ole i ka hanaia e ko kakou poe waiwai, o ia no ke kokua ana aku, i wahi e loaa ai he mau home no ka poe uuku o kahi loaa, a i ole, he poe nele a pllikia maoli no paha. Eia iwaena o kakou e noho nei, he nui a lehulehu wale o na kanaka i makee e loaa he mau home no lakou iho ame ko lakou mau ohana, o Jia pilikia trai nae e hiki ole ai ke hookoia kela makemake, o ia no ka nele i ke dala, o ko lakou mau uku pule a mau uku mahina paha e loaa nei, ua lawa wale no ia no ka malama ana aku ia lakou, a koe aku ka poe nunui o ke dala o ka mahina a uuku o ka ohana, ua hiki ia lakou ke hookaawale i kekahi hapa o ko lakou uku. no ke kuai ana aku i mau home ponoi no lakou iho. He hana pookela na kekahi poe waiwai a kuonoono oloko nei o ka aina, ka haawi makana ana ae ma ke ano hoaie, i ka poe e makeMake ana e kuai i mau home no lakou, me ka hoihoi hou ia mai o na dala e ka poe i loaa na home ia lakou,* alaila haawi aku ana ia mau dala i kekahi poe hou ae no ke kuai ana i mau home, o keia kekahi o na hana kokua oiaio, a no ka mea ua ae he heluna nui o na ohana, mai ka noho hoopiliwale ana, mai ka noho auwe ana; aole auanei e nele ke kukuni paa ia iloko o ko lakou puuwai na manao mahalo kui'o no ka poe i kokua aku ia lakou. O keia kekahi kokua kupono loa, aole o na kokua e haawi ana i mau uku kiekie no ka poe na lakou e malama ana i kekahi mau home i hookaawaleia no ka lehulehu, ma ke ano e ikeia mai, aka o ke kokua oiaio, o ia no ka hoopakele ana ae i kekahi poe ku maoli i ka pilikia i na home kupono o noho ai me ka oluolu. _ ■ >