Ka Nupepa Kuokoa, Volume LXIII, Number 33, 14 August 1924 — OLELO HOALOHALOHA NO MRS EMMA DUDOIT [ARTICLE]

OLELO HOALOHALOHA NO MRS EMMA DUDOIT

Mr. Lunahooponopono o ka Nupcpa Kuokoa, Aloha pumehana oe:E oluolu mai kou ahonui i ka makou puolo waimaka aloha, no ka makou kaikamahine aloha i haalele mai i keia ola ana, me ke aloha pumako oiaio. Ua oluolu no i ka Makua ma na lani, ke kipa ana ae a lawe aku la i ka mea aloha he uhane, mai ke kino aku o kana kauwa wahine Mrs. Emma Dudoit, ma kona home ma ka aina hoopulapula o Kalamaula, Molokai, i ka la 10 o Iulal, 1924, a waiho iho la i ke kino lepo e hoi no i kona

home mau, a o ka uhane i kona mea nana i hana. Oiai, o na ano maikai apau o ka makou kaikamahine i aloha nui ia, he mea hiki ole ia ia makou ke hoopoina, o kekahi ia o na lala ku maikai i hilinai nui ia iloko o ka Ekalesia Hoomana Naauao o Hawaii, iloko o ka Luakini o Kealaula o ka Malamalama e ku nei ma Koula, Honolulu, a he puuku paeaina nui hoi no ka Hoomana Naauao o Hawaii, a ma o ka maemae la o kona malama oihana ana, i hooliloia ae ai o Kealaula o ka Malamalama kahiko i Kealaula o ka Malamalama hou, e holomua nei ma o ka uhane la ahiki i keia la. He mea oiaio no, ua moe aku la oia, aka, o kana mau hana maikai nae, ke ola nei ia iloko o kela ame keia pakahi o makou i kiahoomanao palaho ole no ke koena o na la, a kona mau hoa kauwa iloko o ka Haku e poina ole ai. Ua haalele iho oia mahope nei i kona hoapili he kane, ame na lei aloha he mau keiki. Nolaila e hooholoia, o makou o na hoahanau apau iloko o ka Luakini o Kealaula o ka Malamalama i huipuia me ke Kula Sabati ame na aha eiwa apau o ka Hoomana Naauao o Hawaii, ke uwe pu a kanikau aku nei me oe e ka hoahanau i hooneleia i ka hoapili, ame na lei aloha a kakou i ka makuahine, ke noi pu ae nei i ke Akua ka Makua mau loa, e hoomama mai hoi i na kaumaha ame na luuluu no ka mea aloha hele loa. E hooholo hou ia, e hoounaia i hookahi kope o keia olelo hoalohaloha i ke kana wahine make M. Dudoit ame na keiki, ko makou hoa paahana iloko o ka ke Akua hana, o ka Hoomana Naauao o Hawaii a i hookahi kope i ka Nupepa Kuokoa. O makou iho no me ke aloha poina ole, a i ke ao pau ole, ma o ko makou mau komite la. DAVID P. KEAWEHAKU, DICK K. DIMOND, JOSEPH K. PEREZ. Koula, Honolulu, Iulai 29, 1924.