Ka Nupepa Kuokoa, Volume LXII, Number 43, 25 October 1923 — Page 4
| This text was transcribed by: | Kamehameha Schools Gift To Dr. Chun |
| This work is dedicated to: | Dr. Michael J. Chun |
Ka Nupepa Kuokoa
KE KILOHANA POOKELA NO KA LAHUI HAWAII.
EHA NUPEPA KUOKOA HONOLULU, T. H. POAHA, OKATOBA 25, 1923.
O HARRY STEINER KA I HOOKOHUIA I LUNAKANAWAI.
O Harry Steiner ka hope Loio Kulanakauhale ame Kalana o Honolulu ka ka Lunakanawai Kiekie Emil C. Peters o ka hokohu ana ae ma ka Poalua o ka pule aku la i hala i lunakanawai hoomalu no ka Apana Honolulu ma kahi o Lunakanawai O. P. Soares i hoopauia mamuli o ka ewaewa o kana malama ana i ka hana, a mahope o kona hookohuia ana mai ua lawe ae oia i ka hoohiki oihana mamua o ke kakauolelo o ka Aha Kiekie, James A. Thompson, a ma ka hora 9 o ke kakahiaka Poakolu mai i lawe ae ai oia ika nono ma ka hale hookolokolo o ka aha hoomalu.
Ma ka halawai a ka Ahahu a ka Papa Loio Hawaii o ka nono ana ma ka Po’akahi o ka pule i hala no ka noonoo a hooholo ana i ke kanaka kupono e hookohuia mai ai no ke kulana lunakanawai ua lehulehu na hoohalahala i waihoia ae e kekahi mau ho no ke apono ana ia Steiner, a eia a i ka manawa hope loa o ka baloka ana akahi no a lokahi na hoa o Steiner ke hookohuia. Ua lehulehu na inoa i waihoia ae no keia kulana ma ka manawa i noho ai ka ahahui papa loio; o Steiner, o Albert F. Judd, Fred Patterson, Huron K. Ashford ame Ferdinand Shanck. Ma ka baloka mua ana a na hoa haule na moho e ae apau a koe o Steiner ame Judd na mea i loaa na baloka kiekie. O keia na baloka i kohoia no kela ame keia malalo nei:
H. Steiner 24, Judd 21, Patterson, 4. He 50 ka nui o na hoa o ka papa loio i akoakoa ae, a ma ke koho hope ana he 49 i koho; ma ia koho ana he 25 baloka i loaa ia Steiner a he 24 ia Judd, a mamuli o ke noi a J. B. Lightfoot, ua lokahi na hoa apau ma ka hoia ana o Steiner ke hokohuia.
Ua hoikeia aku keia apono ana o ka Ahahui a ka Papa Loio Hawaii i ka Lunakanawai Kiekie Emil C. Peters, nolaila ma ka Poalua mai i hookohuia mai ai o Harry Steiner i lunakanawai hoomalu no Honolulu, a ma ia la no i lawe ae ai oia i ka hoohiki oihana, a ma ke kakahiaka Poakolu mai kona hoomaka ana e lawelawe i ka oihana lunakanawai.
Kona Moolelo
Ma Honolulu nei no o Steiner i hanauia ai, o ke keikikane oia a Mr. ame Mrs. Jane Steines o Honolulu nei. Ma ke Kula o Kapunahou ae nei no oia i hoonaauaoia ai, a i kona hemo maikai ana, ua komo aku ia i ke Kula A’o Kanawai o Iale, a puka maikai mailaila mai me ka loaa o na degere kiekie loa iaia he A. B. ame L. L. D. I ka hoi ana mai i Honolulu nei i hui pu ae ai ma ka hoomaamaa kanawai ana me ka Loio E. C. Peters, e noho lunakanawai kiekie mai nei no ke teritore, a i ka manawa i komo aku ai o Amerika i ke kaua nui ma Europa, ua hokohuia mai oia i aliikoa a ma na Pakaua o Leilehua ame Castner oia i noho hana ai ahiki i ka pau ana o ke kaua.
I kona hookuu maikaiia ana mai ua hui hou ae oia me ka Loio Peters ma ka hoomaamaa kanawai ana; no ka manawa pokole mahope iho kona noho ana ma Honolulu nei a holo aku no Shanghai, Kina. I kona hoi hou ana mai i Honolulu nei ua hui ae oia me ka Loio William T. Rawlins a hookohuia mai i hope loio kulanakauhale ame kalana e William H. Heen, ka loio kalana, he kulana hoi ana i paa ai me ka hanohano ahiki i ka hookiekieia ana ae la i lunakanawai hoomalu no ka Apana o Honolulu. He Repubalika kona aoao kalaiaina, a ke manao mau ia aku nei e hana ana oia i ka pono kaulike me ka ewaewa ole i like oli me ka hana a kona mua ma ka oihana.
HE UKANA LUULUU
Solomon Hanohano; Lunahooponopono o ka Nupepa Kuokoa; Aloha Kaua:---He wahi ukana kaumaha a luuluu ka’u e waiho aku nei na ka elele mama hoi e ahai aku ma na paia apau o ka Paredaiso o ka Pakipika nei, i ike mai ka ohana na makamaka ame na hoaloha i ka mimo palanehe ana aku la o ka uhane o kuu hoaloha a heoahanau no hoi, Abraham S. Paniani, ma ka awakea o ka la Sabati nei, Oct. 7, maloko o ka General Hospital o ke kahu ma’i nei. Ua loihi no na la o kona waiho ana i ka nawaliwali, ma kona home ponoi, a ma ka McVeigh Home, kahi ona i noho ai no kekahi mau pule, a hoihoi loa ia i ka Haukapila.
Ua hanauia o “Abe” Paniani ma ke Kulanakauhale o Honolulu, ma ka la 7 o Augate, 1870, na Samuel Paniani ame Lepeka na makua; a nolaila ua piha iaia na makahiki he 53 ame na mahina elua o ke ola ana a hoi aku la i ke ao polohiwa a Kane” - Ua kamaaina no o “Abe” i ko Honolulu poe, kekahi mau Hui Hawaii like ole, a aole no paha i poina kona mau hoa Poola iaia. He kanaka oluolu oia ma ka launa ana me na hoaloha, a he waipahe hoi ma ke kamailio ana, a wahi a kekahi i olilo mai ai i kou meakakau nei; “pehea la ka nui okau mau kipehi ana aku iaia, aole no ia e lilo ana i mea nona e hoomau ai a paweo ai paha ia oe.”
Ua komo mai oia i ke Kahua Ma’i nei, me na hoa ma’i no hoi, ma ka la 2 o Mei, 1914, a piha iho la iaia na makahiki 9 ame 5 mahina a keu o ka nono ana i ka aina kaulana o Kalaupapa, a waiho aku la ke kino i ke one puni hele o Papaloa. Eia no he lehulehu o kona mau hoa i hele pu mai ai ke noho ae nei e hoomanao nona, ame kana mau hana maikai e hiki ole ai ke poina ia.
Aneane paha e piha ka makahiki o kona hiki ana mai ua kohoia iho la oia i luna haawi ai, pipi, kamano, aila mahu, kukaepele a paakai, a ua noho oia ma ia hana no na makahiki elua a keu, alaila ua kohoia i Makai Nui no ke Kalana o Kalawao, a mamuli o ka nawaliwali ua waiho maoili aku oia i ka oihana makai nui. Ua hoomau aku no nae oia iloko o ka hana ahiki i ka loaa ana o ke pani ma kona kulana, ma ka la 1 o Okatoba nei. Eono a oi makahiki kona lawelawe ana i ka oihana makai. Ma keia mau oihana ana i lawelawe ai ua haawina no na mahalo ana iaia, aka, elike no hoi me na kanaka e ae aole no i nele na ohumuhumu ame wa olelo ana nona.
I kona makahiki mua no o ke komo ana mai ua hooikaika oia ma ka hoala ana i na hui hooikaika kino mawaena o na kane ame na wahine, ka paikau, a he eleu maoli no oia ma ka alakai ana ma keia mau hana. O kekahi o na hana ku i ka mahaloia ana i hoala ai, o ia no ka hooikaika ana e loaa i hale hoohauoli a hoonanea me na kiionioni, no ka poe ma’i, oiai o kahi hale no ia mau hana ia manawa, he wahi hale ano like me ka hale lio, pukapuka no hoi ke pili hao, a i ka wa ua he holo a-wai okoa mai no na kulu pakaua, aka, no ka nui hauoli no o ka poe ma’i, aohe nana ia ae o ia ua. Ua komo mai ka noonoo iloko o Paniani e hana i kekahi mea e loaa ai he hale kupono no na ma’i e hoonanea ai me na kiionioni. Ua ui aku oia i keia manao imua o kekahi mau hoa, a i ko lakou noonoo ana ua hooholo iho la lakou e hele aku e hui me ka luna nui McVeigh. Ua kohoia iho la na komite oia keia malalo nei: Charles Palaualelo, lunahoomalu; A. S. Paniani, Jack Kamealoha, Frank Cook, ame Jack Aiona, kakauolelo. O na inoa hope ekolu eia no lakou ke hauoli nei i ka luhi a lakou i hooikaika ai.
I ka hiki ana aku o keia komite imua o ka luna nui McVeigh a hoakaka aku la i ka hana a lakou i hele aku ai, ua hoopuiwa loa ia oia, me ka olelo ana mai aole paha e hiki ia manawa, no ka mea, aole he haawina dala i hookaawale ia e ka ahaolelo no ia hana; e kali paha a nono hou mai ka ahaolelo. Aka, ua pane aku no o Paniani, “The Lord will provide.” I ka lohe ana o ka luna nui i keia mau olelo, ua i mai la oia, “Ina pela, e hana aku oukou, and I will help you.” Hooholo koke iho la no ke komite e wehe i mau aha mele na hana hoomakeaka no hoi, na hana kepolo. I ka hoomaka ana nae o ke komite e hoohana ua puka ae no na olelo hooiloilo mai kekahi poe makaula ae e olelo ana aole e ku ka hale. Ma ka hana ana nae a ke komite ua loaa he $2000.00 aka, aole i lawa no kekahi hale kupono.
Nolaila, ma ka noonoo hou ana a ke komite ua hooholo lakou e hoouna i mau palapala ua hiki aku imua o Kiaaina Pinkham, a i ka ike ana o ke Kiaaina i keia palapala noi a na poe ma’i o Kalaupapa, i hale hoohauoli a hoonanea no lakou, ua komo koki ke aloha iloko ona, a kauoha ae la oia e kukulu ia ka hale, a ma ia hana ana, ko aku la no na makahiki he 15 a oi, me ka loaa ole he ku-e mawaena o ko mua noho ana, eia ka ua kokoke loa mai e haalele ia’u i ke kane!
Auwe, ka mea ehaeha o kuu naau i ka nana ae i kahi a hii wahine e noho ai, e walea ai me na hoa o Magoon Black! Ua hala kahiko no ka mama o kuu wahine no na makahiki loiki a ukali aku la no oia ma ia alanui hookahi. Eia no kona papa e noho mai la no i ka aina hanau me kona ola kino nawaliwali, me ka ike pu ole i ka hanu hope ana o kana kaikamahine.
Ua waiho malia ke kino o kuu wahine aloha ia mau hora pokole o ia wanaao me na leo kumakena o ka ohana i akoakoa pu mai, pela pu hoi na haloha o ka noho ana o ka Magoon Block, a ma na hora o ke kakahiaka nui Poakahi i laweia aku ai ke kino o kuu wahine no ka hale hoomaemae kino o Borthwick, a ma ka hora elua oia la i hoihoi ia mai ai kona kino puanuanu no ko maua rumi ma Magoon Block iloko o ka home kaupaku ole a ka haole, a malaila i akoakoa pau mai ai ka ohana, na makamaka me na hoaloha o maua me kuu wahine, a hoohanini like iho la na mea apau ina kulu waimaka kumakena o ke aloha e hoaleale ana i ka lau lihilihi o na mea apau. Aloha no!
E lilo ana ke aloha o kuu wahine i ukana kaumaha luuluu na’u e hiipoi hele ai i ka la ikiiki wela o ke kaona nei; ona lei aloha paha auanei a maua he mau keiki ka mea nana e hoomaha mai i kuu wela nui o keia ola ana. Aloha no hii makua o ka noho ana he wahine!
Nolaila, e na makamaka, na hoa launa na pilikana, na makua ame kuu mau hoaloha apau, ke haawi aku nei au ke kane i hoehaehaia i kuu mea aloha he wahine, i ko’u mahalo me na hoomaikai kiekie loa i kaupalena oleia, no ko oukou hui pu ana mai me a’u ma ke ku kiai like ana ma kela po no ko’u mea aloha ahiki i ke ao ana, pela pu hoi ko’u mahalo i ka poe hoohauoli lealea mai ma ia po nana i hoomama ae i ke aloha e pinapinai ana i kuu houpo i hele a wela. Ke haawi hou aku nei au i ko’u mahalo ia oukou apau no ka lua o ka manawa, no ka oukou mau makana po-ke pua i haawi mai ai me ko oukou puuwai hamama i piha me ke aloha kuio i kahiko ea maluna o kuu wahine oiai kuu wahine aloha a moe malie ana i ka moe oni ole iloko o kona home kaupaku ole. Aloha no!
Ma ka hora elua o ka Poalua i makaukau ae ai ka huakai hele loa a kuu wahine aloha. Ua kukuni ai na mea apau no ka ike hope ana iho ina hiona aloha o kuu wahine, oiai oia e moe malie ana i ka moe oni ole. Ua hiki ole ina mea apau ke kaohi i na waimaka o ke aloha oiaio ilokoo o na mea apau. Ua malama ia ke anaina haipule no kuu wahine mai kekahi makua misiona o ka Hoomana Moremona. I ka amene ana, ia manawa i akoakoa hou ae ai ka ohana me na waimaka e hiolo makawalu ana no ka ike hope ana iho i na helehelena, aloha o kuu wahine a uhi iho la ka paa a ka haole pau ka ike hou ana iaia no ka wa mau loa. Hoi aku la ka opua i Awalau.
Ua nee aku la ka huakai hoolewa me ka piha pono o na kaa otomobile i ka ohana, na makamaka, na hoaloha apau i piha me ko lakou puuwai hamama o ke aloha oiaio no kuu mea aloha; ua hiki aku ka huakai ma ka pa ilina o Pauoa a malaila i haawi hope ia ae ai na leo hoomaikai i ke aloha o ke Akua, e ka makua Misiona maluna o kona hale lua.
I ka pau ana, a uhi iho la ka lepo maluna o ka lepo, elike me ka olelo a ka Haku e hoi no ka lepo i ka lepo a o ka uhane e hoi aku no ia me ka Mea Nana i hana ua kahikoia iho na lei ilima maluna o kona he puanuanu e memele ana i ka la, pela hoi na po-ke pua o na ano kaila like ole i hoowehiwehi ia iho ai, a na ka ua lili lehua o ia uka a kuu wahine i moe aku la, e kahiko mau iho maluna ona i na wa apau, a huli hoi aku ai na mea apau no ka home me kahi puolo kaumaha ole i ka lima, a no'u iho hoi ke hoi la i ke ala me ko'u mau hoa hele o ia o luuluu Hanalei i ka ua nui, kaumaha i ka noe o Alakai. Eia no laua ke hoopipili mau nei ia'u. A aloha wale ia la hoi a o kaunuohua he puu wale no, hookahi no wahi e ku ai, o ka wahine hoi keia i pili hele ia ai ma na wahi apau. Ua noho ia me ke aloha no na makahiki he 15 a oi, hui me na makahiki elima o ko maua noho ana i keia aina ua like me iwakalua makahiki i noho ia ai me ke aloha, me ka loaa ole he mau manao ku-e mawaena o maua e kaawale ino ai ka noho aloha ana o ke kane ame ka wahine, aole no hoi he hookahi manawa o ko'u lima i hoopa aku ai maluna o kuu wahine aloha. A na kuu wahine no hoi i hoopa mai la ia'u a eha au.
Ua loaa mua i kuu wahine ekolu keiki, hookahi kaikamahine aia no i Maui me na kupuna, elua keikikane eia no me a'u, eono hoi keiki me a'u, elua kaikamahine eha kane; ua make elua kane, koe elua me elua wahine, hookahi aia i ka hanai, ekolu no hoi me a'u hui me na keiki mua a kuu wahine, ua like me elima pua momi maikai a kuu aloha i waiho iho la i mau lei kahiko no kuu mau la o keia ola honua ana. Aloha no kuu wahine hele loa!
Auwe no hoi ke aloha i kahi a maua e hele ai me kuu wahine! O kela piina ikiiki o Puoina, hoomaha aku i ka luna o Papakolea, oia home aloha e luana pu ai me na kaikuaana aloha o kuu wahine, e walea ana hoi i ke ahe olu a ka makani me ka nani huikau lua o ke kaona nei ke nana aku!
Aloha no! Me keia mau kanaenae aloha no kuu wahine, ke hooki nei au maanei me kuu naau ehaeha, ana ka Haku no e hoomaha mai i na kaumaha i kau iho maluna o kana kauwa kane me kona man oiaio ame ke aloha.
Nolaila, e na makamaka na, hoaloha a me ka ohana apau, e oluolu mai oukou e lawe aku i ka'u leo hoomaikai no oukou apau elike me ka maikai a oukou i panai mai ai ia'u, a ke nonoi ae nei au ma ka inoa o ke Akua mana loa, e kau mai i na hoopomaikai ana maluna o kakou apau me na manao lokahi o ke aloha oiaio, elike me ka olilo i hoikeia me ka Palapala Homolele o ia hoi, i aloha kekahi i kekahi. Ua like no hoi ka lua me ia e aloha aku oe i kou hoalauna elike me kou aloha ia oe iho, pela auanei kakou e hoopaa ai i keia mau olelo maikai me ka naau lokahi o ke aloha oiaio. O ka'u leo nonoi keia. Ma ka inoa o ka makua ke keiki ame ka Uhane Hemolele. Amene.
Me oe e Mr. Lunahooponopono ko'u aloha pau ole, ame na keiki ahonui o kou papapa'i ko'u aloha.
Owau iho no me ka naau kaumaha,
HENRY KEOLA, JR.,
Honolulu, Oahu.
Ma kahi o ka $1,991.90 na hoolilo o Samuel W. Robley ma ke kau koho baloka wae moho aku la i hala, ana o ke alualu ana i ke kulana makai nui, ma ka aoao Repubalika, a haule.
LEHULEHU NA ULIA KAA MA KE SABATI IHO NEI.
Mai ke kakahiaka ahiki i ka hora 7 o ke ahiahi o ke Sabati iho la i hala, lehulehu na ulia kaa otomobile i ikeia ma ia la me ka hoonui ia i ka hana ma ka aoao o na makai mokokaikala.
O ka ulia koikoi loa i ikeia ma ia la oia ka pino i ikeia ma ka namawa a S. K. Sun e holo ana maluna o kona kaa me kona ohana ma ke alanui Beritania a hookulia mai e ke kaa e kalaiwaia ana e James Andrews. Ma ka hoike a ka Makai Waiolama o ka hoihoi ana ae, ua hoohuli pokole loa o James Andrews ma ke kihi o ke alanui Weaver ame Beritania a hooku'i kona kaa mawainakonu o ke kaa a Sun e kalaiwa ana. Ua moku ko Sun helehelena me kona poo mo ka poholehole o kekahi mau wahi e ae o kona kino; no Mrs. Sun hoi ua moku kona mau lima ame ka papalina i na apana aniani nahaha, a no Alice Chun ua haki kona iwi kipoohiwi; o ka bebe hookahi ka mea i pakele, aole i eha. no ka holonui noonoo ele i ko hai pono.
O kekahi ulia ma ia la, ia F. H. Dexter e holo ana ma ke alanui Kapahulu ua hooku'i aku la kona kaa me ke kaa mokokaikala o John Jeremiah e holo ana me ka huina o ke alanui Kapahulu me ke alanui Campbell a haule o Jeremiah a moku kona lima akau. Pakele ka wahine ame ke keiki a laua e kau pu ana ma ke kaa aoao. O ke kaa mokokaikala ka i pau i ka nahaha. No ka eha i moeuhane mua ole ia, i lapaauia mai ai o Jeremiah ma ka halema'i o na pino ulia.
Ia la no, oiai o A. J. Ernest e kalaiwa ana i kona kaa, ua hooku'i aku la ia me Kaili Kawai, he keikikane o 11 makahiki e kau ana maluna o ka baikikala a eha ke keiki, a no na eha i loaa iaia oia ka moku ma kona kuli me kekahi mau palapu e ae ma kona poo a ma na maka, i laweia ae ai oia i ka halema'i no kona lapaauia mai.
Hooku'i ke kaa Helu 3812 e kaaiwaia ana e kekahi kanaka i maopopo ole i ke kiakaa uwila ma ke kihi o na alanui Isenberg ame Moi ma ka auwina la, elike me ka hoike a ke kiakaa uwila J. Kaina, a mahope o ia hooku'i ana ua hoomau aku no ke kalaiwa i ka holo o kona kaa. O ia ka hana a na makai mokokaikala ma ia auwina la o ka huli i ke kaa nona ka helu i hoikeia ae ai.
Ma ia kakahiaka Sabati, huikau na kaa e kalaiwaia ana e M. Gineny ame San Yoke ma ke kihi o na alanui Liliha ame Kula a nahaha like ia mau kaa. Ua kauohaia aku na kalaiwa a elua e hoea ae imua o ke Kapena Makai Bob Lilis ma ke kakahiaka Poakahi nei.
Ma ia auwina la no oiai o Walter Bell e kalaiwa ana i kona kaa me ka nui o kona ona ma ke alanui Waialae, elike me ka hoike a ka Makai Mokokaikala Hans Kihachi o ka hoihoi ana ae, ua hooku'i aku la kona kaa me ke kaa o Harold Jeff a nahaha ke kaa o Jeff, a malaila o Walter Bell i paa ae ai i ka hopuia, a no ka eha i loaa ia Bell i paa ae ai i ka hopuia, a no ka eha i loaa ia Bell mamuli o kela hooku'i ana o na kaa o ia ka mokumoku ame ka pohoehole ana ma na wahi lehulehu o kona kino, i laweia ae ai oia i ka halema'i o na poino ulia e lapaauia mai ai.
Ma ia la no, elike me ka hoike a ka Makai Hans Kihachi o ka hoike ana ae, oiai ke kaa a Hirobe e ku ana ma ke kihi o na alanui Desha ame Moi o ia holo no ka ia o ko Allen kaa a hooku'i aku la mahope o ke kaa o Hirobe, a i ka manawa a Hirobe i a'o mai ai ia Allen e hooi aku oia i kona makaala ana ma ia mua aku, i ole e hooku'i hou aku i kekahi kaa, ua huhu o Allen no ia a'oia ana mai ona, a ku'iia aku la o Hirobe ma na maka a pehu. Ua hopuia ae o Allen no ka hewa hoeha me ka mea eha ku i ka make ma ke kakahiaka Poakahi ae.
NA LEKA I KII OLE IA MAI AHIKI I OCT. 20. 1923.
Binanua, Mrs. Rebecca Kaili, Miss Maggie
Imaikalani, Mrs. E. Kemohe, Sam K.
Hikalea, Mrs. Ida Kuaiwa, Mrs. Mary
Kauhane, Miss Emma Lele, Mr. Kale (2)
Kama, Mrs. Julia
E ninau mai ma na leta i hoolahaia ke kii mai.
D. H. MacADAM, Lunaleka.
Ma ka po nei i weheia ae ai ka aha fea nui a ke Kalapu Hoolaha maloko o ka Aloha Paka, me ka hoomauia aku o kela hana, ahiki i keia Poaono iho.
KEKAHI MAU HIHIA O KA OIHANA MAKAI.
No ka hewa o H. Blanhard i hoopiiia ae ai oia kona aihue ana i kekahi pahu waiu mai ka halekuai aku o L. Ah Leona Co., i paa ae ai oia i ka hopuia e ke Kapena o na Makaikiu McDuffie ma ka Poakahi iho nei no kona ninaninauia mai.
O R. W. Allen i hopuia ai ma ke Sabati nei no ka hewa hoeha me ka mea eha ku i ka make maluna o ke kino o H. Hirobe i hoopa'iiia ai oia he $25 me na koina o ke kaa oto a Hirobe e kalaiwa ana e Allen, a i ka huli ana mai o ke Kepani e a'o ia Allen e makaala, ia manawa i lele aku ai ka puupuu a Allen a ku na maka o ke Kepani, a uku nae i ka hoopa'i o $25.
Ia Ah Kong he Pake, e hele ana mai kekahi aoao aku o ke Alanui Coollege Walk ma ke alanui Beritaina a i kekahi aoao me kekahi pu-a wahie e kau ana iluna o kona poo, ma ka hora 7:30 o ka po Poakahi nei, ua hookani aku la o K. Hirei i ka o-le o kona kaa e ku malie aole e hele aku, ano ka pioo o ka Pake ua hoomau aku la no nae oia i ka hele ana a kaa pono mamua o kahi a ke kaa e lolo aku ana a hookuiia oia a hina ilalo a eha, a no ia eha i laweia ae ai oia i ka halema'i Moiwahine no ka haki ana o kekahi o kona mau iwiaoao. I kulike keia me ka hoike a ka Makai Mike Morse o ka hoike ana ae.
No ka ikeia ana o Henry Leong Shun e oili mai ana mailoko mai o ka halenoho o Peter Loo ma ke alanui Kanoa, ma ka po Poakahi nei me kekahi mau waiwai lehulehu he mau mea gula me kekahi mau mea hoomanao ame na dala pepa, i paa ae ai oia i ka hopuia, aole nae i paa koke i ka manawa ona i oili mai ai. Ua hoopuniia ka hale o Peter Loo i ka manawa i ikeia ai he mea aihue koloko o ka hale e ka poe e noho kokoke mai ana; i ka manawa i oili mai ai o Leong Shun ua paa oia i ka hopuia i kekahi kanaka, a mahope o ko laua aumeume ana ua hemo o Leong Shun a no kekahi kuaa kona alualuia ana aku e ka Makai Machado ahiki i ka paa ana, a i ka huliia ana o kona kino i loaa aku ai na waiwai ana i aihue ai. Ma ka Poalua nei i hookomoia ae ai ka hoopii no Leong Shun.
Ma ka auwina la o ka Poalua iho nei i halawai ae ai o Mr. Auana, he wiliki no ke kaa rola alanui, o ke Kulanakauhale a Kalana o Honolulu nei, me ka make ulia mamuli o ka pii ana o ka rola maluna o kona poo @ palahe, mauka ae nei o Alewa.
HOAILONA
AEKO
WAIU KIA
Mahalo na kauka i ka Waiu
Aeko no na bebe maikai
ole o ke ola kino
MAI KALI A PAA KAU BUKE BANAKO I KA UHIA E KA PUNAWELEWELE
O ka hapanui o na kanaka ua maa loa i ke kali a loaa nui mai ka lakou dala, alaila, hookomo hou aku ma ka banako no ka hoopu'ipu'i hou ana aku i ka lakou mau hoahu liilii. E haalele loa ia mau manao ana pela, a e hoomau i ka hoahu liilii ana elike me ka hiki ia oe.
O na huina dala mahuahua ma kou home a i ole ia iloko paha o kou mau pakeke, he mau mea ia e lilo mapakele he mau mea iai lilo ma'uwale ana i kekahi manawa.
UA MAKAUKAU MAU MAKOU E LAWE MAI I KAU MAU HOHU LIILII.
CHINESE-AMERICAN BANK
Kihi o na Alanui Moi ame Nuuanu Honolulu, T. H.
Pahu Leka 2000 Kelepona 6119
GUAVA JELLY TIME--AND A COOL KITCHEN
Hoolilo i ka manawa i hookaawaleia i
mea hoohauoli i keia makahiki ma ka
hoohana ana i ke kapuahi aila maikai.
E hoihoi pono ana ia me ka mau i ka
wela malalo pono ai o na ipuhao. Ua
hoopokoleia mai kau hana, a ua oluolu
kou halekuke, maemae a maikai.
I wahi e loaa mai ai na hopena maikai,
e hoohana wali no i ka Aila Star--ka
aila a maikai a kaulike--i homaemaeia
a hoomemae hou ia e ka makou ano
hoomaemae kaokoa.
Kuaiia e ka poe kuai aila ma na wahi
apau, ma ke kini a ma na pahu. Kauoha
mai ma ka inoa--Aila Star.
STANDARD OIL COMPANY,
(California)
STAR OIL
(kerosene) Heat and Light
MA KE KAUOHA.
HOOLAHA KUAI O KA HOOLIMALIMA AUPUNI
Ma keia ke haawiia aku nei ka hoolaha akea ma ka hora 10:00 a.m., Poalima, Novemaba 23, 1923, ma ka puka komo mamu a ka Hale Kapitala, onolulu, T. H., malaila e kuai hoolilo ia aku ai i ka mea koho kiekie loa malalo o na manao o ka Pauku 73 o ke Kanawai Kumu o Hawaii, na Pauku 358 ame 380 et seq. o na Kanawai Hooponopono Hou ia o Hawaii o 1915 ame ke Kanawai 143 o na Kanawai Ahaolelo o 1917, ku Hoolimalima Laula no ke kula holoholona o na aina Aupuni ma Waianae, Oahu, elike me ia malalo iho nei:
Iliaina (Eka)
(Oi aku a emi mai)
Mahele A, Koena Aina Aupuni ma ke Kualapa o Paheehee,
Waianae, Oahu........................................................................108.00
Mahele B, Koena Aina, Aupuni ma ka Pali o Ku'-ale,
Waianae, Oahu......................................................................... 48.50
Mahele C, Koena Aina Aupuni ma ka Pali o Kauaopuu,
Waianae, Oahu......................................................................... 28.36
Mahele D, Apana 12, na Aina Hookuonoono o Waianae,
Puea, Waianae, Oahu............................................................... 28.68
Mahele E, Na Apana 21, 22, 23, 24, 25, 28, 29, 30, 31, ame
32, na Aina Hookuonoono o Waianae, Waianae, Oahu..........111.87
Mahele F, Koena Aina Aupuni ma ke Kualapa o Paheehee,
ame Kuwale, Lualualei, Waianae, Oahu................................ 350.50
---------
Huina iliaina............................................................... 675.91
O ka hoolimlima e kuai hoolilo ia aku ana e kaa no ia malalo o na kumu ailike apau ame na hulana o na Hoolimalima Laula Aupuni i hoopukaia e ke Keena o ke Komisina o na Aina Aupuni, a e kaa pu hoi malalo o na kulana paku'i e hookomoia aku ana maloko o ka hoolimalima e hoopukaia aku ana mamuli o keia kuni, elike me keia malalo iho:
"No ka paku'i ana aku i ke kulana e pili ana i ka pa ana, elike me @a i paa maloko o na Hoolimalima Laula Aupuni, e malama no ka mea e lilo ai, malalo o kona mau hoolilo ponoi, oiai ka manawa o keia hoolimalimaia aku ana e kulike ana me na palena o ka Ululaau i Hookoeia o Waianae-kai."
"Ina i mahiia ana kekahi hapa o ka aina, e hoolimalima aku ana, e uku no ka iliaina i mahiia i ka uku hoolimalima o $5.00 no ka eka o ka makahiki no ke koena aku o ka manawa mai ka la aku o ka mahiia ana, mawaho ae o ka uku hoolimalima i oleloia."
E kaa keia kuai malalo o keia mau kulana mahope ae nei:
(a) Manawa o ka loolimalima, 21 makahiki mai Novemaba 23,1923 aku.
(b) Uku hoolimalima haahaa, $165.00 o ka makahiki, e uku hapamakahiki mua ia.
(c) E uku mua ka mea e lilo ai, ma ka haule ana o ka hamare, i ka uku hoolimalima o na mahina mua eono, hui pu me na hoolilo apau o ka hoolaha ana ame na kaki e ae apau e pili ana me ka hoomakaukau ana i ka hoolimalima i oleloia.
Hanaia ma Honolulu, T. H., maloko o ke Keena o ke Komisina o na Aina Aupuni, i keia la 23 o Okatoba, A. D. 1923.
6579--Oct. 25; Nov. 1.
HOOLAHA KUAI O NA HOOLIMALIMA AUPUNI
Ma keia ke haawiia aku nei ka hoolaha ake ma ka hora 10:00 a.m., Poakolu, Novemaba 28, 1923, ma ka puka komo mamua o ka Hale aupuni Kalana, Lihue, Kauai, malaila e kuai hoolilo ia aku ai ma ke kudala akea i ka poe koho kiekie loa malalo o na manao o ka Pauku 73 o ke Kanawai Kumu o Hawaii, na Pauku 358 ame 380 et seq. o na Kanawai Hooponopono Hou ia o Hawaii o 1915 ame ke Kanawai 143 o na Kanawai Ahaolelo o 1917, na Hoolimalima Laula o na apana Aupuni malalo iho nei:
1. Ka apana halekula i haaleleia maloko o Kalaheo, e pili pu ana me na Apana 70 ame 75, na Aina Hookuonoono o Kalaheo, Kauai, nona ka iliaina o 2.82 eka, oi aku a emi mai paha. Uku hoolimalima haahaa, $35.00 o ka makahiki, e uku hapa-makahiki mu ia.
2. Apana 74-C, na Apana Taona o Hanapepe, Hanapepe, Kauai, nona ka iliaina o 4,950 kapuai kuea, oi aku a emi mai paha. Uku hoolimalima haahaa, $25.00 o ka makahiki, e uku hapa-makahiki mua ia.
O na hoolimalima e kuai hoolilo ia aku ana e kaa no malalo o na kumu aelike apau ame na kulana o na Hoolimalima Laula Aupuni i hoopukia e ke Keena o ke Komisina o na Aina Aupuni.
E kaa no keia kuai malalo o na kulana mahope ae nei:
(a) Manawa o na hoolimalima, 15 makahiki pakahi mai Novemaba 28, 1923 aku.
(b) E uku mua ka poe e lilo ai, ma ka haule ana o ka hamare i ka hoolimalima o na mahina mua eono, hui pu me na hoolilo apau o ka hoolaha ana ame na kaki e ae apau e pili ana me ka hoomakaukau ana i na hoolimalima i oleloia.
O ke kii palapala aina e hoikeike ana i na apana e hoolimalima aku ana ame ke ano o ka Hoolimalima Laula Aupuni eia ke waiho nei ma kahi o na palapala a e ikeia no ma ke Keena o ka Hope Akena, Hale Aupuni Kalana, Lihue, Kauai, a i ole ma ke Keena o ke Komisina o na Aina Aupuni, Hale Kapitala, Honolulu, T. H.
No na hoakaka aku i koe e ninau ae ma ke Heena o ka Hope Akena, Mr. J. M. Lydgate, Hale Aupuni Kalana, Lihue, Kauai, a i ole ma ke Keena o ke Komisina o na Aina Aupuni, Hale Kapitala, Honolulu, T. H.
Hanaia ma Honolulu, T. H., maloko o ke Keena o ke Komisina o na Aina Aupuni, i keia la 23 o Okatoba A, D. 1923.
6579---Oct. 25; Nov. 1.
No ka hoao ana o G. Riffo ame W. Spencer e aihue iloko o ka hale kahiko e ku nei ma ke alanui Chaplain i paa ae ai laua i ka hopuia e ke Kapena o na Makaikiu McDuffie ma ka po Poakahi nei a paa ia no ko laua ninaninauia mai.
MA KE KAUOHA.
HOOLAHA I HOOLOLIIA O KE KUAI O KA APANA AUPUNI.
Ma keia ke haawiia aku nei ka hoolaha akea o ka Hoolaha o ke Kuai o ka Apana Aupuni i hanaia ma ka la 16 o Okatoba, 1923, ma ke kuai o ka Apana Pa-hale o Olinda Makawao, Maui, ma keia ke hoololiia nei e heluheluia ai elike me ia malalo iho nei penei:
Ma keia ko haawiia aku nei ka hoolaha akea me ka hora 10:00 a. m., Poalima, Novemaba 23, 1923, ma ke Keena o ka Hope Akena, Mr. F. K. Kalua, Wailuku, Maui, malaila o kuai hoolilo ia aku ai ma ke kudala akea i ka poe koho kiekie loa malalo o na manao o ka Pauku 73 o ke Kanawai Kumu o Hawaii, na Pauku 348 ame 358 o na Kanawai Hooponopono Hou ia o Hawaii o 1915 ame ke Kanawai 143 o na Kanawai Ahaolelo o 1917, na apana Aupuni malalo iho nei:
1 Apana #1, na Apana Pa-hale o Olinda, Makawao, Maui, nona ka iliaina o 2.61 eka oi aku a emi mai paha. Kumukuai haahaa, $261.00.
2. Apana #2, na Apana Pa-hale o Olinda, Makawao, Maui, nona ka iliaina o 2.55 eka, oi aku a emi mai paha. Kumukuai haahaa, $255.00.
E kuai hoolilo ia aku no na apana maluna ae malalo o na kulana mahope ae nei, e hookomoia ana ma ke ano he mau kumu hoopaa paku'i ame na kulana maloko o ka Aelike Kuni Kuikawa e hoopukaia aku ana i na apana i oleloia.
(a) He mea pono e kukuliia i hale noho maluna o na apana pakahi iloko o elua (2) makahiki mai ka la aku o ke kuai, o na hale la aole e emi iho ka lilo alalo o $1,500.00.
(b) E uku ka poe e lilo ai i ke'a ame keia makahiki ma keia hope aku i na auhau maluna o ka waiwaiio o ke koina o ka aina i oleloia ame na kaki e ae ame na auhau e kauia aku ana a e ohiia ana paha maluna a i ole ia e pili ana i ka aina i oleloia a i kekahi kuleana paha maloko olaila.
(c) E hoopukaia no ka palapala sila he elua (2) makahiki mahope aku o ka la o ke kuai a i ole ma kekahi manawa paha o ke kukuluia ana o ka hale noho i koiia ai ame ka uku piha ia ana o ke kumukuai i i lilo ai ame na auhau apau i ke Teritore.
(d) E ukuia ma ke kuike ka hookahi-hapakolu o ke kumukuai i lilo ai ma ka haule ana o ka hamare, o ke koena aku iloko o elua hookaa liilii like ana ma ka makahiki me ka ukupanee ma ka 6% o ka makahiki maluna o kekahi koena i uku ole ia.
Ua kaa ke kuai o keia mau apana malalo o keia mau kulana malalo iho nei:
1. E uku no ka poe e lilo ai i na hoolilo o ka hoolaha ana ame na kaki e ae apau e pili ana me ka hoomakaukau ana i na palapala kupono.
2. O na makaainana wale no o na Mokuaina Huiia o Amerika a i ole o kekahi mea paha i kukala ae i kona manao e lilo i makaainana a i ole o kekahi ahahui paha i kukuluia a e ku ana malalo o na kanawai o ke Teritore o Hawaii ke lilo i poe kuai mai.
O ke kii palapala aina e hoikeike ana i na apana e kuai hoolilo ia aku ana ame ke ano o ka Aelike Kuai Kuikawa eia ke waiho nei ma kahi o na palapala a e ikeia no ma ka Keena o ka Hope Akena, Wailuku, Maui, a i ole ma ke Keena o ke Komisina o na Aina Aupuni, Hale Kapitala, Honolulu, T. H.
No ka hoakaka laula e ninau ae ma ke Keena o ka Hope Akena, Mr. F. K. Kalua, Wailuku, Maui, a i ole ma ke Keena o ke Komisina o na Aina Aupuni, Honolulu, T. H.
Hanaia ma Honolulu, T. H., maloko o ke Keena o ke Komisina o na Aina Aupuni, i keia la 22 o Okatoba, A. D. 1923.
C. T. BAILEY
Komisina o na Aina Aupuni.
6579--Oct. 25.
HOOLAHA
I NA MANA KOHO BALOKA O KE KALANA O HAWAII:---Ma keia hoolaha, ke haawi haahaa aku nei au ia oukou i ko'u mahalo ame ko'u hoomaikai a nui loa no na baloka, he 1062, i loaa mai ia'u ma ke Koho Wae Moho ika la 13 i hala, oiai au he Moho no ke kulana Makai Nui no ke Kalana o Hawaii.
THOMAS PEDRO, JR. (Kome Pikalo)
KOHO IA AH NEE
Ke haawi aku nei au i ko'u mahalo no ka lei hanohano au e Hawaii i hoolei mai ai maluna o'u, owau kekahi moho lunakiai i waeia ma ka aoao Demokarata. Ke nonoi hou aku nei au i ka oukou mau kakoo, a e koho hoi ia'u a puka ma ka la 6 o Novemaba e hiki mai ana.
Owau no me ka haahaa,
KEOKI KEKOA AH NEE,
Moho Lunakiai.
PENEI KA BOOSTER OLELO:
"I ko'u olelo ana aku i ka'u 'Mea Ohi Dala,' he nui loa ka'u hana, olelo mai la oia, manao au la he makemake oe i ka nui o ka hana ma ke ano o kau mea i hana ai i wahi no'u e hoololi ai i kuu inoa."
Aohe he hana nui ia makou no ka hooko ana aku i kou makemake. Hana makou i na mea apau e hiki ana ma ke kuai ana i na lole kupono ma na manawa kupono a no ke kumukuai kupono i hiki ai ia makou ke haawi aku ia oe na kumukuai kupono i na la apau o ka makahiki, a ina ua kau aku ka holomua maluna o ka poe kuai mai, alaila ua HOLOMUA makou.
E WEHE I MOOHELU AIE.
THE MODEL CLOTHIERS
"Ka Halekuai Hoemi Hoolilo"
1139 --- .Alanui Papu .--- .1141