Ka Nupepa Kuokoa, Volume LIX, Number 25, 24 June 1921 — Page 4
| This text was transcribed by: | Maryann Acker |
| This work is dedicated to: | Jackson T. thanks for all your work |
Ka Nupepa Kuokoa
KE KILOHANA POOKELA NO KA LAHUI HAWAII.
NUPEPA KUOKOA, HONOLULU. T. H., POALIMA, IUNE 24, 1921.
NUPEPA KUOKOA
SOLOMON HANOHANO, LUANHOOPONOPONO HOOPUKAIA I NA KAKAHIAAKA POALIMA APUA
POALIMA IUNE 24, 1921
KE KIAAINA HOU O HAWAII NEI
Aole he pohihihi i koe no ka ninau kiaaina o Hawaii nei: no ka mea ua wae ae ka Peresidena Harding ia Wallace R. Farrington i kiaaina no ke teritore o Hawaii nei, a ua haawi aku nei hoi ka aha senate o ka ahaolelo lahui i kana apono ana, o ka hana wale no i koe. o ia ke kakali aku o ke hoea mai o ke kiaaina hou. a nana aku i kana hookele ana i ke aupuni.
He kanaka o Mr. Wallace R. Farrington i ku-e ikaika e ka aoao Repubalika kuloko, aka i kakooia nae e na Repubalika kaokoa, ame na kanaka lawelawe oihana o keia kulanakauhale; i kona kohoia ana mai nae e noho ae ma ke poo o ka hookele aupuni teritore o Hawaii nei; malaila iho la no pau na ku-e ana; o ka hana pono wale no ia kakou. na makaainana o keia Teritore, o ia ka haawi ana aku i na kokua ana, e holomua ai na lawelawe oihana ana a ko kakou kiaaina hou, no ka holomua o ke aupuni. a no ka pomaikai laula hoi o na makaainana.
Aole o Mr. Wallace R. Farrington i malihini i na hemahema ame na pilikia o Hawaii nei, he kanaka oia i loaa aku na ike laula no ke kulana hooponopono aupuni kuloko. a he kamaaina no hoi ma kekahi olelo ana ae. nolaila i kona lawe ana ae i kona kulana hou, e kau aku i ko kakou mau manaolana. e ukali aku ana oia mahpoe o na kapuai wawae o kona mua, ma ka imi wale ana ae i na mea e pono i’o ai ke aupuni; a e kapae ae hoi i ka ninau aoao kalaiaina mahope.
Ua nui na mea i kamailioia e koonei poe, no kanana ole mai o Mr. Farrington i ka aoao kalaiaina Repubalika kuloko; malia paha he mau olelo pololei no ia. aka he hookahi nae mea a keia pepa e manaoio nei. e nana ana ko kakou kiaaina hou i ke kanaka. ma kona kupono, aole hoi ma ke ano e kona aoao kalaiaina; elike me kana i hooiaio aku ai i na mana nui ma Wakinekona, ua makee wale mo oia e ike i na kanaka kupono a hoopono iloko o kona au hookele aupuni.
Oiai nae kakou e kakali aku ana o ka hoea mai i ka wa e ike ai i ke ano o kana hookele aupuni ana. he hookahi mea nui iloko o ko kakou noonoo iloko o keia manawa, o ia no ka hoike ana ae i ko kakou mau manao ohohia no ko kakou kiaaina hou. ma kona wa e huli hoi mai ai. ma ke komo liek ana aku iloko o na hana hookipa e hoolalaia mai nei no ka hoohanohano ana aku iaia; o na manao ku-e apau. e ka pae aku ia mea; aole he pomaikai e loaa mai ana ia kakou ma kekahi ano, ma ka malama ana ia mau manao ku-e, koe wale ae ka hoolilo ana ia kakou i mau enemi no ka mea e noho ana ma ke poo o ke aupuni teritore.
E lilo oke kakou i poe naaupo, ma ka hoopaakiki ana i ko kakou mau manao ku-e a maikai ole i ke kanaka a ka Peresidena o ka hookohu ana mai nei, aka e lilo lakou i peo naaoao, ma ka hoololi ana ae ia mau ku-e ana, a haawi aku i na kakoo ana iaia me ka makee e ukaliia na makahiki o kona noho kiaaina ana aku, me na haawina pookela o ka holomua.
KAKOO I KA MANAO PILI I NA HAWAII
Ma ka Advertiser o ka Poalua nei, Iune 21, i hoopukaia ae ai kekahi leka i kakauia e Mr. W. K. McNullen. e hoakaka ana i kona manao no ka haiolelo a Mr. Joseph Kamakau. e a’o ana i na Hawaii i na mea e pono ai lakou, a ke Kuokoa e hooia nei i ka pololei o kela manao, o keia makamaka.
Ua mahalo nui keia pepa i ka haiolelo a Mr. Joseph Kamakau. ma ka la 11 o Iune, ka La o Kamehameha, o ka manao hookahi no ia iloko o na Hawaii apau. i makee i keia lahui kanaka. aka o ka pilikia nui. elike me ka hoakaka a keia makamaka. o ia no ke kamailio wale ilio no, i na mea pono a na Hawaii e hana aku ai, aole nae he ku ae o kekahi poe mamua. ma ke ano he mau alakai. a a’o mai i na Hawaii i na mea pono a lakou e hana aku ai. i hoi hou mai ai kela ano kahiko i maa ia lakou i ke au kahiko.
Eia kekahi hapa o kana leka i kakau ai, a makou i makemake ai, e hoikeike aku i ka manao o keia makamaka: a kakou no hoi e hiki ole ia ke hoole ae i ka pololei ame ka oiaio o ia manao:
“Ke mahalo nui aku nei au i ka manao hookaka i kamailioa ae e ka meakakau e pili ana i ka hapai hou ana ae i na Hawaii i ko lakou kulana mua. He manao maikai loa keia, ke ae aku nei au ia mea. Ua heluhelu no au i na manao hoakaka o keia ano, mahope mai’o ka loaa ana ia’u o ka ike heluhelu ame ke kakau. aole nae o’u ike i ka hahaia o kekahi mea e hoihoi hou mai ana i ka mea a na Hawaii i nalowale.
“Heaha ka waiwai o ke kamailio kualehelehe wale ana ame ke pa’i ana; me ko kakou hoao ole e hooko i ka kakou hana? He hana maalahi loa ke kamailio ana. aka aohe nae he waiwai, ke ole kaukou e hooko i kekahi hana. Ua hiki ia kakou ke kamailio elike me ka hiki ia kakou, aka nae. elike me ka hooko ole ia ana o kekahi mea, aohe waiwai e loaa mai.
“O keia ka mea nana i hoala mai i ko’u noonoo po kekahi pauku iloko o ka olelo a ke Akua, penei ka heluhelu ana: ‘Ina he kapa ole ko ke kaikaina paha. ke kaikuahine paha. a i nele hoi i ka ai i kela la i keia la: a i aku kekahi o oukou ia laua: O hele olua me ka pomaikai a e hoopumehanaia. a e maona no hoi: aole nae oukou e haawi i’o aku ia laua i ka mea e pono ai ke kino, heaha la ka waiwai?”—Iakoba 2:15-16.
“Nolaila ina ua makemake kakou e pa’iia keia mau mea maloko o na nupepa, hokeaha no hoi ka mea lawe oela e ia mau keehina hookahi a oi aku no paha, e hoopomaikaiia mai ai kakou, ma ka hookomo ana aku iloko o ka noonoo o na Hawaii, he mea pono ia lakou ke ala ae, oiai aia no he mau manaolana?
“Ke manaoio loa nei au, aole i makemake ke Akua, e make ka lahui Hawaii, elike me ia e holomoku nei i keia wa, aole hoi e hoohuikauia e kekahi lahui e aku. Aole no hoi e paa na Hawaii malalo o ka auamo hooluhi no ka wa mau loa, me ka pii ole mai ma ke ana iliwai me na lahui e ae. Ma keia mea, aole au e kamailio ana no na Hawaii wale no, aka no na lahui apau. Mamuli mai o ka hookae, ke hoao nei lakou e kaomi ia kakou malalo o ka auamo hooluhi, elike me ka hiki ia lakou ke hana, a elike me ka loihi o ko kakou paa ana ma ia ano, me ka hana ole aku i kekahi mea, aka o ka uwe wale iho no, me ka hooikaika ole e oili ae mailaila mai. aole he loihi o ka manawa i koe, e hoea mai ana i ka nalohia ana o ka lahui Hawaii.
“Ua manao anei o Mr. Kamakau a i ole kekahi poe okoa aku paha, e hiki ana i keia poe naaupo a hemahema, i hiki ole ke ike aku i na mea, elike me ia, ke pii mai iluna no lakou iho, me ka loaa ole o ke alakai. a mau alakai paha? Aole anei i hoouna aku ke akua ia Mose e lawe mai i ka Iseraela mai na hana hooluhi mai o Aigupita? Heaha ka waiwai o kekahi puali, ina aole ke kapena a i ole kenerala paha? Nokeaha ka mea kukulu ole ae i Mose na kakou? Ke ole e hanaia keia mea, e mau ana no ko kakou noho ana elike me keia wa me ka mau no i ka uwe. Nikeaha ka mea ku ole ae o kekahi poe Hawaii naauao iluna a hoohana aku i ko alkou mau mana naauao, a e hoao e hoihoi hou mai i ke mea i lilo mai ia kakou aku, aole hoi o keia mau olelo kualehelehe ano ole a pa’i aku maloko o na nupepa?
“He hookahi a’u mea i koe i makemake ai e kamailio, mamua o ko’u hooki ana, e pili ana no ia i na kula Hawaii e kukuluia ma keia mau mokupuni. O keia kekahi mea a’u i lohe ole i kekahi mea e kamailio ana, aole no hoi o’u ike i ke pa’iia maloko o na nupepa.
“E hoohemahema anei na Hawaii i ka lakou olelo kupa? Manao anei oukou ua aponoia ia imua o ke Akua, no ko kakou hoopoina ana i ka kakou olelo kupa? Ina ua aeia na Kepani ame na Pake e kukulu i ko lakou mau kula, nokeaha ka mea e hiki ole ai ke loaa ko kakou?”
O keia ka makamaka mua loa nana i kuhikuhi mai i kekahi olelo ana ae hoi, e hooko i na mea e kamailioia nei no ka pono o keia lahui kanaka, ma ka hana aole ma ka walaau wale iho no.
Aia he mau alakai kupono loa iwaena o kakou i keia la, i hiki ke nanaia aku me na manao hilinai e keia lahui kanaka, he poe naauao a makaukau maoli ma ka haiolelo; ua loaa na ike kuhohonu, no na pilikia o keia lahui; a ua maopopo no hoi na alahele e palekana ai lakou, o ka pilikia nae, aole he ku ae o kekahi mau alakai imua a alakai aku i ko lakou lahui, ma na alahele apau e palekana ai lakou, ami na pilikia ame na poino e hoopuni mau nei i na Hawaii.
NA KANAWAI O KA AHAOLELO
Ma keia helu o ke Kuokoa e puka aku nei i pau loa ai na kanawai o ke kau ahaolelo aku la i hala, i ka hoopukaia; nalaila e hoi hou mai ana keia pepa i kona kino mau elike me ka maa o na wa ae nei i hala.
Malia paha, ua lilo na kanawai ahaolelo i hoopuka mau ia aku i kela ame keia pule i mea hoihoi ole ia e kekahi poe, a ua ku a uhahua maoli paha kekahi poe i ka lilo nui o kekahi mau aoao o ka nupepa no ia mau kanawai; ina nae he mau manao kekahi o kela ano, he keu aku a ka hawawa ame ka naaupo: no ka mea, o ka mamawa wale no keia i hiki ai i na Hawaii ke ike. a hoomaopopo i na kanawai a na lunamakaainana ame na senatoa a oukou i koho ai, e hele e hana i na kanawai, aole he manawa hou aku:
Ua hoea mai la nae hoi i ka wa e pau ai ia mau manao nauki a uluhua. ua pau loa na kanawai i ka hoopukaia; nolaila o ke a’o wale no i ka poe i makee ia mau kanawai, o ia ka malama ana i na kope apau. o na nupepa i puka aku ai kela mau kanawai, aia no he la e hoea mai ana. ma keia mua aku. e ike auanei kakou, e lilo ana ka malama i mea kokua nui mai i ka mea noho naaupo a pohihihi.
E HOOKOKIA KE KANAWAI E PONO AI
No ka hooko ana aku i ke kanawai i hooholoia e ka papa o na lunakiai o ke Kulanakauhale a Kalana o Honolulu nei. e pili ana i ke kaumaha o na ukana a na kaa halihali ukana e lawe ai maluna o na alanui aupuni, he me pono e loaa i ke aupuni he poe kanaka no ka hooko ana i ke kanawai; pela wale no e lilo ai keia kanawai i mea waiwei.
He mea oiaio loa, ua lilo ka maikai ame ka paa o kekahi mau alanui i hanaia i mea ole i na kau halihali ukana, i hele a kaumaha maoli. me ka nana ole o na ona na lakou na ukana, pela hoi me na kiakaa o na kaa kalaka nunui, i na hopena e kauaku ana maluna o na alanui; no keia kumu nae, a no na kumu lehulehu e ae, aole loa he kupono e aeia aku na hana o keia ano. no keia nee ana aku, aka e malamaia ka maikai o na alauni aupuni, a e kauia aku hoi na ahewa ana maluna o ka poe apau e ku-e ana i ke kanawai.
Nuhou Kuloko
Ma Waipahu ae nei, ma ka la 14 o keia mahina, i hoohuiia ae ai ma ka mare e ka Rev. D. A. Kaaiahua, o Dela Cruz me Elizabeth Jonah.
Ma keia Poalima ae e haalele iho ai na lala o na Ahahui o na Ululaau no Hilo, no ke komo ana aku iloko o na hana hoohauoli Pokiulai malaila.
Eia na hale hana kini halakahiki ke hoohana mai nei i keia mau la. me ka nui o na keiki kula, e noho hana aku ana malaila, ma keia wa hoomaha o ke lula.
Mamuli o ka piha loa o ka pepa i keia pule, ua hoopaneeia ka hoopuka ana aku i kekahi mau palapala a na makamaka a loaa kahi kaawale, no keia pule ae.
O George Freeland ka i hookohuia aku nei i lunakanawai apana no Lahaina, ma kahi o C. B. Cockett i waiho mai i kela kalana, no kona uku hoomau ia ana.
I ke kulanakauhale iho nei ka Reb. J. Kama o Pahoa, Puna, Hawaii, ma ka Mauna Kea o ka Poalua nei, a oia ka la apopo no e huli hoi aku ai oia no ka Paia Aala i ka Hala.
Lalau hou mai la no kau mau haina nane e ke Keiki o ka Ua Kilihune o Manou, o ia hoi “Kumukula,” no ka nane a Z. P. K. ame “Kana Alii,” no ka nane a H. K. Home Lauiwaiwa.
Ma keia puka ana o ke Kuokoa i pau loa ai na kanawai o ka ahaolelo kuloko aku la i hala, i ka hoolahaia, nolaila e hoi hou mai ana no ka nupepa a kona kino mau elike me mamua.
E noho ae ana ka halawai kumau a ka Ahahui Kaahumanu ma ka Poalua, Iulai 5, 1921, ma kahi maamau, ma ka hora 10 a.m., no ka mea he la kulaia ka Poakahi.
E wehe ae ana na kaikamahine puukani o ka Ua Lililehua o Palolo he ahamele ma keia po Poaono iho, maloko o ka halehalawai Phoenix Hall, no ka pomaikai o ka halehalawai ma Palolo.
Ma ka la 6 o keia mahina ae e haalele iho ai o Kiaaina McCarthy ia Honolulu nei, no ka lawe ana ae i kona kulana hou ma Wakinekona, me kona kakali ole a hoea mai ke panihakahaka ma kona wahi.
Maolok o ka Odd Fellows Hall maka hora ehiku me ka hapa, o ka po o ka la apopo, e weheia ae ai he ahamele me hulahula, no ka pomaikai o Adam Kealakai, elike me na mea i hoike mua ia aku ai.
E hoea mai ana o Wallace R. Farrington, ke kiaaina hou o Hawaii nei, ma ka la 12 o ka mahina ae nei o Iulai, eia ko Honolulu nei poe, ke linliu mai nei no na hana hookipa, e pahola aku ai imua ona.
Eia ke liuliu mai nei na hoomakaukau ana, no na hana lealea Pokiulai mawaho ae nei o Kapiolani Paka, a ua makaukau ka oihana koa e haawi aku i ka lehulehu i na hoikeike maikai loa i keia makahike.
He hoike hui o na Kula Sabati ke malamaia ae ana maloko o Kawaiahao ma keia Sabati iho, Iune 26, a ma ia po iho, e malamaia ai na hana hoolaa i ka hale halawai mauka ae nei o Kalihi, o ka Ekalesia o Kawaiahao.
Ua hookohu aku nei ka Lunakanawai Kiekie Coke ia James von Ekekela i lunakanawai no ka apana o Kawaihau ma kahi o ka Lunakanawai Apana Robert Puuki i waiho mai i kela kulana, ma o kona aku hoomau ia ana.
PAKELE MAI PAU I KE AHI MA KA MOANA.
Ma ke ku ana mai o ka makuahi Wolverine State no Honolulu nei, ma ka Poalua aku la i hala, i hoikeia ae ai ka nuhou, no ka a ana o ke ahi maloko o kela moku, mahope o ka haalele ana aku i ka Ipuka Gula o Kapalakiko.
No ke kinai ana nae i ke ahi, ua hoopaaia ka holo o ka moku, no kekahi mau hora, a i ka pio ana o ke ahi, akahi no a hoomau mai i ka holo ana ma kona alahele o hoea mai ai no keia awa.
He nui na manao kohokoho i ala ae, no ke kumu mai o kela ahi, eia nae. i ka hiki ana i na kanaka o kela mokuahi ke kinai aku i ke ahi me ka maalahi loa, ua lilo kela ahi i mea liilii loa iloko o ka noonoo o na ohua ame na aliimoku, no ka mea he uuku loa na poino i ikeia.
WASHINGTON, Iune 20.—He manaolana ko ka Peresidena Harding e akookoa pu aku ma ka manawa e noho ai ka ahaolelo nui a ka Ahahui Huiia pau Pakipika ma Honolulu ina e halawai ole ana me kekahi ke ake’a, wahi ana o he hoike ana mai ia, Home Ford, ke kakauolelo ame ka lunahoohana o ka ahahui, ka mea i holo mai ianei mai Honolulu mai no ka pahola ana aku i ka poloai i ka peresidena.
Nuhou Kuwaho
PARIS, Iune 19.—Ua noila aku e Pelekane. Palani ame Italia ia Helene e hoopanee i ka hoouka ana aku i kekahi kaua maloko o Asia Uuku a e apono mai i ka lakou hooikaika ana ma ka uwao ana. He olelo hooholo keia i loaa mahope iho o kekahi ahakuka mawaena o ke Kuhina Nui Briand ame ka Haku Curzon, i pau iho la ma ka po nei me kekahi palapala i hoounaia aku i ka Moi Konesetina o Helene, e noi aku ana e pane koke mai ina e ae mai ana o Helena na na Aupuni Huiia e hooponopono i ka hoopaapaa me Tureke.
BELFAST, Iune 19.—O kela mae keia hana makaala no ka hoopakele ana i ka Moi Keoki ame ka Moiwahine Mary ma keia Poakolu ae, ma ka manawa a laua e hoea mai ai i Belfast nei no ka wehe ana i ka ahaolelo Ulster, e malamaia ana. Aole kanaka e aeia ana e pii maluna o kaupoku o ka hela, e panikuia ana ua, haleinurama a e ku makaukau mau ana ka ahaolelo no ka hookipa ana mai i na moi. O ka olelo hooholo a ke moiwahine e ukali mai i ka moikane ua haawi aku ia hana ana ana i ka hauoli nui i ka lahui ailiki mai o a o o ka aina.
NOGALES, Ariz., Iune 19.—Hookahi haneri ame kanalima mau Hikini Vaqui i komo aku e hao iloko o ke kulanakauhale o Cocorit; ua haoia na waiwai maloko o na halekuai a na Pake a holo aku la me na waiwai i hoahuia, elike me ka olelo a na ohua o ka hoea ana mai ianei maiwaena mai o Mekiko. Mamua o ke komo ana mai o na Hikini e hao i na waiwai ua hoikeia mai ke puhi mua ana ae a lakou i ke alahaka Pakipika Hema mawaena o corral ame Esperanza.
BERLIN, Iune 20.—He mau kaukani o na kanaka hana ole i komo aku ma kahi e akoakoa ana ka hui uniona limahana a kauoha aku la o na kanaka apau e hana ana ia manawa e haawi mai lakou i ka hana i ka poe hana ole. Ua hoomaka ka hakaka ia manawa, he hakaka i komohia ai he 5000 kanaka. a pepehiia ka peresidena o ka hui uniona a eha loa, a ua haalele mai oia i ka rumi halawai me ke koko e kaheawai ana mai kona mau wahi iho i eha. Mahope iho o ka hala ana o na hora elua i kaiehuia aku ai na kanaka apau mailoko aku o ka hale e na makai a hoomaluia ka uluaoa ana, me ka lawe ana aku i ka peresidena i eha noloko o kekahi hale aina. Ua wawahiia ka haleaina i laweia aku ai o ka peresidena. pau na puka i ka nahaha ame na puka aniani, me ka wawahiia o na lako oloko o ia hale. Ma kekahi puka mahope o ka hale i pakele aku a ika peresidena.
LOAA AE I KE KULA NUI O OAHU HE $1000 MAKANA
Ma ka Poakahi iho nei i haawiia mai ai i na kahu waiwai o ke kula nui o Punahou e Wallace M. Alexander o Kapalakiko he $1000 no na hana hou o ke kahua paani Alexander. E hooliloia aku ana ka hapanui o kela mau dala no ka hoomomona ana me na lepo momona i eliia mai ka luawai auau hoomanao no Elizabeth P. Waterhouse ma ke ano lahilahi maluna o ke kahua paani.
He kahua paani mau ia kela e na haumana a e ka lehulehu pu, a ina no ka paholaia aku o ka lepo momona maluna o kela kahua e lilo ana ia i mea hooulu ae i ka manu. Ia Mr. A. C. Alexaxnder, kekahi o na kahu waiwai o ia kula, ka loaa ana ae o ke kelekalapa e hoike ana i ka makana a W. N. Alexander i haawi mai la, aia no oia ma Kapalakiko i nei manawa.
NA MARE.
Lucio Lucas ia Anna Madrina, Iune 16.
C. A. Star ia Miss A. t. Waialee, Iune 16.
Peter J. S. Hanohano ia Stella J. K. Keliiaa, Iune 16.
S. Kamana Jr., ia Louise Apo, Iune 17.
Martin Beek ia Aagie Apio, Iune 18.
L. R. rogers ia Rebecca Wise, Iune 18.
Wm. Palakiko ia Miss helen Tim, Iune 21.
NA HANAU.
Na F. K. Mendiola ame Elizabeth Makuaole, he keikikane, Iune 1.
Na L. Kapowai ame Emma Keahi, he kaikamahine, Iune 20.
Na Joa. Wong ame attie Makahaunani, he kaikamahine. Iune 20.
NA MAKE.
Keahi, ma ka Halema’i Moiwahine, Iune 14.
Joseph N. Lui. ma ka Halema’i Moiwahine. Iune 16.
Wm. Tripps, ma ka Halema’i o Kalihi, Iune 16.
Annie Kane, ma ke alanui Kamehameha V. Iune 17.
Kalawainanui Kaoo, ina ke alanui Hema, Iune 20.
KA HOIKE KULA SABATI AME KA HOOLAA ANA I KA HALE HALAWAI
Elua mau hana ane nui e lawelaweia ana e ka ekalesia makua o Kawaiahao ma keia sabati iho, Iune 26, ka mua, ka hoike hapaha o na kula sabati apana o Kawaiahao, huipu me na kula sabati o na Kona o Oahu, e hoomaka ana ma ka hora 9 . M. a ua manaolanaia e hoea mai ana na kula sabti o na Kona Makua, Waianae, Ewa, ame ko Kalihi Moanalua, a koe ko Kaumakapili kula sabati, no ka mea, e malama ana no ia kula sabati i kana hoike hapaha na ia la, a o ka lua, oia ka, hoolaa ana i ka hale halawai hou ma Kalihi i kukuluia a i makaukau i keia la no ka hoolaaia ana aku.
E hoomaka ana na hana hoike ma ka hora 9 A. M. Ponoi mamuli o ka manaoia ana e nui mai ana na kula sabati e hoea mai ana no ka hoike ma ia la, a e pau ana ma ka hora 12 M. a i ole ani liilii iki paha mahope o ka auinala, ke ulolohi ole na hoonee hana ana, e lilo ana ka manawa holookoa o ia kakahiaka i na hana o ka hoike.
O kekhi o na hana ano nui e lawelaweia ana ma ia auinala oia ka hoolaa ana i ka hale halawai hou o Kalihi. E hoomka ana na hana hoolaa ma ka hora 3 P. M. ponoi, a mahope o ka pau ana o ia hana e malana ana ka Ahahui Hooikaika Kristiano i kana halawi hoau mua maloko o ia hale halawai ma ka hora 6 P. M. a pau ma ka hora 7:30 P. M. a mahope aku o ia manawa e malamaia ai ke anaina haipule e na hoahanau o na eaklesia Hawaii ekolu a o ka panina hope na hoi ia o na hana o ia la.
Ua nui a lehulehu na hoahanau o Kawaiahao e noho nei ma ka apana o Kalihi, a i loaa ai i hale no lakou e hoolulu a e hoakoakoa ai ia lakou iho no ka malama ana i na hana hoomaua, ua waiho mai lakou he noi i ka ekalesia makua ma kekahi manawa i hale aku nui e kukuluia i hale halawai maloko o ia apana a ua hookoia aku a makemake, ua paa ua hale halawai la, na makaukau no ka nohoia a hoomaka aku i na hana i makemakeia. a ma keia sabati iho e hoolania ai. Elilo ana ia hale halawai i pa no na hipa o ia apana e hoakoakoa ae ai, a i wahi hoi no lakou e malama mau ai i na hana hoomana; aole no na hoahanau wale no o Kawaiahao e noho nei ma Kalihi ia hale, aka no na mea a pau e makemake ana e hoakoakoa ne @ lakou mlaila no ka hana ana i na hana a ka Haku. ka mea nona ia waiwai. He wahi hale halawai, ia i @ a paa me ka maikai a he hale halawai kokoke loa hoi no na keiki makua ole e noho nei ma Kalihi-Kai.
ELUA MAU HOOPII KOI AIE NO KA MOKU ZAMPA
Ma ka manawa a ka Lunakanawai H. E. Cooper i kuai ai i ka mokukuna Zampa ma ka manawa o ke kudalaia ana mamuli o ke kauoha a ka aha hookolokolo federala ma Hawaii nei, aole paha oia i manao e nui aku ana kona mau pikikia, aka i nei manawa akahi no oia a ike, no ka mea, elua mau hoopii koi aie e koi mai la iaia ma Kapalakiko ma ke ano oia ka ona o ia mokukuna i nei manawa. O ka huina aie i koiia mai la he $10,224.34.
Ua kuaiia kela mokukuna e ka Lunakanawai H. E. Cooper ma Honolulu ua emi loa iho ia malalo o ka waiwaiio o ia moku. O ka hoopii koi aie mua na ka Banako Lahui Anglo & London o nei no $1900, he kumukuai i manaoia Kapalakiko, a e koi ana i ka huina aie o $5300 i hooiaioia ka haawiia ana mai o ia huina ma ka aie ia Kapena Jack Edwardson, ke kapena mua o ia mokukuna, ma ka mahina o Aperila aku la i hala, no ka hana hou ana ae i na wahi i poino o ia moku oiai ia moku e ku ana ma Honolulu nei. He hoopii keia i hookomoia ae e ka banako i ka aha eha la mahope iho o ke ku ana aku o ke Zampa i Kapalakiko.
O ka lua o ka hoopii i hookomoia ae ma ke ano hui na na luina o ia mokukuna e koi ana i ko lakou mau ukuhana i uku ole ia aku ia lakou nona ka huina o $4924.34. Ua hookomoia ae keia mau hoopii a elua i ka aha hookolokolo apana ma Kapalakiko,
Mai Samoa kela mokukuna o ka hookomo ana mai a ku i ke awa o Honolulu me ka poino, he mau mahina lehulehu i hala hope aku nei, me ka piha ukana, he i’o nui maloo. Ua nui ka liu i komo iloko ona ame ka hoomanawanui na kanaka o ia moku o ka pauma ana ahiki i ke komo ana mai i ke awa o Kou.
E LOAA MAI ANA HE $500,000 LA HAWAII NO NA ALANUI
Ina no ka holopono o kekahi itamu i hoolalaia ai a i hookomoia hoi maloko o ka bila e ku mai la i nei manawa maloko o ka ahaolelo lahui. e loaa ana ia Hawaii nei he hapalua miliona dala no na alanui, elike me ka hoakaka a kekahi lono kelekalapa o ka loaa ana ae i ka oihana kalepa ma Honolulu nei mai ke kakauolelo mai o ka oihana kalepa Mr. Brown, mai Wakinekona mai.
Ma ka hoakaka a Mr. Brown hemea ano nui a waiwai ka waiho ana aku i kekahi nanao me ke komite o na alanui o ke senate e hoakaka ana i ka nui o na dala i loaa aku i ke aupuni federala mai Hawaii mai, a i ukoia aku hoi i ke aupuni federala iloko o na makahiki he 10 i hala, e hookaawale ana i na dala auhau, na dala i ohiia e ka oihana kukeawa, na loaa kuloko, na aha hookolokolo, ka oihana leka ame na oihana e ae elike me ia.
Ma ka bila mua e hoakaka ana ia no ka haawina dala no na makahiki elua no Hawaii nei ame Alasaka he $700,000 pakahi, oia hoi he $350,000 no ka makahiki hookahi. Ma kela bila ua manaoia he hoike ana mai ia i ka haawiia ana o kekahi noonoo hohonu no ka hoonui ia ana ae o ka haawina dala no Hawaii nei.
NUI ANEI
kau dala i hoolilo no kou lole, a i ole ua kupono ae okui iununuu i ole ua kupono anei i kou makemake? Nokeaha ka mea ! ole mai na ka “Halekuai Hoiho. Hou i ke Dala” e hoike aku i oe i ke alahele hoemi lilo? Ka hana nei makou no ka pono o ka poe he mau haneri a nou pu kekahi.
Heaha ka mea hele ole mai e nana i na lole huluhulu a makou a hoikeike nei; Kumukuai mau $17.50. Ke kuaiia nei i keia wa no $12.50. Ma ke kumukuai kahiko he makepono maoli kipa koke mai oiai e koe ana.
The
Model Clothiers
“Ka Halekuai Hoemi Hoolilo.”
ALANUI PAPU
Makai o ka Halepule Kakolika
TERITORE O HAWAII.
Keena o na Puuku, Honolulu. Oahu
Ma ka hana e hoopau ana i ka AALA DRY GOODS COMPANY. LIMITED.
OIAI, o ka AALA DRY GOOD COMPANY, LIMITED, he hui ia i ka kuluia a e ku ana malalo a ma mana o na kauawai o ke Teritore o Hawaii, i kulike ai me ke kanawai a hoomakaukauia ma na hana o keia ano ua waihoia mai iloko o keia keena ke palapala noi no ka hoopau ana i ka ho’i oleloia, hui pu me kekahi palapala i hooiaioia i hoohui pu ia me ia. elike me ia i koiia ai ma ke kanawai.
NOLAILA, ma keia ke haawiia ana nei ka hoolaha i kekahi mea, a i na kanaka apau, he mau kuleana manao. a e kuleana nei paha i keia manawa e ma kekahi ano iloko o ka hui i olelo ae e pono e waiho mai i na ku-e ana i ka aeia aku o ka palapala noi i oleloia maloko o keia keena, mamua ae ka hora 12 awakea o ka la 31 o Augate, 1921, a o kela ame keia mea e makemake ana e hooloheia aku maluna ka ia mea, he pono e hoea kino ae ma o keena o ka mea nona ka inoa malila iho maloko o ka Hale Mana Hooko Honolulu, ma ka hora 12 awakea o ka la i oleloia, a e hoike mai i ke kumu, ina he kumu kekahi i wahi e ae ole ka aku ai ka palapala noi i oleloia.
DELBERT E. METZGER.
Puuku, Teritore o Hawaii.
Honolulu, Iune 22, 1921.
6457—Iune 24; Iulai 1, 8, 15, 22, 29. Aug. 5, 12, 17, 26.
HOPUIA HE PANIOLO KANE ME KA LOLE WAHINE
Mawaena o Lielehua ame Kipa@ loaa aku ai kekahi Paniole nona ka inoa o Aurela Garlia i ka Hope Makai Nui Plemer o Waialua, a ma ka Poalima aku nei i hala, i hoihoiia mai ai kela Paniolo no ka hoopaa ana ma loko o ka halepaahao, mamuli o ka loaa pono ana aku he kane oia i kona i ka lole wahine.
Ma na ano apau ke nana aku he wahine maoli no kela Paniolo, o ka mea wale no nae nana i kumakaia iaia. O ia no ke puhi ana mai o ka makaukau kona lauoho ku’i, a ahuwale ae la kela helehelena, me ka lilo ole o kona ka wahine e komo ana i kumu e nalo ae ai kona epa.
Oiai e pau anao maloko o kahi hoopaa o na lawehala i ninau aku ai o Kau@ Ayer iaia ma ka olelo Paniolo i kela mu o kona lawelawe ana i kela ana hana, a o kana pane, no ka lealea wale no ka, aole no kona manao e hana ana i kekahi mau hana kolohe.
Aole he loihi o ka manawa ae nei i hala, he Pilipino kane. i komo i ka lole wahine ka i paa i ka hopuia. ae i kona noho pu me kekahi Pilipino oia aku ma ke ano he wahine a he @ a ua manaoia o ka hana pahaa ia a @ Pahiolo, i hoolili ai oia iaia iho i wahine, oiai nae he kane kona kuana oiaio loa.
PIHOLO I KA WAI A MAKE LOA
He keiki uuku nona na makahiki la elima ka i piholo iloko o ka wai ma ke kahawai o Waikahalulu ae nei pa ka auwina la o ka Poalima aku no hala, a nona hoi ka inoa o Mitch Kaonohi.
Ua hele aku kela keiki uuku me kekahi poe keiki e ae i ka auau. a lakou e auau ana, i piholo aku ai Mitchell iloko o ka wai, me ka noke @ ana o kona kino i ka lau ahiki i ka loaa ana.
Ua hoikeia mai ka lohe i ka Ho@ Makai Nui Asch, a ma kona hoea ana aku, ua ike oia aole e kala i make a kela keiki, a lawe loa ia ae kona kino make, no kahi waiho o na kino make o ke aupuni.
HOOLAHA HALAWAI
E noho ae ana ka halawai a ka Lunalilo Cirle Helu 279 C.O.F. ma ka ahiahi o ka Poalima Iune 24,1921 ma ka hora 7:30, maloko o ka Phoneix Hall no ke koho ana i na lunanui. Kepoloaiia aku nei na lala apau e hiki mai.
Ma ke kauoha a ka peresidena.
Ma o RACHEL O’SULLIVAN
Kakauolelo Moolelo
6547-Iune24.