Ka Nupepa Kuokoa, Volume LVI, Number 15, 12 April 1918 — HE HOALOHALOHA NO KUU MAMA HELELOA, MRS. KIKA KAUANUI [ARTICLE]

HE HOALOHALOHA NO KUU MAMA HELELOA, MRS. KIKA KAUANUI

Ia oe e Mr. Sol. Hanohano, Lunahooponopono o ka Nupepa Kuokoa, ka ipukukui malamalama o ka lahui Hawaii, Aloha kaua: —E noi aku ana au i kou oluolu no'u hoi kekahi rumi kaawale o ka hiwahiwa, no ka'u wahi puolo waimaka a ke aloha e kau ae la maluna, i ike mai ai na kini makamaka o maua, e noho ana mai ka hikina a ka la i Haehae ahiki aku i ka mole olu o Lehua, no kuu hoa pili he makua, ua hala i ke ala hoi ole mai. Luuluu wale au i ka hana a ke aloha. Ma ke awakea o ka Poakahi, Feb. 18, 1918, ua oluolu i ka Mea Mana Loa ke kaili ana aku i ka hanu ola o kuu mama, Kika Kauanui, ma kona home noho ma Kulaholoa, Mapulehu, Molokai, a moe aku la i ka moe oni ole i na kau a j kau. Ua hauauia kuu mama ma Honolulu, | Oahu, i Dec. 22, 1862, mai ka puhaka mai o Manuel Testa ame Pohano Naulei, nolaila ua piha na makahiki he 55 iaia me na mahina keu. He 26 wale no ona mau ia i kaa ma'i ai, ku kiawe ma ka wawae akau, a ua lilo nae i blood poison a make aku la. Ua anuanu ka home, ua hele oe e mama; auwe kuu kaumaha e, kuu hoapili, hoa hele hoi o keia alakahi o Molokai a Hina, hoa auaukai hoi o keia mau moana e waiho mai nei, ua pau no ka wa mau loa, aole kaua e hele hou ana. He makuahine oluolu a heahea oia; . auwe kuu mama o ka mea loaa ole ia'u ke imi hou aku, luuluu wale loko i ka hana a ke aloha. He hoahanau oia no ka Ekalesia Kalawina o Kaluaaha, Molokai. Ua haalele iho oia mahope nei ehiku makou keiki ame umi kumamalima moopuna e paiauma aku nona ma ke ka'e o ka muliwai eleele o ka make. Nolaila ke haawi aku nei au i ka hoomaikai nui i ke Kahu I. D. laea a i ka poe no apau i komo pu mai me a'u iloko o na hora o ka ehaeha a i lu iho hoi i ka lakou mau makana pua maluna o kuu mama. Nolaila e hoomaikaiia ke Akua a no ka mea Nana no i haawi mai a Nana no i lawe aku, ame na keiki o ke keena pa'i ka'u hoomaikai nui. Owau no me ka luuluu, MRS. HELELANI CRANE. Mapulehu. Molokai, Apr. 6. 1918.