Ka Nupepa Kuokoa, Volume LXIII, Number 31, 31 July 1924 — HEWA LOA KA AEIA ANA. [ARTICLE]

HEWA LOA KA AEIA ANA.

O ka aeia ana aku o ka makuakane o kekahi keiki opio, e waiho mai nei maloko o ka Halema'i Moiwahine, iloko o ke kulana kupilikii, e hoeha i kana keiki maloko o ka halewai, o kekahi ia o na hana hewa loa, e pono ai e lawelawe ole ia no ka elua o ka manawa ma keia hope aku. Ina paha ua maopopo mua a maopopo ole i ka Makai Nui Trask, kela hoeha ana o ka makuakane i kana keiki, he mea liilii loa ia i keia manawa, hookahi mea ano nui, o ia no ka lilo o ka hana a ka makuakane, i hookau aku ai maluna o kana keiki, i kumu e lawe ai ke keiki i ka laaumake. He kuleana ko ka makuakane e hoopa'i ai i kana keiki, iloko o na palena kupono, i oi ole aku mamua o kana mea i makemake ai e hanaia mai i ua keiki nei ana e ha'i; aka o ka aeia ana o kela makuakane, e hooko aku ia hana maloko o ka halewai, ke manao nei keia pepa, aole loa ia he hana kupono, ma ka aoao o ka oihana makai. Ua ikeia ke kupono ole o kela lioeha ana a ka makuakane ! kana keiki, mamuli o ke ala ana mai o kekahi hoopii, e ku-e ana, no ka hewa hoeha, o ka mea nae i hooi loa ia aku ai ke kupono ole, o ia no ka lilo ana o kela hana hoeha, i kumu no kana keiki e lawe okoa ae ai i ka laaumake, mamuli mai o na hana a ka makua maluna ona. Ma na mea i oleloia ae, o kela kekahi o na keiki kolohe īnoino, me ka hiki ole i kona makuakane ke hoomalu ia'ia, ina o kela iho la ka mea oiaio, alaila aole no e lilo ka hoeha ana a kona makuakane, i mea waiwai, koe wale no, ka waiho ana aku iaia, na ke kanawai, e imi mai i na alahele apau e lilo ai oia i keiki maikai, a i makaainana mahaloia nia keia hope aku.