Ka Nupepa Kuokoa, Volume LIX, Number 25, 24 June 1921 — Page 3

Ka Nupepa Kuokoa

 

 

He Moolelo no ko

Helena Simoa Lanakila Ana

A I OLE

Ka Hoowalewaleia Ana o Halebatona

 

            “He mea oiaio ia au i olelo mai la, a no ka mea, e aho ko’u make ana mamua o kuu ike ana aku ia oe he wahine na kela kanaka i hihia mua i ka wahine e! He mea oiaio ua hauoli oe no kou kaawale ana mai kela kanaka mai, a pehea la. he wahi aloha iki no anei kekahi iloko ou no kela kanaka?”

            “Alaila, ina no ka mariea nei ou me Habati, he mare wale no anei ia no kou manao e hoopakele ia’u, aole me kou puuwai ea, oia anei?” a hoomaka iho la ka makuahine e ha’uha’u uwe me ka hiki ole iaia ke hookuo hou iho.

            “E mama, e hoomama oe i kou noonoo! O oe hookahi wale no ko’u hoaloha oiaio ma keia ao a nou wale no hoi an e ola aku ai. no ia kumu i mea nou e ola ai ua hiki ia’u ke haawi ia’u iho no kekahi mea, ina he mea ia nou e hoopakeleia ai—kela ame keia mea, i mea e hoomauia mai ai kou noho pu mau ana mai me a’u.

            “Ua lohe aku la oe i na mea apau, a oiai aole au e mare ana ia Habati, ua maopopo loa ia’u ko kaua nele i ka mea nana e malama mai, a e haawi mai hoi i kekahi kokua iloko o ka manawa pilikia elike me ia i na la i hala, aka, mai kaumaha oe, ua hiki loa ia’u ke hoopakele ia oe. Hamau!” i papa aku ai i ka makuahine, no ka mea, ia manawa ua lohe aku la oia i ke kani ana mai o ka hele. “O laua kela i hookani mai la i ka hele!” wahi ana.

            “E ae aku ia laua e hele mai,” wahi a Mrs. Simoa, me ka aaki ana iho o na ku’i. “Ua makaukau au no laua, a e lohe koke aku ana o Habati i ka mea a’u e noonoo nei nona!”

            “E mama.” wahi a Helena, me ke kau pu ana aku i kona lima maluna o ka poohiwi o ka makuahine. “E lawe mai ana au i ke kahunapule maanei me oe no ka hoolaukanaka ana aku ia oe. a e oluolu oe mai hoike iki aku iaia i kekahi mea a’u i hoike aku nei ia oe ahiki i kuu hoi ana mai, oiai hoi an e kamailio mua aku ana ia Habati. He mea ano nui ka’u i makemake ai e kamailio aku iaia mawaho ae o ke ninau e pili ana i kona ano hookamani imua o kaua; e hiki ana paha ia oe ke koho mai i ka’u mea e manao nei e kamailio aku iaia a aole paha, a pela hoi ma ka’u mea e manao nei no kana mea pono e hana aku ai me ka hoopanee ole, ina e hiki ana i’u?”

            “Hookahi no paha au mea e hana aku ana o ke noi aku iaia e ae mai e mare me Mele, ke ae mai hoi,” i pane aku ai ka makuahine.

            “Ae. oia ko’u manao. a o ka hana no hoi ia a’u e noonoo nei e noi iaia; e hele ae ua.” a ku koke ae la a hele aku la ka mama maloko aku o ka holo.

            “E oluolu e hoike mai owai kela mawaho?” i ninau aku ai o Helena maloko aku o ka ohe kamailio.

            “Owau no keia o Habati,” wahi a Helena o ka lohe ana aku.

            “Pii loa mai iluna nei.” i pane aku ai o Helena. a kaomi pu aku la i ke pihi; alaila wehe mai la i ka puka a ku iho la me ke kakali ana o ko Habati ma komo mai, me ke keokeo pu o koaa helehelena ame ka haalulu pu, i kona manawa i ike aku ai i na malihini e pii mai ana.

            Aohe i liuliu iho ku ana no o Habati mamua ona me ka helehelena hoihoi ame na kaina wawae mama, no ka mea na piha hauoli o Kawelohea ia manawa no ke kokoe loa o ka manawa e hoohuiia ae ai oia me Helena ma ka mare. a o kekahi, ua ike mai la oia ia Helena ua makaukau, a mahope mai no hoi ke kahunapule o ka pii ana mai a kau ana iluna.

            Ia kau ana mai no a Habat iiluna hele mai la oia a hui me Helena a haawi mai la i kona lima no ke aloha ana. eia nae. ia hookokoke ana mai a ua o Habati na hiki loa iaia na manawa ke ike mai aole kela ano hoihoi o Helena iaia mamua, he helehelena kukona ko Helena e nana aku ana iaia ia manawa. No ke kahunapule ko Habati kumu o ka hilahila ana iho no ko Helena ohaoha ole aku iaia.

            Eia nae ku ae la o Habati ma kekahi aoao i hiki ai i ke kahunapule ke hele mai imua, me ka i pu ana mai ia Helena: “E Miss Simoa, e oluolu oe e hoolauna aku au i ka Rev. Have ia oe.”

            “E oluolu mai ana anei oe e lawe aku au ia oe imua o mama no kekahi mau minuke, e Mr. Have, oiai hoi au e kamailio ana me Habati nei?”

            Aohe pane mai o Mr. Have, aka, hahai mai la oia mahope o Helena e alakai la mamua noloko o ka rumi hookipa, a ia komo an aku a laua, hoolauna aku la i ke kahunapule i ka makuahine. alaila nonoi aku la e hookuu mai iaia, a hoi hou mai la oia no kahi a Habati e ku ana maloko o ka holo. kahi hoi a ua o Habati e ku ana noonoo no ka Helena mau mea e kamailio aku ana iaia.”

            Ua makemake ua o Habati i hiki mua mai i ka hale o Helena ma mamua ae o ka hora umi-kumamalua. aka, mamuli o ke ano ulolohi o Mr. Have, pela iho la i lohi ai ko laua hiki ana mai, a ua ano kua uluhua maoli ua o Habati i ke kakali ia Mr. Have.

            “Heaha kau mea nui i makemake ai e kamailio me a’u, e kuu aloha?” i kaa mai ai na ua o Habati ka ninau mua ana.

            “E oluolu oe e komo mai iloko nei,” i kahamaha koke aku ai o Helena me ka haalulu iki ana ae o kona kino no ka Habati olelo ana mai, “kuu aloha.”

 

MOKUNA XXI—Ke Kamailio ana me na Olelo Pihoihoi

 

            Hahai aku la o Helena i ke kanaka opio ahiki i ke komo pu ana aku iloko o ka rumi, me ke pani malie ana mai i ke panipuka mahope ona, i ia manawa i ike aku ai o Helena i ke ano piena o ke kanaka opio no ka ike ana aku ia Mele e noho mai ana iloko o ka rumi.

            Ke ku la o Habati nana pono ia Mele i ka noho mai mai ke poo a na wawae, me he mea la ua kuhihewa paha ka ike a kona mau maka, a eia a i ka huli pono ana mai o Mele e nana iaia akahi no ua o Habati a ike aku eia ka o ke kaikamahine no ana o ka pauaka ana mamua ke noho mai ana.

            “Auwe, o Mele Wadale!” i hooho ae ai ua o Habati me ka leo o ka mea i piha me ka inaina. “Heaha kau onei o ka miki ana mai nei? Mahaoi maoli no oe o ka hele ana mai! O ka hale kou wahi kupono loa e noho aku ai, aole o keia wahi!”

            He helehelena leleiona ko ua o Habati ia manawa, e lele e wale ana no kona mau maka i o a ianei, pupuku kona lae, nee aku la a ku ma ka aoao o Mele a hopu aku la ia Mele me ka ikaika ma ka lima, a hooluliluli ae la me ka ikaika elike me ke kaka ana a kekahi popoki i ka iole.

            “Pehea oe i aa ai e hele mai ianei a hoike ae ia Helena i na mea apau?” wahi hou a ua o Habati o ka ninau ana iho, me ka hoomaha ole iho a noonoo i kana mau huaolelo ponoi no ka huli mai a hoahewa iho iaia.

            Ia ike ana aku o Helena i ka hopu ana aku o ua o Habati i ka lima o Mele a huki mai la me ka ikaika, lele koke aku la oia me ka hikiwawe loa. a ku mawaena o Mele ame Habati, a pale mai la ia Habati me ka i ana aku:

            “Hookuu ae oe iaia!” mai paku’i hou iho oe i mau olelo hoino hou iaia maluna iho o na hana hewa ko’iko’i mua au i hana ai maluna ona! He mea oiaio ua hoike mai oia ia’u i na mea apau, a i ha’i aku au ia oe, ua nui kuu mahalo iaia no kona hele ana mai nei ianei a hoike mai nei ia’u i na mea apau au i hana aku ai maluna ona, a mamuli o kana mau mea o ka hoike ana mai nei ia’u. ua hoopakeleia ae au mai kekahi hana hewa ko’iko’i loa i oi aku ke ino mamua o ka make.

            “Ina aole oia i hele mai nei. a mahope aku paha au e lohe ai i kau mau hana epa a hilahila ole maluna o keia wahine opio, he pilikia ko’iko’i loa ia no’u e hiki ole ai ke hoopakele ae ia’u, oiai ua paa au i ka hauhoaia malalo ou. ia manawa. Aole au e hoino wale aku ana no ia oe ia manawa. aka, e makemake pu ana au e kaawale mai a oe mai, aka nae, ua lohi loa, ua hala loa ka manawa pono.”

            Haule iho la ka lima o Habati ma kona aoao mai ka poohiwi mai o Helena, no ka lohe pono ana aku la i na olelo hoahewa a Helena. a pane mai la me ka piha i ke kahaha:

            “Ikaika maoli ka hoi kau mau olelo, e Miss Simoa.” wahi ana me ka helehelena e ike aku ana o Helena ua piha oia i ka hilahila. a ua like hoi ke keokeo pu o kona helehelena me ke aiai o ka leia-i e paa ana ma kona kalaa-i.

            “Ikaika ka’u mau olelo?” i hoopili aku ai o Helena i kana olelo. “Oia maoli na hauolelo kupono e kamailioia aku ai ia oe, elike me ke kupono i kou ana ame kau hana.”

            “Ae, ua ikaika loa kau mau olelo—he liilii loa kou ike i ka nui o ko’u aloha ia oe—oia mau ia aloha o’u nou ahiki i nei manawa. eia nae, ma kau mau olelo o ka hoike ana mai nei ua piha loa oe i ke konakona ia’u, elike me ia a’u o ka lohe pono ana aku la. “me ka hiki pono ole o ka ua o Habati kamailio mai no ka piha loa i ka huhu ame ka hilahila pu.

            Ua ku ae o Helena iluna ia manawa, aka mamuli o ko ua o Habati kamailio ana aku i kona aloha, noho hou iho la o Helena iluna o ka noho a i mai la:

            “E Habati, mai kamailio hou mai oe no ia mea he aloha ia’u imua o keia wahine au i hana hewa ai ame keia bebe au i huli iho ai, na mea i kuleana i kou aloha, a ia laua hoi oe e hoike ae ai i kou aloha. aole ia’u,” wahi a Helena.

            “Aloha! Ha. aloha ka auanei! He kanalua nui ko’u i kou ike a hoomaopopo i ka manaoio o ia huaolelo laahia. He huaolelo laahia loa ke aloha la, i loke oe. aole e hiki ana ia oe ke hoomaopopo iho i ka nui o ka ehaeha i loaa ia’u i keia la, i ka manawa i loaa ia ia’u ka ike i na mea apau e pili ana nou ame kau mau hana hewa loa.

            “E Habati, ua manaoio mau au ia oe mamua aku nei ahiki no i keia la iho la, he kanaka opio hoopono. oiaio a maemae oe i kau oleia e kekahi wahi kiko eleele, elike la hoi me ka maikai o kau mau olelo, ka maikai o kau hana ame ka maikai no hoi o kou mau ano lehulehu ke nana aku. eia ka, he kanaka hiki ole oe ke hilinaiia, he hoopunipuni a he hookamani pu no hoi!”

            “He kanaka oiaio au ma ka olelo a ma ka hana, he hoopono ma ka’u mau hana apau. a he piha aloha hoi i na mea apau. “Elike me ia a’u i hoike aku ai ia oe mamua ua lilo ko makuahine i mea aloha na’u oia no ka’u e hoike hou aku nei ia oe i nei manawa. Elike me ko’u aloha i ko’u makuahine ponoi, pela ko’u aloha i ko makuahine a oi aku no paha mamua o ko’u makuahine ponoi.

            “Nou hoi, ua ike na lani ua aloha aku au ia oe me kuu uhane apau, kuu ikaika apau ame kuu puuwai, a eia nae, ua papa mai la hoi oe aole au e kamailio hou aku ia oe no ia mea he aloha,” wahi a ua o Habati me ka hulili o na maka.

            “E Habati, e ae mai oe e kamailio aku au i keia, ke manaoio nei au o kau mau mea apau i kamailio mai nei no kou hoopono. ka oiaio, ka piha aloha a pela aku, ke hoike aku ana i kona hoowahawaha i ke kanaka i aneane loa e lilo i kane nana.

            “Heaha kou manaolo maoli ma ia oleo ana mai la ua elike me kela e Helena, i ninau mai ai o Habati, me ka piha loa i ka huhu.

            “Na’u e hoike aku ia oe i ko Helena manao,” i komo koke mai ai o Mele e kamailio ma keia wahi; “ua maopopo ia Helena nei na mea huna a olua me Lanakasa i hoolala ai.”

            “Pehea?” me ka huli ana ae a ua o Habati e nana ia Mele e noho mai ana me ka hulili o na maka, no ka mea, i ka ua o Habati noonoo iho la ia manawa me he mea la he pahi oilua ka i houia mai la i kona puuwai.

            “He mea oiaio loa keia a’u i hoike aku la ia oe, e Habati, i lohe oe!” wahi a mele. “Aole au e huna ana i kekahi mea me ka hoike ole aku ia oe i ka mea oiaio, a oia keia: Ua loaa ia’u ka leka a Lanakasa o ka hoouna ana mai ia oe iloko o ka pakeke o ko kuka hoopumehana ma kekahi po ia oe e hiamoe ana maloko o kuu rumimoe ma kela hale a’u e noho nei.

            “I ike aku au i ka oioi ae o kekahi kihi iwaho, a no kuu manao he leka paha ia nua mai kekahi wahine manuahi mai au, ua piha koke au i ka manao lili nui nou, no ka mea ua ike au ia oe e kamailio ana me Helena ma kela la o na limahana, pela au i manao ai mai iaia mai ia leka.

            “Ma ka po aku la i hala, ia’u i hele aku ai e noi ia oe i dala. a oiai kaua maloko o kou rumi moe, i ko manawa i hele aku ai i ko pakaukau kakau e wehe i ka ume no ke kii ana aku i kekahi mau dala a haawi mai ia’u, ua haule iho iluna o ka papahele ko kelekalama mai a Lanakasa mai; ia ike ana aku a’u o kuu manawa ia i hele aku ia a ku ma ko aoao a kau iho la i kuu wawae maluna o ka apana pepa a’u o ka ike ana aku i ka haule ana iho, a i ole ai e loaa ia oe kekahi hoohuoi no ka’u mea o ka lalau ana iho ua hoohaule iho la au i kuu hainaka ilalo. a ia’u i lalau iho ai i ka hainaka ua lawe pu ae la au i ka apana pepa, o ua apana pepa la o ke kelekalama ia a Lanakasa i hoouna mai ai ia oe.”

            “O, wahine ino maoli oe! Eia ka o oe ka mea nana e hoonele mai ana ia’u i ka manaolana, a o oe no hoi ka mea i imi mai nei e hookomo ia’u iloko o ka pilikia, a e mare ole ana paha au me Helena nei la i nei la!” wahi a ua o Habati, me ka hopu ana aku i ka lima o Mele a anehe aku la e ku’i a e pepehi iaia a eha loa a i ole make no paha ma ia wahi ia manawa.

            Ua ike mua o Helena i kana mea e hana aku ana maluna o Mele, nolaila me ka hoohakalia ole iho ua komo aku la oia mawaena o Habati ame Mele ma ke ano e uwao, hopu aku la oia ia ka lima o Habati a puliki iho la.

            “Hilahila maoli au ia oe e Habati no kau mau hana limanui i keia wahine; ua hoohaahaa oe i kou inoa maikai mamuli o kau mau hana hewa hiki ole ia oe ke alo ae, o keia wahine ame ka bebe na hoike oiaio o kou hewa, a ke hoao nei nae oe e hoonui hou iho i kou hewa, e hoomahuahua loa ae i ke ino o kou inoa ame kou kulana, a e hoike ae ana hoi i kou ano lapuwale a noonoo kanaka ole.

 

He Moolelo no

 

KONARADI KENEKONA

 

a i ole

 

Ka Hiena o na Awawa Kuhoho ame Demona ka Lio Eleele Kupaianaha

 

MOKUNA V.

 

            Aohe mea hiki ia Konaradi ke hana aku, no ka hoopakele ana ae i kona ola, ua lohi loa kona noonoo ana e lele mailuna aku o Demona, i ka wa o ua lio nei i hoomaka aku ai elele i ka pali. nolaila ke puliki paa la oia i ka hulu o ka a-i o ka lio, ina no ka make a no ke ola paha. ua paa kona manao e halawai aku me kona hopena.

            Ua like pu me ka poka mailoko aku o kekahi pukuniahi kela oili ana aku o Demona me Konaradi mailuna mai o ka pali; me he mea la i ka nana iho o Konaradi i kona ano, aia wale no kona hanu i ke kania-i, i kau a mea o ka hele a kuhaiki kahi noonoo.

            O ka mea mua loa i oili ae iloko o Konaradi, o ka make wale no ka mea e halawai mai ana me ia. eia nae. aole no i nele oia me na manaolana no kona palekana, ina nei no kona halawai me na ulia lakj. Iloko o kela mau sekona a ke kanaka opio e lele koheonheo la iluna o ka lewa, malunao ke kua o ka lio eleele. ke hoomanao la oia. ina nei no kona halawai aku me ka make, alaila e lilo ana ia i mea e hoohauoli loa ia aku ai o Felipe, ke hapa Ilikini. na kela noonoo i hooi loa ae i kona manaolana, aole loa he pono e halawai oia me ka make, aka e hoao oia ma na ano apau, i wahi nono e palekana ai.

            O na wawae mua o Demona ka i pa aku i ka wai. me he oki ana la na ka pahi i ka iliwai. ua nalowale aku la o Demona me Konaradi iloko o ka wai. o kahi nae o ka laki, he hohonu ka wai ma kela wahi. nolaila aole i hoku’i aku na wawae o Demona i ka pohaku, a i ka aea ana ae o Demona iluna, aia hoi, ke mau la no ka puliki o na lima o Konradi i na hulu o ka a-i. a he hookahi no ko laua oili like ana ae, no ka hanu ana i na ea e hoopuni ana ia laua.

            Oiai o Demona e lana ana iluna o ka wai, me Konaradi no hoi maluna o kona kua. ke alaalawa la ke kanaka opio no kekahi wahi kupono e hiki hou ai laua ke kau iluna o ka aina paa, ike mai la oia i kekahi wahi haahaa, he mau kapuai elhulehu no mai kela wahi mai, nolaila hoopololei mai la oia i ka au ana a kona lio no kela wahi. a o ka mea nana i hookahaha loa aku i kona manao, o ia no ka hooko o Demona i kona makemake.

            He hohonu maoli ka wai ma kela wahi a laua i haule mai ai, aole elike me kekahi mau wahi mai o kela hakawai, he papa’u ka wai, aia ma kahi o ka elima a eha kapuai wale no ka hohonu, ina paha no ko laua nei haulle ma kela mau wahi, ua maopopo loa, o ka make wale no ko laua hopena.

            I kela hoea ana aku o ka lio ma kahi haahaa o ke kahawai. pekupeku aku la o Konaradi ia Demona. me ka pii malie ana aku no hoi o ua lio nei a kau ana ma kapa o ke kahawai. o ka mea apiki nae, ku malie loa iho la ua lio nei, me ke kulou ana o ke poo ilalo, me he mea la, ua auhee loa aku kela ano ahiu a eena iloko ona a ke pinapona’i la hoi kana hanu ana. no ka mea ua hele maoli a pau ke aho. Ke hoomanao la o Konaradi, ua haawipio okoa mai o Demona iaia iho, e noho mana aku ke kanaka opio maluna ona, alaila leha aku la ka nana ana o Konaradi iluna o ka pali kiekie, me na manao hoomaikai, no ka lilo ana o kela kahawai, i mea kokua mai iaia, ma ke kaa ana o ka lanakila ma kona aoao. maluna o Demona.

            Oiai nae ka lio eleele e ku malie la, ke naka wale la no kona kino me ka haalulu. me he mea la. aia iloko ona ka maka’u ame ka weliweli, no ka hookau hou ia aku o na hana hoehaeha maluna o kona kino e ka enemi. a ma kahi nae o ko Konaradi hoohana aku i kana huipa, pa’ipa’i aku la kona mau lima. ma ka a-i o Demona. me ka noke pu ana aku i ke kamailio i kekahi mau olelo oluolu, e hoomalielie ana i kela lio.

            Aia ka wai ke kakahe la mai ka hulu aku o Demona, a mai ke kino aku no hoi o Konaradi, eia nae he la pumehana loa kela, ua lilo ia pulu i mea ole. o ka mea nui wale no. a o ka mea no hoi nana i hoohauoli loa mai ia Konaradi. o ia no kona noho lanakila ana maluna o kela lio.

            Aia no ua o Konaradi maluna o ke kua o Demona kahi i kau ai, aole ona makemake e lele ilalo. o ike mai auanei kela lio iaia, o ka mauawa ia e hookau mai ia i na poino maluna oia nei.

            Ke noke mau la no o Konaradi i ke kamailio, ka hamohamo no hoi ma ke poo a ma ka a-i o Demona, no kekahi manawa. alaila aea ae la ke poo o ua lio nei iluna, me ka nana ana ae ma o a maanei, aole me ke ano pienaena, aka, ua i iho la nae o Konaradi i ke kamailio ana mai:

            “Mai maka’u oe e kuu hoaloha, aole au e hoeha hou aku ana ia oe,” wahi ana me ka piha hoihoi no ka hiki ana iaia ke lanakila maluna o kela lio. “Ua nui kuu minamina me ka makee nou e kuu hoaloha. nolaila aole au e hoopilikia hou aku ana ia oe ma kekahi ano, koe wale no a hoao mai oe e hoopilikia ia’u. E lilo kaua e pono ai i mau hoaloha maikai loa mai keia manawa aku. Ina he huhu kekahi iloko ou, no ka’u mea i hana aku ai i keia la, e hoopau loa oe ia huhu. no ka mae owau ana ka mea nana e hana aku i na mea maikai wale no nou. ma keia hope aku.”

            Me he mea la. ua maopopo mai la no paha ia Demona ka manao o na olelo a Koaradi i kamailio iho ai, no ka mea aea ae la ke poo o nalio nei iluna. a kunokunou iho la, e hoike ana no kona apono i kela manao o Konaradi.

            Aia o Konaradi me kona lio ma kahi inoino o ke kuahiwi. o ka hoea hou ana ma kekahi kapa o ke kahawai. he hana pohihihi loa oia, oiai he pali wale no ka nui ma kela ame keia aoao o ua kahawai nei.

            Aia nae kekahi wahi haahaa i kamaaina i ua o Konaradi. he mau mile ka mamao mai kela wahi ae; o kona hoea wale aku no i kela wahi. kana e noonoo la, ina no ka ae o Demona e hele malalo o kana mau kauoha, nolaila hoomaka aku la oia e hoohele i ka lio me ka malie, a o ka mea nana i hoohauoli loa mai i kona manao. o ia no ka hoolohe o Demona iaia.

            He manawa loihi nei keia a laua i hele aku ai. ua hoea i’o aku la no kahi i kapaia o foda, he wahi haahaa keia o ke kahawai, ma kela wahi no e hele ai kekahi poe mai kekahi aoao a i kekahi aoao o ke kahawai.

            E hana mau ana no o Konaradi i ke kamailio i kona lio i kela ame keia manawa ahiki wale i ka hoea ana aku no Foda, alaila olelo iho la no ia Demona e komo iloko o ka wai, me ka huki pu ana i ke akula kaohi, e loaa aku ai ka ike’ia Demona, no kana mea i makemake ai.

            Aole he hookolohe o Demona, aka komo aku la no iloko o ka wai, me ka hele malie ana, a pii ma kekahi aoao o ke kahawai. o ko laua nei kau no ia i ka aina paa.

            He loa okoa no kahi e hele ai a heoa i ka home kuahiwi o Konaradi, a oiai ua kamaaina oia i ka waiho ana o ka alahele pokole loa e hoea aku ai i kona home me ka maalahi.

            Mai kela manawa mai, i kau aku ai kekahi inoa hoohanohano i’o no ia inoa i hookauia aku maluna ona. ua lanakila oia maluna o Demona. ka lio i hiki ole ia Felipe ke hoolakalaka, oiai he paniolo kaulana oia no Mekiko.

            Oiai nae ua o Konaradi e hoi malie la, ma ke alahele no kona home, ke minoaka malie la ua kanaka opio nei, no ka hookahahaia aku o ka manao o ka hapa Ilikini. ke ike mai iaia nei e oili aku ana. ka mea a kela knaka i manao loa ai, o kona uhane ke hoi aku ana. no ka mea aole loa ona wahi manao iki, e pakele ana oia nei mai ka make mai.

            Ua hele no hoi a aui ka la. hoea aku la o Konaradi ma kahi e ikeia aku ai kona home, a i kona hookokoke loa ana aku. ike aku la oia ia felipe e noho ana mamua o ke kahua manienie ma ke alo o ka hale. e noke ana ua hapa Ilikini nei i ke puhi kikaliki.

            Ua maha maoli o Demona i kela manawa, oiai he hele mali wale no ka laua mai kela kau ana mai ma keia aoao o ke kahawai, a i ka hoea ana aku nae i ke alanui akea e moe pololei ana no ka hale, ia wa i pekupeku e ai o Konaradi ma ka aoao o Demona. o ka holo malie aku la no ia o ua lio nei. o ia no oe o kekahi lio laka maoli, aole kela ano pienaena a puiwaiwa.

            Ua hoopuwaia aku o Felipe i ka lohe ana mai i ke pahupahu kapuai wawae lio. ia kiei ana mai. a ike ai Konaradi e hlui hoi aku ana, me ka holo malie loa ana o Demona. aole i hiki iaia ke hoopuka i kekahi huaolelo no ka mea ua hoopiha loa ia aku ua kanaka nei me ka puiwa ame ke kahaha pu, no ka lilo ana o kela lio i mea paani imna o Konaradi, aia no kona hoohilahilaia ana aku e keia keiki opio wale no. i emi mai na makahiki malalo o kona.

            Ke hoolalau wale la no o Konaradi. me he mea la. aole oia i ike ia Felipe. a ke hoi pololei loa la oia no ka halelio, aole ona makemake e hoihoi hou i kela lio noloko o ka pa, aka e malama loa aku ana oia i kela lio, me ka hoopaa ana iaia maloko o kekahi wahi kupono.

            I kona hoea ana aku no ka halelio. lele iho la oia ilalo, aole he wahi mea a pienaena ae o Demona. a hoao mai paha e hoopilikia i ke kanaka nana i hoeha aku iaia.

            Ke noke la o Konaradi i ka hamohamo ma na wahi apau o ke kino o Demona, me ka lilo o kela hana i mea maikai i ka manao o Demona, a he wahi manawa nuku wale no kona e eeke ae ai, no ka maa ole no paha kekahi i ka hoopaia aku o kekahi mau wahi o koa kino, a ke noke la no hoi o Konaradi i ke kuwakuwai i ke kino. me kekahi kawele maloo, a iaia no paha ka ike, ua lawa kela hana. kii aku la i kekahi huluhulu, a hoaahu aku la maluna o ke kino o Demona.

            Aole malaila pau ka Konaradi hana, aka kii aku la oia i kekahi mau apala. a mailoko aku o kona mua lima ponoi. i hanai aku ai oia ia Demona. he mau apala. aole no hoi ona. hoalo iki i ke kamailio mau ana aku i kela lio. i na olelo hoomalielie. i kela ame keia manawa. a ke nana aku ia Demona. ua laka maoli. a ua nana mai no hoi iaia nei. me he hoaloha maikai loa la nona.

            I ka pau ana o kana mau hana maloko o ka halelio, huli hoi mai la oia no ka hale. me kona alawa ana aku nae, ma kana wahi i ike ai ia Felipe. aole he noho mai o ua kanaka nei. oiai nae. ua holo aku o Felipe a pee maloko o kekahi hamo ana i ka lio eleele, me ka hoopuka ana ae i keia mau olelo:

            “Ua hiki hoi paha. ua lanakila oe e kena keiki i keia la, mamuli o ke kokua ana mai o Satana e hoopakele i kou ola. aka e hoea mai ana ka la. e noho mana aku ai o Felipe maluna ou.”

            O ka manao o Konaradi ma kela hoi ana aku no ka hale, o ia no ka wehe ana i kona mau lole pule. a komo mai i lole maloo. me ka ike ole mai o kona makuahine ma’i. ua holopono ole nae ia manao ona. oiai e noho mai ana kona makuahine maluna o kona noho. a kahea mai la ia Konaradi e hele aku imua ona:

            “Ihea oe e kuu keiki. i hele ai kou lole a pulu i ka wai?” wahi a ka makuahine me ka leo oluolu. o ka mea i piha i ka makee keiki.

            “Heaha mai auanei. i ka auau aku nei au me ko’u mau lole no,” wahi a Konaradi me ka minoaka ana aku i kona mama. “He keu ka palaka pu o ko’u noonoo. mamuli paha o ko’u makemake loa i ka auau, ua poina au i ka wehe mua ana i ko’u mau lole, alaila komo aku iloko o ka wai.” me ka hoike okoa ana aku nae o ua o Konaradi i ka mea oiaio loa i kona makuahine. me kona huna ole iho i ka mea e hoehaehaia aku ai ka manao o kona mama.

            “Auwe no ka hoi oe e kuu keiki e!” i hooho ae ai ka makuahine, me ka puliki ana ae i kona mau lima a elua i kahi hookahi. “Ua nui kuu hopohopo nou. a ke ike nei au. ua hoopuniia kou ola ana e na poino! Ma ka’u koho aku. eia kekahi mau hana ke hoolalaia mai nei. no ka poino o kou ola e kuu lei!” alaila hina aku la ka makuahine ihope. me ka nui ana iho o kona hanu.

            “Ua kuhihewa loa kou manao ana pela e mama.” wahi a Konaradi. me ka paa ana aku i na lima o kona makuahine. a nana aku la no hoi iaia me na maka oluolu. me ka minoaka hoi ma kona mau papalina. “Heaha auanei na kumu nui a kekahi poe i makemake ai e hoopoino mai i ko’u ola?”

            “Aole i maopopo ia’u ke kumu, aka e pono oe e makaala loa e kuu keiki—e hoomanao mau hoi i ka’u mau mea i kamailio aku ai ia oe mamua. E makaala loa oe i kela kanaka hapa ilikini, me na maka eleele. he moo oia. Ina i maopopo ia’u na mea apau, ina ua hoike aku au ia oe. a no ko’u pohihihi loa ma kekahi mau mea, pela e hiki ole ai ia’u ke hoakaka aku i ka’u mea i manao ai. He kanaka opio nae oe e kuu keiki, he kino ikaika kou. me ka piha i ka eleu. malia e ike aku ana no oe i na mea oiaio apau ma keia mua aku. e makaala nou iho i na manawa apau, mai noho me ka nanea ame ka palaka! Ina he kino ikaika ko’u. ua hiki ia’u ke kokua aku ia oe, aka aole, he nawaliwali au, aohe mea hiki ia’u ke hana aku no kou palekana e kuu leialoha.”

            Me ka hana nui o Konaradi i hoomalielie aku ia i kona makuahine. ahiki i ke akakuua ana mai o na manao pihoihoi o ua mama nei.

            I ka haalele ana aku o Konaradi i kona makuahine. a hoi ae la no kona rumi, ua hele oia a piha me ke kaumaha no kona mama; ua manaoio loa oia, o ke kumu o ka hopohopo o kona makuahine nona, mamuli mai paha o ke emi o ka ikaika o kona kino, me ka nawaliwali pu mai o kona noonoo. Ke hooikaika la oia e hoopoina i na mea a kona makuahine i kamailio mai ai iaia. aole nae he poina iki. e kau mau mai ana kela mau olelo apau imua o kona noonoo.

            Ua maopopo loa iaia, aia ka lili ame ka inaina iloko o Felipe nona, a ina no ka holopono o kela hoolala ana a ua hapa Ilikini nei, no ko ia nie lilo i pio na Demona, e lilo loa ana ia i mea hauoli na ua kanaka nei. aka nae i ko ua o Konaradi lanakila ana maluna o keia lio, a hoohokaia aku hoi na manao lapuwale o Felipe. aole hou aku he kumu a kela kanaka e hoopoino mai ai i kona ola. aka i ke kamailio ana mai nae o kona makuahine iaia e makaala loa, ua ala mai la kona huhu me ka inaina no Felipe.

            Mahope o ke komo ana mai i paalole hou nona. me kona hele ana aku hoi e ai i kekahi mau meaai, hooholoiho la oia e hele maoli aku no e halawai he alo a he alo me kela kanaka. a e koi aku iaia. e hoike mai i ke kumu o kona makemake ana iaia nei e make.

            Ua poho wale nae kela manaolana o ua o Konaradi. no ka mea ua noke oia i ka huli ia Felipe aole he loaa iki. oiai ua hala ua kanaka hapa Ilikini nei. no kekahi wahi e pee ai. oiai ua ike mua no oia. aia iloko o ke kanaka opio na manao inaina nona.

            No kana wahi ole e hele aku ai. aole no hoi he hana e lilo ai kona noonoo malaila, hele okoa aku la ua o Konaradi no ka halelio. a komo aku la maloko o ke keena i hoopaaia ai o Demona, a o ka mea nana i hookahaha loa mai i ka noonoo. o ia no ka laka me ka hoihoi o kela lio i ka wa i ike mai ai iaia nei, ka mea a ua o Konaradi i manao mua ole ai, pela iho la ka maalahi loa, o ka hoopalupalu ana i na ano o keia lio.