| | HE MOOLELO — No — KALOKE a i ole
Ka Mea i Kapaia ka Moiwahine o na
Puuwai Kupaa. MOKUNA II. "Aole i loaa ia'u kona inoa," i pane aku ai no hoi o Kalifoda. "He oiaio anei aole i maopopo ia oe ka inoa o kela kaikamahine?" me ka hakilo pono loa ana mai o Abe Nape, ma ka helehelena o Kalifoda. "O ka mea oiaio maoli no ia, aole au i ike i ka inoa o kela kaikamahine. Ua makemake no au e ninau aku i kona inoa, aka ua hele oia a piha loa me ka pihoihoi, a aole au i makemake, e hooi aku i kona maka'u, ma ka niele ana aku i na mea i pili iaia. "He nani hoi ia, ua makemake oe e ike i ki inoa o kela kaikamahine, nolaila, o oe ka mea nana e ninau aku iaia; a e niele pu aku oe i ke kumu o kona holo ana a haalele i ka hale ana o ka hemo ana mai iwaho, aia a halawai hou kaua ma keia hope aku. ia manawa oe e hoike mai ai ia'u i na mea apau au i ike ai nona." MOKUNA III. O ka ai hoi ia o Kalifoda i kona aina kakahiaka ahiki i kolia maona ana, haalele aku la oia i ka home o Abe Nape, aia hoi iloko o kona umauma na mea he nui e lalapa la, me he pulupuluahi i kuniia aku i ke kukaepele. O kela hana i hookoia ma ka po mamua aku, o ki mea nui hookahi ia iloko o ka noonoo o ke kanaka opio, a ua lilo no hoi i ninau pohihihi loa iaia, kona lilo ana, oia ka mea nana e hoopakele i ke ola o ke kaikamahine opio, no ka mea nalu wale iho la no oia iloko ona, ina paha i lohi iho oia he elima minuke o ka hoea ana ma ke alanui Haukona, ina ua lilo ma'uwale ke ola makamae o ka wahine opio, a aia paha kona kino maluna o ka wai kahi i lana ai ma kela manawa o ke kakahiaka. Ma kekahi aoao hoi, noonoo pu iho la oia, i ke kupaianaha maoli o ka mea i hanaia; eia ka nana, na kekahi kanaka opio i kipaku mai ka home mai o kona makuakane, e hoopakele ana i ke ola, o kekahi wahine opio, i haalele aku i ka hale ana i noho ai. "Heaha aku ana la ka hopena ma keia hope aku," i namunamu liilii wale iho ai no o Kalifoda iloko ona, iaia e hele malie la no ke taona, me kona ike maoli ana iho no i ka loli o kona ano, me he mea la aia na noonoo maikai a kanaka makua iloko ona. "No ka helehelena o kela kaikamahine, o kela ka mua loa o ka u'i ame ka huapala a'u i ike ai, a he kulana Iede oiaio kona ma na ano apau; no ka mea, ma ke ano o kana kamailio ana, pela me kana hele ana, i ka poe wale no o ke kulana kiekie e loaa ai ia mau ano, aole i ka pohai o ka poe haahaa ame na kaikamahine a'o maikai ole ia. "Ma ko'u manao koho, o kela kekahi o na wahine opio maemae loa, a iaia i kau mai ai i kona hilinai maluna o'u, ua like Ia me kekahi uwila o ka anapa ana mai ma kuu uhane, ka mea nana i kono okoa mai ia'u, e lilo au i kanaka hanau hou ia e pono ai. "Aole e hiki ia'u ke hoopoina i kela mau maka nohea, o ia no oe o na maka onaona o ka manu nunu, me he mea la e heluhelu mai ana i ko'u mau manao ame ko'u mau ano; ka mea nana i kono okoa mai i ko'u noonoo, e lilo au i kanaka maika elike me na ano o kela wahine opio. "Aia no hoi o Ane kuu kaikuahine aloha, oia kekahi o na kaikamahine maikai, a ua makee maoli no oia ia'u kona kaikunane, a me he mea la ke ike maoli nei no au, aole he haiia pono e ae ma ko'u aoao, o ka hoike wale aku no i kuu makuakane, aole au he keiki lapuwale a waiwai ole elike me kana i manao ai, aka owau kekahi keiki, me kekahi mau kalena mai-kai he nui iloko o'u." I ka hoea ana ma kela wahi o na mea a Kalifoda e noonoo ana, ku ino iho la oia i kahi hookahi, a me he anapa ana Ia na ka uwila, hooholo iho la oia, ua pau ka hoomaunauna wale ana i na manawa maikai, aka e komo koke oia e lawelawe kekahi oihana, a e lilo oia i kanaka maikai e mahaloia mai a oia e na mea apau. Me kela manaopaa iloko ona, hele pololei aku Ia oia no ke alanui Borokawe, no na keena o ka poe hoopukapuka ma na waiwai paa, ame na mahele iloko o na hui hoopukapuka wai wai. Me kona mau manao koa apau, pihi ae la oia i kona kuka me ka hele pololei ana aku a komo ae Ia maloko o ke keena o kekahi kanaka hoopukapuka waiwai, i noho hoaloha me ko na ohana no na makahiki loihi. Iaia i komo aku ai iloko, ninau aku la oia i kekahi o na ku pakako, no kona makemake e ike ia Mr. Nowuda, a kauohaia mai la keia, e hoomanawanui oia no kekahi manawa pokole aia a pau ke kamailio ana a kela kanaka me kekahi mea okoa aku, alaila komo aku oia e ike iaia, maloko o kekahi keena okoa aku. Aole no i loihi kela kakali ana, hookipaia aku la keia ma loko o ke keena o Mr. Nowuda, a haawi mai la kela kanaka i kona aloha, i ke kanaka opio me ka hoihoi, a mahope o ko laua lululima ana, aole o Kalifoda i hoohakalia iho, i ka hoa-kaka ana aku, i ka manao o kona hoea ana aku ma kela kaka-hiaka. Hoike aku la oia ia Mr. Nowuda, no kona paee ana me kona makuakane ma ke ahiahi aku mamua, a i ka hope loa o kona hoike ana aku i kona moolelo, nonoi aku Ia oia i kela kanaka, | ina paha e hiki ana iaia ke haawi mai i hana nana, no ka mea ua hooholo maoli no kona noonoo, e hele oia i ka hana, a e hoolilo iaia i kanaka kupono maoli. Ke hoolohe pono mai la o Mr. Nowuda i ka moolelo a Kalifoda e hoakaka aku nei mai ka mua mai ahiki i ka hopena, me ka nana ana mai hoi o kela kanaka maluna ona, me na manao kanalua no ke kanaka opio, a o ia kana o ka pane ana mai: "Ma ko'u manao maoli e Mr. Kalifoda Vini, ina ua ike oe i kou hewa a aia iloko ou ka iini, e komo iloko o kekahi oihana, e lilo ai oe i kanaka maikai, alaila aole he wahi kupono e ae nou e noho hana ai, mamua o ke keena oihana o kou makuakane, elike me kana i makemake mai ai e noho hana aku oe maloko olaila. "E hoomanao oe e kuu hoaloha opio, aia ka manao maikai ole iloko ou ame kou makuakane, a i wahi e hoopauia ae ai kela kulana mawaena o olua, o keia wale no ka'u a'o ia oe, e hoi oe e noho hana malalo o kou makuakane, ma ia ano auanei, e kau mai ai kona hilinai ana maluna ou, a ma kou aoao hoi, e hoikeike aku oe imua ona, no ka paa o kou manao, e lilo kanaka nui ma keia hope aku, a o kou makuakane hookahi wale no, ke kanaka kupono nana e onou aku ia oe imua, aole o kekahi poe e ae." No kela hoakaka a Mr. Nowuda ua pahola ae la ka nanaina maikai ole ma ka helehelena o ke kanaka opio, a kulou iho a kona poo ilalo, me ka pane ole aku no kekahi mau minuke, a iaia no paha ka maopopo i kana mea e pane mai ai, aea ae la kona poo iluna, a kamailio mai la: "He mea oiaio, ma kekahi mau ano, aole paha au i hana aku i na mea a ko'u makuakane i ake mai ai ia'u; aka nae, ma ko'u manaoio, ua pili pu ka hewa i kuu makuakane, aole oia i lawelawe mai i na hana apau elike me kekahi makuakane i makee i kana keiki; nolaila ina au e hoi aku ana e noho hana malalo ona, aole no ia he mea e hoopauia ae ai kela ano kahiko iloko o maua, a o kekahi no hoi, o ka hana paha e haawiia mai ana na'u e lawelawe aku, aole ia he hana e ike maoli ia ae ai ko'u mau ano kupono. "Ua koho maoli no au, e noho hana aku malalo o ka poe okoa, a e hooikaika au ma na ano apau, no ka hoikeike ana aku imua o kuu makuakane, he keiki au i loaa ka iwikuamoo, aole elike me kana i kapa mai ai ia'u; a o kekahi no hoi, me he mea la, he rula paa loa ia, aole he holopono o ka lawelawe oihana ana a ka ohana ponoi, elike me ka holomua, o ka lawelawe pu ana me ka poe malihini loa." "Ke ae aku nei au imua ou e kuu hoaloha opio, he mau mea oiaio wale no kena au e hoakaka mai nei, a ke ike aku la au i ka pololei o kou manao; aka ma kekahi ano nae, me he mea [a, o ko-- ' nie aku e noho hana malalo o kou makuakane, aole oe . ni i kekahi mea e hooluoluia ai kona noonoo. "Ua hoopiha mai oe i ko'u noonoo, ma ke ano o kau mau olelo me na manao makee nou e ke kanaka opio, a malia, e hooiia ae ana paha kou kulana ma ka noho hana ana aku malalo o ka poe okoa, a ke manao nei au, e loaa ana no he wahi kupono nou e noho hana ai." "Me na mahalo he nui ia oe e Mr. Nowuda," i pane ae ai o Kalifoda Vini, me ke kui'o loa, a ua hookahahaia aku hoi ka manao o Mr. Nowuda, no kela iini loa o Kalifoda e loaa iaia kekahi hana, no ka mea ua kamaaina oia i na ano o kela kanaka opio mamua aku, aole ona hoihoi i ka hele i ka hana, o ka holoholo wale iho la no kana hana makemake, me ka huikau iwaena o na keiki a ka poe waiwai me ka hoolilo ana i na dala a kona makuakane ma ke ano uhauha no kekahi mau lealea waiwai ole. He kumu okoa ae no kekahi a Mr. Nowuda i manao ai, e haawi aku i na kokua ana ia Kalifoda, aia iloko o keia kanaka ka iini e lilo ke kaikuahine o Kalifoda, i wahine na ke keiki a kona hoaloha waiwai; malia o kona kokua ana aku i keia keiki opio iloko o kona manawa o ka pilikia, he kumu ia no Kalifoda e panai mai ai i kekahi hana maikai ma kona aoao ke hoea mai i ka manawa kupono. "He nani hoi ia, ua hoike mai nei oe i kou makemake e noho hana me a'u, nolaila i hoike aku no au imua ou i ko'u manao maoli ea, aole loa o'u makemake e ike i kekahi poe molowa iwaena o ko'u poe kanaka; nolaila ua ili aku ke ko'iko'i maluna ou, ka hoike ana mai no kou kupono e noho hana me a'u ame ka ole." "Ke hooia hou aku nei au imua ou e Mr. Nowuda, e lawelawe aku ana au i ka'u mau hana apau me ke kuio loa, a e ike aku ana no oe, aole au mea e mihi ai no kou haawi ana mai hana na'u," wahi a Kalifoda, me ka maikai ole o kona noonoo iaia i ike mai ai i ke ano o ka nana ana aku a Mr. Nowuda iaia me he mea la, aia no iloko o kela kanaka kekahi manao hilinai ole maluna ona, a o ia kana o ka pane hou ana mai: "Malia paha aole e hiki ia oe ke hilinai mai no ko'u hooko aku i ka'u mau hana me ka manao kui'o mamuli o kou kamaaina i ko'u mau ano iloko o keia mau makahiki loihi i kaahope aku nei, a o ka mea oiaio no ea, owau pu kekahi i hookahahaia mai, no keia loli ano-e loa ana o ka makemake iloko o'u e hele i ka hana, ka mea a'u i ike ole ai pela mamua. "No kou pono, a. no ko'u pono ponoi iho, ke hooia aku ne au imua ou, e lawelawe aku ana au i na hana apau e haawiia mai ana ha'u e hana, me ka makaukau apau i loaa ia'u." "O kena ke ano o ke kamailio ana e ke kanaka opio, nola-ila aole a kaua mau mea hou i koe e kamailio ai, maluna o keia kumuhana; a i ka manawa hea oe e makaukau ai no ka hoi ana mai e hana me a'u?" "Auhea oe e Mr. Nowuda, no ka hoike ana aku i ka mea oiaio ea, he ewalu wale no dala iloko o ko'u mau pakeke i keia manawa, a o kela mau dala na kuu kaikuahine no ia i haa w mai, mamuli o kona lokomaikai me ka oluolu, ahiki i ka loaa ana o ka'u dala, alaila hoihoi hou aku au iaia. "E hoomaopopo hou mai oe e Mr. Nowuda, he kanaka opio au i maa i ka piha mau o ko'u mau pakeke i ke dala, e lu ana ka hema, nolaila aole i lawa kela mau dala no ka malama ana ia'u, no kekahi manawa loihi; a o ia ka'u e olelo aku nei imua ou, ua makaukau au e wehe ae i ko'u kuka, a lawelawe aku ka'u mau hana i keia manawa ano, me ke kakali ole no kekahi la okoa aku." "Ke mahalo loa aku nei au ia oe e kuu hoaloha, a ua like maoli no kou ano, me ko kou makuakane," alaila noke okoa ae la o Mr. Nowuda i ka akaaka. "Ae, e wehe oe i kou kuka, a e hoomaka kou hana ana i keia manawa, a o kou ukuhana elike no ia me ka ukuhana a'u i uku ai, i kekahi mea okoa no kela ano hana hookahi a'u e haawi aku ana ia oe," alaila hoike aku la oia i ka nui o kana uku e haawi ai ia Kalifoda. Ua hoohauoli loa ia aku ko Kalifoda manao, no kela uku hoikeia mai la iaia, aole oia i manao mua, pela iho la oia e ukuia mai ai, oiai he mea hou Ioa oia, akahi no a noho hana malalo o kela kanaka, ua kupono paha kela uku, no kekahi mea i kahiko kona noho ana, aole no nae ana hoohalahala ana aku, aka noho ae la oia ma ka aoao o kekahi pakaukau, a hoo-maka aku la e nana i na palapala a kona haku hana e ahu mo- | kaki ana maluna o ke pakaukau, me kona lilo ana i kakauolelo na Mr. Nowuda. E haalele aku kaua e ka makamaka heluhelu o keia moolelo ia Kalifoda e lawelawe ana i ka hana kakauolelo, me kona haku hana, a e hoi hou ae kaua ihipe no ka home o Abe Nape kela wahine oluolu a lokomaikai nana i hookipa aku i ke kaikamahine malihini a Kalifoda i hoopakele ai mai ka make mai, ma ka po mamua aku. Ma ka hora eono o ke kakahiaka o kela la, i haalele iho ai o Keoni Nape, ke kane a Abe, mahope o ka pau ana o kona aina kakahiaka, no kahi o kana hana, a ma ka hora ehiku ae hoi, i ala mai ai o Kalifoda Vini, a oia pu kekahi i haalele aku ka hale, i ka wa i pau ai kona aina kakahiaka, nolaila, aia o Abe Nape, ke holoi la i na pa ame na pola, a ke pulumi la hoi i ka hale, me kona waiho malie aku i ke kaikamahine opio e hiamoe elike ke loihi me kana i makemake ai. "Ua nui paha ka maluhiluhi o kela kaikamahine, pela i loihi ai kana hiamoe ana," i namunamu wale iho ai no o Abe iaia iho, oiai oia e lawelawe ana i kana mau hana, me ka hoonakeke ole. Ua kani no hoi ka hora eiwa o kela kakahiaka, oiai no o Abe maloko o ka halekuke, ua weheia aku la ka puka, e pale ana mawaena o ka rumi aina ame ka halekuke, a kiei ana no ke poo o ke kaikamahine opio, a o ia ka Abe o ka pane ana mai me ka leo oluolu loa: "O ke aloha kakahiaka no kou e kuu kaikamahine; ke lana nei ko'u manao, ua loaa he hiamoe maikai ana ia oe ma keia po, a ke ike aku nei au i ka lamalama maoli o kou mau papalina, o ia no oe o kekahi dala hou o ka oili ana mailoko mai o kahi hooheehee dala." "Ae, o ke aloha kakahiaka no ko'u; a ke mahalo aku nei au ia oe, no kou oluolu me ka lokomaikai ia'u. I hoike aku no au i ka mea oiaio loa ea, o keia ka manawa maikai mua loa a'u i ike ai, i hiamoeia e a'u, no kekahi mau pule lehulehu," alaila nui iho la ka hanu o ke kaikamahine opio. "Ke hauoli loa nei au no ko'u lilo ana i mea kokua aku ia oe elike me ka hiki ia'u ke hana, e kuu hoaloha opio; e noho aku oe maluna o kena noho, a e hoomakaukau ae au i mau meaai nau; aole no au i ai i ko'u aina kakahiaka, ua kakali iho nei au a ala mai oe, i hookahi ko kaua ai like ana, ke lilo ole nae ko'u noho pu ana me oe, i mea nau e ku-e mai ai," me ka nana pono loa ana mai o Abe mailuna mai o ke poo o ke kaikamahine ahiki ilalo o kona mau wawae, a ke hoomaopopo loa mai la oia, aole kela ne kaikamahine na kekahi ohana haahaa, aka he mea oia i maa i ka noho ulakolako ana, a ua hoonaauaoia hoi oia. "Aole a'u mau ku-e ana aku no kou noho pu mai me a'u e ai ai, o ko'u hauoli loa ia, o ka loaa o ke kokoolua e ai pu ai, a e noke ai no hoi i ke kamailio," i pane ae ai ke kaikamahine opio me ka piha hoihoi. "Pehea e oluolu anei oe e hoike mai ia'u i kou inoa, i hiki ai ia'u ke kahea aku ma kela inoa, i ko kaua wa e kamailio ai?" wahi a Abe, iaia i waiho mai ai i kekahi mau pa meaai imua o ke alo o kana malihini. "O Kaloke Livinakona ko'u inoa, i pane aku ai ke kaikamahine opio, me ka pii nae o ka ula ma kona mau papalina, no ka lilo ana o kana hana naaupo ma ka po mamua aku, i kumu e ike wale ia mai ai kona inoa e ka poe ana i kamaaina ole ai mamua, elike me keia ana e hoike nei ia Abe. "Ea, he inoa kela no kekahi ohana kiekie," i nalu wale iho ai no o Abe iloko ona, me kona hoopuka ole mai nae i kona manao imua o kana malihini alaila kii aku la i ke kope a ninini iho la iloko o ke pola, panee mai la no hoi i kekahi apana i'o pipi palai ame ke pa palaoa imua o Kaloke, a hoomaka iho Ia laua e ai, a no ka noho kukule loa o ke kaikamahine opio, hoomaka mai la o Abe e kamailio ma na mea lehulehu, ahiki i ko laua nanea maoli ana, me ka hoauhee loa ia ana aku o ka hilahila ame ka hoopepe mai ia Kaloke aku, a ai aku Ia oia me he mea la, oia ponoi no ka mea nana i hana i kela mau meaai. O ko laua ai hoi ia ahiki i ka maona ana, ua kaa aku la ke kamailio ana ma ka aoao o ke kaikamahine opio i ka i ana ae: "E ae mai oe, e lilo au i mea kokua aku ia oe, ma ka lawelawe ana i kau mau hana, aole loa he mea maikai ma ko'u aoao, ka noho wale iho no." "Aole au e koi okoa aku ana ia oe e lawelawe mai i kekahi hana, a he mea maikai ole ' o hoi ma ko'u aoao, ka ae ana aku i kau noi, aka nae ina he mea i'o e hooluoluia aku ai kou noonoo, kou kokua ana mai ia'u ma kekahi mau hana, alaila ua hoohauoli loa mai oe i ko'u manao," wahi a Abe me kona hopu ana iho i na pa meaai, a lawe aku la no kahi holoi-pa. "Oiai hoi kaua e lawelawe ana i ka kaua mau hana ea, malie e hiki ana paha ia oe ke hoakaka mai i kou moolelo; a ma ka'u nana aku ia oe, me he mea la aia kekahi mau kumu ano nui loa, nana i kono mai ia oe, e hooko aku i kela hana o ka po nei," a i ka ike ana mai o Abe, i ka haikea maoli o ka helehelena o Kaloke, hoomau hou mai la oia i kana kamailio ana: "Aole au mau mea e hopohopo ai no'u e kuu hoaloha, aia a loihi aku ko kaua noho ana, e ike maoli iho ana no oe, he hoaloha oiaio loa o Abe Nape no ka poe iloko o ka pilikia." "Ua hoike mai nei oe i kou lilo ana i hoaloha oiaio loa no'u, ma kou hookipa ana aku ia'u me ka oluolu loa ma kou home nei, a elike hoi me kau noi, pela no au e hoike aku ai ia oe i na mea e pili ana ia'u, he moolelo i piha i ke kaumaha ame ka ehaeha, aka iloko aku nei o na pule elua i hala, i hiki hou ole iho ai ia'u ke hoomanawanui, a owai la ka mea manaoio mai, no ko'u emi hikiwawe ana iloko o ka hoohaahaaia!" "Auwe no ka hoi e!" i hooho ae ai o Abe, me kona piha i ke kahaha no kela mau olelo hoakaka mua a Kaloke, a o ia ka ke kaikamahine opio o ka hoomau hou ana aku: "Mai manao oe e kuu hoaloha, ua lawelawe maoli au i kekahi mau hana hewa no ka hoohaahaa ana i ko'u inoa ame ka inoa o ko'u ohana, aole pela, aka ua lilo na mea e hoopuni ana i ko'u oia ana, i mau mea hookaumaha mai a i mau mea hoehaeha i ka noonoo, aka e hoolohe mai nae oe i ka'u moolelo, e hoakaka aku ana imua ou, a nau ia e ike nou iho, i ko'u kulana oiaio." "Ua pono kela, a e noho aku kaua maluna o na noho, oiai hoi ua pau ae la no ka kaua mau hana, e maikai ana kou kamailio ana mai ia'u me kou noho ilalo, mamua o ke ku ana iluna," me ka uwai ana mai o Abe i kekahi noho no Kaloke, a noho iho la no hoi oia, ma kekahi noho, e huli pono aku ana imua o ke kaikamahine opio. "Ua make ko'u makuakane, iloko o ko'u mau la opiopio loa," i hoomaka aku ai o Kaloke i ke kamailio ana i kona moolelo. "He eono wale no kaukani dala i waihoia iho na kuu makuahine, he mau dala inisua kela no ke ola o kuu, makuakane; a me kela mau kaukani dala, i kokua nui ia mai ai ke ola ana o ko'u makuahine ame a'u. "Na kekahi hoaloha maikai o kuu makuakane i hookomo i kela mau dala o na hana hoopukapuka, me ka loaa o na uku- | panee maikai loa, a ma ka hoolilo ana ma ke ano hoomakaulii, ua lawa loa ko maua noho ana me ko'u makuahine. Ma Kolorado kahi i ku ai o ko'u home, ua noho ko'u mau makua malaila, mamuli o ka ma'i o ko'u makuakane, o ia ka pilikia ma kona mau akemama. He mau keiki lehulehu no ka ko'u mau makua, owau no hoi ke keiki muli loa, a o ke keiki hookahi wale no e ola nei, ua pau aku ka nui i ka make, a no ka makee o kuu makuahine ia'u, ua hoouna oia ia'u maloko o na kula, e hoonaauaoia ai, no ka mea oia kekahi o na makuahine hilinai loa no ka hoonaauao ana i na keiki. "He haahaa no ko maua noho ana me ko'u makuahine, iloko no nae o ia haahaa, ua komo pu aku mamua iloko o na anaina a ka poe hanohano a waiwai, no ka mea ma Kolorado, aole he nanaia o ke kulana waiwai a hanohano o kekahi mea he like wale no na kanaka apau, pela iho la maua i huikau aku ai me ka poe kupono o kela wahi, o ke kumu nui no paha, aa nana mai ka nui o na kanaka i ko'u makuahine, ma ke ano oia kekahi o na wahine paa rula a ike i ka launa ana me na ano anaina apau. "Iloko o ka makahiki aku nei i hala, ua emi mai la ke kulana o ke ola kino o kuu makuahine, mai ka ikaika mai a i ka nawaliwali loa, a he eha mahina wale ae nei no i hala, ua kakau aku la oia he leka i kona kaikunane hoahanau. "O keia kanaka, he keiki makua ole oia, i hanaiia e kona makuakane, a ua pipilipaa no hoi ka manao o kuu makuahine no kela kanaka, me he kaikunane ponoi la nona, oiai nae he kaikunane hoahanau no kela; maloko o kana leka, e hoakaka aku ana kuu makuahine, no ka hookokoke ana mai o kona hopena, a oiai e koe hookahi iho ana kana kaikamahine, nolaila ua manao oia, e lawe aku ana kela kaikunane hanauna ona a malama ia'u, elike me ka malama ana a kona makuakane iaia, i kona wa makua ole. "He ekolu a eha paha pule o ke kakali ana o kuu makuahine aole he loaa iki ae o ka pane o kana leka, aka i ka eha o ka pule akahi no a loaa ae kana pane, e hoakaka ae ana oia i kuu makuahine, no kona hoea mai iloko o ka manawa kupono, o ke kumu wale no i hooka'uluaia ai kona hoea koke ae, no ka nui o kekahi mau hana i pau ole i ka hooponoponoia, aka nae iloko paha o na la elua ekolu, e pau ai kela mau hana. alaila holo ae oia no ka hui kino ana me kuu makuahine, a lohe i kona mau manao no ke ano o kana mau hana e lawelawe aku ai mahope nei. "He maikai maoli na manao i kakauia maloko o ka leka a Keoni Huba, ke kaikunane hoahanau o kuu makuahine, a ua hoomama loa ia ae kona noonoo no'u mamuli o kona hoomaopopo ana iho, aole au e lilo ana i kaikamahine kama ole, a e hookipaia aku ana hoi au ma kekahi home maikai a kupono, eia ka auanei, he okoa loa ka mea e hanaia mai ana no'u," alaila palulu okoa ae la o Kaloke i kona mau maka; no kona hoomanao ana mai, i ke ano o kona noho ana me kela makuakane hanauna, me kona noke pu ana iho no hoi i ka uwe, no ke aloha i kona makuahine. "Aole i ike kuu makuahine ia Keoni Huba, no ka mea he ekolu la mahope mai o ka loaa ana ae o kela leka, i make aku ai oia, a ma ke ahiahi o kekahi la mai, i hoea ae ai o Keoni Huba; a i hoike aku no au ia oe e Abe ea, i ko'u wa i ike ai i kela kanaka, ua komohia koke mai ka maka'u ame ka hopohopo iloko o'u no kela kanaka." "Auwe no ka hoi e! Heaha iho la ke kumu o kou maka'u ana iaia?" "O ka'u i upu aku ai, o ia no ko'u ike i kekahi kanaka keonimana, o ke kulana maikai a piha paa rula, no ka mea ma ka mama kamailio mai ia'u, oia kekahi o na kanaka maikai, ma kona manawa i ike hope ai iaia; aole nae ia o ke ano o kela kanaka, oia kekahi o na kanaka o ke kulana haahaa loa; he kino nui kona, ke ano o na kanaka inu nui i ka waiona, a he okalakala hoi kona mau ano mawaho ke nana aku. "Ua hoao oia e hoikeike mai imua o'u, me he mea la, ua komo pu mai oia me a'u iloko o ko'u mau kaumaha ame ka luuluu no kuu makuahine, eia nae ua hiki loa ia'u ke ike aku, ua kaokoa loa kona mau ano, mai na ano a kuu mama i kamailio mai ai nona; a o kana mau olelo ke kamailio mai, he mau olelo na ka poe ike ole i na rula maikai. "Aole he mea hou aku a'u e manao ai, e malu au malalo o kana malama ana, a oiai he kaikunane hoahanau kela no mama, hooholo iho la no au i ko'u manao, malia ua oi aku ka pono e hoi au e noho pu me ia, a ua mahalo aku no hoi au iaia, no kona holo kino ana ae i Kolorado. "Ua kaa ka hooponopono ana i ko mama mau pono apau malalo ona, me ka hoomamaia mai o ko'u noonoo, oiai ua kaa aku na hana apau iloko o kona lima. Ua hala no kekahi mau la o ko'u noho ana iho maloko o ko'u home, aka i ka wa i hooliloia, aku ai ua home nei o'u ma ke kuai, akahi no maua a haalele aku ia Kolorado a holo mai la no Nu Ioka." "Alaila aia anei ka malama ana o kau mau dala apau i kela kanaka?" i ninau mai ai o Abe, me kona ike ana iho i ke kulana pilikia maoli o ke kaikamahine opio. "Ae, ua kaa aku ka malama ana i ka'u inau aala apau malalo o ka malu o kela kanaka, no ka mea ua hana no o mama, i kekahi palapala e hoolilo ana iaia i kahu no'u mamuli o kona manaoio, he kanaka kupono kela; ina paha no kona ola ahiki i ka ike pono ana i ua kaikunane nei ona, aole ana oia e ae e kaa aku ka hoohana ana i kona mau waiwa malalo o kela kanaka, a oki loa aku hoi ka malama ana mai a kela kanaka i kana kaikamahine." "Ua pupuahulu loa kou makuahine ma ka hookohu ana i kela kanaka i kaliu malama waiwai nou!" i hoakaka mai ai o Abe i kona manao. "Pehea auanei e hiki ai ia mama ke alo ae, no ka maikai maoli no o kela leka a Keoni Huba i kakau ae ai, a pela o mama i manaoio loa ai he kanaka maikai kela, eia ka auanei, o ke diabolo kona hoa e kohu ai.' "Heaha kana mea i hana ai me kau mau dala, mahope mai nei o ko olua hoea ana mai no Nu Ioka. "Aole i maopopo ia'u kana mea i hana aku ai no kela mau dala, a ke mihi loa nei au no ko'u hilinai wale ana aku no iaia; pehea nae e hiki ai, i kau a mea o kona oluolu, ia maua o ka holo ana mai ma kela huakai no Nu Ioka, aole au i ike iki aku i kekahi wahi hoailona, o ka epa ame ke kolohe iloko ona. "Pehea nae ka nui o na manao hoowahawaha iloko o'u no kela kanaka mamua aku, ua hooi ia ae ia hoowahawaha ame ka weliweli, i ko maua manawa i hoea maoli mai ai maloko o Nu Ioka nei," alaila palulu hou ae la o Kaloke i kona mau maka, me ka hookahe hou ana aku i kona mau waimaka o ka ehaeha. "O ke ike aku nei au i ka nui maoli o kou ehaeha, no na mea au i hoomanawanui ai," i pane mai ai o Abe, me kona hamohamo okoa ana mai ma ka poohiwi o ka wahine opio. "Mai hoike hou mai oe i kou moolelo, ina e lilo ana ia i kumu hoehaeha i kou noonoo." (Aole i pau.) | |