Ka Nupepa Kuokoa, Volume LVII, Number 45, 7 November 1919 — O JOSEPH MAKANANI UA HALA [ARTICLE]

O JOSEPH MAKANANI UA HALA

E ka Lunahooponopono, Aloha oe: - Elike me ka uwila e anapu ana ma na paia lani e nakeke hele ana, pela iho la ka hiki ana mai o ka anela o ka make i ko'u hoa kauwa, Mr. Joseph Makanani, nolaila e oluolu mai kou ahonui i keia lono kaumaha e hookomo iho ma kahi kaawale o kekahi rumi o ka kaua milimili a na ka lau makani e kukini aku, i ike mai na kini mano a lehu o Kauai. Ua kiiia mai au e hele ilaila a malaila au a pauaho mai, ahiki i kona hanu hope loa, a mahope hiki mai ke Kauka Cooper. Ma ka umauma wale no ka eha, no eono wale no hora i hoomaka ai ka eha, a pilikia loa, pili loa keia eha ma ka puuwai, a make ma ka hora 5:45. Ua nui na makamaka ame na hoaloha i hiki mai e puili pu i ke kaumaha me ka wahine i hooneleia i ke kane. O makou iho no ke hoomaikai a komo pu aku nei makou, kou mau hoahanau e noho ana ma Kalauao, i kou kaumaha e hoomama mai, a ke pule nei makou nou e Mrs. Julia Makanani, mai kanalua i ka oiaio o ka. euanelio e nee imua, e nee imua, a o makou iho no, ke hoonani aku nei i na Lani e kokua mai ia oe e hoomama mai kou noonoo. O kou mau hoa iho no iloko o ka Euanelio hookahi. MRS. PONI KEOLA, GEO. KEOLA, MRS. ANNIE P. KEOLA, MISS HIHINA KEOLA, PETER KEOLA, MRS. ANNIE APUA, W. K. APUAKEHAU, MANUEL PILIPI, MRS. KAUMAI. Kalauao, Ewa, Oct. 29, 1919.