Ka Nupepa Kuokoa, Volume LV, Number 4, 26 January 1917 — MAHUKA HE MAU KAIKAMAHINE O KAWAIAHAO. [ARTICLE]

MAHUKA HE MAU KAIKAMAHINE O KAWAIAHAO.

Ma ka po o ka Poakahi aku la i hala, i mahuka mai ai he ewalu mau kaikamahine mai ke kula kaikamahine mai o Kawaiahao, mauka o Manoa, eia nae, he eha o kela mau kaikamahine i hoi hou aku i ke kula, mahope o ko lakou loaa ana, a he eha i hooleia ko lakou kuleana e hoi hou aku iloko o ke kula. He mau kaikamahine kela no lakou na makahiki mai ka umi-kuma-makahi aku, a i ka umi-kumamalima. I kulike ai me na mea i hoomaopopoia, no ke kumu o ka mahuka ana o kela mau kaikamahine ewalu, penei no ia: Mamua koke aku nei ua hoounaia aku la he kaikamahine Pukiki no ke kula kaikamahine o Kawaiahao e ka Lunakanawai Whitney, me ka ae ole ia o na makua e hele e ike i ka laua kaikamahine ma na manawa e ae, koe wale no ka manawa i hookaawaleia, no ka ike ana i na kaikamahine. Ua lilo ka ike ole o na makua i ke kaikamahine, a pela hoi ke kaikamahine i kona mau makua, i mea maikai ole, a ua lilo hoi na hoao ana a na makua e ike i ka laua kaikamahine, i mea waiwai ole; nolaila ma kekahi mau manawa, ua hoolala iho la kela kaikamahine Pukiki me kekahi mau kaikamahine e ae he ehiku ko lakou nui, e holo mahuka mailoko aku o ke kula. Mahope o ka pau ana o ka aina ahiahi, rna ka Poakahi nei, a i ka wa hoi i kani mai ai ka bele, no ka hele ana na kaikamahine apau e hoopaa i ka lakou mau haawina, o ka wa iho la ia a kela mau kaikamahine ewalu i mio aku ai, hoi no ko lakou mau wahi. I ka wa i ikeia āi ka holo mahuka ana o kela mau kaikamahine, ua hoike koke ia ae la ka lohe i na makai, a ma ka Poalua mai i hoihoi hou ia mai ai he eha mau kaikamahine, he elua na ka makai, a he elua hoi na na makua. He eha o kela mau kaikamahine i hawiia mai ka ae no ka hoomau ana aku i ko lakou noho ana maloko o ke kula, aka no ke koena aku o lakou, e ku okoa ae ana imua o ka aha hookolokolo no ka hooloheia mai o ko lakou hihia. LONDON, Jan. 23—He lono mai Berlin mai i ka Reuters Agency o keia la ke hoakaka ana ua manaoio loa ia ka lanakila e na Mana Waena ma keia kaua elike me ka hoakaka a ka poe haiolelo ma ka po nei ma kekahi papa ahaaina maloko o Berlin i haawiia ae ai e na peresidena o na hale ahaolelo Kelemania. Ma ka hora 7:30 o ke ahiahi o keia Poalua ae, lanuari 30, e malama ae ana ka hui hana poi o na Hawaii, ka Hawaiian Taro and Mercantile Co., Ltd., he halawai ma ka home o ka Pe residena Isaia Kaaihue, ma Kakaako, no ka hoolohe ana i ka hoike a na luna nui mua o ka hui, ame ke koho ana i na lunanui hou no ka hui.