Ka Nupepa Kuokoa, Volume LXIV, Number 29, 16 July 1925 — Page 8

HE KU MAOLI I KA POLOLEI OLE.

O ke kulana o ka papa o na lunakiai o ke Kulanakauhale a Kalana o Honolulu nei, i ka nana aku iloko o keia mau la, aole ia i kaokoa ae, mai kinohi mai o ka lawe ana ae o kela papa i ka hookele ana i na hana o ke aupuni kulanakauhale, malalo o kona malu, aka e ku kaokoa mau ana kekahi mahele o na lunakiai mai kekahi mai. Eia na Lunakiai Cunha ame Ahia ke hookaawale mau nei Ia laua iho mai na halawai aku o ka papa, aia hoi ka Lunakiai Hollinger ma Amerika i keia manawa, a o na lunakiai Demokarata ekolu me hookahi lunakiai Repubalika, o lakou ia e noonoo mau nei i kela ame keia la, i na ke aupuni, a no keia ano hana a na lunakiai aole he pololei ke nana aku. Me kela kulana kuikahi ole, a paonioni mau, mawaena o na Repubalika ame na hoa Demokarata o ka papa o na lunakiai o na manawa ae nei i hala, ke nana aku nei kekahi mahele o na makaainana me na manao hoohuoi, o ka noho ana o na Lunakiai Cunha ame Ahia, mai na halawai aku o ka papa, aole ia no ko laua ma'i maoli, elike me ka laua hoike i waiho aku ai imua o ka meia, aka no ke kakali ana no ia ahiki i ka huli hoi ana mai o ka Lunakiai Hollinger, mai Amerika mai; i hoomahuahuaia ae ai ka makaukau, e ku aku ai a paio me kekahi mahele o na hoa o ka papa, kela mahele i ikeia ai ke kuikahi ole o na aoao elua, ma na hoonee hana ana. I hooiaio, no ka pololei o keia manao hoohuoi, ua loheia na manao ku-e o na Lunakiai Cunha ame Ahia, no ka pololei ole o ke kohoia ana o ka Lunakiai A. F. Clark, no ke kumu, aole oia i aponoia e ka hapanui o na hoa o ka papa, a i wahi e lilo ai na hana apau a ka papa lunakiai e lawelawe ai, i noho mana ia e na Demokarata ekolu, ame ka lunakiai hou, he mea pono ia Iaua e lilo ole, o Iaua pu kekahi maloko o na halawai a ka papa, e noonooia ana, a e hooholoia ana kekahi mau hana pili i ke aupuni kulanakauhale. Me kela ike i loaa aku i na Lunakiai Cunha ame Ahia, e lilo ana ka laua mau ku-e ana, a mau hooikaika ana aku paha ma kekahi mau hana no ka holomua o ke upuni, i mau mea lanakila ole, oiai aia ka hapanui ma kekahi aoao mai; o ka imi ana nae o ka ma'i ke kumupale e kau ole aku ai na ahewa ana maluna o laua ma kekahi ano, no ka hele ole ana ae ma na halawai, o kekahi ia o na kumupale kupono ole, a aole e puni wale mai ana ka lehulehu, ma kekahi hana pulapu o keia ano. Elike nae me ka nui o na hooikaika ana ma ka aoao o kela mau lunakiai e hoea ole aku ma na halewai, pela no ka ikaika o ka manao ame ka iini iloko o na hoa Demokarata ame ka meia Demokarata, e hoea aku laua ma na halawai apau, a e lilo na hana i lawelaweia e ka papa ; i mau mea mana, me ka nana ole ia o ka laua mau ku-e ana aku. Ua like no a like na ahewa ana ina he mau ahewa ana aku kekahi, maluna o na lunakiai hoohemahema i ka laua hana, me na lunakiai, i ake mau, e lanakila ka lakou mau mea i makemake ai e hana aku ; no ko lakou hoao ole ana e kapae ae i na noonoo ana i ko lakou aoao kalaiaina pakahi mahope, a mamua ka noonoo ana no na hana e pono i'o ai ke aupuni, ame na mana koho baloka.

O KA MEA POLOLEI MAOLI NO IA!

Mahope iho o ka hookohuia ana o Albion F. Clark, i hoa no ka papa o na lunakiai o ke Kulanakauhale a Kalana o Honolulu nei, i hoakaka ae ai oia i kona manao, e kapae ana oia i ka ninau aoao kalaiaina, a o na hana e holomua ai ke aupuni, a e pono ai ka lehulehu, o ka mea mua loa ia iloko o kona noonoo ; no keia hoakaka, ua hiki ole ke kaohi mai na makaainana kuokoa apau, i ka haawi ana aku i ko lakou manao mahalo nona; a ina pela iho la ke kulana o na hoa apau o kela papa, ma ko lakou manawa i kohoia ai e na mana koho baloka, ina aole he pilikia iki e ikeia i keia la. Malia paha, i ku kela manao o Mr. Clark, no ka mea i hookohu maoli ia mai oia e ka Meia Wilson i lilo ai i lunakiai; ina paha na na mana koho baloka, elike pu ana no oia me na hoa lunakiai Repubalika, elike no hoi me ka pili mau o na hoa Demokarata apau, ma ko lakou aoao iho; hookahi nae mea maopopo loa, ua hoike okoa mai oia i kona ano kuokoa, ma ka iini ana, e haawi aku i kana mau kakoo ikaika ana, ma na hana apau e pono ai ka lehulehu, a e ku-e aku hoi, i na hana ana i ike ai, i ka pono a pololei ole.

No na hana uhauha a hoomaunauna wale i na dala o ka lehulehu, ma na hoolilo kupono ole, ka hoomahuahua ukuhana, ame na limahana, pela iho la i hookomoia aku ai ke aupuni kulanakauhale iloko o ke kulana kupilikii, o ka auamo ana nae i kela mau hana uhaai, maluna ia o ka poe hookaa auhau, ka poe no na lakou i koho aku, i na hoa o ka papa o na lunakiai, ame na poo o na keena oihana kulanakauhale.

He oiaio loa na olelo a Kiaaina Warrington i hoakaka ae ai no ke kahua o ka holomua ma Hawaii nei, elike me kana i hoomaopopo maoli ai iloko o na makahiki aku nei i hala, a pela no hoi no keia mua e nee ahu nei, o ia no ka noho kuikahi o na lahui kanaka apau. Me na oihana mikiala i kukuluia ae iloko nei o ka aina aole loa ia e lilo ana i mau oihana holomua ke ole e lokahi like na lahui apau, ma ke kakoo ana aku ia mau oihana.

Me na ike he nui i loaa i na hoa o ka ahaolelo lahui, o ka huli hoi ana aku nei no Amerika, no na hemahema ma Hawaii nei, e pono ai e haawiia mai na hooponopono ahaolelo federala no keia teritore; e kau aku ko kakou mau manaolana, ua hoomahuahuaia ae na manao makee iloko o kela mau hoa kaukanawai, no ko kakou mau pono ame na pomaikai, ka mea i loaa ole ia lakou pela mamua aku nei.

He kumupale maikai loa ka ma'i, i kekahi manawa, ma na haiia apau, ina pela iho la e hoopakeleia ae ai, mai ka hooilina ana aku o na ahewa ana maluna o kekahi mea, aka he mea hoihoi ole ia ka ma'i e kakou, ke lilo ia i kumu hoopilikia mai i ko kakou mau kino, a kakou e olelo ae ai, aole o kakou hoihoi ia mea.

Me na ulia kaa otomobile, e loaa mau nei i kela ame keia la a pau ka pule. na poino no hoi i kau aku maluna o kekahi poe, pela ka poe i make i na kaa otomobile, kokoke loa e kauia ka weli o kela ano kaa ma keia mua aku, e ka poe, i makee i

ko lakou mau ola.

EKOLU MAU HAPAUEA I EHA MAMULI O KA HAULE ANA MAI KE ALAPII IHO

Mamuli o kekahi ulia ili wale mai he ekolu mau hapauea, o ka mea opiopio iki o lakou he 65 makahiki, a o ka mea 1 elemakule loa he 75 , i halawai me na eha mauwale ma ka po o ka Poakolu a o kekahi ma ke ahiahi o ka Poalua aku la i hala mamuli o ka haule ana mai ke alanuipii iho. O ka mea mua i eha a i hoikeia ae ai i ka oihana makai, he wahine o Mrs. M. Pankratz, no ke Cottage Grove, ma ka hora 6 P. M. o ke ahiahi Poalua aku kona eha ana, paholehole kona mau kuli a no ia eha i laweia ae ai i ka halema'i o na poino ulia a mahope iho i hoihoiia ae ai i ka halema'i Moiwahine. I palaha oia maluna o ke alapii P'' -iku o kona hale i halawai ai me ia elia. Ma ka hora 9 mai o ka po poakolu he wahine no o Mrs. Mary Vierra ka inoa no Kalihi. Ua poniuniu oia a maule ma kona manawa e ku ana ma ke poo o ke alapii o kona hale a walawala iluna o ke alapii, a no ia eha mamua o kona umuma i laweia ae ai i ka halema'i o na poino ulia. Ma ia ahiahi no, aneane he hapaha hora ke kowa mahope iho o ko Mrs. Vierra hookuuia ana mai ka halema'i mai he wahine Kepani o 73 makahiki, a nona hoi ka inoa o Shiraki, no ke alanui Nuuanu, ka i laweia ae i ka halema'i o na poino ulia no ka eha ma kona kuekue lima mamuli no o ka haule ana mai ka lanai mai o ka hale a iluna o ka lepo.

UA PAU KA NANA ANA A KE KOMITE A KA AHAOLELO LAHUI

Mahope iho o ka hele ana e makikai i ke kahua o na mokukaua ma Puuloa no ka manawa hope loa ua hoike ae na hoa o ke komite a ka. ahaolelo lahui i hoouna mai ai, o A. E. B. Stephens ka lunahoomalu, aohe o lakou kanalua no ka hoonui ia ae o ke kahua o na mokukaua ma Puuloa a loaa ke kulana lako a makaukau i makemakeia no ka oihana kaua moana me ka palua ia mai o ka heluna o na mokuluu no ia kahua. Ia manawa hookahi e hoomahuahua pu ia mai ana na koa hiki i ka loaa ana o kekahi heluna nui lawa kupono me ka lawa i na makaukau a pau no ka oihana kaua moana. Ua hoike pu. ae ka lunamakaainana Stephens ma ia manawa like i kona manao he mea pono e hoolaula a eliia ke awakumoku o Puuloa. "He mea ano nui loa ke awakumoku, aole no ka oihana kalepa wale no, aka no ka oihana kaua pu kekahi, a no la kumu he mea pono e hoohohonuia a e hoakeia ae, i hiki ai e nui ka rumi no na moku e komo mai ana. Ma ke Sabati iho nei i haalele mai ai na komite a ka ahaolelo ia Honolulu nei a holo aku maluna o ka moku halihali koa Henderson no Kahului, a mailaila aku a Hilo, a o kona awa hope loa ia mamua o ka hoi loa ana aku no San Diego ma Kaleponi.

ANEANE E LELE NA MANAMANALIMA I KA MEA HOOPAHUPAHU

No ke kulaia ana i ka po kiulai ua kuni ae la kekahi Pake i kekahi mea pahupahu nui i ke ahi, a no ka pokole loa o ka uiki, a mamua hoi o kona kiola ana aku ia mea ua pahupahu mua ae la nae ia oiai no e paa ana iloko o kona mau lima, o ka hopena i ikeia no ia hana hemahema ana oia ka aneane loa ana e lele kekahi o kona mau manamanalima. Iloko kela Pake u ka hale hui a na Pake nu ka Alanui Aala a e hoao i ia e hoopahu i kekahi mea hoopahu nui, pahu mua ae la nae ia mamua o kona kiola ana aku i kahi e.

MOKUMOKU I KA OMOLE NAHANA I KA WA I LUU POO AI

ka . -ina!.. _x , nei no .. makemake o kekahi keikikane o Harry Avilla e auau ua holo aku la oia maluna o ke kaa ahiki i kekahi kiowai ma ke poo o ke alanui ololi Ladd, mauka ae nei o Pauoa, a mahope o kona wehewehe ana ae i kona mau aahu ua kulou poo aku la oia iloko o ke kiowai papau a hookui kona i na omole nahaha i kiolaia iloko o ia wahi kiowai. Mamua o kona umauma kahi o ka mokumoku hohonu a loihi, e like me ka moolelo, a no ia eha i laweia ae ai oia no ka halema'i o na poino ulia no ka lapaauia ana mai, a he umikumamaha mau maka kui i humuhumuia ai k. ' wahi i mokumoku ; o kona home aia ma ke alanui Auwaiolimu, a ilaila oia i hoihoiia aku ai mahope o kona humuhumu a kauia ana i ka laau.

Nuhou Kuloko

Ma ka Poalua iho nei, i hoemi hou ia mai ai na akena hopuhopu waiona ma kahi o eono ka nui, mai ke keena mai o ka Akena Hopuhopu Waiona John H. Wise, no ke kumu he poe wale no kela i hoohanaia, no na mahina ekolu.

Ma ka auwina la o ka Poakahi iho nei , i hooku'i ae ai ke kaa mokokaikala o ka Makai Herman Moniz me ke kaa otomobile, e hookeleia ana e S. Kubo, ma ke alanui Beritania e kokoke ana i ke alanui Weaver, me ka nui o na poino i loaa i ka makai, e hiki ole ai iaia ke hele koke i ka hana, no kekahi mau mahina elua.

Iloko o ka aha a ka Lunakanawai Kaapuni John R. Desha, ma ka Poakahi iho nei, i hookohuia mai ai o Samuel K. Toomey, i kahu no na keiki oo ole a kona hoahanau Alexander T. Toomey i make.

No ka ae okoa ana ae i kona hewa imua o ka lunakanawai o ka aha apana ma ka Poakahi iho nei, o ia ka holo nui i kona kaa otomobile, ke kumu o ke kahuli ana ma Kaneohe, a loaa ai na poino i ka poe e kau ana maluna, i kauia mai ai ka hoopa'i o umi dala maluna o William Wilkins, me ke kapaeia ana o kona kaikini hookele kaa, no ka manawa o hookahi makahiki;

Ma ka hora eiwa o ke kakahiaka o keia Poaono iho, e pa 'iia ai ke kii o ke keiki hanai manu o Kahuku, me ke kiamanu nana i pahele a paa ka manu ahiu ana, ke keiki o Palolo, a hoopukaia aku ko laua mau kii maloko o ke Kuokoa nei, i ike mai ai ka lehulehu ia laua.

Ma ka Poaono iho nei, i huli hoi mai ai kekahi poe makaikai, o ka holo ana aku nei no ke kulanakauhale o Los Angeles me ka Ahahui Kamehameha, a ua hooka 'ulua iki ia aku kekahi poe, a mahope mai, no ka makaikai ana i kekahi mau kulanakauhale e ae o Kaleponi.

He o ia mau no ke kulana oma'ima'i o na Lunakiai Cunha ame Ahia, elike me na mea i hoomaopopoia aku, no ko laua hoea ole ae ma na halawai kuikawa i malamaia e ka papa o na lunakiai i na la aku la i hala.

I kulike ai me kekahi hoike i loaa mai i keia keena, ua koho wale ia, hookahi kumu o ka make koke ana o Duveauchelles opio, kekahi o na paahao mai Maui, mai, mahope o kona okiia ana, o ia ka pilikia ana o kekahi wahi o kona kino, mamuli mai o kona komo ana iloko o ka hookuku hukihuki kaula o na paahao, ma ka la Pokiulai aku nei i hala.

UA MALAMAIA KA HANOHANO O KA LA KUOKOA O AMERIKA MA WAIANAE

Ma ka Poaono o ka pule aku Ia i hala, ka la 4 o Iulai, ua malamaia ae e na makaainana ma ka apana o Waianae ka hanohano o ia la, he kai huakai, he mau heihei, he hukihuki kaula a he kinipopo ka hana lealea hope loa. , Mamua loa o ka huakai ka bana puhiohe keleawa a mahope aku o ka poe e hele wawae ana na kaa i hoohiwahiwaia a e kauoia ana e na lio, e like me ia e hanaia ai i na la kahiko i hala, oia ka hana mua loa ma kela kakahiaka Poaono. Ma ia la aneane e koe wahi kanaka ole na kauhale no ka hele ana ae e ikemaka i na lealea o ia la ma ke kaona o Waianae. Mahope iho o ke kai huakai he hoikeike holo maluna o ka bipi a na lilo ia M. Pico ka manaka ekahi. Ka lua o na lealea ma ka papa kuhikuhi hana o ka la he hukihuki kaula mawaena o ka puali makai ame na makaainana, a no ekolu manawa ke kaa ana o ke eo i na makai. Ma ka papa kuhikuhi hana no ke kakahiaka komo pu he hookuku hopu puaa i hamoia a pahee ke kino i ka aila ka lealea mua, ka lua, be heihei mawaena o na opio a pela hoi ka heihei mawaena o na kanaka makua; ke kolu, he heihei pahu barela na na keiki malalo iho o 12 makahiki; ka eha, he hookuku kakia kui na na kanaka makua; ka lima, he heihei hookuku ai pai, a o ka hope he heihei no na mea a pau no hookahi mile ka loa. Lehulehu na kaa kalaka i piha me na ipu haole wai nui a momona i laweia ae a haawiia i ka poe a pau i komo pu ma na, hana hoohauoli o ia la. Ma ka auwina la he hookuku kinipopo mawaena o na koa o ke kahua o na mokuea ma Puuloa ame na keiki laeula iho o Waianae, oia ka hana hoohauoli hope loa o ia la.

NA ANOAI POKIULAI 0 KA UA LANI HAAHAA

I ka Lunahooponopono o ka Nupepa Kookoa; Aloha oe:-E oluolu oe e hookomo iho maloko o ka hiwahiwa a ka lahui, i kela poomanao e kau ae la maluna, o ia keia: He umi-kumamalima hora mamua ae o ka hoea ana mai o ka la hoomanao, a o ka la no hoi i kukuluia ai ka Repubalika mana, a ulakolako loa o ka hoonua nei, ke hoomaka e nei no kou meakakau, e haku, i mau lalani wehewehe, i na mea e hoohana a e hoomakaukauia nei, e ko Hana nei mau kupa Amerika, no ua la nei. He mau pule mamua ae o ka manawa, na akoakoa ae la keia mau keonimana, oia o Geo. Gibb, ka haku o ka mahiko, Wm. Haia poo kumukula, J. Medeiros, luna ohi auhau ame kekahi mau keiki lalawai e ae no o Hana nei e hoolala i mau komite ame ona papa kuhikuhi o na lealea, me na hana e ae o ka la. O ka hoohui ana ae o ke poo o ka maiko me na poo aupuni, he hoike ana mai ia i ke ohohia o na makaainana o Anakala Same o keia welau o ke aeritore, e hoomanaoia ka la hanau o ke aupuni o Wakinekona, ka makuakane na'i aupuni o Amerika Huipuia. Ua hooholo iho la lakou, e hoohana o Hana nei i ka la nui o ka aina, ma o ka haawi ana i mau lealea kupono, i ka hapa mua o ka la, me ka hoomakaukau ana i mau meaai, e ana ai ka lua o ka inaina o ke kanaka a i ke ahiahi ana iho, e hoohauoliia ka lehulehu, ma o ka haawi ana i aha hulahula iloko o ka hale hoolaulea o Wananalua. Mamua o ka hiki aaa mai i ka hora wehe o na hana hoolaulea, hooikaika kino, ame ka ahai ana i na makana lehulehu; ua okoakoa mai la he huina nui o na kanaka ma na kahua nei, me ke kokoke e poai puni ia e na kaa otomobile. Ma ke kihi o ke kahua, ua kukuluia e ka haku o ka mahiko, he lanai nui palena ole, nana e hoomalumalu ana i ka hapanui o na lede ame na kane pu ame na opio. Oiai aia keia kahua ma ke kihi hema o Kauiki, ka puu kaulana i pau ai o Pe 'ape 'a i ka wela a ke ahi, nolaila pa pono mai la no ka. makani kaulana o ka aina he Ulumano, mai ke kai mai, a olu iho la ke anaina, ahiki wale no ka paholaia ana mai, o na meaai mamua, ke anaina, ahiki wale no i ka paho-(hotgogs) me na palaoa, kope a pela wale aku. Ua ai ke anaina, a koe nae ka poe ai ilio ole, no ka lohe he naaukake ke paholaia mai ana. O keia iho ka papa kuhikuhi o na lealea o ka la: Hoomaka ina ka hora 9 o ke kakahiaka maloko o ka pa kinipopo ma Kipahulu iho o Kauki. Heihei 1. Heihei alualu uala kahiki, lilo ke eo ia Jos. Ahui. 2. Lele kiekie, Watanabe, Jr., ame Chas. Jacob. 3. Kukini o 100 i-a, Jos. Ahui, Joe Drummond. 4. Holei hamare Jas. Kalehua, Kala Palekai. .5. Heihei kamaa, Joe Helekahi, Geo. Kaaihue, 6. Kukini kamaliiwahine, Yaiko Hayashi, Grace Jacob. 7. Heihei eke, Eddie Manoa, Kala Palewai. 8. Lele pa kiekie, Arthur Kailua Kinney, Joe Drummond. 9. Uhau uluna, Sam Kalalau. 10. Hukihuki Kaula, Na keiki o Kowali. 11. Lele pahu-ku, Beligard Bardogo. 12. Kukini keikikane, Sam Kamana. 13. Nou hamare, Henry Cooper, Jas. Kalehua. 14. Holo a Iele, Jos. Ahui. 15. Kinipopo makaupena, Kalapu Pilipino. 16. Heihei baikikala, Kenethe Lee, Kenichi Okano. 17. Heihei ekolu wawae, Jos. Ahui, Watanabe. 18. Hehei kekake, Fred Tomlimson. 19. Kukini hapa mile, Arthur Kailua Kinney, Chas. Jacob. 20. Hukihuki kaula, Kalapu mahiko. 21. Lele-pa, e ka lio, Wm. Kaiana, Chas. Waikiki. Ua lawelaweia na lealea Pokiulai, malalo o na hooponopono ana, ame na lawelawe ana a na komite i hookaawaleia no kela ame keia ano lealea, pela hoi na hana hulahula o ka po ana iho. UA LANIHAAHAA, Hana, Maui.

AOHE I PILI KA HEWA IA ISOMURA NO KA MAKE ANA O KE KEIKI

I kulike me ka ke Kapena o na kalaiwa kaa oto Kamauoha o ka hoike ana ae ma ka Poaono o ka pule aku Ia i hala aohe hoopii e hookomoia ae ana no Isomura, ke kalaiwa o ke kaa kalaka i hookui ai ine keiki Uuku o 3 makahiki, a hina ke make no ia keiki. Oiai o Isomura e kalaiwa ana i kekahi kaa kalaka ma ke alanui Moi ma ke ahiahi, o ka Poalima o ka pule aku la i hala na hookui mai la kana kaa ia Ah Loy Leong, he keiki uupu o 3 makahiki, a hina ke keiki ilalo me ka loaa o kekahi eha kukonukonu loa iaia, a no ia eha i laweia aku ai no ka halema i o na kamalii ma ke awakea Poaono mai. Ma ka hoakaka a na kahu-

Nuhou Kuwaho

NU HOU KUWAHO MANILA, July 9.— Ua lilo na kuau e haule mau mai ana me ka ukali pu ia mai e ka makani taifuni i mau mea hoopoino me ka nui o na poho aneane ma na wahi a puni na Mokupuni Pilipine. Ua hookunanaia na moku holopiliaina a pau me ke kakali ana o ka malie ae. O na waapa na kaa i hoohanaia ma na alanui lehulehu maloko o Manila ma na wahi i halanaia e ka wai na wahi i kohoia ua hiki aku i ka $100,000 ke poho.

CANTON, July 8.— Me na hakaka mawaho aku o ke kulanakauhale he lehulehu i hoikeia mai ma na wahi kaua huliamahi ke nanaia aku nei mamuli o ka mahae maloko o ke aupuni hou. He hahana loa ka manao hae o ka lahui i nei manawa a ua silaia na hale o na lahui e ma ke kauoha a ke aupuni he hana no ka hoopakele ana.

KOBE, July 9.— Ua haalele na luina a pau o ka mokuahi Emepera wahine o Rusia i ka moku a ua lele aku iuka o ka aina me ka ae ole ia. Ke hooikaika mai nei ka hui mokuahi e loaa i mau luina Kepani no ia moku no ke pani ana ma kahi o na luina Pake i haalele mai i ka hana.

CHUNKIANG, July 9.— Ua hoopukaia ae kekahi kuahaua e ke Komisina Pake i keia la o ka poe e hoao ana e hoopoino i na ola o na lahui e he make wale no. Ua lilo ke kulana uluaoa o na kanaka maanei i mea hooweliweli mai a eia na lahui e apali ke hoomakaukau mai nei no ka haalele ana iho ia nei.

TOKIO, July 9— Ua hoolahaia ae e ka nupepa Kokumin i keia la kekahi mea hou no ka hoao ana a kekahi mau Korea e komo iloko o ka kalealii o ka Emepera me kekahi mau poka pa-hu. He elua o lakou i paa i hopuia a he elua i pakele aku, a ua paa ae nae laua mahope iho maluna o ke alanui e hiki aku ai i Korea. Aole i pahu na poka mamuli o ka ike mua ia ana. wahi a ka hoakaka a ka nupepa. Ma ka hale hoomaha o ke kau wela ka emepera kahi i noho ai ma ka manawa o keia hono ana e hoopoino i kona ola, pela ka manao wale ia.

NEW YORK, July 10— Ma keia la i hoikeia ae ai. ke kuai hoolilo ana aku o John D. Rockfeller, Sr., i kona mau aina ma na kuahiwi Pocantico a maloko o Lakewood, N. J., kona hale ma ke kaona ame ka halekaa otomobile maloko o ke kulanakauhale o Nu Ioka ame kona hale hoomaha o ka hooilo ma Ormond, Fla., i kana keikikane John D. Rockfeller, no ke kumukuai 5 oi loa aku maluna o ka $3,000,000. Ua haalele iho ke kuai o keia la i ke kanaka waiwai loa o ke ao he kanaka nele loa i ka home nona ponoi iho. O ke kumukuai i ukuia no kela ame keia apana aina ua oi loa ae maluna o ka waiwaiio o ka aina hauhauia ai. Ua hoole loa ae kekahi lala o ka hui aila i ka oiaio o na olelo i hauwawaia ae i kuai ka onamiliona aila i keia mau waiwai ona i mea e pakele ai i ka uku ana i na auhau waiwai hooilina.

ma'i o ka hale ma'i o na Kamalii ua naha ka iwipoo o ke keiki a me he mea la ua haki pu kona ai. Ma ka hoike a na makai na laua i ninaninau i keia hookui ana ua hoike ae o Kamauoha aohe i pili ka hewa ia Isomura, a,ua hoihoi ae ke kiure a ke koronero he hoike imua o ka aha he make ulia ko ke keiki ma ka manawa i noho ai ka halawai a ke kiure koronero.

MAOPOPO OLE KE KUMU O KA WAAWAA ANA O KE POO O KA PAAHAO

Loaa aku o John Viera, he paahao i hoopaaia aku maloko o ka halepaahao kalana e auwe mai ana i ka eha, a no ke kumu o kona eha ana ma kona poo he ninau pohihihi loa ia, no ia eha ona i laweia mai ai i ka halema'i o na poino ulia no ka lapaauia ana aku. Ua hoopaaia aku kela Pukiki maloko o ka halepaahao kalana e ke kapena o na Makai Lawrence Twoomey e hiamoe a pau kona ona, a i ka hele ana aku keia a ka Wiliki Palenapa e wehe I ka rumi kahi o Vierra i hoopaaia ai e auwe mai ana oia i ka eha, a hoike kokeia ae ia eha o Vierra ia Kauhaihao, a lawe koke ia mai i ka halema'i, ma ka nanaia ana o kona wahi i eha i loaa ai ka ike ma kona poo kahi i waa waa. No ke kumu o kona eha ana ua pohihihi loa na makai a ke huli ia mai la nae e na makai.

UA LILO KA HANA HOIKE KULA SABATI O NA APANA O KA WAIAHAO MA KAMOILIILI I HANA OHOHIAIA.

E Mr. Lunahooponopono, e oluolu mai i wahi kowa o ke Kuokoa:— Ua lilo ka hana hoike Kula Sabati o na apana o Maluhia, Manoa, Pa lolo, Kaimuki ame Kamoiliili ma Kamoiliili i kela ame keia mahina i hana ohohiaia ma ka hoomaopopo iho, o ka hoike no nana e hooiaio mai i'a ohohia mai ka uuku ma na haumana ame na lulu a kela ame keia Kula Sabati a i ka pii mahua hua mau ana aku, he hua e ike maopopoia mai ai na waiwai ia hana. Ma ke Sabati i hala iho la no ke Sabati o Maluhia ia manawa hoike a ua hui pu mai na apana e ae ma na hana hoike ame ke kokua ana ma na lulu; ka huina nui o na hau mana i akoakoa ae ma Ia ia he 211 na makaikai he 13 a o na loaa lulu he $130. O ka hapanui o keia mau dala e holo aku ana ia no ke kokua ana i na hoolilo o ka ekalesia or Kawaiahao. Maluhia na hana i lawelaweia ahiki i ka hookuu ana, maikai na haawina a ku i ka nani na himeni a ua aneane i ka hapalua e ka huina nui o na haumana apau na pokii ame na opio i komo pu ae ma ia hoike ana, Nani Kela. Mahope iho o na manao paipai mai ia Rev. Kapahee, Rev. Wm. Kamau ame kekahi poe e ae na hookuuia na hana o ia la me ka pule ame ka himeni a ke anaina, a he mau meaai mama ka i panaiia mahope iho. Ma ke Sabati mua o Augate e hiki mai ana no ke Kula Sabati o Manoa ia la hoike, a ua upuia aku e hoea ae ana na manu leo lea o ka Ua Kuahine me ko lakou mau makaukau apau no na hana hoike o ia la. Me ka mahalo i ka lunahooponopono, Kou no a mau — Makaikai.

MAKE HIKIWAWE LOA O JOHN DUVAUCHELLES MALOKO O KA HALEMA'I

Ua make o John Duvauchelles, me ka hikiwawae loa oiai oia e hana ana no kona hoopai i kauia aku ai mai ka 20 a ka 25 makahiki e noho ai maloko o ka halepaahao me ka hana oolea no ka pepehi ana a make o Wai Bow, he Pake kiai loko i'a ma Molokai ma ka po o ka la 15 o Maraki, 1916, ma ka hora 3:30 o ke kakahiaka Poalima o ka pule aku la i hala maloko o ka halema'i Moiwahine, kahi oua 1 lawe awiwi ia ae ai ma ka auwina la Sabati no ke oki ana iaia no kekahi ano ma'i i loaa iaia. Ma ka hora 11 o ka Poakahi nei kona anaina hoolewa o ka malamaia ana maloko o ka bale kupapau o Silva ma ke alanui Kukui me Nuuanu, a ma kahora 5 o ia auwina la i hookauia aku ai kona kino mahina o ka mokuahi Lehua no ka hoihoi ana aku i Pukoo, Molokai, ma ke alahele aku o Kaunakakai, no ke kanu ana i kona kino ma ka ilina ma Pukoo ma ka Poalua nei. O keia kekahi o na keikikane a Edward K. Duvauchelles i hopu a i hoopai pu ia ai me ka makuakane ame kona hoahanau Waldemar Duvauchelles no ka pepehi ana a make o Wai Bow ma Malokai. Ua hanania o John Duvauchelles ma Honolulu nei ma ka la 23 o Aperila, 1897, a iaia i make aku la ua piha iaia na makahiki he 28, 2

mahina ame na la keu he 17. HP moolelo pepehikanaka ko keia ma i kanaka i kamaaina i ko ka Nupepa Kuokoa poe heluhelu apau elike me ia i hoopuka mua ia aku ai. NA MARE. Oliver Kupau ia Jessie Amy Robb, Mei 14. Edward Alapai ia Ellen PuuVi. Mei 27. John H. Eames ia Lily K. Naholo, Iune 1. Joseph M. Nihoa ia Bernice T Kekai, Iune 10. Herman Rosezweiz ia Violet Ah sing, Iulai 2. H. J. Sweenwy ia Mary Kalua. Iulai, 8. Louis B. Omega ia Jennie Kanamu, Iulai 10.

NA HANAU. Na Kamaka Kalahiki ame Elizabeth Akau, he keikikane, Iune 25. Na Samuel N. Kaeo ame Rose Kimona, he keikikane, Iune 26. Na James ame Edith Anahu, i ••. keikikane, Iune 27. Na Wm. Hing Ping ame Abigail Kahaawinui, he keikikane Iulai 4. Na Alex D. Toomey ame Minnie Ululani Kea, he kaikamahine. Iulai 7 Na Ng Chong ame Lily Kealoha he keikikane, Iulai 7.

NA MAKE.

Alice Kaanaana, ma ke alanui Kuke, Iulai 8. Joseph Kealoha, ma ka Halema'i Moiwahine, Iulai 9. John Duvauchelles, ma ka Hale ma'i Moiwahine, Iulai 10. John Kapela Brown, ma ke alanui Luso, Iulai 10. Rebecca Duvauchelles ma ke alanui Moi, lalai 11. Joseph Pili Hussey, ma ke alanui Moi, Iulai 11. David H. Keawepoo, ma ka Halema'i Moiwahine, Iulai 11. Julia Williams, ma ke alanui Martin, Iulai 11.

P. E. R. STRAUCH LIMITED WAIWAI PAA INISUA

Ma x waiwai alahele kaauwila ame ke taona, ke waiho aku nei makou no ko kuai he hale maikai o 2 rumi moe, ma ke alanui ololi Peter-son. 50x50 o ka apana, he wahi nani no kou home o keia mua aku, kokoke i ke kaauwila me ke kula. He makepono ma ka $2750.00. Ma ke taona he hale maikai o 2 rumi moe ma ke alanui Puowaina, aohe ukukaa e uku ai, oluolu loa ma ka $3000.00 Uku liilii. Kalihi Kuea Kamaki, mau apana maikai ma na kumukuai haahaa makepono. $50.00 uku mua, $20 o ka mahina. Kapahulu: Nui ka makou mau apana maikai ma keia wahi kaulana, he 50x100 pakahi o ka apana, hiki ke loaa ia oe ma ka $25.00 uku mua, $20 o ka mahina. Na bale lako a lako oi no ka hoolimalima. Na pahu hoahu no ka hoolimalima $2.76 a pii aku o ka makahiki. 75 Alanui Moi Hema Kelepona 2391-2391 Mahope o na hora oihana a ma na la Sabati kuhea mai 5117.

HALE O NA ALII O HAWAII (Ahahui Poo)

E malamaia ana ka halawai ki mau o ka (Ahahui Poe) o ka Hale o na Alii o Hawaii, ma ka Phoenix

Hall i keiaSabati Iulai 19, 1925, ma ka hora 2 p. m; Ma ke kauoha a ka Iku Hai, MISS LOUISE AKEO, Iku Kau. 6369— Iulai 16.