Ka Nupepa Kuokoa, Volume LXIII, Number 33, 14 August 1924 — LUULUU HANALEI I KA UA NUI KUU MEA ALOHA UA HALA [ARTICLE]

LUULUU HANALEI I KA UA NUI KUU MEA ALOHA UA HALA

Mr. Solomon Hanohano, Aloha kaua:—Oluolu mai hoi oe i kou mau kipoohiwi me kou mau lima aloha o ka hoomanawanui i wahi rumi oneki, o ko kaua mokulele, aha'i mama, ma na kaiaulu o ka moana akea, i kikeke aku ma na ipuka hale o ka ohana, kuu wahine aloha i haalele mai ia'u, ma na hua mnai a ke Akua i haawi mai ai iloko o ko maua mau la o ka puili aloha pu ana. Ua hala, ua nalo i ke ala hoi hookahi o ka maewaewa, i maalo hookahi iho nei ma kuu alo, me ke aka wailua, o kuu wahine aloha, a hala ma kuu kua, kahi hiki ole ia'u me na lei a maua ke hopu ae, ua hala i ke aka polikua a Kane. Luuluu wale Hanalei i ka haluku a ka wai uina o Namolokama, ua hala kuu mea aloha he wahine! luuluu wale ka hoa noho o kahi mehameha i laukanaka i ka leo o kuu mea aloha he wahine. Ke unu hookahi nei au i ka puolo waimaka me na keiki a kaua; luuluu wale au i ka puolo waimaka e hanini nei ma kuu alo, ua nalo, ua hala no ka wa pau ole. Ua hanauia kuu mea aloha ma ke Kainehe i ka iliili, nona ka olelo kaulana e o nei i keia la i ka wa e noho ana o Makee, mahiko o Ulupalakua, kupa'i ke ko ia Makena, mai ka puhaka mai o kona mama e ola nei, he mau pokii kaikaina, kaikunane, me na keiki a maua ekolu me kona Akamu mua, hookahi kaikamahine, elua keikikane. Ua hoomailo mai ka ma'i maluna o kona kino i ka manawa e kokoke aku ana i ka manawa e hanau ai, ua hoomaka mai ka nui loa me ka manao ina e hanau alaila e pau ae ana paha keia haawina maluna o ke kino, eia nae ua oi loa mai la. Ua hanau no me ka maikai, ua hemo no ka bebe me ka maikai, ua hanau ma ka po Poaono o ka la 26, a make ma ke ahiahi Poaono o ka la 7 o ka mahina o Iune. Ke ola nei no ka bebe me ka maikai. Ua hemahema ka noho ana o ka hale, me na keiki ke unu hookahi nei au i na keiki me na makua ka ohana aloha. Aloha wale kuu wahine mai ka i'a limalau i ke one o Papakuaiwa, mai na makalae hulihua o ka aina, ke kiei a halo nei au ma-o a maanei, mahea la oe i nalo iho nei; ua hala ka pualena aia i Hilo, ua imi aku la ia Papalauahi, loaa aku la no i Makanoni e nonoho ana no me ka la i Kukii. Eia au iloko o ka ehu o ka makani hoolua ka makani anu o ka aina o kaua, ua hala oe ka wahine ka mea e mehana ai, i mehana au i na keiki a kaua. Me ka ohana o kuu wahine hoomanawanui i ka hana a ko kakou Haku aloha, ame kona makua, ke hoomaikai nei au i ka poe me ka ohana i ku kiai pu ai me a'u i ke kino wailua o kuu wahine i na hora o ka po. Ke hoomaikai hou nei au i ka poe i makana mai i na boke pua o ke aloha ame ka ohana, no ka mea ua kahaia ko kakou kino mailoko mai o ka lepo, pela kakon e hoi ai ilaila; no ka mea ke waiho nei ke ko'i malalo o ke kumu o ka laau, ke olelo nei o Paulo i ka wa kanawai ole,

ola au, hiki mai ke kanawai, make iho la au. Ke hoomaikai nei au i ka Lunahooponopono. Me ke aloha nui, PINE POEPOE, JR. Makena, Maui.